ثواب ح 23 ماقبل الأخيرة 💜
.
.
خالد :نعرف مازن و نعرف مجاب زعمك من نخبر ( و حط يده على لحيته و قعد يفكر )
ثواب بصدمة : ككييف انت من وين تعرفهم ؟
خالد : هههه لازم نعرف نساباتي
ثواب : لوو تقعد آخر واحد في العالم مش حنفكر حتى التفكير فيك
خالد : لهدرجة ولد العم عامي عينك !!
ثواب : تي و الله نحس ان وراك انت و اختك ملعوب و انا حنكشفه و تبي تخبر خوتي تفضل خبرهم لأن كل شيء مسجل هنا ( و أشرتله على الفون ) ساد مرة درتها و خربتلي حياتي بسببك و توا مش مستعدة بعد ما صلحتها انت تجي تخربها ( و كرت رنا من يدها و ناضن و هو قعد مصدوم )
خالد : مستحيل تكون ثواب يلي يقولوا عليها طيبة !! .
رنا : صحة ليكك بنت الخالة قدعة و الله 👌
ثواب : اكتشفت مع الأسف مؤخرا ان هالشيء هو يلي ماشي توا عشان تفرض نفسك
رنا : بس كيف خطرت عليك و سجلتي ؟
ثواب : مسجلتش بس نخوف فيه 😂
رنا : اووو و الله في تطور كبير زيادة
ثواب : خططرهااا شن رأيك تروحي معاي اليوم بابا مش جايني عنده شغل و نبي نحكيلك على كارثة
رنا : معنى نبيش انشوف خوك محمد لكن يلا
ثواب : خطرها على محمد من يوم ما حكيتي معاه معش جاء جيهتي نهائي 😌
رنا : عشان تحمدي ربي على نعمة وجودي في حياتك 😌 ايه شن الكارثة ؟
ثواب : عمي يوسف
رنا : عمت عينه قولي دراه الكبد يوسف
ثواب : ياحمارة مش مهم لكن سمعتهم امس يحكوا انه طلق لطيفة و تجوز اختها الصيغرة يلي من بوها و باع كل شيء ليه في ليبيا و سافر هو و ياها
( رنا وقفت بصدمة )
رنا : تبصري ثواب !
ثواب : و الله العظيم ماهي بصارة
رنا : كيف ترضى هالمقززة تاخده و هو المقرف ياخد اخت مرته !
ثواب : الحمد الله يلي اطلقت قبل ما تصير هالقصة
رنا : ايه و الله افتكيتي منهم
( و قعدن يهدرزن لين وصلن قدام الورشة يلي يشتغل فيها مجاب لقتها مسكرة استغربت و كملن لين وصلت لحوشهم )
ثواب : مااامااا
رنا : شكله مفيش حد راه ( شوي و يطلع محمد من داره كان كيف نايض و ما انتبهش على رنا )
محمد : نقصي صوتك امك طالعة طلعها مجاب للمحلات بتشري صالون جديد
ثواب : من أول ماوعيت عالدنيا و نحن نفس الأثاث شن خطر توا ؟؟
محمد : تحقيق هو !! بنخش اندوش و وتيلي حاجة ناكلها ( و خش للحمام يكرم القارئ ، و ثواب اتشوف لرنا و رنا اتشوفلها )
رنا : هو متجاهلني و لا ميشوفش فيا ؟
ثواب : تي عيونه مغمضات مشافنيش حتى انا 😂
رنا : باهي خشي انتي بدلي و ضمي حوست الحوش تو انديرله سندوتش
ثواب غمزتلها : خاطبيله راه
رنا عزقت عليها المخدة : امشي مبررردك و حرام فيك حد يساعدك
ثواب : هههههه بصارة امشي وتي لخطيبك ما ياكل
رنا : ثواب و حق ربي كان ما تسكتي نكلم بابا و نروح
ثواب حطت يدها على فمها : سكتت ( و مشت لدارها رنا مشت للمطبخ )
رنا : زعمك شن يتسمسم هضا
محمد : نتسمسم في قهوة بعدها نص
رنا حطت يدها على قلبها : انت شن قصتك !! دير صوت الهم شي يوم بنموت مفجوعة منك
محمد : هههههه سلامتك
رنا شافتله بصدمة : عندك حرارة ؟
محمد : لا ليش !
رنا : ضحكة و كلمة ذوق في مرة ؟؟؟ بلكي تكون تودع ؟؟
محمد : عاد يافرحتك انتي يا تامي هههه
رنا كشخت عليه : هاك قهوتك ، بعدين انا الموت نتمناشي لحد ( و تلفتت للغاز يلي بتقلي عليه الدحية قبل ، بعدين تلفتتله ) بنديرلك جبنة لأنك الواضح بتطلع خير ماتلصق فيك ريحة الدحي
محمد شافلها : تمام ( ورد يشرب في قهوته بهدوء عكس الضجة يلي دايرها قلبه جوه ، رنا دارتله نصه و حطاته ليه قدامه و جاية بتطلع )
محمد : رنا ( ولأول مرة ينطق اسمها ) قعمزي نبي نحكي معاك
رنا ردت قعمزت : نعم !
محمد : احم
رنا : مقلتش غني انا تفضل احكي يلي عندك ولو بتهزب قول لأن و الله مش فارقة معاي راه !
محمد : نحبك
رنا :ههههههههههه على من تضحك انت ؟؟ انت حبيت تامي الكيوت الحبوبة مش رنا ام لسان طويل
محمد : تصدقي نفس يلي قلته انا لنفسي بس توا انا متأكد ان نحب رنا يلي لسانها طويل نحب رنا يلي دارت هضا كله و كسرت جبروتي يلي مقدرش حد يكسره نحب رنا يلي خلتني شهر و انا نعاود في حساباتي مع نفسي
رنا : و رنا متحبش محمد يلي كل ماتنطق اخته اسمه تنطقه بخوف منحبش محمد يلي دار علامة بالنار بكل قلب بارد في يد اخته مش حتنساها لين تموت منحبش محمد يلي عمره ما تفكر اخته حتى بكلمة طيبة منحبش محمد يلي حتى امه عمره ما طبس على رأسها ...نكمل ولا نزيد ؟؟؟
محمد : بس انا تغيرت
رنا : ساهل الكلام كلنا نتغيروا
محمد : باهي لو تأكدتي ان تغيرت و جيت خطبتك توافقي !!!
رنا : على حسب و الله
محمد : هههه نعرف البنت تتحشم لما يقولوها بيخطبوك مش على حسب
رنا : عادي انا غير عليهن نحبش التصنع
محمد : و هضا ععليش اخترتك ❤ ( ناض من على الكرسي ) نلتقي آنسة رنا
رنا : ان شاء الله ( و طلع محمد و خشت ثواب حضنت رنا و تبكي )
ثواب : شكرا شكرا شكراااا انك غيرتيه و الله مش عارفة حتى شن انقولك
رنا : باهي توا الدموع ليش ؟!
ثواب : دموع فرح و الله ،فرحانه انه تغير للأحسن
رنا : باهي انقولك شيء خليه بيناتنا !
ثواب : اه شنو ؟
رنا حطت يديها على عيونها : حتى انا نحبه
ثواب : هييييي لولولوي مش مصدقةةة
رنا : بس خليه يتأدب 😌
ثواب : ربي معاكك 💪
.
.
في حوش هل محمد ن :
محمد حط سوزان عند هله و طلع مع ابراهيم
.
سوزان : خيرات عميمة
نعيمة : اهلين
سوزان: وين منورة
نعيمة : في دارها تقرأ
سوزان : ناديها نبي انقوللكم خبر
نعيمة : طح سعدك انا مراء كبيرة تتأمر عليا
سوزان : آسفة عميمة بس عشان الدروج قالي حمادي تركبيهنش ، عشان انتي حتقعدي جدة ( الخبر جاء زي ماصة كهرباء على نعيمة عشان مخططة هي و بنتها انهن يطلقنها ) مفرحتيش !؟
نعيمة : م م مبروك
سوزان : بس ؟ مفيش زغروتة ولا حاجة ؟
نعيمة : عليش ؟
منار نزلت : شن في ؟
سوزان : خبريها يا عميمة
نعيمة بهزوة : حتقعدي عميمة يا منار
منار : شنوووو
سوزان : هههه عارفتك فرحانة
منار : ا ايي هه مبروك
.
.
عند محمد ن و ابراهيم :
ابراهيم : بس كيف جت هذي فهمني ؟!
محمد : كيف كيف جت قلتلك منذر طليق ثواب طلب يد اختي اليوم
ابراهيم : محمد هضا طليق ثواب راه ث و ا ب عارف انت شن صايرلك ؟
محمد : و من هي ثواب ! و كان طليقها بعدين هو الشهر كله قاعده في المستشفى و بعد ناض طلقها و لا هي تبيه و لا هو يبيها !
ابراهيم : باهي شن صار و شن قالك هو ؟!
محمد : قاعد في مكتبي يلي نادر مانقعد فيه شوية و خشلي :
منذر : السلام عليكم
محمد : و عليكم السلام اهلا
منذر : اهلين فيك ان شاء الله مش مشغول !
محمد : لا تفضل عادي
منذر : جايك في موضوع و ياريت تفهمني للآخر
محمد : شن هو ؟
منذر : انا لما تجوزت ثواب خديتها رغبة لطلب بوي و هي متبينيش
محمد : باهي !
منذر : ا ايه و انت واضح عليك راجل مشاء الله و تفاهمت موضوعي من الأول ، فلو مفيش مانع نبي إناسبكم
محمد شك : انت تبي اين وحدة
منذر " هييي شن بنقوله توا ؟": عادي اين وحدة المهم انا حكيتلك على ظروفي و انت احكي لهلك و لو الموضوع تمام حنجيب الوالدة ( محمد اطمن انه ميعرفش منار و مش مكلمها )
محمد : ان شاء الله خير
منذر : هي نستأذن توا و، رقمي معاك
محمد : اذنك معاك ، ايه ايه
( كمل محمد شغله و روح و كان يبي يحكي لسوزان بس قالتله ان بيقعد أب و هو من الفرحة نسى الموضوع )
.
ابراهيم : انت توا تروح تشاور هلك و بعدها ساهل
محمد طبس خدا مفاتيحه : و هضا يلي بيصير هي توصي على حاجة
ابراهيم : سلامتك
محمد : الله يسلمك ، سلم على الوالدة راك تنسى
ابراهيم : يوصل " و الله ماك صاحي يا صاحبي في وراك حاجة "
.
.
نردوا لحوش هل محمد ن :
محمد : السلام عليكم
كلهم : و عليكم السلام
محمد : وين بوي ؟
منار : في الحديقة
محمد : امي تعالي نبيك
نعيمة : هي جيت ان شاء الله خير
سوزان " شن يبي فيهم هله !! ".
.
.
محمد : و هذي كل القصة
نعيمة : قصدك طليق ثواب !! و هو نفسه ولد عمها جاي يبي بنتي ؟!
بوه : تعالي من الجانب الايجابي انه دكتور اسنان و شاطر و عرف غلطته و زواجه كله غصب و ولدك حكالك كل شيء
نعيمة : منار مزالت صغيرة على الأقل خليها تتخرج بعدها ربي يجيب نصيبها
بوه : قوله بكرا يجيني و كان معجبنيش انقوله مفيش نصيب تمام !
نعيمة واثقة من اختيار راجلها : تمام
محمد : هي مالا نستأذنكم توا بنروح
نعيمة : خليك اميمتك استاحشاتك
محمد : مرة ثانية تو انجي ( خش كلم سوزان و روحوا ، و اتصل بمنذر و قاله يجي بكرة لبوه يبيه )
سوزان : حمادي
محمد : نعم
سوزان : شن تبي في بوك و امك امبكري ؟
محمد : ... ( و حكالها )
سوزان : هيي قصدك ثواب اطلقت ؟
محمد : ايه
سوزان : يا حراام
محمد : نصيب ، ديريلي حاجة ناكلها
سوزان : اطلع جيب من برا منبيش انطيب
محمد : حاضر ( و فعلا طلع سمع كلامها ومشى للمطعم بيجيب العشاء )
.
.
في حوش هل ثواب :
ثواب : باهي يلي روحتوا
امها : زحمة غريبة ووااك رأسي بيطربق
ثواب : حتى انا رأسي بيطربق من التفكير
امها : و الله امس بوك و محمد عطوني فلوس و قالولي اشري أثاث
ثواب : شنو !! بابا و ومحمد ؟
امها : مستغربة حتى انا ، و الله شكلها يابنتي الدنيا بدت تضحكلنا
ثواب : ان شاء الله متخربش فرحتنا زي كل مرة
امها : بنخش انبدل ديريلي قهوة
ثواب : تمام بس وين مجاب؟
امها : حطني و طلع
ثواب : اهااا
( مشت ثواب اطيب في القهوة لأمها و تفكر في موضوع محمد و كيف قدرت تغيره رنا )
امها : هييي دونك القهوة فاجت
ثواب : حي حي مفطنتلهاش
امها : وين ماشي عقلك ؟؟
ثواب : في قرايتي ( و صبت لأمها قهوة و قعدت تمسح في الغاز ) ، ااااااااه
امها جتها : كنننكك
ثواب : حديدة الغاز حرقتني
امها : بعقلك انتي ؟؟ ماهي عارفتيها حامية ليش تمسحي فيها توا !
ثواب : نسيت نسيت
بوها : السلام عليكم
ثواب ، امها : و عليكم السلام
بوها : كنها بنيتي شادة يدها ؟
ثواب : حرقتني حديدة الغاز
بوها : هي تو نكلم واحد من خوتك يجيبلك كريمة
ثواب : مفيش داعي
بوها : لالا شوفيها كيف حمراء
ثواب : تمام
( بوها كلم محمد و قاله )
محمد : تمام بس بنتأخر شوية اليوم راه شغلي واجد
بوها : تمام و رد بالك تخبر حد على يلي بينا
محمد : هههههه ياحاج تربايتك
بوها : خلاص هي راك تنسى الكريمة
محمد : و الله تو انجيبلها
( سكر من بوه و طلع من شغل يلي عنده جاب كريمة و رد للشغل يلي عن حتعرفوه الحلقة الجاية شن هو )
بوها : اهو كلمت خوك تو بيجيبلك
ثواب : تمام .
.
.
عند منذر و امه :
امه : بس ياولدي عارفني نقدرش نطلع توا
منذر : يييه نسيت بكل تو بكرا بوها لو وافق انقوله
امه : منذر انت تبيها ؟؟
منذر : تصدقي لو قلتلك اها من يوم يلي فتحتلي فيه الباب و انا مش ناسيها و في كل صلاة ندعي انها تكون من نصيبي
امه : ياااااارب اجعلها من نصيبك يااارب
منذر : ان شاء الله يا الغالية 🙌🙌( شوي و يرن فونه رقم دولي )
امه : من ؟؟
منذر : رقم دولي مش عارف
امه : فوته
منذر سكر على رقم : اهو سكرت ( و حط فونه على الطاولة ) بنوض اندوش و انجيك
امه : تمام على ما سخنتلك وكالك
منذر : تمام
.
.
الساعة 11 ليل عند ثواب :
قاعدة تنفخ في يدها و تقرأ : ياربي شنو هضا ثواب افهمي لازم تفهمي و تقعدي محامية شاطرة ( شوي و يطق الباب ) خشي ماما
محمد : نخش !!
ثواب وقفت : خ خ خش
محمد : متخافيش مش ضاربك قعمزي
(ثواب قعمزت بخوف ) وينها يدك المحروقة ؟
ثواب أشرتله عليها : ا اهيا ( محمد شاف جنبها حرقته امتاع الدخان )
محمد : قاعدة توجع فيك
ثواب : شوي ( طلع الكريمة و قعد يداويلها فيها بالشوية ، و ثواب منصدمة كمللها و قاللها )
محمد : .......
.
.
في آخر حلقات ثواب ماذا سيحدث من احداث بعد !
و هل سوزان قدرت تربط روحها بمحمد الى الأبد بفعل الحفيد القادم ؟
#يتبع في آخر حلقة من رواية ثواب
#رواية_ثواب
#rwayat_br0o
أنت تقرأ
ثواب 💜 ( روايات ليبية ) مكتملة
Misterio / Suspensoرواية ثواب ❤ المقدمة : اسم غريب و رواية اغرب تروي قصة فتاة تدعى ثواب عاشت الكثير في حياتها و عانت الكثير ،و لكن شقت حياتها تحت إسم{ القانون }، لمحبي انواع الآكشن و الألغاز أقدم لكم هذه الرواية ، و هي اول رواية لي بهذا الاسلوب الروائي اتمنى ان تنال...
