ثواب 💜 ( روايات ليبية ) مكتملة

الحلقة 21 💜

ثواب ح 21 💜
.
.
يوسف : أختك غالية
لطيفة خبطت يدها على قلبها : م م م مستحييييل انت تكذب ، ت ت توا قلت كلمت أب البنت
يوسف : كنت نبي انديرها مفاجأة هههههه بس تحمست و قتلك  ، و على فكرة أختك هي عرضت هالعرض و بصراحة هي صغيرة
فلاش باك 🎥
(تذكروا لما روح يوسف و تعارك مع لطيفة و خش رقد شوي لما ناض و جاي بيطلع نادت عليه غالية أخت لطيفة من الأب عمرها 32 سنة مش متجوزة عايشة مع أمها عزوز كبيرة و امها مجابتش غيرها )
غالية : يوسف يوسف
يوسف التفتلها : نعم
غالية : الحمد الله على سلامة ولدك
يوسف زفر : سلمك
غالية : ا ا مش عارفة كيف انقولك عادي لو كلمتك في الليل في موضوع نبي انقوله ليك
يوسف : تمام
.
في الليل رنت غالية : ايوا
يوسف : ايوا نسمع
غالية : لطيفة يالاك ؟
يوسف : لالا شن في ؟
غالية : امبكري بالصدفة سمعت الكلام يلي بينك انت و لطيفة و إنك معش تبي هالعيشة
يوسف : و الله اختك كل حالتها بكلام الناس تزيد
غالية : امم لو انقولك طلقها و انا نرضى بيك
يوسف قعمز : شن !!؟
غالية بدموع التماسيح : لطيفة عندها ولدها يقعد سندها اما انا معنديش حد حتى خوتي من بوي ميحبونيش 💔
يوسف سخفاته : تو نفكر و نرد عليك ( و سكر منها و قعد يفكر انه كلامها صح فقرر يطلق لطيفة و يتجوز غالية )
.
.
نردوا للحاضر 🎥
.
لطيفة : لا ل ل لا انت تكذب
يوسف : تمام متصدقيش لعند اتشوفي ورقتك ( و طلع و هي رنت على منذر طول )
منذر : ايوا
لطيفة ببكاء هستيري : ت تعااالى الحقنيييي
منذر : شنن فييي
لطيفة : تعااالى بوووك بيتزوج خالتككك تعالى
منذر بصدمة : جاي جاي
بعد 5 دقائق :
منذر : شن صار ؟؟
لطيفة : بوك لما طلعت من الغيبوبة ...( وحكتله لعند ماطلع بوه )
منذر : لالا مستحيل اكيد خرف !!!
لطيفة : و الله معد قاعدتله دقيقة باهي ، راجي هنا
منذر : تمام هي ( و قعمزت حط يديه على راسه حس انه عاجز يحل موضوع معقد زي أهوا ، شوي سمع صوت عجل الشناطي وقف مشى لأمه يجيب معاها حط الشناطي في السيارة و ركب )
لطيفة : شيلني ليها معش نقدر
منذر حس بنار أمه : تمام ( و مشى للحوش يلي فيه غالية و امها قعدت اطق لطفية بالقوة )

لطيفة : أفتتتحي أفتتتحي ( فتحتلها غالية و مكانتش تتوقع ان يوسف قاللها بالسرعة هذي  )
غالية : بسم الله فضحتي بينا بين الجيران
لطيفة : خليهم يسمعوا يلي داراته الأخت في أختها خليهم يسمعوا بالأخت يلي عرضت روحها على راجل أختها

غالية : راجلك يلي ميبيكش اذكري لو مش أنا وحدة ثانية و الأقربون أولى بالمعروف ( و سكرت في وجها الباب منذر جاء شد امه يلي منهارة من مرفقها و ركبها للسيارة و تحرك لعند وقف قدام عمارة )
منذر : انزلي هي
لطيفة : وين !
منذر : انا شريت شقه هنا ( نزلت لطيفة و هي تحس كأنها في حلم شن صار و شن قاعد يصير ركبها منذر و خششها لداره جابلها منوم عشان ترقد و رقدت )
منذر : و الله بتشوف يا يوسف ... و طلع فونه
ورن على بوه 5 مكالمة رد
يوسف : اكيد خبراتك امك
منذر : شيء أكيد بعد واحد زيك يحمل كل انواع القذارة هه آسفة استاذ يوسف مش متعود على ولدك المدلل هك يتكلم بس أفعالك هي يلي تتكلم توا
يوسف : اصلا معش تهموني لا انت و لا امك و ورقتها تو توصلها لحوش هلها
منذر : منبوكش توصلها غير عطينا موعد الجلسة ( و سكر عليه ) حرام كلمة أب فيك انت و خوك
.
.
ثاني يوم في العشية 🌞
عند ثواب 💜
كانت جايتها رنا
رنا : غريبة حوشكم مهفت
ثواب : بابا ماشي يعاين في ماما ضغطها راقي و الباقيين منتلفيين
رنا : اييه صار محمد يلي شاد القضية
ثواب : و الله زي ما انقولك بس طلع و لا كأن شافني مكأناش محمد يلي نعرفوه نهائي
رنا : اكيد يبي يدير روحه رزين و كذا قدام بوك 😂
ثواب : خاطب بنت عمه راه ، شن بيفسخ بسهولة تحسابي !!
رنا : مدخلناش نحن المهم يجي يخطبك درهتولي كبدي 🌚
ثواب : هههههه تحسابي امه بتقوله باهي ؟؟ و انتي عارفة تفكيير الليبيين ولدي وحيدي و هالوجيج
رنا : أسكتي ترا جبتيلي الكآبة بكلامك السلبي
ثواب : سكتت بنوض انديرلك قهوة تبي ؟
رنا : شربت قبل ما انجي مع خالتك
ثواب : ليا وين عليها
رنا : قبل بتجي معاي رنت عليها سعاد جارتنا قالتلها في عزاء مش عارفة من و الجارات بيمشن يعزن شوي قالت فرصة و معش نحصلها ، و بعدين انا بايتة تو بكرا اتجي مع بابا
ثواب : مرحبتين بيها ، اييه انديروا كاكاو باهي ؟
رنا : باهي نوضي هي
( ناضن للمطبخ يهدرزن و ادير في الكاكاو )
ثواب : معش كلمتي محمد
رنا : توتوتو في الحظر قاعد
ثواب : عندي احساس انه حيعرف
رنا : كيف ؟
ثواب : نندريش 💁
رنا : و طز مش هامني يعرف ولا لا
ثواب :الطريحة بتجي فيا مش فيك
محمد خش : كويس أنه عارفة هالشيء ( و جاء كرها من شعرها) تلعبن عليا امدايراتني مضحكةةة ماهو انتي تعودتي خلاص  ( جت رنا عضت محمد في يده يلي ماسك بيها شعر ثواب بالقوة لين طلقها )
رنا : ثواب امشي لدارك
ثواب : ا..( وقبل ماتكمل )
رنا : ثواب ( ثواب مشت لان عارفة رنا الوحيدة يلي قدرت تنزل جبروت محمد خوها )
محمد : تبيني انقولك تامي ولا رنا!!
رنا حطت عينها في عينه : يلي يعجبك
محمد : تعرفي إنك مش مت( وقبل لايكمل )
رنا بإنفعال : رد بالك اهااا انا متربية أحسن تربية بس لما انشوف بنت خالتي و اختي تتعذب من خوها يلي مفروض يكون ساندها في كل مرة اطيح فيها انشوف القهرة في عيونها لما تسمع البنات كيف يحكوا على خوتهن شن تبيني اندير ؟؟؟ نقعد ساكتة ؟؟؟ تعرف يلي حسيت بيه انت وقت درتلك حظر هي تحس فيه كل يوم ! انت جاتك خيبة امل من بنت متعرفهاش و مش شايفها هي جتها خيبة امل من خوتها من دمها و لحمها ، عاود حساباتك راه الدنيا حياة و موت ( و قبل ما تطلع من المطبخ لفت عليه وهو مصدوم من جرأتها و كلامها و كل حرف كيف متأكدة منه ) تمام يا ولد الخالة  ر ا ج ع ن ف س ك
محمد "لا مستحيل يلي سمعته توا مستحيل هذي نفسها تامي يلي عرفتها " ( خدا حاجاته و رد طلع من الحوش و هو في وذنه كلام رنا و قوتها )
رنا : خزي بكاية ، خلاص انحل الموضوع و تستور منك كيف قلتي حاسة انه بيعرف و عرف
ثواب من بين بكاها : هههههه عارفتك قدها
.
.
عند محمد ن 💜:
منار تلف تحفظ في امتحانها سمعت عيطت محمد في داره بحكم قريبه منها مشت تجري فتحت الباب لقاته عرق و وجهه احمر مشت تجري لأمها
منار : مااااما
نعيمة : هاها بالشوية
منار : محمد عيط عيطة قوية و لما شفته لقيته وجهه معرق و تحمر ( شهقت نعيمة و ركبت لدار محمد بخاته بميه لين ناض و هو عيونه مغبشات وقعدت تقرأ عليه في المعوذات و منار تبكي اول مرة اتشوف محمد ضعيف هك حتى لما يمرض كان يقاوم )
بعد ساعة و نص ( نعيمة و راجلها و منار مقعمزين لوطة )
محمد : السلام عليكم ( كلهم شافوله مكأناش هو نفسه يلي يعيط امبكري ) عليش هك اتشوفولي ؟!
بوه : شيء و عليكم السلام
محمد : بنطلع مع ابراهيم و قبل ما نطلع بنقوللكم حاجة
منار توشوش لأمها : نحس فيها كارثة مش حاجة
( نعيمة فنصت فيها )
محمد : .......( وطلع)
منار شافت لأمها بصدمة : قتلك ك ك كارثة
.
.
قصة يوسف و لطيفة حقيقية 💔 مع الأسف فحبيت ندرجها ضمن رواية ثواب
تتوقعوا شن تأثير كلام رنا على محمد و هل حيتغير زي بوه ؟
محمد شن الكارثة يلي قالها ؟!
#يتبع
#رواية_ثواب
#rwayat_br0o