رواية ثواب ح 16
.
.
ثواب : هه شوف توا انت وين من فعايلك بسببك انت و بوك قعد قلبي اسووود منحسش اهاا ، شن يلي جبرك علي مدام تبي تهرب و تبي تحتضن الغيبوبة ليش تعذب فيا ( مسحت دمعتها ) لييش تحرم فيا حتى من الراحة في النوم قعدت انشوف فيك كابوس ، يقولوا المريض يسمعك حتى هو في الغيبوبة و انا نبيك تسمع هالكلمتين بذات ( و قربت يلا وذنه و قالت ) كرهتك و حيقعد هالكره ليوم ربي بس ينزعه .( وطلعت و حولت يلي كانت لابسته )
يوسف : شن يابنتي
ثواب : ع عمي بنزل بنشري اميه ( و نزلت للكافتيريا )
.
.
عند محمد ن :
منار : محمد ياهو
محمد : هااا
منار : يا مسبوه فونك
محمد رد : الو السلام عليكم .
الرقم : وعليكم السلام ، هضا رقم المحامي محمد ....
محمد : ايه تفضل !
الرقم : و الله شكروك ليا ناس واجد وقلت نستشيرك
محمد : تفضل نسمع فيك
الرقم : ولدي قبل يومين خش في سيارة واحد بالقوي لدرجة ان يلي ضربه حاليا في الغيبوبة و ولدي كدمات في رأسه و يده صارلها تشعرينة و حاليا نكلم فيك من المستشفى لان الدكاترة يبوا يفتحوا محضر في حالة الولد نبي نعرف ولدي شن حيصير فيه ؟!
محمد : اولا منقدرش نحكم ليش نشوف حالة ولدك و حالة الولد المضروب و الاصح مفروض المحضر مينفتحش الا بعد استيقاظ المريض ، لكن عطيني اسم المستشفى دقائق و نكون عندك
الرقم : بارك الله فيك ، في مستشفى ....
محمد : اووو يبي نص ساعة هي ( سكر و ناض بدل و انطلق )
.
.
ثواب مقعمزة في الكافتيريا و مش عارفة تفكر في شيء كأن دماغها موقف
محمد خش من يالا باب كافتيريا لمح ثواب
محمد " شكلها لعنة ثواب تبيش تفارقني حتى في المستشفيات ، اعوذ بالله من الشيطان الرجيم " ( طلع فونه و رن على الراجل ) الو انا بجنب الريسبشن تمام تمام شفتك .
صابر ( اب الولد ) : اهلين استاذ محمد
محمد : اهلين بيك
صابر : من وين حابب تبدأ
محمد : نمشوا لولدك بعدها أهل المريض الثاني
صابر : لو نبدوا بأهل المريض لان بيروحوا
محمد : تمام ( و ركبوا لعند العناية لقوا قدامها يوسف و لطفية و ثواب كيف قعمزت و لما شافت محمد جمدت في مكانها و عطت بالظهر )
ثواب " يااارب صبرك شن هاليوم و بعدين هو شن دخله بعمي ؟؟! " عمتي من هذوم يلي واقفين على عمي ؟
لطفية بعصبية : كان يهمك امشي اسأليهم
ثواب "ربي يشفي ناضن عليها جنونها هذ شن بيسكتها توا 😷"
لطفية : ناس معش تتحشم ، اه يا ربي شن دايرة عشان جيتيني انتي كنة
ثواب : راجعي حسابك مع ربي و استغفري لان مزاااال حسابكم " تقصد حتى منذر و يوسف "
لطفية : قصدك الكلام اهوا ليا !!! بجد امك معرفتش تربي
ثواب : لما تعرفي تربي انتي ولدك هضك الوقت تكلمي ( وناضت لانها حست انها حتنفجر رسمي و لطفية اتقول حد صب عليها امية متوقعتش ثواب بالجلاطة هذ )
.
.
عند الرجالة :
محمد و صابر : السلام عليكم
يوسف : و عليكم السلام
محمد : انا محامي محمد ...
يوسف : مرحبتين بيك
محمد : كيف حال المريض !؟
يوسف : مفيش اين تحسن 💔
محمد : كلمني هالراجل ... ( وحكاله ) تبوا تفتحوا محضر ولا لا انتم ؟
يوسف : منبيش اندير اين اجراء توا لين ينوض ولدي بالسلامة
الدكتور : السلام عليكم
كلهم : وعليكم السلام
الدكتور : كويس يلي لقيتكم مع بعضكم نبي انقوللكم شيء
هما : تفضل
( محمد مش معاهم يشوف للبنت يلي كانت نسخة ثواب و يفكر هل تكون هي ثواب و هضا راجلها !؟ لالا شن راجلها هي امس كانت في الكلية )
الدكتور : بالنسبة لمنذر خدينه منه عينة دم و طلع زي ما توقعنا طلع فيه نسبة من المسكرات و هضا دليل ان قبل الحادث مكانش في وعيه و الشيء يلي يخلي ولدك يا عمي صابر خارج التحقيق و انت عمي يوسف نبيك على جنب شوي
صابر : الحمد الله ياربي
محمد : انا لازم نروح حاليا بمأن كل شيء وضح و ان شاء الله لابأس على ولدك
صابر : وفيك بارك الله ياولدي و ان شاء الله ربي يعاونك 💜👐
.
.
يوسف : مستحيل ولدييي عمره ما حط هالسم في فمه هو دكتور
الدكتور : معروف هو الدكتور منذر و نفس الشيء كنت بنقولك عليه ان هو دكتور و مشهور كيف يدير هك؟؟؟ و ضرر ولد !!
يوسف تنهد : باهي مفيش تحسن في صحته ؟!
دكتور : حاليا لا انت روح تريح و لو في اي جديد حنتصلوا بيك
يوسف نزل رأسه بأسف : إن شاء الله بارك الله فيك ( و مشى وين ما امقعمزة لطفية و نادا على ثواب يلي كانت واقفة على روشن الممر )
يوسف : هيا بنروحوا
لطفية : من هذوما ؟!
يوسف فنص فيها : يسألوا بس
ثواب" و الله التفنيصة فيها أن " ( ورن فونها وكانت رنا )
رنا : هلو ثواب شنجك
ثواب : تمام قاعدة في المستشفى نروح و نكلمك تمام
رنا : تم هي
.
.
في حوش هل ثواب :
مجاب: عمي دارلها فون راه
محمد : كيف كيف؟؟
مراد : رسمي هبلت هذي ؟!!
بوهم : اسكتوااا خلاص كبدي زعمت منكم راه خلاص حرة هي وراجلها توا
مازن : تي أي راجل تحكي عليه ؟؟؟ اسبوعين مختفي و ليه يومين بس امداير حادث هذي وين جت ؟؟
محمد : في حاجة لكن خلي نراجوا لين ينوض بعدها ساهل ( و جاه مسج من تامي ' هي رنا ' و ناض ) بنوض انقيل
مجاب: وانا بنرد للورشة
( و كل واحد مشى لمكان و قعد الاب مقعمز قريب نص ساعة لين جت الأم قعمزت يالاه )
الام : شفت الحوش كيف قعد بلاها هي كانت محولة عليا الكساد 💔 بس انت و اولاد الله يسامحكم عزقتوها عزقة مش حتنساها ، مشفتهاش انت امس كيف تحكي و كأن موراهاش 5 رجالة سندها ، عشان هي بنت هك ظلمتها ولا البخل امتاعك خلاك ادير هك في بنتك ؟؟؟ راهي بنتك حمل الجبال يلي شايلته منكم و توا زدتها ولدك خوك يلي خلاها قصة يشربن عليها الصبايا في القهوة ( و هو ساكت لأن فعلا كلامها صح ، و هي ناضت عشان تقيل )
.
.
عند محمد ن :
خش محمد للحوش لقى بوه مقعمز :
محمد : السلام عليكم
بوه : و عليكم السلام ، قعمز نبيك شوي
محمد قعمز : ان شاء الله خير !
بوه : فيك حاجة ياولدي ؟؟! مضايقتك حاجة ؟!
محمد : الحمد الله مفياش شيء ، عليش تحكي هكي؟
بوه : شيء عادي لاحظت عليك الايام هذي الضيقة خانقتك يا ولدي بس
محمد : لالا اطمن مفياش شيء و الله( سلم على رأس بوه و جاي بينوض )
بوه : نبي انقولك راه حجزتلك انت و أمك للسعودية امشوا ديروا عمرة 💜💜
محمد بفرح : بجددد ؟!
بوه : اي ، انا بنقعد مع منار عشان امتحاناتها
محمد : امي تندري ؟!
بوه : ايه قاعدة توتي في دبشها
محمد : امتى الرحلة ؟!
بوه : بعد بكرا الليل لو سخر ربي
محمد : تمام ( وناض هو فرحان لان كان محتاج هالمشية فعلا )
.
.
بعد مرور شهر 🕥
محمد و امه مشوا عمرة و قريب يروحوا
منذر قاعد مناضش
ثواب ردت للكلية و حاليا امتحاناتها
.
.
ثواب : رنوش جاوبتي ؟!
رنا : امم
ثواب : مزاللنا مادة بس 💃
رنا : امم
ثواب : رنااااا وين عقلك انتي من امبكري اممم اممم زي البقرة
رنا : احم ثواب بنقولك حاجة
(ثواب عرفت في حاجة صايرة )
ثواب بخوف : شن في ؟!!
رنا : .....
#يتبع
#رواية_ثواب
#rwayat_br0o
أنت تقرأ
ثواب 💜 ( روايات ليبية ) مكتملة
Gizem / Gerilimرواية ثواب ❤ المقدمة : اسم غريب و رواية اغرب تروي قصة فتاة تدعى ثواب عاشت الكثير في حياتها و عانت الكثير ،و لكن شقت حياتها تحت إسم{ القانون }، لمحبي انواع الآكشن و الألغاز أقدم لكم هذه الرواية ، و هي اول رواية لي بهذا الاسلوب الروائي اتمنى ان تنال...
