رواية ثواب ح 20 💜
( خشت ثواب مع بوها و تنصدم من يلي دايره منذر )
ثواب "هيييي محمد شن يدير هنا ؟؟؟ "
بوها : ثواب ثواب
ثواب : ن ن نعم
بوها : وين رحتي هي خشي
ثواب : تمام خشيت ( خشت ثواب و هي تشوف لمنذر و محمد و مش فاهمة شيء و محمد بعد شافها عادي مكأنهاش ثواب نهائي كأنها وحدة عابر سبيل 💔 اطلقت ثواب و هي طالعة نادا عليها منذر )
منذر : ثواب ثواب
(بوها وقف قدام ثواب كحاجز بينها و بين منذر ثواب حست التغيير يلي في بوها فعلا )
بوها : خلاص ساد ما جاها منك شن مزال تبي
منذر : هههههه سبحان مغير الأحوال سبحانه يلي يغير و مايتغير باهي و الله شفناك حنيت عليها شن صاير في الدنيا
بوها : ربي يهدي من يشاء و بعدين مزال عندك عين حتى تقابلني ؟!!!
منذر : و الله هي كلمه و بنقولها ليها و منيش جارحها
( تلفت الاب لثواب بمعنى شن !! ثواب هزت رأسها بإيجاب )
بوها : ثواب انا في السيارة كملي و تعالي
ثواب : تمام
( طلع بوها و هي قعدت اتشوف لمنذر )
ثواب : احكي هيا معش عندي وقت انضيعه بسببكم
منذر : الله الله شن قصتكم انتِ و بوك ؟
ثواب زفرت بغضب : بتحكي و لا نتوكل
منذر : اوك يا طليقتي عارفك مستغربة من وجود محمد ، انا خليته شاد قضية طلاقنا عشان يعرف انك اطلقتي و يفتح موضوعك من جديد
.
.
فلاش باك 🎥
منذر اول ما طلع قعد يدور على محمد بإعتباره متذكر اسمه بعدين مشاله للحوش و رن الجرس فتحتله منار :
منار بصوت غجري تحسابه محمد لأن موعد مرواحته: باهي الهم و انت تحط يدك على الجرس معش تعرف تحل ( و فتحت الباب و تنصدم بمنذر يلي ميت ضحك و سكرت الباب في وجهه و قعدت تنذب وراء الباب )
منار "حي عليااا كان يخبر محمد وووه كان هضا جنازتي اليوم 😭😭"( وتسمع صوت سيارة محمد درست و تسكيرة الباب بالقوية )
منار "وووه يا مامي خلاص هذي نهايتي "(وركبت جري لدارها )
نعيمة : بسم الله كنك يا بنت من يجري وراك ؟
منار : محد محد فوني يرن. بس
نعيمة : عقل ان شاء الله
.
عند محمد و منذر ( محمد وصل لقى منذر مدرس استغرب وعلامة تعجب فوق رأسه )
محمد : تفضل !
منذر : اهلا استاذ محمد ...
محمد "حي حي كيف عرفني هضا ؟!" : ك ك كيف
منذر : سمعتك لما جيتني في المستشفى و حنحكيلك القصة كلها ( و حكاله نفس القصة يلي حكاها لبوها و خوتها محمد فرح بككل و حمد ربي ان عطاه فرصة )
منذر : ونبيك تكون محامي القضية تمام
محمد بفرحة : ت ت ت تمام
منذر : عطيني رقم فونك عشان نتواصل معاك
محمد : تمام سجل هي ....
منذر : تمام تسجل ،تحبك راه ( و مشى ركب لسيارته و توكل و هو نفس اليوم يلي كلم فيه سوزان 💔 ، خش للحوش فرحان و كان وقت ضحى معندهمش حد )
محمد : اهلا بالغالية
نعيمة : ان شاء الله دوم هالفرحة يلي في عيونك يا ولدي 💜💜💜
محمد رفع يديه : ان شاء الله ياااارب ، بنركب انبدل و جيعان راه
نعيمة : حاضر هي تو انديرلك نص تصبر بيه لعند يجي بوك نتغدوا مع بعضنا
محمد : تممم ( و ركب لدار منار و قعد يخبط على دارها زي المجنون )
منار "وووووه متتت اشهد ان لا اله الا الله و ان محمد رسول الله " ( محمد بعد مردتش يحسابها راقدة فاتها ، وبعد مشى الصوت منار فتحت الباب شوي و قعدت اتشوف لقاته ماشي )
منار : هيي شن قصته هضا !! .
.
.
نردوا للحاضر 🎥
منذر : و على فكرة عندك حماة هبلة ههههههه ( ومشى)
ثواب : ربي يشفي ان شاء الله ( و مشت لبوها و روحت و استقبلوها خوتها )
محمد : متريحة توا !! كلية و حرية تامة بحبحي
ثواب : ...
مجاب: ايه مدامة لفت على بوك بكلمتين و تغير توقع منها اي شيء
ثواب : ...
مراد : اييه بالله و فون آخر طراز شن مزال تبي
ثواب :...
مازن : ياخوفي بسس
ثواب : كملتوا يا خوتي ؟ خلاص كل حد طلع يلي في قلبه ؟؟ قلوبكم يلي الحجر ألين منها ( و مشت لدارها كلمت رنا و قالتلها ان اطلقت )
رنا : لولولولولولوي و اخيرا مبروك عليك الحرية
ثواب : هههههه الله يبارك فيك بس تعالي شوفي الكارثة
رنا : ثواب و بلا كوارث مستحيل ، احكي احكي
ثواب : محامي يلي شاد القضية محمد
رنا جت مقعمزة : محمد محمد يلي نعرفوه ؟؟
ثواب : اهااا بشحمه و لحمه
رنا : كيييف
ثواب : ياحنة هضا منذر ( و حكتلها )
رنا : هههههه و الله دار لقطة ولد عمك
ثواب : بس محمد ولا كأن يعرفني
رنا : اكيد متحشم من بوك بس متفكريش
ثواب : امم مرات هي وجك بنرقد
رنا : نومة اهل الكهف ان شاء الله 🌚 ( وسكرت )
.
عند محمد ن 💜:
منار : ماما
نعيمة : ها
منار : نحس في سوزان حتى بالكذب مش راكبة على محمد
نعيمة : و الله هو اختارها يتحمل نتيجة اختياراته
منار : هي نحس فيها زي المشعوذات الساحرات و مالا خالد خوها زي شرشبيل يلي يكره السنافر
نعيمة : ييي بالله قريب تتخرج و اتقولي سنافر ، نوضي ماما نوضي شوفي الغداء خوك و بوك على جية
منار تتكلم زي الخدم الأجانب : هادر ماما انا شوف وكال مال انت
نعيمة : ربي يشفيك يا بنيتي 🌚( ناضت منار للمطبخ و محمد خش ) ، اهلين اهلين بنور العين
محمد : اهلين
منار من المطبخ : هو نور العين و انا بنت البطة السودة اهااا !!
محمد بعصبية : اسسسسسكتي منبيش نسمع شيء رأسي بيطربق راه ( منار و امه انفجعن و هو ناض لداره و يفكر في الكوابيس يلي اتجيه من اسبوع )
.
.
في حوش يوسف :
يوسف : اهااا بنتجوز خلاص مليت منك و من وجك كرهتيني في حياتي انتي و ولدك
لطيفة : هضا جزائي يلي تحملتك و بعدين توا قعد ولدي انا بس ماهو حتى هو ولدك
يوسف : انااا معنديش اولاد فاااهمة ولا مش فاهمة و خلاص البنت كلمت بوووها و بيرد عليا
لطيفة تبكي : ان شاء الله ماتتريح حسبي الله و نعم الوكيل فيك ( وجت بتركب )
يوسف : متبيش تعرفي منو ضرتك ؟؟
لطيفة: ميهمنيش و منبيش بعدين تحلم نقعد على ذمتك
يوسف : متأكدة متبيش تعرفي
لطيفة : و من ان شاء الله !
يوسف : ......
لطيفة خبطت يدها على قلبها : م م م مستحييييل انت تكذب
.
تتوقعوا من يلي حيتجوزها يوسف ؟
ومنذر هل حتكون له قصة مع منار ؟
وسحر سوزان قديش حتكون كمية الأذى يلي حيسببها لمحمد و كيف حيساعد سوزان و هل حتنكشف ؟
كل هالأسئلة جوابها في الحلقات الجاية 💜
#يتبع
#رواية_ثواب
#rwayat_br0o
أنت تقرأ
ثواب 💜 ( روايات ليبية ) مكتملة
Misteri / Thrillerرواية ثواب ❤ المقدمة : اسم غريب و رواية اغرب تروي قصة فتاة تدعى ثواب عاشت الكثير في حياتها و عانت الكثير ،و لكن شقت حياتها تحت إسم{ القانون }، لمحبي انواع الآكشن و الألغاز أقدم لكم هذه الرواية ، و هي اول رواية لي بهذا الاسلوب الروائي اتمنى ان تنال...
