لواء الشيطان

البارت السادس

(مستر جورج والعصابة )
في فيلا فخمة في مجمع راقي وقفت عربيتا في حتة مناسبة ونزلت بي اناقة ودخلت من الباب، ماشة بي اسلوب كلو دلع خلت العيون الحاضرة كلها تعاين لي  البت السمحة الدخلت دي، كان في حفلة من النوع المشبوه شراب ومخدرات وبنات وجو كده مالطيف، كانت لابسه فستان محزق راسم جسما المغري مع كعب عالي ومسرحة الشعر كيف تقولو مشهورة من مشاهير التلفزيونات  وجادعة ليها طرحة في كتفها مامعروف  دورها شنو في الموضوع، وقفت تتلفت وعيونا بتفتش عن شخص معين لحد ماسمعت صوت جاي من وراها بقول: لولاااااا لقد حضرتي ياجميلتي
اتلفتت وبإبتسامة قابلت زولا المنشود: جورجي، مامعقول ماالبي دعوتك الكريمة
كان راجل خمسيني، ابيض لونو لدرجة الحمار، قصير وسمين واصلع مع بعض الشعر الابيض البسيط فوق لي اضانو، عندو لحية رمادية وشنب رمادي كثيف.
مستر جورج: تفضلي من هنا لنشرب شيئاً سوياً
إلهام: مااتخيلتك بتشرب بي النهار كمان
مستر جورج: انها مشروبات خفيفة لاتخافي انها تلطف الجو فقط
إلهام : متين بتتعلم سوداني بدل كلام الكتب ده
جورج ختا يدو في خصرها وساقا معاهو وقال: اطمع ان تعلميني أنتي كيف اتحدث مثلك
إلهام ضحكت ضحكة مجلجلة وهي ماشة جمبو بي طريقة مغرية..
قعدها وجاب ليها مشروب متلج وقعدو يتكلمو
مستر جورج: أصدقائي سعداء ب الشحنة ويتطلعون للتعاون معكي مرة اخرى
إلهام : في الخدمة ياجورجي طالما بدفعو كويس لأنو شغلنا ده ماساهل محتاج كمية صرف عشان نأمن نفسنا
مستر جورج: لاتقلقي من هذه الناحية سوف تجدين مايرضيكي، اخبريني الآن هل علم ظافر بما حدث بيننا؟ لا اريد ان يشعر اننا نقصيه
إلهام : ظافر سيبو لي ماتختو في بالك، وبعدين ماعرف بي اي حاجة لحد الآن نايم في العسل وعندنا اليومين ديل مشروع وجوه جديده لي مجموعتنا مشغول فيهو
مستر جورج: ظافر شاب مندفع وطموح ولا يوجد له مثيل
إلهام : لكن متهور وكان افضل انو يبعد في الصفقة دي خصوصاً انو مشغل واحد غبي ومجنون ممكن يفشل شغلنا بي طبعو الشرس
مستر جورج: لا أريد ان اخسر ظافر لولا فكوني حذرة فيما تفعلين
إلهام : قلتا ليك اطمن
مستر جورج غمز ليها وابتسم بخباثة وقال : لولا هل ستشرفيني وتقبلي بعإطائي بعض الدروس اللغوية الخاصة؟ تعرفين اني متشوق لهذا ياحبي
وبقى يعاين ليها من فوق لي تحت ويتفحص فيها برغبة واضحة
إلهام : مستر، انت عارف وقلتا ليك قبل كده انا مابخلط الشغل بي المتعة فاهمني؟ ده مبدأ عندي، سوري يابيبي مابنفع
مستر جورج: ماذا لو كتبت لك شيك حالاً بعشرة ملايين جنيه؟ لا ترفضي أنا اعرف انك تحبين المال و أنا لدي المال وانتي لديك مااحب ان اجربه أنا اتشوق لك كثيراً
إلهام ابتسمت بسعادة : لو ماغلاوتك عندي كبيرة ماكنت برضى والله وحااعتبرو شغل عشان خاطرك بس يابيبي
مستر جورج بلهفة: هيا الى فوق ياجميلتي هيا إلى النعيم
إلهام : لااااا وين؟ الشيك اول ياقلبي بعدين نطلع اي مكان تحبو سلم واستلم
مستر جورج :  إتفقنا إذا حبي سوف اكتب لك الشيك حالاً
                            *****************
في مكتب ظافر كان قاعد مع حامد بتكلمو
ظافر: هااا كل شي تم زي مافهمتك؟
حامد: بي الحرف
ظافر: والتنفيذ؟
حامد: مستني الاوكي من زولي
ظافر: اتحرك طوالي من دربك ده وخليك قريب، وماعايز غلطة وإلا بشيلك ليها براك وتروح في شربه موية
حامد: تربيتك ياريس ماحتلقى إلا البسرك
ظافر: إلهام ضروري تلبس في حيطة تكسر راسا عشان تلجأ لي وبكده بقدر امسكها من رقبتا والوي يدها
حامد: وبخصوص عمر ولدا ؟
ظافر: اول ماتبلغني بي المراد بمشي اجيبو
حامد: الشيطان حاياخد منك دروس
ظافر: عشان تعرف انا بعمل شنو في البتحداني، يلا قوم ماتضيع الوقت في الكلام الفارغ
حامد: فريرة يامعلم
حامد قام وطلع وظافر قام طلع شقتو فوق بسرعة..
فتح الباب وقفلو بي رجلو بي استعجال وبقى ينادي بعصبية: زهرة، زهرة انتي يازفتة
زهرة جاتو من جوة مبتسمه بتقول: نعم حبيبي
ظافر: مش كنتي راجعة عند اهلك؟ ليه جيتي المفروض اتخرجتي وماحاترجعي الا لي برنامج الخدمة الوطنية
زهرة: اهلي عايزين يعرسو لي ود عمي ولو رجعتا حا القاهم ركبو الصيوان واحتمال عقدو عديل فقررتا ماارجع تاني هناك لي الأبد، مابقدر افارقك حبيبي، انا هربتا منهم ومستحيل ارجع
ظافر بغضب : غبية، جايه ترمي بلاك علي واهلك يجو بي وراك يعملو لي غلبة انا في غنى عنها؟ ليه ماطرتي في اي داهية تانية
زهرة بي رجاء: ظافر ماتطردني من بيتك ولو ماعايزني اعيش معاك شوف لي اي مكان اعيش فيهو قريب منك انا خدامتك لحد اخر عمري حبيبي علييييك الله ماتخليني علييك الله
ظافر: عارفة حجم الخطر الحاتعرضينا ليهو بغبائك ده؟
زهرة: مابسبب ليك قلق انا من يدك دي لي يدك دي بس خليني قريبة منك علييييك الله
ظافر: حسي انا مافاضي افكر  في مشاكلك، اترزعي هنا واياكي تفتحي الباب ده لي زول  او تطلعي لي مكان لحد ماارجع واشوف ليك داهية تتحرقي تقعدي فيهاسامعاني كويس؟
زهرة : حاضر حبيبي
ظافر : وماتقولي لي حبيبي وزفت دي تاني انا ماحبيبك واعرفي حدودك والزميها والا بكسر ليك راسك ده وارجعك لي اهلك مربوطة في شوال عشان تبقى ضبحتك ساهلة عليهم
زهرة بي كسرة نفس: حاضر أمرك
رجع طلع تاني وقفل الباب وراهو بي غضب وهي بقت تتنهد وقالت: مابعد خسرتا حياتي بسببك وسبب العواليق حامد و إلهام حااتنازل عنك بسهولة، مابعد إستحملتا الذلة والضرب والإهانة بخليك لي واحدة غيري، انت حقي براي وحبيبي ولو فكرتا تحب واحدة ولا تعرس ولا اي مصيبة زمان تبقى جنيت على بت الناس الحاتجيبا لأني بقتلا ليك ياظافر، بقتلا بأبشع صورة يتخيلا عقلك المريض، انا بحبك وضحيت بي اي شي  هربتا خليت اهلي عشانك عشان اكون معاك انت بس..
ابتسمت بي خبث ورجعت دخلت الاوضة جوة
                **********************************
عند مستر جورج و إلهام طبعاً دردقتو وقام طوالي كتب ليها الشيك وسلمو ليها، شالتو مبتسمة وقالت ليهو بي مشاغلة مستعد لي اول درس؟ حاأوريك عرض يستاهل ال10 مليون الدفعتها ياحبي
اتبسط جورج شديد ومسكا من يدها وقام معاها على الطابق الفوق في غفلة من الناس القاعدين اللي أساساً ماواعين لي شي في ظل حفلة المجون الدايرة في المكان...
دخلت إلهام حمام الغرفة وهي بتضحك على جورج القطعت نفسو وهدت حيلو ابو كرش الخواجي ده، اخدت ليها حمام وهي بتتلفت بإعجاب في شكل الحمام الملوكي وقالت في نفسها: مصيري أشتري فيلا زي دي وادلع نفسي وامحي سنين العذاب والحرمان وولدي يتربى تربيت عز..
طلعت بعد لبست روب الحمام المعلق في الباب ولفت شعرا ببشكير ومرقت تتمايل، لقت جورج راقد على ضهرو ومغطي نصو التحت بي غطا السرير ومبحلق في السقف، عاينت ليهو ضاحكة ومشت قعدت قدام المراية بتنشف في شعرا، مرت دقيقتين رجعت عاينت ليهو بي المراية لقتو في نفس الوضعية، نادتو بي لهجة مايعة : جورجي انت لسه مااخدت نفسك؟ اهههههههه، قوم اخد ليك حمام يفوقك ياحبي..
الراجل مابدرت منو اي حركة او إستجابة، إستغربت وقامت مشت عليهو وهي بتناديهو: جووورج، مستر! يارجل مالك مابترد علي قوم..
وصلت قريب منو واتمطت لقدام وعاينت ليهو في وشو لقت وشو احمر شديد وعيونو جاحظة ومبحلق للسقف بدون مايرمش
اتراجعت لي ورا وهي مخلوعة شديد ماعرفتو مالو، براحة رجعت لعند الكرسي العلقت فيهو هدوما وهي بترجف وتقول : وااااي ده مالو اتبكم كده الليلة وا سجمي مايكون مات ولا انجلط
بقت بتلبس بسرعة وعصبية، وهي بتلبس سمعت صوت جوطة واصوات عالية وصريخ، قالت برعب : ديل مالهم كمان ده شنو اليوم المنيل ده
فجأة الباب اتفتح بعنف من برا ودخلو رجال اربعة ودخل وراهم واحد إتكلم بصوت عالي: شرطة كلو يثبت في مكانو
صرخت إلهام بخوف وهو عاين بي اتجاها وقال: أنت امسك لي البت دي وانتو قومو الراجل ده سريع،يبدو جينا بعد خلص الفيلم لكن التتر شغال لسه
إلهام بقت تصرخ : فكني ماعملتا شي فكني واااي انتو منو انا ماعملتا شي فكوني
الاتنين العند جورج بصرخو عليهو: قوم يازول حرك، قوم تقوم قيامتك
واحد منهم اتلفت وقال: سعادتك الزول ده قاطع النفس وما بتحرك شكلو ميت
الضابط:  ميت؟
اتلفت لي إلهام وقال: وقعتك سودا يابت الكلب دعارة  واخرتا فيها موت عملتي في الراجل شنو انطقي، إنت وإنت جيبوها يلا، وإنت! وقف لي زول في الباب ده و مافي زول يدخل واستدعي شرطة الجنائية فوراً دي فيها موت، ده الظاهر الموضوع كبير
ساقو إلهام جروها جر وهي تصرخ وتولول وتحاول تخلص نفسها من قبضتهم، وقبضو كل القاعدين في الحفلة
                  **********************
ظافر قاعد في مكتبو وبدخن بعصبية لما تلفونو ضرب، شالو بلهفة لقاهو حامد رد ليهو بسرعة  وقال: هاااا سبع ولا ضبع
حامد: مبروك ياريس جورج قطع رحلة مستعجلة لجهنم و إلهام لبست في شرك عجيب، كل شي تم زي ماخطتا ليهو يابوس، الشرطة كبست عليهم ورفعو إلهام مع اللي اترفعو، حاتمشي ليها ياريس؟
ظافر: حامد انت غبي أصلاً ؟ ولا عايز تضايقني بي اسئلتك الغبية وخلاص؟ امشي ليها كيف قبال تستنجد بي ما أنا المفروض ماعارف شي لو مشيت معناها انا البلغتا فيها ياحمار وهي ماغبية حاتفقسا، فهمتا؟
حامد: فاتتني دي ياريس سامحني
ظافر : اقفل اقفل ويلا اخفي اي شي يوصل البوليس لينا نحن لا بنعرفو ولا هو قابلنا يوم مفهوم؟ سرب ناسك الساعدوك بسرعة واتصرف ماتسيب وراك دليل
حامد: أمرك يا ريس
ظافر: حاجة تانية الزفتة زهرة هربت من اهلا نهائي عايزك تدبر ليها مكان تولع فيهو اكيد أهلا حايجو يفتشو عنها ماعايز شي يربطا بينا، ناقصين كمان مشاكل نحن؟
حامد: ماتخليني ارسلا لي جورج تونسو ونرتاح من الهم
ظافر: تفتكر ده حل مناسب؟ واحدة هاربة من اهلها يفتشوها ويلقو جثتا والبوليس يبدا يفتش وسين وجيم وبلاوي ونحن في مرحلة خطيرة ومهمة محتاجيين هدوء
حامد: محلولة خلاص  ماتقلق بدبر ليها مكان..
قفل ظافر وقام على حيلو طلع من المكتب لكن في زباين جوهو عايزين يأجرو شقة رجعوهو تاني..
في قسم الشرطة إلهام قفلوها في الحراسة وبقت تبكي بكا شديد خصوصاً انو المكان كئيب وريحتو مقرفة والأشكال كيف كيف، بقت تلعن جورج والورطة الدخلا فيها دي معقول بعد كل سنين الحرص دي تمسكا شرطة الآداب؟ تبقى بعد عمرها ده كلو سوابق؟ رجعت تبكي بي حرقة شديدة، بعد كملو إجراءات دخولا سمحو ليها بي تلفون طوالي ضربت لي ظافر
إلهام :الووو ظافر
ظافر بصوت عادي : ايوة أهلا وسهلا
إلهام بقلق : ظافر أنا إلهام ماعرفتني؟
ظافر: إلهام؟ غيرتي رقمك ولا شنو ماعرفتك
إلهام بي صوت باكي : ظافر الحقني انا في ورطة ياظافر الحقني سريع
ظافر بصوت مخلوع وهو في الحقيقة البسمة حاتفرتق خشمو : مالك يا لولا في شنو عمر جاتو حاجة مالك؟
الهام من سمعت اسم عمر انفقعت بي البكا
ظافر : إلهااااام بطلي بكا في شنو وترتيني اتكلمي
إلهام باكية  : أنا... أنا في القسم ياظافر مقبوض علي
ظافر: شنوووو قسم؟ قسم كيف يعني في شنو انطقي عملتي شنو واوعي تكوني عملتي شي كبيير مابريحك
إلهام : تعال لي انت بس بحكي ليك وقبل اي شي عمر ولدي خليتو مع جيراني اغشاهو شوفو طولتا عليهو
ظافر بغضب: غبية، جدعتي ولدك ومشيتي وين؟ انتي حاتجلطيني يوم
إلهام مفزوعة: وقتي خلص تعال لي بسرعة
وصفت ليهو القسم وقفل منها وقام طلع طوالي، ضرب لي زهرة وقال ليها: بجي حامد بعد شوية تنزلي ليهو لما يرن ليك فاهمة وانتظري مني تعليمات
زهرة: حاضر
قفل في وشها وضرب لي حامد: اسمعني كويس إلهام اتصلت وكلمتني بي الحصل، انا ماشي اجيب ولدا وانت تركب تجي العمارة تحت وترن لي زهرة بتنزل ليك جيبا وتعال لي في بيت إلهام بسررررعة
حامد: فوراً يابوس
ظافر مشا ساق الولد الصغير الكان عمرو 10سنين من الجيران وانتظر لما حامد جاب زهرة وجوهو قام سلم الولد لي زهرة  وقال ليها: ده عمر ود إلهام اختي، حايقعد معاك في شقة حايوديكم ليها حامد حسي، ايااااك تطلعي منها ولا تفتحي الباب لي اي سبب من الأسباب وعينك على عمر مايغيب من عينك تهتمي بيهو كويس، حامد حايجيب ليكم كل البتحاتجو ليهو هناك، وما تتصلي بي نهائي وشريحتك دي اكسريها وحامد بجيب ليك رقم جديد بضرب ليك فيهو، كلامي ده مفهوم؟
زهرة: حاضر ياريس، بس وين إلهام حصل ليها شي؟
ظافر: مايخصك يلا امشي اركبي وركبي عمر جمبك مسافة اتكلم مع حامد
زهرة هزت راسا ومشت ساقت الولد من يدو وركبو عربية حامد
ظافر فهم حامد حايعمل شنو وسابو مشا ركب ودور بسرعة ماشي على إلهام...
دخل ظافر القسم بي كل ثقة وسأل عن إلهام وعرف سبب القبض اللي هو أساساً عارفو وطلب يشوفا لكن رفضو ليهو قالو ليهو ممنوع لأنو الموضوع فيهو شخص ميت وهي اتلقت معاهو في نفس المكان والموضوع بقى فيهو تحقيقات، طلع من عندهم ومشى وكل ليها محامي يتابع معاها عن الموضوع..
عدا يومين والشرطة حققت مع إلهام وضغطوها ضغط شديد، جاتا نفسيات عديل وماوقفت بكا، بعد داك إستلمت الشرطة تقرير مبدئي من الطبيب الشرعي انو سبب الوفاة ازمة قلبية حادة ورجحو انو بسبب الكحول والمخدرات وممارسة الرزيلة فحصل إجهاد رهيب للقلب وحايتحققو اكتر خلال التشريح، بكده خففو ضغط عن إلهام وسمحو ليها تلاقي ظافر أخيراً
ظافر قعد معاها ووشو في قمة الغضب وهي ماوقفت بكا واول كلام قالتو : عمر ولدي وين وعامل كيف؟ سأل مني؟
ظافر بغضب: آخر شي كنت اتوقعو منك انك تجازفي وتتورطي مع البوليس يا إلهام، انتي جنيتي؟ الوداك عند جورج شنو؟ حسي لو بحثو وراهو وكشفو بلاويهو البحلك منهم شنو؟ حاتبرري معرفتك بيهو كيف؟ كلمتك كم مرة تبعدي من درب الراجل ده كم؟
إلهام بي خوف : انا ماقتلتو صدقني ياظافر
ظافر : لكن مشيتي ومن وراي وعملتي معاهو علاقة جابت أجلو ولو نفدتي من موضوع موتو ماحتفلتي من انو قبضوك ناس الآداب في حالة تلبس، انتي مابتشبعي من الرمرمة؟ ياخ مالك انتي؟ دايرة راجل في حياتك عرسي، انستري مش تفضحيني بي البلد، عايزة تلفتي العيون علينا وتروحينا كلنا في حديد عشان تنبسطي؟
إلهام : عمر ولدي وينو
ظافر: عمر انا جبتو عندي ومن الليلة بقى مسؤوليتي انا وبس مابخلي عاهرة زيك تربيهو كفاية امك والعملتو فينا، ورثتي عنها البجاحة والعهر، انتي بالنسبة ليهو مسافرة بعيد من الليلة ماحاتشوفيهو تاني بي عينك فاهمة؟ انسيهو خالص
إلهام بقت تصرخ : ولدي ياظافر ده ولدي مابتشيلو مني ماتعمل فيني كده انا ماعندي غيرو
ظافر: ده اخر كلام عندي عمر مابتلمسيهو بي يدك تاني، ابقي فالحة واسمعي كلامي احتمال اخليك تشوفيهو ولو من بعيد بس، حسي خليك في قضيتك وبعد تخلصي بينا كلام
بكت إلهام وقالت ليهو: ليه ياظفر عايز تعذبني ده ولدي ولدييييي
ظافر : المفروض انو ده شغل، نحن بنشغل الناس موش نشتغل نحن بنفسنا، انا يوم شغلتك معاي ماقلت ليك اخدي راحتك ومارسي الدعارة على كيفك لازم تتعاقبي على غلطك يا إلهام لازم، وحسي تلزمي السكات اوعك تجيبي سيرة اللي بالي بالك، ولو سألوك عن مدى عرفتك بي جورج انتي عندك معاهو علاقة غير شريفة وبس فاهمة؟
عاين ليها عين سوداوية وأول مرة إلهام تخاف منو، حست لأول مرة قدر شنو ظافر شرير، حست انو القداما ده شيطان رجيم..
مرت الأيام وطلع تقرير الطب الشرعي انو الوفاة طبيعية فسقطو قضية القتل وحكمو ليها في قضية الزنا والكحول واتسجنت واتجلدت...
                                  **************************
في الايام ديك سهى ارتاحت من زن العصابة شوية ولقت نفسها بتعمق في صداقتا مع جوليا ودايما بتلاقو او مع بعض بي التلفون، هالة كانت عند اهلها في الاجازة..
كل يوم بتتأكد اكتر انو مابتقدر تضر جوليا وندمت على العملتو أول لما سمعت كلامهم وورتا ليهم..
جوليا حبت سهى ومعاها اتغير مزاجا وخلت الغضب الكتير والحزن على قعادا هنا بدون رضاها، هاشم كان مبسوط بي التقدم ده وكان بشجعا كتير انو تتواصل مع سهى ودايما بثني على البت وزوقا وادبا..
سهى كملت مزكراتا وغلفتا في ظرف بني كبير  وكل ماتطلع بتشيلها في شنطتا حرصاً عليها..
والفترة دي كانت الهدوء السبق العاصفة، لأنو بعد ظافر وحامد هدت الأوضاع عندهم واطمنو انو موت جورج العرضي إنطلت كذبتو على الشرطة وعلى إلهام رجعو لي مداومة نشاطهم من تاني.. في يوم هادي ورايق كانت سهى في غرفتا بتتجهز لي طلعة مع جوليا الطلبت منها ترافقا للسوق عشان عايزة تتسوق لأنها مسافرة اجازة قصيرة مع هاشم ورحمة، وهي بتلبس في هدوما تلفونا ضرب جرت عليهو فاكراها جوليا، ردت بي لهفة من غير ماتعاين للمتصل منو : الووووو
جاها صوت حامد من الطرف التاني بقول : سهويا..
سبب ليها صدمة قوية كأنها كانت نايمة وصحوها بي طريقة مفزعة
سهى بي توتر: ح حا حامد؟
حامد: مالك مستغربة ماتكوني فاكرانا نسيناك
سهى: في شنو عايز شنو
حامد: صدر الأمر... الليلة دي وبي اي طريقة تسلمينا جوليا مفهوم؟ بي اييييي طريقة لازم الليلة
سهى بي رعب: لكن كيف؟
حامد: اتصرفي او اتحملي النتيجة لو فشلتي
سهى اترعبت شديد وضعفت عزيمتا وقالت ليهو بي خوف: طيب
حامد: ايوة كده خليك فالحة ويلا نفذي
قفل منها وهي جدعت التلفون في السرير وبركت في الأرض بي إنهزام وبدت تبكي بصمت..
سهى قالت بي حزن: مافي مفر لازم اسمع كلامهم..
رجعت قامت من الأرض وشالت تلفونا ورسلت لي حامد [ نتلاقى في السوق بعد ساعة انا وجوليا ماشين نتسوق اتصرفو وسوقوها من هناك مابقدر اجيبا في الكوافير]......
يتبع........