(جاري التعديل)كذبتنا♡our lie

الفصل 43

#ريم
انا مش فاهمة حاجة من اللي بيقوله! هو ايه اللي قاله ده بالظبط؟! طيب المفروض انا اصدق اللي قاله ده؟!هو فعلا اصلا يقصد كل كلمة قالها؟! ولا قال كده بس علشان الموقف اللي حصل؟ ! هو اصلا اللي سمعته ده حقيقة و ادم هو اللي قاله؟! فعلا ادم ماسك ايدي دلوقتي و قالي الكلام ده؟! لا ،لا، ده قال كده بس علشان كل اللي حصل ده فحس بالذنب ،حس ان ده حصل لانه ماكنش موجود علشان كده قال الكلام ده، اكيد بكرة هلاقيه نسي كل حاجة قالها،بس حاسة بصدق غريب في كلامه، مش عارفة اصدقه ولا لا، اصدق انه يعني اللي قاله فعلا ولا اصدق انه قاله بسبب اللي حصل؟! ااااااهههههه دوامة من الأسئلة لقيت نفسي وقعت فيها مرة واحدة، طيب احاول افتح عيني و اسأله كل اللي عايزاه و اخلص، لا! حاسة اني لو عملت كده هعقد الموضوع، لو كان عايزني اسمع ده كله كان قالهولي قبل ما اغمض عيني، ده غير انا تعبانة اوي و ما عنديش طاقة اني اتكلم ولا اسأل في اي حاجة و لا قادرة حتي افتح عيني، احسن حاجة اعملها هي اني انام و اكيد مع الوقت هيبان ان كلامه ده حقيقة ولا لا، لحد الوقت ده هفضل انا متعلقة بين الشئ اللي جوايا اللي عايزني اصدقه و مابين الخوف اللي بيقولي ماينفعش اعمل كده علشان ما اتصدمش زي ما حصل النهارده، حاولت اتخلص من الافكار و الاسئلة الكتيرة و احجزها في غرفة بعيدة في عقلي و اقفل عليها الباب، انا عارفة ان الباب ده مش قوي كفاية انه يحجزها و انها هترجع تاني تزيد حيرتي بس علي الاقل هيقوفها شوية لحد ما انام لاني بجد محتاجة اني ارتاااااح
************************************
صحيت من النوم بس مافتحتش عيني لسه، حاسة بإيد ماسكة ايدي، اكيد انا بيتهيألي! مستحيييل ادم يكون نام جنبي و هو ماسك ايدي! فتحت عيني ببطء و اول حاجة شفتها هي عيون ادم المغمضة، كان نايم و هو قاعد علي الارض و ساند راسه الكنبة جنبي و كان ماسك ايدي، رغم ان النومة دي مش مريحة ابدا لكنه كان باين انه نايم نوم عميييق، ابتسمت و فضلت بصاله، اول مرة افضل باصه لادم فترة كده و عن قرب، شكله مسالم اوي و هو نايم، زي الطفل الصغير، كرشت براحه علي مناخيره، كشر و حرك راسه، ضحكت ضحكة خفيفة، كرشت تاني فقعد يحرك ايده الحرة عند وشه علي اساس انه بيهش الدبانة اللي هي اصلا انا، ضحكت تاني، ماكنتش اعرف انه ممتع كده اني اغلس علي، المرة دي كرشت عند خده، قام برضه قعد يحرك ايده عند وشه، كرشت تاني، مرة واحدة و نزل بحتة قلم جامد علي خده! ماقدرتش امسك نفسي من الضحك و قعدت اضحك جامد، فتح عينه، فضل باصصلي شوية و اشك انه كان شايفني اصلا لان شكله كان لسه مافقش، بعد كده ابتسم
ادم: هو انت اللي كنت بتعملي كده؟!
ابتسمت و هزيت راسي
ادم: طيب ليه الغتاتة علي الصبح؟!
رغم انه بيقولي ان دي غتاتة بس برضه كان بيكلمني هو مبتسم، انا لو حد كان عمل فيا كده و انا نايمة كنت قمت بعفاريتي كلها عليه و خليت قبيلة العفاريت اللي بتتنطط قدامي الصبح لبسته كلها عفريت، عفريت
ريم: اصلك كنت مسالم اوي و انت نايم فغريزة الرخامة عندي خلتني اعمل كده
بصلي شوية باستغراب و بعد كده ابتسم و هز راسه يمين و شمال بعد كده فضل باصصلي و مبتسم
ريم: بس غريبة!
ادم: ايه هي؟!
ريم: ان انت ما اتعصبتش عليا!
ابتسامته وسعت اكتر و بص في عيني
ادم: لاني فرحان
ريم: ليه؟!
ادم: لاني صحيت علي احلي حاجة كان ممكن اصحي عليها النهاردة...ضحكتك
اول ما قال كده حسيت بنبضة جامدة اكن قلبي نط من مكانه، فضلت بصاله في ذهول و مش مصدقة ان اللي سمعته ده بجد، انا حاليا مش عارفة اقوله ايه ولا اتصرف ازاي اصلا، انا مش قادرة حتي اصدق اللي سمعته، حاسة ان ودني باظت و بقت تسمع حاجات غريبة من امبارح، المفروض اروح لدكتور يكشف عليها يشوف بتجيب الكلام دي منين ولا يشيلها و يجيبلي ودان جديدة، فضل باصصلي و حاطط عينيه في عيني و مبتسم، ابتسامته دي بتخليني اصدق ان اللي سمعته حقيقة ده غير نظرة عينيه المباشرة في عيني و ان وشوشنا قريبة من بعض بتخلي نبضاتي تتسارع اكتر، قمت قعدت بسرعة
ريم: امممم خلينا نقوم يلا نجهز علشان نروح الجامعة
وقفت و جيت امشي علشان اخرج من الصالة، قبل ما امشي ادم مسك ايدي مرة واحدة، لفيت لورا و بصيتله، ساب ايدي و قام وقف، قرب مني، بصيتله باستغراب و رجعت لورا شوية، قرب تاني فرجعت خطوتين كمان لورا، ادم ابتسم و ضحك ضحكة خفيفة
ادم: انت بتبعدي ليه؟!
بحق انا عمالة ابعد ليه؟!
ريم: ااااممممم ، ماعرفش! خلص قول عايز ايه؟!
ادم: اممم
بص لتحت بعد كده رفع راسه و بصلي و ابتسم
ادم: مابلاش نروح الجامعة النهاردة
بصيتله باستغراب، قرب مني براحة و وقف قدامي،وطي راسه لتحت و بص ناحية ايدي، مد ايديه براحة و مسك ايديا الاتنين بايديه، شبك صوابعه بصوابعي، هو ايه اللي حاصله النهاردة؟! شكله عايز يخلي قلبي يقف بالمواقف اللي بيعملها دي! رفع راسه و بص في عينيا و ابتسم
ادم: احنا من ساعة ما جينا و احنا مابنعملش حاجة غير اننا نروح الجامعة و بعد كده نرجع البيت و نتخانق كل شوية، بكرة اجازة فخلينا نغيب النهاردة و ناخد بكرة و النهاردة فرصة اننا نخرج فيهم و بالمرة افرجك علي كوريا
بغض النظر عن تفاجئي من اللي بيقوله و شكي ان ادم اصلا هو اللي بيتكلم، بس فرحت اوييييي بمجرد انه فكر في حاجة زي كده و طبعا مستحييييل ارفض ده، ابتسمت ابتسامة كبيرة و هزيت راسي بسرعة اني موافقة، ادم ضحك
ادم: شكل الموضوع عجبك
ريم: ايوة
ماقدرتش بصراحة اخفي فرحتي
ريم بحماسة: هنخرج امتي؟!
ادم ابتسم و ساب ايديا
ادم: دلوقتي يلا اطلعي اجهزي
ابتسامتي كبرت اكتر حاسة ان بؤي هيطلع برة وشي بعد شوية، طلعت اجري بسرعة علي فوق، دخلت الاوضة، لما وصلت كانت الطرحة مبهدلة خالص و شبه مفكوكة، فكيتها و لفيتها تاني اي كلام و دخلت اوضة اللبس، قعدت ادور في الهدوم، امممم البس ايييييههه؟!! طيب احنا هنروح فييين علشان علي اساس ده اشوف هلبس ايه؟! سمعت صوت في الاوضة، شكل ادم جه يشوف هيلبس ايه هو كمان، لفيت و بصيتله
ريم: احنا هنروح فين؟!
ادم: بتسألي ليه؟!
ريم: علشان هشوف هلبس ايه
ادم: هنروح اماكن كتير علشان كده البسي حاجة مريحة
ريم:-_- افادكم الله
اممممم المشكلة ان تقريبا كل لبسي مريح لاني مابحبش البس حاجة مابقاش مستريحة فيها يعني ما فادنيش في حاجة -_-، بعد حيرة طويلة قررت اخيرا هلبس ايه، لفيت ناحية ادم لقيته لسه ما قررش اللي هيلبسه، احسن علشان اخش استحمي الاول و مانتخانقش علي مين يخش الاول، اخدت هدومي كلها ماعدا الطرحة، طلعت من الاوضة و روحت للحمام، دخلت و اخدت دش بسرعة و اتوضيت بعد كده لبست هدومي و لبست الحجاب اللي كنت لابساه قبل كده،لفيته لفة اي كلام، خرجت من الحمام، ادم كان نايم علي السرير و جنبه هدومه وماسك موبايله بيلعب فيه
ريم: مالبستش ليه؟!
ادم: مستنيكي تخرجي علشان اخش اخد دش
مابصليش وفضل باصص في موبايله
ريم: مانزلتش تحت ليه؟!
ادم: بحب اخد دش هنا اكتر مزاج، اجدع!
ريم: طيب قوم يلا انا خرجت اهو
ادم: هممممم قاااييييم اهوووو
صليت الصبح وشكرت ربنا انه حفظني وحماني، كنت متضايقة لاني متعودة اصليه فجر بس بسبب كل اللي حصل كنت تعبانة اوي وماقدرتش اصحي للفجر، خلصت صلاة ولقيت ادم علي نفس الوضع اللي سبته عليه
ريم: ما دخلتش يعني؟!
ادم: هخش اهووو
اتمطع جامد وقام قعد علي السرير، شكله مرهق اوي و تعبان،امممم اكيد ما نامش امبارح كويس،اااااه انا غبية اوييييي طلعت اجري زي الهبلة وفرحانة ومافكرتش فيه هو! روحت لعند السرير وقعدت جنبه، لف وشه و بصلي مستني الحاجة اللي هقولها، بصيت لتحت لعند ايده ومسكتها بإيدايا الاتنين وقربتها مني، رفعت راسي وبصتله وابتسمت، كانت الدهشة مرسومة علي كل ملامح ادم
ريم : ادم انت قولت علي الخروجة علشان تصالحني و تنسيني اللي حصل امبارح كله سواء الصبح ولا بليل صح؟!
فضل باصصلي شوية باستغراب بعد كده حرك راسه بإنه موافق علي كلامي، وسعت ابتسامتي اكتر
ريم: بس انت تعبان من النومة اللي مش مريحة خااالص اللي نمتها امبارح واكيد هتمووووت و تنام
بص لبعيد أكنه مش عايزني اعرف ان كلامي فعلا صح
ريم: انا بالنسبة ليا كفاية اوي انك جيت و انقذتني في الوقت المناسب و استحملت انهياري كله امبارح و كنت موجود جنبي و طمنتني وحسستني اني بأمان و ان في حد بجد اقدر اعتمد عليه واعتبره حمايتي، ان انا اصحي الصبح الاقيك نايم جنبي وماسك ايدي ده لوحده مسح من ذاكرتي كل حاجة حصلت امبارح، مش محتاج تبذل اي جهد اضافي علشان تصالحني ممكن يكون كل اللي قولته ده انت شايفه بسيط بس صدقني بالنسبة ليا هو حاجة كبيرة اوي لاني حسيت فيه بصدق غريب علشان كده ما تحملش نفسك فوق طاقتها وريح النهاردة، في حاجات كتير ممتعة ممكن نعملها في البيت بس اول حاجة هنعملها هو انك تناااام
طول ما كنت بتكلم ادم كان باصصلي باستغراب ولما خلصت كلامي لقيت نظرة الاستغراب دي اختفت شوية بشوية واتبدلت بنظرة غريبة اوي، نظرة خلت قلبي ينبض مرة واحدة نبضة جامدة اوي، نظرة شايفة وراها حاجات كتير بس مش عارفة ايه هي، اول مرة اشوفه بيبصلي كده ومش فاهمة ايه الشعور الغريب اللي حسيته ده اول ماشوفتها، بصيت لبعيد وقمت من علي السرير بسرعة، وقفت جنب السرير ووطيت شوية، حطيت ايديا علي اكتاف ادم وبراحة رجعته لورا علشان انيمه علي السرير، وهو بس كان باصصلي بنفس النظرة وانا كنت بحاول اتجاهل ابصله، بعد ما خليته ينام جبت البطانية و غطيته، بصيتله و ابتسمت ومسحت بأيدي علي شعره اكنه طفل صغير
ريم: يلا نام زي الشطور
شيلت ايدي ولفيت علشان امشي،مرة واحدة مسك ايدي، لفيت راسي لورا وبصتله باستغراب
ادم: ينفع تقعدي معايا لحد ما انام بس علي الاقل؟!
لفيت بجسمي كله علشان لو فضلت لافة وشي بس كده رقبتي هتتلوح،رفعت ايديا لعند صدري وربعتهم، رفعت حاجبي اليمين لفوق
ريم : مش كفاية خليتك تنام علي سريري عايزني كمان اقعد انيمك؟!
بصلي البصة اللي بكرهها جدا لاني مابقدرش اقاومها >_< نظرة الكلب الحزين، اتنهدت
ريم:امري لله، خش لجوه شوية علشان اقعد
ابتسم ابتسامة عريضة زي ابتسامة الطفل لما تجيبله مصاصة، دخل لجوه بسرعة، قعدت جنبه وسندت ضهري علي راس السرير و فردت رجلي
ادم: غنيلي
ريم: لاحظ ان طلباتك كترت وبعدين انا مابعرفش اغني
ادم: انت صوتك حلو اوي في قرائة القرآن اكيد هيكون حلو في الغني
ريم: امممم خلاص هقرألك قرآن
بدأت اقرأ من سورة يوسف، ادم غمض عينه وابتسم وبان عليه انه مستمتع بسماع القرآن وده فرحني اوي، حطيت ايدي علي شعره وقعدت امسح عليه براحة وانا بقرأ ، فتح عينه وبصلي باستغراب وبعدين ابتسم وغمض عينه تاني، مرة واحدة لقيته قام وقرب مني وحط راسه علي رجلي ونام، وقفت قراءة وبصيتله باستغراب، نبضات قلبي اتسارعت بطريقة مش طبيعية
ادم: وقفتي ليه؟!
ريم: اممم ما..مافيش انت بس فاجئتني بالحركة دي
ادم: انا حسيت اني عايز انام ع رجلك فعملت كده وانا كده مرتاح اكتر
مسك ايدي وحطها علي شعره تاني
ادم: يلا كملي
ابتسمت وكملت قراءة وانا بمسح علي شعره، بعد فترة قصيرة لقيته نام، مسكت مخدة وحاولت اقوم بالراحة واحط راسه علي المخدة من غير ما يحس، شيلت راسه بالراحة بس هو بعد راسه عن ايدي ونام تاني علي رجلي، واضح ان مافيش فايدة وهو مصر ينام كده، فضلت قاعدة وباصة عليه وهو نايم، نفسي ادم يرجع تاني لربنا، عندي فضول فظيع اني اعرف ادم زمان كان عامل ازاي، بس انا شايفة النور اللي لسه في قلبه رغم كل المسافة الطويلة اللي هو مشيها بعيد عن ربنا لسه في خير في قلبه،لسه جواه حاجة عايزة ترجع، عيني بدأت تتقل شوية بشوية لحد ما نمت انا كمان
#ادم
صحيت وفتحت عيني براحة، كنت نايم علي رجل ريم رفعت راسي لفوق لقيتها ساندة علي راس السرير ونايمة علي نفس القاعدة اللي كانت عليها قبل ما انام، قومت من علي رجلها وقعدت، بصيتلها وابتسمت، نزلتها براحة علشان تنام عدل علي السرير بدل ماهي نايمة وهي قاعدة كده وغطيتها، نمت جنبها وسندت راسي علي ايدي وفضلت ابصلها، ايه اللي فيها مميز للدرجة دي؟! فيها حاجة غريبة اوي بتخليني اتصرف تصرفات انا نفسي مش فاهمها! زي انا مش فاهم انا ليه مسكت ايديها وماكنتش عايزها تمشي! لما قالتلي اني اريح والكلام اللي قالتهولي كله كنت مستغرب ومتفاجئ في البداية، ان رغم كل شيء هي بتفكر فيا بس بعد كده كل ده راح وماكنش في غير اني حاسس بالجمال، حسيت انها انسانة جميلة اوي، مش اقصد الشكل بس القلب، قلبها جميل اوي، فجأة افتكرت لما ريم قالتلي" الحب هو انك تحب الشخص لشخصيته، تحب ابتسامته مش علشان هو شكله حلو فلما بيبتسم بيبقي حلو برضه، لا المفروض تحبها لانها بتعكس طيبة قلبه، في ناس كتير شكلهم مش حلو اوي يعني بس ابتسامتهم جميلة جدا،لان قلبهم حلو وابيض ،قلبهم نقي ونضيف لان الحب بيكون مابين القلوب مش العيون" اول ما شوفت ريم كنت شايفها عادية مش بالجمال اللي هو بس دلوقتي كل ما ابصلها الاقي جمالها بيزداد، بقت اشوفها اجمل بكتير من بنات كتير شوفتهم تنطبق عليهم كل معايير الجمال واول ما يخشوا اي مكان بيخطفوا كل الانظار، ريم مابتخطفش الانظار بجمالها بس اكيد بتخطف القلوب بجمال قلبها، لما قامت علشان تمشي حسيت بشعور غريب، حسيت بالخوف! خوفت من انها تمشي وتسيبني، خوفت من اني لما اصحي مش هلاقيها، مش هشوف ابتسامتها تاني، مش عارف ليه حسيت كده! انا خايف اوي! بصيت لايد ريم ومسكتها جامد بعدين بصيت لريم تاني، خايف اوي من اليوم اللي مش هقدر امسك ايدك تاني بعده، اليوم الي طرقنا هتودع بعضها وتفترق، مش عايزه يجي، بس اللي مخوفني اكتر اني متأكد ان اليوم ده هيجي، مش فاهم انا خايف ليه! ايه سبب الشعور ده؟! مش فاهم مشاعري ولا فاهم خوفي ده سببه ايه! مسكت موبايلي،ببص لقيت في 10 مكالمات من يوناااا!!!! قمت من علي السرير بسرعة وخرجت من الاوضة، ونزلت علي السلم، اتصلت بيونا بسرعة، اففففف تلقيها دلوقتي شايطة وعلي آخرها، ملحقش يرن رنتين ولقيتها ردت
يونا بأعلي صوت: اااااااادم اييين انت؟!!! هل تعلم كم مررررة حااووولت الاتصال بك؟!!*k
ايه السؤال ده ؟! -_- طبعا عارف ما انا شوفتهم اول مافتحت الموبايل!
ادم: امممم انا..انا حقا اسف لقد كنت نائم*k
يونا : نائم! الآن فهمت! يبدو انك قضيت سهرة طويلة مع زوجتك العزيزة لهذا لم تستطيعا الاستيقاظ للجامعة*k
جيت اكحلها عميتها !
ادم: اممم لا لا لقد كنت نائم لاني مريض ولم استطع حتي النهوض من مكاني*k
يونا بعصبية: وبالطبع زوجتك الحبيبة جلست معك لترعاك*k
نعم! هو ده كل اللي هاممها ؟! مش مهم عندها اني بقولها اني تعبان؟! ماقلقتش عليا خالص ولا مهتمة حتي تعرف مالي!
ادم بعصبية: انا مريض ولم استطع ان اذهب الي الجامعة فكيف ستذهب ريم وهي لا تعلم اي شئ هنا؟! يونا! انا حقا متعب جدا ولا استطيع التحدث لنأجل هذا لوقت اخر الي اللقاء*k
خلصت المكالمة ودخلت الصالة ، حدفت الموبايل علي الكنبة بعصبية انا عارف اني كدبت ومش تعبان بس كونها انها ماهتمتش اصلا بحالتي ازاي ولا تعرف انا عامل ايه دلوقتي بجد معصبني ! فجأة افتكرت اليوم اللي اتأخرت فيه علي ريم وازاي كانت قلقانة وخايفة عليا، ماسألتنيش عن اي حاجة كانت بس عايزة تطمن اني بخير، والنهاردة رغم انها كانت متحمسة للخروجة بس فضلت راحتي! ايه ده؟! ايه الغباء اللي انا بعمله ده؟! ايه اللي خلاني اقارن بين يونا وريم؟! لا لا ماينفعش اقارن بينهم، يونا حاجة وريم حاجة ماينفعش اقارن اي حد بيونا، اه بيحصل بينا مشاكل بس برضه انا بحبها اكتر من اي حد تاني ،حركت راسي يمين وشمال علشان اطرد الافكار دي منها،فتحت التلفزيون و قعدت علي الكنبة اللي قصاده
ريم: جيت انيمك نمت انا كمان
اتفزعت ولفيت راسي بسرعة وبصيت ناحية باب الصالة كانت ريم واقفة عنده
ادم: فزعتيني !
جت وقعدت علي كنبة تانية
ريم: معلش، اععععععع انا جعااااااااانة
ادم: قومي طيب اعملي اكل
ريم: تري اني مش الطباخة اللي شغالة عندك ده غير انا مكسلة اعمل حاجة
مرة واحدة اتقلبت علي جنبها ونامت علي الكنبة
ريم: احسن حل اني انام وابقي اكل بكرة
ادم: -_- يخربيت الكسل!
سكت شوية وبصيتلها
ادم: قومي يلا اطلعي البسي هناكل بره
ريم: لا مكسلة
اتنهدت وقومت وقفت
ادم: ماسبتليش حل تاني
روحت لعندها وشيلتها مرة واحدة علي ايديا الاتنين