(ردي لي قلبي )
وصلو البيت أخيراً وهالة ساعدت جوليا تدخل ترتاح، دخلت إتحممت لمسافة طويلة، حست وشها مخطووف لونو وشكلها بائس وفوق ده كلو عرفت إنو راشد جايي على هنا، ماعايزة تظهر قدامو عيانة وتعبانة وهزيلة، هي مصرة انو الحصل حادث عرضي ومافي محاولة قتل غامضة ولا في شي يخوف، عايزة تظهر قدامو عادية عشان كده طولت في الحمام إستحمت مرات ومرات وغسلت وشها لمن وجعا في الاخير، بعد حست بالترطيب حتى طلعت من الحمام، هالة ساعدتا تلبس لبس مريح وطبعاً راسا مربوط كلو مافي طريقة تسريح
جوليا: عايزة كحل اسود محتاجة انور وشي ده شوية
هالة : كحل قلتي لي؟ روج مادايرة طيب؟ ده كلو لي صاحب السعادة؟
جوليا: منو جاب سيرتو حسي
هالة : ومنو الجايينا بعد شوية وحايطل في العيون المكحلة دي؟
جوليا: مامنك فايدة نهائي ماعايزة الكحل أها
هالة: تاكلي وتنكري ، الكان نايم معاك وحارسك الليل كلو منو غيري يافقر
جوليا : اخلصي وجيبي الكحل ارحميني
ناولتا الكحل وطلعت خلتا مشت تشوف رحمة وتساعدها..
جاتا راجعة بعد١٠ دقايق تتبسم وقالت : احححم احم، الفارس جا بي حصانو الأبيض وقال ليك تعالي
جوليا ضحكت براحة وقالت: ماسامعة لي صوت حوافر في الارض
هالة : لا ماااااا ده حصان بطير
جوليا: ايوااا لا كده حلو، اها ولابس قصير وشايل سيفو ولابس خوذة؟
هالة : قومي بطلي لطافة
جوليا : منو الجا يتلاطف أول ياترى
قامت براحة ولبست شبشب البيت الفرو بتاعا وبقت مارقة
هالة : وين الطرحة
جوليا: طرحة لي شنو ماكفاية الطرحة اللافين بيها راسي دي هو ناقص يعني؟
طلعت لقتهم قاعدين هو وهاشم في الصالون، دخلت وسلمت من بعيد وقعدت
هاشم قال : اخد راحتك ياجنابو البيت بيتك
وقام طلع خلاها معاهو براها، قالت في نفسها هو جايي زيارة ولاتحقيق ده؟
راشد ساكت مسافة ومنزل راسو لي الأرض، بقت بتعاين ليهو بي راحتا وتتبسم ، شكلو مرهق ولا زعلان ولا مالو؟ إتمنت تواسيهو لو بتقدر على كده بس مابتقدر، ماحايسمح ليها أساساً، لقت نفسها مبحلقة فيهو وبتفكر وسرحت بعيد، هالة وزنها المتواصل وتصوراتا إنو معجب بيها خلاها هي تعاين ليهو بي طريقة مختلفة، كل ماتتأملو بتعرف تفاصيل فيهو ماإنتبهت ليها في الأول، ماإنتبهت إنو رفع راسو وبقا عينو في عينا، قال ليها : كيف اصبحتي الليلة
جوليا إنتبهت بعد لحظة تشويش وقالت بسرعة : تمام تمام، الحمدلله بخير، شوية صداع بس مااكتر
راشد: الف سلامة عليكي
جوليا: thanks كلك زوق
راشد: كان امبارح شكلك غريب مصفرة كده وعيونك مامستقرة جد قلقتا عليك
جوليا إبتسمت بعرفان وقالت: كنت خايفة شديد عشان كده ،الدكتور قال لي دي صدمة مابعد الحدث
راشد: المهم إنك احسن من امبارح كتير
جوليا: الحمدلله
راشد: جوليااا معاي صورة عايز اعرضا عليك
جوليا: يعني ماجيت تطمن علي؟ جابتك الصورة؟
راشد إرتبك وسكت للحظة لكن هي بسرعة إبتسمت ليهو وقالت : ماتخاف بهظر معاك ما اكتر، هات الصورة
راشد لسه محرج منها وقال: انا جيت اشوفك إنتي في المقام الأول اكيد
جوليا: عارفة والله و بشكرك
راشد محتار في الوش المسالم الراسماهو ده ولا إلابتسامة كمان، في العادي كانت حا تهاجمو وحاتزعل وتنرفزو
مد ليها الصورة وقال بعد إتنحنح : ركزي في البت الفي الصورة دي شفتيها قبل اليوم؟
جوليا عاينت فيها و قالت مدهوشة : واااو بالسرعة دي قبضتوها؟
راشد: يعني بتعرفيها؟
جوليا: كيف مابعرفا دي ياها البت الضربتني، نحن اتكلمنا مع بعض وعاينتا في وشها كويس قبل تهاجمني
راشد وسعت حدقة عينو وقال ليها : متأكده انو دي هي الضربتك
جوليا: ايوة قلتا ليك هي بي ذاتا، انتو قبضتوها شكلكم؟
راشد : جوليا عارفة البت دي تطلع منو؟
جوليا: انا مابعرفا والله والله
راشد: بس بتعرفي إسمها اكيد
جوليا: أنا؟ كيف بعرف اسمها ومابعرفا هي
راشد : ممكن تندهي على هالة من برا
بدون ماتقوم بقت تنادي بي اعلى صوت : هالااااااة، ياهالة تعالي بسرعة
هالة طوالي جات وكانت بتعاين في قلق وقالت : مالك حبيبتي تعبتي؟ حاسة بحاجة؟
راشد : جوليا كده تهجميها؟تعالي ياهالة دقيقة وشوفي الصورة العند جوليا دي وقولي لي إذا بتعرفيها
هالة مشت شالت الصورة وعاينت فيها وطوالي قالت : دي الحقيرة زهرة أكيد، كيف مابعرفا
جوليا إتفاجأت وقالت ليها : زهرة منو؟ زهرة الكنا بنفتش عليها أنا وإنتي؟
هالة : ياها الفقر المجرمة
جوليا عاينت لي راشد قالت: مافاهمة حاجة
راشد : واضحة ياخ مالك راسك ربط، زهرة إعتدت عليك وحاولت تقتلك وإنتي اكدتي لي حسي
هالة مخلوعة : زهرة؟ زهرة هي الضربتك؟
جوليا : إذا كانت دي زهرة فهي نفسها الضربتني ايوة
هالة عاينت لي راشد: انا كمان مافاهمة، كيف زهرة تظهر وتتجرأ تقرب من جوليا وتعتدي عليها
جوليا: هي كانت بتتكلم بجدية لمن قالت لياااا
عاينت لي راشد وقالت بي حرج: لما قالت ابعدي من حبيبي والا حاتندمي، قصدها شنو بحبيبا ده طيب؟ انا كنت مصرة إنو دي واحدة مجنونة وكان الحصل منطقي، حسي الأمور جاطت في راسي وماقادرة القى رد مناسب
راشد قام على حيلو وقال ليهم: اهدو وماتخافو أنا راجع لي عمار وحانتباحث في الموضوع ده بأقصى سرعة
قرب من جوليا ومسك كفها بتردد وقال بهدوء وهو لسة ماسكا: خليك متزكرة أنا موجود مابقدرو يضروك تاني، ماتخافي
جوليا إبتسمت بخجل وقالت : شكراً، أنا متعبة في كل الظروف صاح؟
راشد لي أول مرة يبتسم ليها مباشرة كده في وشها وقال ليها: متعبة جداً بس ده دوري اتحمل المتاعب دي
هالة ماسكة ضحكتا بي الغصب وأول ما راشد طلع فات فكتا وبقت تضحك وتنطط
جوليا: يابت اهدي غبية دي بسمعك مابكون بعد
هالة : ابو ام الرومانسية ياااخ
جوليا هزت راسا بي أسف وضحكت وقالت : مجنونة دي ، وينا الرومانسية حسي
هالة جاتا قريب وكتلت العيون هيمانة وقالت : أنا موجود ماتخافي مابضروك تاني، هييييح ،هههههه
جوليا ضحكت كمان وقالت: دي رومانسية في نظرك؟ ماتنسي إنو ضابط وده شغلو يحميني ولا شنو؟
هالة : ليه مصرة تنكري ياااخ قسماً وااااضحة شديد
جوليا قامت وطلعت خلتا وهي بتقول : أوهااااااام...
®®®®®®®®®®®®®
ظافر رجع من سفرتو سعييد جداً، أول ماوصل ونزلو شنطو وحاجاتو ودخل البيت شم ريحة البخور ولقا سفرة تكفي قوم بحالهم والست زهرة قاشرة ومسبسبة تقول بتستقبل في راجلا الكان مسافر ليهو زمن..
سلم عليها ببرود ودخل طوالي غرفتو وهي جرت وراهو طوالي..
بعد إستقر خلاص وارتاح واتغدى ضرب لي حامد وقال ليهو تجي سريع سريع بدون تأخير
زهرة بي إستياء قالت ليهو : ماممكن تأجل زفت ده حسي؟ عايزة اليوم ده لي أنا ، مشتاقة ليك حبيبي شديد
ظافر: ماتكوني فاكرة روحك مرتي ولا حاجة، اعتقد فهمتك كتير لكن انتي براك الغبية
زهرة : حاابسطك صدقني يابيبي سرب حامد ماتخليهو يجي
ظافر: طيري على المطبخ ولعي لي فحم للشيشة يلا
فاتت بعد ملت من تحنيسو لكن وقفت تراقبو و تتصنت لما شافتو شال تلفونو
ظافر إتصل في رقم جوليا وردت ليهو بعد زمن
جوليا: الووو
ظافر : إزيك ياكعبة، يعني مابتفقديني في اليومين الغبتهم منك ديل
جوليا: ظافر ، هاي إزيك، معليش كنت تعبانة شوية
ظافر : خير مالك
جوليا : حصل لي حادث وخبطا راسي
ظافر : اوووف الف سلامة عليك ياقلبي ربنا يشفيك سريع الشفاء
جوليا: أشكرك كتيير، عموري كيف طولنا منو
ظافر : بسأل عليك كتير شكلو إتعلق بيك زي خالو
جوليا عملت نفسها ماسمعت آخر جملة وقالت ليهو : الله يحفظو ويحميه
ظافر : آميين يارب، ماحااقدر اشوفك يعني؟ كنت مشتاق ليك شديد وعايز الاقيكي
جوليا : مابقدر آسفة كتير
اختصرتو بسرعة وقفلت منو، زهرة سمعت كل كلامو وحست بي غضب شديد، وبقت تدعي إنها تموت ابشع موتة بعيد عنهم وظافر ينساها، فكرت انو حاتكرر المحاولة لو استدعى الموضوع والمرة الجاية حاتطعنا بي سكين لمن تتأكد إنها ماتت تماماً..
جرت بسرعة تولع الفحم عشان ظافر ماينتبه ليها..
حامد جا بعد نص ساعة من تلفون ظافر وسلم وقعد
ظافر وراهو نتيجة السفرية والشغل الجابو جديد
ظافر : حانحتاج نتوسع اكتر الفترة الجاية لكن بي إسلوب جديد، محتاجين ضهر جامد يحمينا وقت اللزوم وانا دبرتا الموضوعين ديل تماماً
حامد : كويييس دي نقلة بتنفعنا كلنا
ظافر : الأخبار شنو عندك
حامد: في حاجة حصلت كده وشاغلاني
ظافر : في شنو حصل شنو
في اللحظة دي زهرة قلبها وقع في رجليها، لو ظافر عرف بي العملتو بحرقا حية
حامد: تتزكر الزول الصورناهو كم مرة مع الفراشة؟
ظافر: الراجل الساكنة في بيتو؟
حامد: في واحد تاني صورناهم في الملاهي
ظافر: ايوة ايوة، مالو؟
حامد: لاقيتو صدفة وكان لابس رسمي، لابس لبس شرطة
ظافر : كيف كيف؟ شرطة؟ إنت متأكد؟
حامد: ايوة متأكد شديد
ظافر : وين لاقيتو؟
حامد : كنت بزور واحدة قريبتنا في المستشفى وشفتو هناك، عاين لي مسااافة وإتحرك جا ماشي علي لكن انا مشيت بسرعة مالحقني، تفتكر الشرطة لقت حاجة تربطنا بسهى؟ وبي الفراشة
كمان وعايزين يوقعونا عن طريق البت دي؟
ظافر فكر مسااافة وقال : كل شي وارد وإحتمال برضو يكون الضابط ده عندو علاقة مباشرة بيها
حامد: والعمل؟
ظافر : في الحالتين حاننتظر شوية، مامستعجل ليها خااالص ،على الهادي وحبة حبة وفي الاخير بقنصا من وسطهم من دون يحسو او يتلفتو لي حاجة
حامد: انا مامرتاح لكن
ظافر: بقيت جبان ياحامد
حامد: حاتطير فيها رقاب يابوس لو اتمسكنا
ظافر : ماتخاف ولا بقدرو يثبتو علينا شي وعندي البقدر يحميني ويمسح اي اثر وراي
حامد: طيب إنت ادرى
ظافر: عيش حياتك عادي وماتحسسهم انك قلقان ده في حالة هم براقبوك او براقبونا كلنا عاااادي حانتصرف ولا كأنو في شي، في الأخير نحن مواطنين شرفاء ولا شنو ياعزيزي؟
حامد: تمام ياسيدي بي أمرك
ظافر : نادي على الحيوانة تجيب فحم جديد ده حايطفي خلاص...
##################
بعد يومين كده لما راشد كان لسه في البيت أمو الزمتو انو يتصل على حنان الليلة دي ويمشي يسوقا يغيرو الدبل ويشتري ليها محبس زيادة مع الدبلة الجديدة، سب لي حنان في سرو ولي الدبل ولي حياتو كلها، قال ليها كويس خير، إتصل بي حنان وكلما ووراها بمر عليها الليلة عصرية كده..
لما طلع العصر مشى عليها صهيب إتصل عليهو وقال ليهو أبوي سائل منك وقال تغشاهو في الأيام دي
راشد: إن شاء الله بمر عليهو، إنت وين الليلة
صهيب: أنا مشيت لي هالة وجوليا وديناها المستشفى تغير على الجرح
راشد: ايوااا تمام
صهيب: وانت وين
راشد: ماشي لي حنان طالع معاها مشوار
صهيب : طيب ماتجيبا ومرو علينا، نحن بعد نخلص ماشين شارع النيل عندي صاحبي عايز اعرفو بي جوليا، كان كايس لي عروس وأنا رشحتها ليهو وعايز يشوفا ،نسقتا مع هالة نسوقا تقابلو وتتعرف عليهو
راشد كأنو في نيزك وقع عليهو، ده يوم نحس ولا شنو؟ ، يعني يوم يمشي يشتري دبل جوليا يظهر ليها عريس؟ قال ليهو : بنجي ماف مشكلة
فكر إنو لازم يشوف العريس المزعوم ده ويشوف ردة فعل العروس المرتقبة، حس بي غضب شديد منها، ملخبطة ليهو مشاعرو ولا على بالا وكمان بتتخطب وامورها ماشة..
بمزاج معكر شديد غشى حنان وانتظرها برا ابا يدخل البيت، اصلاً كان ماعايز يشوف أبوها الأصر يحصرو في الزواية وتدخل في قراراتو..
بعد مرقت ليهو ساقا وطيران على سوق الدهب، لفت وإتفرجت وهو يتأفف في سرو مستعجل عايز يخلص، أخيراً لقت طلبا ولقو طلبو وإشترو وإتحركو، إتصل بي صهيب وسألو إنتو وينفد
صهيب قال ليهو نحن يادوب وصلنا وصاحبي ماجا لسه
راشد: نحن في الطريق طيب
حنان: حانمشي ويين
راشد: صهيب ود عمي ومعاهو اصحابو في شارع النيل قاعدين وعزمني نمشي ليهم
حنان: ايوااا طيب اهي فسحة، طولنا ماطلعنا طلعات زي دي
راشد حس بي الذنب تجاها، في النهاية هي ماذنبها لو هو قلبو دق في إتجاه تاني، هي إنسانة راقية في تعاملها وقلبها طيب وبتحترمو كتير بس قلبو ما مال ليها شديد، ماحباها وده كمان ماذنبو ذنب قلبو وذنب الظروف..
أخيراً وصلو وعرفو وين قاعدين الشباب ومشو عليهم، لقو نفسهم وصلو مع العريس المرتقب في نفس اللحظة، طبعا دورت السلامات بيناتهم كلهم، جوليا إتفاجأت بي راشد وحنان، صهيب ماكلمهم إنهم جايين، هالة برضو إتفاجأت وكانت دي اول مرة تشوف حنان، صاحب صهيب اسمو علاء، زول لطيف كده وحبوب والنوع الكلاااام ووناس
تم السلام والتعارف بين الكل وقعدو.. حنان همست لي راشد: جوليا دي قابلناها قبل اليوم صاااح؟
راشد: ايوة في المطعم
حنان : بتعرفهم من زمان؟
راشد: يعني مازمن بعيد، هم صحبات سهى الله يرحما
حنان : اهااا تمام
هالة كانت عارفة موضوع صهيب والخطيب، ولما شافت راشد جا، حبت تثبت لي جوليا صحت شكوكها وقررت إنها تستفز مشاعرو دي عشان جوليا تلاحظا وتصدق، خلت علاء يقعد جمب جوليا بحيث بقو مقابلين لي راشد ومستوى رؤيتو، قعدت هي جمب صهيب وجمبها حنان وبقت تتونس معاها عشان تشغلا عن راشد شوية، علاء ماصدق طبعاً وعجبتو جوليا شديد وبدا يوجه ليها الحديث ويتعرف بيها وكده، جوليا طبعاً مابتحب المحاككة الشديدة ومحاولة الغوص في حياتا من خلال شخص غريب، لازم تاخد فترة حتى تعتاد على الناس، بدت تزهج طبعاً لكن إتعاملت مع الموقف بشجاعة وجاملت الولد كتير..
راشد بتونس مع صهيب مرة وبعاين ليهم مرة ، ريحو شوية ملامح جوليا الواضح إنو مامعجبة بي الأفندي ده.. تاني الونسة شملت الكل وبقو كلهم يتونسو مع بعض، صهيب قال لي علاء: جوليا دي مررررجع في الأغاني، اي اغنية بنحبها وبنسمعا انا وانت لقيتا عندها وكمان حافظاهم
علاء بدا يسألها من إسم كم أغنية وورتهم ليهو وإتكيف دبل، صهيب لكز هالة إنو تدي جوليا خلفية عن علاء وتوريها براااحة كده إنو هو عريس وإنو هي عجبتو ودايرها.. هالة نادتا على جمبة وورتا
جوليا مستائة بقت : إنتو جايبين لي عريس يشوفني واشوفو وجايبين لي راشد كمان؟ ليه طيب، عشان يجهجهني؟ عارفاني لمن الاقيهو مابكون مرتاحة لأنو بكون براقب في تصرفاتي
هالة : براقبك عشان هو غيران وحسي هو غيران وجا بس عشان صهيب قالو ليهو في واحد عايز يتعرف عليك
جوليا: صهيب قال ليك كده؟
هالة : اي قبل شوية همس لي بكده لما سألتو راشد وحنان الجابهم شنو
جوليا: هالة ماممكن واحد غيران يجيب خطيبتو معاهو عشان يجي يمارس غيرتو قداما ويفضح نفسو
هالة: يازولة خليك منو وركزي في علاء المز ده، زول ظريف ياجوليا ومروووووق لي الطيش،هو دكتور و عندهم شركة لصناعة الادوية وامورو ظابطة شديد
جوليا: أنا ماعايزة اعرس لكن ليه ترشحوني ليهو كان تكلمي حبيبك بكده قبال تعشمو ود الناس
هالة : يابت بلا عبط معاك، تعرسي ونص وخمسة بلا مابعرس
جوليا: يلا نرجع حسي عيب نسيب البت براها وسط تلاتة رجال
هالة : هاماك شديد يعني؟ الظرافة قاتلاك إنتي
ساقتا ورجعو قعدو معاهم تاني
صهيب كان بتكلم مع راشد وحنان ولما هم قعدو قال ليهم، يابنات باركو لي عصافير الحب ديل عقدهم يوم الجمعة الجاية دي
برميل موية متلجة إتكشح في البتين، هالة إتصدمت اكتر من جوليا، كانت متأكده انو راشد عايز جوليا مااتخيلتو يواصل في العرس، أما جوليا صدمتا مختلفة، كانت بدت تأمل في شي بعد كلام هالة وزنها المتكرر، رغم انها نكرت الشي ده كتير بس بدت تتقريف للموضوع وتحب كون إنو راشد مهتمي ليها وكانت مقررة تغير تعاملا معاهو وتكون الطف وارق من المعتاد، الخبر لبسا في حيطة وإتكسر الحلم الوردي
جوليا بادرت وقالت بصوت بان فيهو نبرة دهشة: مبرووك الف مبروك ربنا يتم على خير ويسعدكم يارب
حنان بي فرح: آميييين، الله يبارك فيكي
هالة : مبروك ياراشد مبروك ياعروس بيت مال وعيال يارب
حنان هي الردت اول وراشد بعدها وشكروها كتير..
حنان: إتفضلو معانا كلكم يوم الجمعة، لازم تجيبهم ياصهيب
هالة مبتسمة إبتسامة صفرة وقالت : إن شاءالله
جوليا ماقالت شي وفضلت ساكتة، راشد لاحظ إنها متغيرة ووشها ماطبيعي فبقى مركز معاها ياربي مالا، اتضايقت من خبر العقد معقول؟ معقول تكون بتحس بي شي تجاهو؟ الشي ده خلاهو متلخبط زيادة، وفوق ده كلو علاء تاني شبك في جوليا بي الونسة والمرة دي حاولت تنتبه معاهو اكتر وتتجاهل وجود راشد وعروس المستقبل القريب، ماعجبو ونسة علاء التحت تحت دي وحاول يقوما منو بي اي طريقة فقام كده فجأة قال ليها لما لمحهم سكتو شوية: جوليا لو سمحتي عايزك ضروري، في كلام مهم عايز اسألك منو
جوليا حست إنها عايزة ترفض، ماقادرة تعاين في وشو، خايفة يحس بي خيبة أملها ويفضح مشاعرها ويسخر منها في سرو وإحتمال يضحك في وشها، بس إتشجعت وشدت على اعصابا وقامت ليهو وقالت : اوكي أنا حاضرة
إستأذنو من القاعدين ومشو حتة بعيدة، حنان بتعاين من بعيد عايزة تفهم شي وشنو ممكن يكون الموضوع وحاولت تقرا تعابيرهم من بعيد..
راشد سألها عن حامد وتاني عن زهرة وكم سؤال مامهمين ولا شي ومكررات، بقت مافاهمة قصدو من إنو يبعدها من المجموعة، ردت ليهو ردود مختصرة وسكتو شوية، فجأة عاينت ليهو عين ماعرف يفسرها، قالت ليهو براحة كده : مبروك، عروسك حلوة جداً، إختيارك موفق شديد طلع عندك زوق عالي، ماشاءالله عليها عينا باردة
كلاما طعنو زي الشوك، رد ليها بكلمة شكراً بس وسكت، إتحركت عايزة تمشي لما هو قال ليها : وييين؟
جوليا : مش مفروض نرجع ليهم خلاص؟ مافضل كلام تاني، جاوبتك في اسئلتك وخلصنا
راشد: دايما مستعجلة عشان تبعدي عني، الكلام معاي ممل شكلو، او أنا ما في مستوى نظرك وماشايفاني من الأساس، بتهربي في أول فرصة زي الأنا ماسكك غصب
جوليا: إنت عايز مني شنو؟ ليه مصر تتعبني وتبوظ اعصابي، قول؟ عايز شنو منييي
ماقدر ينطقا وقالا في سرو : عايز قلبي، رجعي لي قلبي بترجاك
وبصوت مسموع قال ليها: ماعايز شي معين، عايز احس انو انا في موضع إحترام وعايزك تتصرفي معاي على هذا الأساس ماتعامليني زي شافع قدامك وتتلاعبي بي يمين شمال تبتسمي لي لمن تكوني عايزة وتستفزيني لمن تكوني نافرة وكارهة
جوليا: أنا؟ أنا بعمل كده؟ لأ ماصحيح بس إنت عايز تبهدلني زي كل مرة بحجة ومن غير حجة، أنا قلتها ليك قبل اليوم، أنا ماعايزة تعامل مباشر معاك، ريحني وإستريح مني ، لو في شي مهم عمار موجود أفتكر، إنت خليك بعيد وريح بالك
راشد بي غضب بارد : ده شي مابتقرريهو إنتي ،وإنتي في عهدتي أنا عايزة أو ماعايزة مابي كيفك، وده موضوع مفروغ منو فاهمة؟ إنتي مسؤوليتي أنا يابت الناس
جوليا : أنا ماعايزة يااخ و تاني بقولا ليك علاقة مباشرة معاك برفضا، عايزة عمار وبكلمو بي كده،ابعد مني ممكن؟
راشد خلاص فقد اعصابو ونظرة غضب لمعت في عينو وبراااحة لكن بعصبية قال : مادام العند بعجبك حااقول ليك بالعند كده إنتي في يدي أنا، أنا وبس فاهمة؟ لما بقول كلمة تتسمع ودلع وتصرفات أطفال مابتخارج معاي، طالما عايزة تتحديني مافي ليك غيري ولو حاتكوني متضايقه ده حا يكون شي مفرح بي النسبة لي وحا استمتع بيهو اوكي؟
جوليا: حا تتقاوى علي وتفرض قوانينك؟ أنا مابمشي بأي راي غير من راسي، مابخليك تتنمر علي ابداً ومابسمع كلامك وبرضو حااكلم عمار
مشت من قدامو بعصبية ووقف هو بحاول يتنفس عسى يهدي عشان مايصرخ فيها ويعمل فضيحة في العلن..
قال ليها بهمس كأنها سامعاهو مع انها بعدت بعيد : ردي لي قلبي خليني اعرف اعيش مرتاح، كفاية جبروت ياخي تعبتا خلاص، خايف اتهور في يوم واتصرف بعدم مسؤولية وده كلو بسببك انتي، ردي لي قلبي لأنو مامن حقك إنتي.. رديهو لي وخلينى ارجع راشد بتاع زمان، راشد العاقل ماراشد الولهان.....
هالة بعد جات جوليا راجعة بقت تراقب في حنان البالها مع راشد هناك عايزة تفهم حاجة، ولما جات حاولت تقرا تعابير وشها وطبعاً عادي راسمة نظرة لا مبالاة وهي قلبها بتنفض عديل حتى جسمها بترعش، راشد وصلا لي درجة صعبة من الإحباط، ماعارفة حاتبعد كيف بدون تحتك ولا تصطدم بيهو تاني..
رجعت وقعدت مع علاء وواصلت ونستا معاهو عايزة تتناسى الإتقال والإتعمل من راشد، هالة جننت ليك راشد جن، كل شوية تدي علاء دفعة إتجاه جوليا عشان تشعلل داك ونجحت في كده بصورة اقوى من الإتخيلتو، ووسعت الهوة البين الأتنين أكبر وأكبر
يتبع....
أنت تقرأ
لواء الشيطان
Actionجوليا فتاة تواجه خطر عصابة تخطف الفتيات وتجبرهم على العمل في الدعارة ولكن القدر يحول دون ذلك لتدخل في مغامرة شيقة برفقة راشد ضابط الشرطة الذي تربطه علاقة اسرية بإحدى ضحايا العصابة..
