لواء الشيطان

البارت الحادي عشر

(وداعاً ياصديقتي)
جوليا بعد رجعت لقت رحمة قاعدة مهمومة وحزينة وشكلها باكية كانت، مشت قعدت جمبها وقالت ليها بقلق : مالها  حبيبتي زعلانة منو زعلها
رحمة : مافي شي شوية تعب كده وبروح
جوليا: عليا انا برضو؟ بعرفك لما تكوني زعلانة مع واحد من اولادك، منو فيهم زعلك المرة ديييي؟
رحمة ماقدرت تستحمل ورجعت تبكي
جوليا وشها بقى حزيين وقالت ليها: وريني وانا باخد ليك حقك لكن ماتبكي مهما كان السبب
رحمة : هاشم ضرب لي ابوك حكى ليهو المشكلة الحصلت ليك وابوكي قال ليهو إنك ترجعي كندا طوالي في اقرب فرصة وتكملي اجازتك بعيد من المشاكل واحتمال يكنسل ليك القراية هنا وترجعي تقري هناك
جوليا اضايقت شديد ماعرفت ليه و المفروض تفرح انو حاترجع بس ماقدرت تفرح، مسكت نفسها وقالت ليها: ماتخافي انا ماراجعة هناك ابدا إلا اتخرج من جامعتي واطمني انا ماعندي اي مشاكل
رحمة: اجي يابتي كيفن عاد مش قالو في ناس عايزين يخطفوكي؟ كيفن نخاطر بيك
جوليا: ده كلام بتقال لكن مافيهو اي شي حقيقي انا منو البخطفني ده الا كان امو داعية عليهو وغضبانة منو
رحمة : ابوك مااتصل بيكي؟
جوليا: تلفوني خلصان شحن لسه مقفول
رحمة : حاتقنعيهو كيف لكن؟
جوليا : مابقنعو وانا الطيارة ماحا أركبها حتى لو قطع لي تزكرة  والطيارة جاتني جمب البيت، انا ماجبانة عشان اهرب وادي فرصة لي الاتهامات تحاوطني وتنتهي مني انا ماببعد عنك ماتخافي..
قعدت جوليا وواصلت الكلام البخدر على رحمة وشغلتا من التفكير رغم انها وصلت اقصى درجات التعاسة واتمنت تصرخ بأعلى صوت
هاشم جا راجع ودخل سلم عليهم ورحمة ابت ترد السلام وقامت خشت اوضتا
جوليا عاينت ليهو بي نظرات كلها لوم
هاشم:  كلمتك اكيد وعاملة زعلانة مني حسي
جوليا: بأي حق تتخطاني وتمشي تكلم بابا بي الحصل
هاشم : بحق اني مسؤول عنك وكان لازم ابوك ياخد خبر
جوليا : انت لييه معرض القصة؟ مافي شي بخليك تكلمو مافي سبب مقنع يخليك تتسرع وتعمل العملتو
هاشم : اي زول في مكاني بعمل كده، ابوك أمنا ليك أمانة كيف عايزاني اجازف بيك ياجوو مابقدر فهمتي؟
جوليا : انا مابسافر كندا ابدا ابدا ولا بنهي دراستي هنا بي البساطة دي، فجأة اجي وفجأة امشي؟ عايزين تجهجهو حياتي مالكم
هاشم بغيظ: عنييييدة، حياتك عايزين نحفظا مش نجهجها
جوليا: مااابرجع يعني مابرجع الا تربطني وترسلني في كرتونة
هاشم: انتي مش كنتي رافضة تقعدي هنا؟ الجد شنو يعني اهي فرصة وجاتك
جوليا : للدرجة دي انت مستغني مني؟ خفتا وسلمتا من أول إختبار؟ كنت اعتبرني بتك واتصرف على الأساس ده، حاول احميني انت بدل طوالي تمشي تبلغ بابا وتقول ليهو سوقو بتكم انا مامسؤول من الممكن يحصل ليها، طيب انا قعدتا عندكم ليه من البداية عشان اكل واشرب وانوم؟ ولا عشان الجأ ليكم اما يواجهني ظرف زي الأنا فيهو ده؟
هاشم جرحو كلاما وحس انو بتتهمو انو جبان ومابنفع يحميها
هاشم: حاتسافري لي اهلك وده كلام منتهي..
جوليا تاني ماناقشتو ولا طلعت من الأوضة نهائي ولا قالت كلمة ذيادة...
الصباح بدري طلعت قبال هم يصحو كانت الدنيا صبحت لكن الشمس مامرقت، اتمشت فترة طويلة لحد ما الشمس مرقت كبيرة ومسكت تلفونا واتصلت بي هالة، حست انها محتاجة تتكلم مع اي زول وهي مابتعرف غيرها
هالة: جوليا حبيبتي إزيك معليش ماسألت عليك بعد الكلام القالو راشد تاني
جوليا: هلول كيفك، انا بخير ماتقلقي، ماافي اخبار عن سهى؟
هالة: مافي شي جديد، انا مسافرة بعدين العصر، اهلي مصرين ارجع وانا ماجبتا معاي غيارات عذبتا سعاد في هدوما
جوليا: حاترجعي تاني؟
هالة : اذا ظهر اي خبر عن سهى بجي  وإلا تاني لما تفتح الجامعة للأسف
جوليا: بابا عرف بي الموضوع ومصر يرجعني كندا
هالة بحزن: جد؟
جوليا: بس انا مابسافر، ماقبل مانلقى سهى ونلقى المجرمين ديل
هالة: ياريت لو ماكنت بت كنت على راحتي وأهلي مابخافو علي عشان انا راجل، برضو ماكنت بسافر
جوليا : المرأة مستضعفة دايماً
هالة : بغشاك الاقيك قبال امشي
جوليا : اوكي بستناك......
               **********************
جوليا لمعت في راسها فكرة وقررت ماترجع البيت، اتصلت على رحمة عشان ماتقلق عليها واتحججت ليها بي مشوار ضروري.. وبقت تتجول من مكان لي مكان ومشت فطرت في مطعم بتاع فاست فوود وانتظرت لما بقت الساعة ١٢ الضهر ومشت ركبت مشت قسم الشرطة تسأل من راشد قالو ليها مامداوم الليلة واترجت العسكري يكتب ليها عنوان بيتو واترجتو كتيير كتير وعملت وش الاطفال البريء داك قام كتبو ليها شالتو وجري على الشارع ركبت تاني وفاتت لي العنوان المكتوب..
وقفت قدام باب بيتهم أخيراً ودقت الباب، بعد مسافة فتحت ليها الباب بت قريبة من سنها، جوليا ابتسمت ليها وقالت : السلام عليكم
البت: عليكم السلام اتفضلي
جوليا: لو سمحتي بسأل ده بيت الضابط راشد سيف الدين؟
البت : ايوة وصلتي
جوليا: هل هو موجود؟ عايزة اقابلو ضروري لو امكن
البت : تعالي خشي، اتفضلي موجود ايوة
دخلتا وقعدتا في الصالون وجرييي خشت كلمت راشد اخوها لقتو في اوضتهم هو رامي اخوهو
كانت اسمها مروة  اخت راشد الصغيرة
مروة بي ابتسامة ذات مغزي: رشووود
راشد : يانعم
مروة بنفس الابتسامة مع بعض نبرة السخرية المبطنة :في بت عسولة كدة زي العسل بي القشطة منتظراك في الصالون
راشد بي استغراب: قلتي بت؟ منو دي؟ قصدك حنان؟
مروة : حنان ميين يانور العيين لأ دي بت غريبة
راشد: غريبة ودخلتيها وكمان قعدتيها في الصالون؟
رامي: اسمها منو
مروة: ماسألتها
رامي : غبائك ده اصلو مابتبطليهو
راشد قام ولبس ليهو هدوم كويسة ومرق يشوف منو الجات عايزاهو  دي كمان
رامي : حلوة يابت يامروة؟
مروة: مستغربة راشد معقول بعرف ليهو بنات مزز كده؟ دي رهيييبة
رامي وقف وقال : لاااااا ده شمار حار تعالي نشوف الحاصل
راشد دخل الصالون وهم جرو سرعة وقفو يتسمعو بي ورا الباب النص مفتوح
راشد اتخلع جامد لما شافا وقال بي استغراب بي لهجتو المخيفة : إنتي؟ الجابك هنا شنو وعرفتي بيتنا كيف
جوليا بهدوء: عادي زي ماانت عرفتا بيتنا وجيتني تتزكر؟
اخوانو بي بره اتلفتو وعاينو لي بعض ومبرقين عيونهم
راشد: عايزة شنو لي جيتي
جوليا حاولت تغيظو : اشتقتا ليك اعمل شنو
في اللحظة دي ام ناس راشد جات داخلة من برة لقت اولادا الصغار واقفين برة الصالون نادت عليهم : يااولاد ده شنوو الموقفكم هنا شنو خليى يشوفكم راشد ولا ابوكم بقطعو رقبتكم
رامي بصوت واطي : تعالي تعالي اسمعي في شنو انتي كمان وشوفي ولدك الغالي عندو ضيفة مريبة
قربت مستغربة وسمعت صوت  راشد بتكلم.
راشد بي ضيق لكن بصوت واطي : جولياااا ماوقت هظار قولي في شنو
جوليا : انتو بتستقبلو ضيوفكم كده دايماً؟
راشد: جوليا اخلصي ماتجننيني
جوليا : راشد انا في ورطة وانت السبب فيها، بسبب انك غلطتا معاي
رامي ومروة والأم قربو يصرخو من الخلعة
راشد مخلوع: شنووو انتي مجنونة؟ عايزة تخربي سمعتي غلطتا معاك كيف يعني
جوليا : بابا عرف الموضوع ومصر يرجعني على كندا وانت السبب لازم انت تحل المشكلة دي
الأم اتصدمت ودفرت ليك الاولاد ودخلت ليهم في الصالون
راشد اتخلع من دخلتا كده وقال : أمي ؟ مالك في شنو
الأم : السمعتو ده شنو
راشد بي ضيق : سمعتي شنو
الأم بي خوف : انت صحي غلطتا مع البت دي؟
راشد استاء ومط شفايفو وقال: امي عليك الله إنتي مافاهمة شي ممكن ماتدخلي؟
الأم عاينت لي جوليا: يابتي الكلام ده حقيقي؟ وريني  غلط معاك؟ متين ووين
راشد : امييييي
جوليا: ايوة غلط معاي وسبب لي مشكلة مع أهلي
راشد رجع عاين ليها وقال بسرعة : انتي عايزة تشليني؟ انتي فاهمة اصلا بتقولي في شنو؟ عايزة تلبسيني مصيبة؟
جوليا : اعترف انك غلطان
راشد : اولا انتي فاهمة معنى جملة غلطا معاك شنو؟
جوليا : ماعندها معاني كتيرة أفتكر
راشد : لا يافالحة  معناها ما الفي راسك الفارغ ده
الأم بي غضب: فهموني في شنو بالضبط
راشد : دقيقة ياأمي عشان افهما هي في الأول الغبية دي
قرب من جوليا وقال ليها بي سخرية : غلطتا معاك دي معناها حصل بيناتنا علاقة حميمة غير شرعية فهمتي؟
جوليا وشها جاب الوان وعاينت ليهو بي دهشة واحراج وصرخت بي اعلى صوت: whaaaat، لأ طبعاً مستحييييل، اغلط ومعاك انت؟ ده المستحيل بي عينو
وعاينت لي امو وقالت : ده حتى مامن النوع البفضلو
راشد: ياااا سلام يعني لو كنت، كان عادي بي النسبة ليك؟
جوليا : إحترم نفسك انت فاكرني شنو
راشد إبتسم لي أمو قال : شفتي انها مسطحة وبتتكلم بلا عقل؟
ورجع لي جوليا وقال : كنتي قاصده انو انا غلطتا فيك مامعاك
جوليا :what ever المهم انك غلطتا وانتهى الموضوع ، تتصوري ياخالتي جا في بيتنا واتهمني قدام اهلي إني لي دخل في اختفاء سهى بس لأني صحبتا وجاب لي الشرطة في بيتنا، وحسي اهلي قررو يقعدوني في البيت
جوليا بكت لي المرا وقالت بوشها البريء الحزين: حايمنعوني من الجامعة والقراية وعايزين يعرسو لي ود عمي بي الغصب واحد اكبر مني بكتير ومامتعلم  ومعرس وعندو ولدين كمان، وجيت لي راشد يساعدني ويصلح موقفي وهو رفض، اهئء اهئء اهئء
وزادت في البكا لمن المرا اتأثرت وقربت حضنتا شديد، ونهرت راشد وقالت : معقول ياولدي تعمل كده وتظلم البت المسكينة دي؟ معقول راشد ود الاصول رفض يساعد بت مكسورة ومقهورة؟ يخص عليك ومااتوقعتها تطلع منك ياراشد ياود سيف الدين يخص
راشد مصدوم في القصة الاخترعتا جوليا في ثانيتين، ولا الدموع النازلة زي المطر دي، بالجد اتلجم وماعرف يرد لي أمو
الأم : حسي شفتا تقعد معاها وتسمع منها وتحل ليها مشكلتا الانت سبب فيها دي والا بغضب عليك ومابسامحك
راشد: طيب اتفضلي إنتي وسوقي جوز الحيوانات اولادك الوقفين اتصنتو من قبيل، حسابهم معاي بعدين
الأم : اقعدي حبيبتي ارتاحي،  يابت مروة امشي جيبي موية وعصير ضيفي البت، يخص عليكم  زول بعرف يتصرف صاح مافي
قامت طلعت وخلتهم براهم
جوليا قشت دموعا وهو براقب فيها وفي الأخير قال:  صراحة مبدعة وممثلة بارعة، اولا طلعتيني غشاش وبغرر بي بنات الناس واخرتا بقيت ما ود اصول
جوليا ضحكت ضحكة حلوة كده كأنو ماكانت بتبكي بحرقة قبل دقيقة، قالت ليهو : كان لازم ارجع حقي منك بعد العرضتني ليهو ده كلو
راشد قال ليها بي وعييد : طييييب يابت الناس انتي طلبتي وانا حاضر، من اللحظة دي انتي حاتكوني طوع امري أنا وبس وأنا بالمقابل بمنع سفرك لي أي مكان وعرسك المزعوم ده ماحايتم ابدا ابدا واي زول يفكر يعرسك بفرغ رصاص مسدسي في راسو ولو  حاولتي تلعبي معاي بأي طريقة وتعصي امري الطلقة حاتكون في راسك انتي فاهمة؟
جوليا حست انها ختت رقبتا تحت سيفو وندمت انها جاتو في بيتو وقالت القالتو ده، حست انو ماقادرة ترد اعتبارها ولا تتفوق عليهو وهو دايماً بكسب المعركة
راشد: سكتي يعني، وين فات لسانك الأطول من نهر النيل؟
جوليا: بكرهك موووت
راشد : مامهم لأني مابطيقك كمان، انتظريني هنا اجيب مفاتيح عربيتي من جوة واجي أوصلك..
ماردت ليهو وقام هو طلع من عندها، إتأكدت انو فات شالت شنطتا وطلعت براحة، لاقتا مروة شايلة صينية فيها كباية العصير : وين ماشة؟
جوليا : اعذريني مابقدر اشرب مستعجلة
ابتسمت ليها وقالت : تعبتك معاي شكراً ليك
مروة بي ابتسامة : العفو
جوليا مرقت بسرعة الريح وقفلت الباب، راشد لبس وجاب مفتاحو وجا راجع مالقاها ولقى مروة مارقة من جوة : وينا جوليا
مروة : فاتت
راشد صرخ بي غضب : آآآآآآآآآه، حااقتلا في يوووووم
بقى يشوت في الهوى ومروة محتارة فيهو وخايفة في نفس الوقت، اتحرك بسرعة على باب الشارع طلع ورزع الباب، لقى جوليا فص ملح وداب ركب العربية ولحقها على الشارع الرئيسي مالقاها برضو، قال في نفسو :  طيب يابت إنتي بوريك، إلا ماتندمي على طولت لسانك معاي وقلة إحترامك لي
                              ************'******
آخر اليوم هاشم استلم إخطار من الشرطة بمنع جوليا رسمياً من السفر لي أي مكان وعرف إنها ورا القصة دي وماقدر الا يضحك...
جوليا اتكلمت مع ابوها واعترضت على السفر وشدو في الكلام وفي النهاية خلاها على كيفا بعد لقى انها مصرة تقعد وتكمل... لما هالة غشتا قبل السفر حكت ليها الحصل مع راشد وهالة ضحكت قالت ليها : ياحبيبتي الوداك عرين الأسد شنو إنتي مستغنية عن روحك كنتي؟
وبقو يضحكو الاتنين....
اما راشد اجتمع مع عمار ودرسو المعلومات البسيطة العندهم وحاولو  يلقو نقطة يبدو منها البحث، خصوصا انو البحث عن زهرة ماوصلهم لي شي مالقوها في الداخلية المزكورة ومالقو  ليها درب حتى في جامعتا لكن جابو بياناتا من ادارة الجامعة وساكنة  في ياتو بلد..
مرت أيام  بدون احداث لحد ماوصل الخبر الصادم، لقو جثة غاطسة ليها أيام في البحر لقوها صيادين صدفة، الجثة ملامحا انتهت لكن من الهدوم كان واضح انها لي بت، وبلغو راشد بسبب اوصاف البحث المسجلة عندهم، راشد حس انو بمر بأصعب موقف يمر عليهو في حياتو، غير انو خبر وجع قلبو شديد بس كون انو يودي خبر زي ده لي بيت عمو الاتشقلبت حياتهم من يوم حصل الحصل ده كان صعب جداً عليهو..
بلغ أهلو الخبر ونفسو ماطايقة تقولا ليهم سهى ماتت ومحتاجين نتعرف على جثتا او الاتبقى منها، صوت صريخ أمها وأخواتا بشق القلب، كسرة أبوها وحنية ضهرو تألم الما بحس، غضب اخوانا و اعماما واحساسهم بي العار والفضيحة بعد فاحت ريحة القصة زاد الوجع أضعاف..
بعد اهلا اتعرفو عليها من هدوما وعاشو اسوء كابوس وشافو اشنع منظر سلموهم الجثة بي اشراف الشرطة عشان مامتحملة تتهبش ووجب دفنها فوراً... دفنوها وابوها فرش يوم واحد بس ورفعو الفراش، ومنع النسوان يفرشو ولا يبكو ..
هالة جات فوراً ومامشت بيت ناس سهى مشت لي جوليا أول ولما اتلاقو كلمتا لأنو جوليا ماكانت عارفة، بكو الاتنين سوا وهالة كانت متجرسة شديد
جوليا حست بي ذنب شديد وهالة لامت نفسا وعاشو لحظات محزنة، وطلعو بعد داك الاتنين مشو بيت ناس سهى عزو أمها وأخواتا وهالة اتفاجأت انو مافي مظاهر عزا، حتى جوليا الماعندها خلفية حست انو الجو مامريح، فتشت هالة عن صهيب اخو سهى واترجتو يوديها هي وجوليا عند قبر سهى، صهيب ماكان راضي لكن هالة بكت ليهو ف رخا وقبل يوديهم، وهم طالعين راشد وصل وشافهم من بعيد ركبو مع صهيب فطلع وراهم طوالي يشوفهم ماشين وين مع انو ممكن يكون صهيب موصلهم عادي لكن هو بقى اي شي عندو ليهو معاني تانية وبقى فكرو مشوش..
وصلو المقابر ونزلو وبعد مسافة بسيطة راشد وصل برضو ونزل وراهم، اول ماقربو وصهيب اشر على القبر هالة  صرخت صرخة عالية وجوليا انصدمت ولسانا اتلجم، قربو الاتنين وصهيب وقف مكانو وراشد بقى جايي ورا منو ووقف هو كمان مكانو
هالة بركت في الارض جمب القبر وبكت بي حرقة وقالت : سامحيني عليك الله، انا لو ماعييت اليوم داك ماكنتي حاتلاقي المجرمة الحقيرة العملت فيك كده، سامحيني لأني ماحسيت بي حجم المصيبة الانتي واقعة فيها ولا قلبي دلاني، سهى! منو تاني البياكل معاي الكورواسون بي الجبنة؟ ومنو بملا مكانك في قلبي
جوليا غلبا خلاص وبدت تبكي برضو وقالت بي صوت عالي : لييه ماقلتي لي لمن سألتك؟ كنتي فاكراني بزعل منك؟ حااكرهك؟ لو كنتي عرفتيني كويس زي ماقلتي كنتي عرفتي اني برضى ابدلك، كنت مستعدة اشارطهم انو يعتقوك ويمكن كنت منعتهم يهددوك تاني، انا مابتفرق معاي ابقى ضحيتهم، بفرق معاي انو انتي تحمليني ذنبك وتضحي عشاني، لييه تخاطري بسببي لييييييه انا ماطلبتا منك تفديني طلبتا منك اساعدك لو عندك مشكلة، انتي بت ناس وانا بت اي كلام معقدة ومختلة ومابفرق معاااااااي كلمتك وحكيت ليك لييه ماصدقتيني؟ انا لا مخطوبة ولا عايزة اعرس ماكان بفرق معاااي والله مابفرق معاي، ليييه انتي تموتي بسببي كان توريني كنتي تقولي لي وانا بتصرف...
هالة تبكي وهي تبكي، راشد قرب منهم وقال كفاية يابنات كده حرام البتقولو فيهو ده، ربنا حكم وحكمو نافذ، ادعو ليها بي الرحمة احسن من البكا والندم ، صهيب سوق هالة رجعا البيت وانا حاارجع جوليا بيتهم
هالة عاينت لي جوليا ووقفو قرو الفاتحة وقالت هالة : مع السلامة يا صاحبتي مابنساك مهما كان
جوليا: حقك حانرجعو بإذن الله اطمني وارقدي في سلام
هالة ودعت جوليا ومشت مع صهيب..
وراشد مشى دور العربية وجوليا مشت وراهو  ركبت من سكات
دور ومشا طوالي وطول الطريق كان في صمت شديد، جوليا سارحة بعيد وبتبكي بصمت ماانتبهت انو راشد غير الطريق ومشا عكس الاتجاه، بعد وقفت العربية انتبهت وافتكرت انها وصلت لكن اتفاجأت انو العربية واقفة في مكان زي الحديقة كده، عاينت لي راشد مستفسرة
قال ليها : المكان ده كنت بجيب فيهو اخواني وسهى واخوانا لما كانو صغار يلعبو ويفرقو، انزلي وشمي شوية هوا واتمالكي نفسك وبطلي بكا
جوليا نزلت من دون ماتتكلم ومشت بعيد من العربية وقعدت في الأرض ورجعت تبكي
راشد إستاء اكتر ومشى ليها وبقى يتكلم معاها: إنتي بتبكي ليه حسي
جوليا: انت فاكر اني ماعندي قلب ومشاعر؟ كوني بعرفا من فترة بسيطة مابتأثر؟ عارفة إنك بتقول في نفسك ليه سهى تقع ضحية وانا انفد من نفس المصير ده؟ عارفة سهى مابتستحق الحصل ليها ده وكونو انا السبب مابقدر ماابكي والوم نفسي، ياريت لو رفضتا دعوتا اول مرة اتلاقينا ياريت ماشفتها من الأساس ، بس ده كلو مابفيد وده الواجعني
راشد : كفاية ارجوكي، انا اكيد حزين على سهى لكن مااتمنيت تكوني مكانا وماحاأسمح انو تكوني مكانا لاحسي لا بعدين اطمني
جوليا : ممكن ترجعني بيتنا؟
راشد : طيب حاارجعك يلا قومي
جوليا قررت انو ماتبعد غير لما حق سهى يرجع واتمنت تقابل العصابة وش لي وش، ماكانت عارفة انو ده حايحصل وقريب شديد.....
يتبع......