(جاري التعديل)كذبتنا♡our lie

ريم تغادر

جهة ريم:
طلعت فوق و فتحت باب الاوضة و دخلت و رزعت الباب ورايا
و سندت بظهري علي باب
حاليا انا حاسة بإحباط و كآبة عمري ما حسيتهم في حياتي
عيني اتملت دموع و كانت هتنزل بس انا منعتها
انا مش ضعيفة خليكي قوية يا ريم ما تخليش ناس زي دول يخلوكي تعيطي انت اقوي من كده بكتير و اقوي منهم بكتير انت عمرك ما كنت ولا هتكون بنت ضعيفة اي حاجة تبكيها
ااااه انا حاليا حاسة اني هنفجر من كتر الغضب
لقيت نفسي بتوجه بدون تفكير لاوضة الملابس
و جبت شنطة سفر صغيرة بعجل و حطيت فيها كل عباياتي و طرحها و حبة هدوم تانية و اخدت عباية كانت مكوية و قلعت الجاكت و الطرحة و لبست العباية فوق البيجامة لان ديه كانت كده او كده عباية مقفولة و لبست طرحتها و اخدت الشنطة و جرجرتها ورايا علي السلم
اول ما نزلت لقيت ادم واقف قدام السلم و بيبصلي باستغراب ما اهتمتش لوجوده و كملت نزول السلم و عديت من جنبه

ادم: انت بتعملي ايه
ما ردتش عليه و كملت مشي ناحية الباب و عديته
فجأة جه و وقف قدامي برضه
ااااه شكله مش هيسبني في حالي

ادم:انت رايحة فين
ده علي اساس انه مهتم

ريم:هريحك
و كملت مشي و سيبته ورايا
و مرة واحدة لقيته مسكني من ايدي
التفت و بصتله بدهشة
مش فاهمة هو عمل كده ليه
و بصلي بغضب

ادم بعصبية: قولت انت رايحة فين؟!
شديت ايدي منه جامد
و بصتله ببرود

ريم: حاجة ما تخصكش
و فتحت الباب و خرجت

جهة ادم:
المجنونة ديه رايحة فين
كنت لسه خارج وراها
لما حاجة وقفتني
كانت يونا اللي جت و مسكت في ايدي

يونا: اتركها ترحل

الان لا شئ يقف بيننا(كوري)
بصيت ليها مش متأكد ان كلامها صح ولا لا
يونا اخدتني للصالة و قعدتني علي الكنبة
يا تري ريم راحت فين دلوقتي
هو فعلا ده اللي انا كنت عايزة؟!
افرض لو حصل لريم حاجة
هي ما تعرفش حاجة ولا حد هنا
ااااه هو انا ليه بفكر فيها كتير اوي كده؟!
اصلا مش مهم
هي اللي مشيت
انا ما قولتلهاش تمشي

جهة ريم :
فضلت جرة الشنطة ورايا و ماشية
و مرة واحدة جه نسيم هوا جميل اوي
وقفت و غمضت عيني و استمتعت بالجو
رغم ان احنا في الصيف الا ان الجو هنا جميل
بعض الناس ممكن تفتكر ان انا غريبة
يعني في الموقف اللي انا فيه ده المفروض حاجة زي ديه ما فكرش فيها من اصله
بس انا ماشية بمبدأ اني ما خليش المشاكل تضيع عليا الحاجات الجميلة حوليا و استمتع بيها علشان ما اندمش بعد كده
فتحت عيني براحة
لحد ما فتحتهم بالكمال
فضلت اتلفت حوليا باستغراب
بالمناسبة يعني هو انا فين بالظبط
كان في علي يميني زي حديقة كده
و كان في كرسي اقدر اشوفه من مكاني
و انا كنت علي الطرف التاني من الطريق
و قمت بمغامرة فظيعة و انجاز لا ينسي
و عديت الطريق لوحدي
و وصلت للرصيف التاني و وقفت اخد نفسي
ااااه ده فعلا كانت تجربة مرعبة و خطيرة
انا في العادة مش متعودة امشي غير في مدينتي
و بيقل فيها العربيات لكن بره المدينة بالعربية علي
طول
مشيت ناحية الكرسي و قعدت
اممم بالمناسبة يعني بالاضافة لاني مش عارفة انا فين بالظبط هو انا المفروض اروح فين دلوقتي
ولا هعمل ايه دلوقتي
انا كنت متعصبة جدا لدرجة اني ما فكرتش في اي حاجة و اخدت الشنطة و مشيت
حاليا انا مش خايفة لانا لسه الصبح
بس اكيد بليل مش هيبقي امن اني افضل في الشارع
المفروض الاقي مكان انام فيه و اهم من ده اجيب حاجة اكلها
كل التوتر ده جوعني
ااااه يا معدتي الكميلة
علي ذكر ده انا ما عييش اي فلوس
اااااه انا فعلا غبية ازاي امشي و ما اخدتش معايا غير شوية هدوم و ديه اخر حاجة انا محتجاها دلوقتي
نفسي لو مخي المتخلف ده زي ما بيشتغل كويس اوي في الدراسة يشتغل بس و لو بنص الجودة ديه في باقي الحاجات

جهة ادم :
طول الفترة اللي انا قعدتها بعد ما ريم مشيت و هي ما راحتش من بالي ثانية واحدة بس
فضل يجي في دماغي حاجات كتير ممكن تحصلها
و كل شوية يزداد فزعي اكتر
بحاول اوقف دماغي عن التفكير فيها
بس مش قادر
رغم ان احنا قضينا مع بعض فترة قصيرة جدا
الا ان ليا معاها ذكريات اكتر مما توقعت
عمالة تتعاد كل الذكريات ديه في دماغي
و ابتسامتها و اما كنا في الملاهي و ضحكتها
و فرحتها لما جبتلها ايس كريم
و وجودها جنبي طول الوقت لما كنت بحالة زي الزفت
و انها ما سبتنيش خالص
و بعد كده جه في دماغي تاني كل الحاجات اللي ممكن تحصلها اتفزعت جامد و اتنفضت من مكاني
و رحت بسرعة اخدت مفاتيح العربية و خرجت ناحية الباب
يونا خرجت ورايا

يونا: اين تذهب؟(كوري)

ادم: لابحث عن ريم (كوري)

يونا: لماذا؟! اتركها هي من رحلت بنفسها (كوري)
سبتها و فتحت الباب و خرجت و ركبت العربية
و مشيت علي طول علشان ادور علي ريم

يونا هي كمان ركبت عربيتها و مشيت ورا ادم

جهة ريم:
كنت قاعدة بستمتع بالهوا لان ما فيش حاجة في ايدي اعملها
و انا قاعدة في امان الله
لقيت شاب شكله واضح اوي انه من هنا من كوريا
جه عندي

الشاب الغريب: ماذا تفعلين بمفردك هنا؟! (كوري)
و انت مالك يا حشري انا حرة هو انا قاعدة في بيتك
اتجاهلته و و قفت و مسكت ايد الشنطة علشان امشي
اي نعم انا من اللي بيطبقوا مبدأ عدم التكلم مع الغرباء

الشاب الغريب: هاي !! اين انت ذاهبة؟ انا احدثك لا تتجاهليني (كوري)
كملت برضه تطنيشه و مشيت
و مرة واحدة لقيته مسك ايدي علشان يوقفني
ازاي يتجرأ يعمل كده
كويس ان انا كنت لابسة قفاذات
انا علي طول باخد احطياطي لاي موقف زي ده

لفيت بغضب و سحبت ايدي بقوة
و بأيدي التانية و طراااااخ علي وشه
اعترف ا القلم كان قوي زيادة عن اللزوم
بس هو كان يستهله
كان شكله متفاجأ جدا من ردة فعلي

الشاب الغريب بعصبية : هل انت مجنونة ؟! (كوري)

ريم: لا انت المجنون من سمح لك ان تمسك يدي و اظن انه كان واضح اني لا اريد التحدث اليك (كوري)
بعدت عنه شوية علشان اتفادي اي رد فعل
و لقيته هو بيقرب مني
شكل ان الموضوع ده هيكبر
بس انا جاهزة للمواجهة
* * * * * * * * * * * * * * * * * * * * * * * *
ملحوظة:
انا هكتب بعد كده الكلام اللي المفروض انه باللغة الكورية
هكتبه باللغة العربية الفصحي مش باللهجة المصرية