لواء الشيطان

البارت السابع والعشرين

(الفراشة وانثى العنكبوت )

إستنفرت الشرطة على قدم وساق في البحث عن جوليا وفتشو عن حامد وضيقو الخناق وحققو مع اهلو وبت خالتو العاقد عليها وضغطو عليهم، بت الخالة إتصلت حزرتو لأنها ماصدقت كلام الشرطة، ظافر عرف فأمرو يفضل في المخبأ هو وزهرة..
عمار وراشد إتلقو اخبار جديدة من القيادة حقت عمار في التحقيق الكانو عاملنو حوالين المستر جورج وظروف موتو، التقرير بقول انو جورج كان شغلو مشبوه وقبضو واحد كان بتعامل معاهو واعترف بي تهريب جورج لي بنات لي برا البلد كذا مرة بي مساعدتو كتجارة رقيق ودعارة، والمدعوة إلهام الإتمسكت واتحقق معاها ماكانت مجرد واحدة صاحبا زي ماقال محاميها، إشتبهو فيها وحققو اكتر عنها واكتشفو انها كانت من فترة صغيرة بتملك سنتر تجميل كبير لكن المكان إتباع فجأة وإتقفل نهائي، وفي اقوال انو المكان واجه لي شغلها التاني في الدعارة وبعض الكانو شغالات هناك من البنات المسجلات  في الآداب،ورجعو يحققو في موت مستر جورج اكتر لأنو في شكوك جديدة انو مات مقتول.. المعلومة  اللفتت نظر راشد وعمار انو إلهام المذكورة مطلقة وعندها طفل واحد ولد اسمو عمر وليها شريك في الأعمال اخ اسمو ظافر شغال في تأجير الشقق المفروشة
عمار قال لي راشد: تفتكر ده الخيط الكنا مستنينو؟
راشد : سهى ذكرت البيوتي سنتر كواجهة لي الأعمال المشبوهة، وكمان زكرت انو البقودو العصابة ٢ مرا وراجل وهم اخوان والاخت كانت صاحبة السنتر بس مابتعرف شغل الاخ شنو
عمار: عندنا اوصاف صاحبة السنتر تجي نقارنا بي صور الاسمها إلهام؟
راشد: نقارن ماحنخسر شي
           ×××××××××××××××××××
زهرة لقت طريقة تدخلا عند جوليا بعد اقنعت ظافر انو يبعد حامد عشان مايفقد اعصابو ويغتصب البت قبل الأوان، ويخليها هي تهتم بي شؤونا من اكل لي حمام لي غيرو لحد مايأمر هو بي الجاي، لما خشت الغرفة لقت جوليا قاعدة في الارض وضهرها للحيط وخاته راسا في يديها على ركبها.. جوليا حست عليها فرفعت راسا تستفسر عن الدخل عليها ده فلقتا زهرة
جوليا بإسلوب كلو ترفع وعنجهية : زهرة هانم عندنا؟ يامرحبا، خشي المكان مكانك ياحلوة ماتختشي
زهرة حاولت تسخر منها وقالت : مفكرة عشان ظافر ماربطك تبقي حاجة مهمة عندو؟ ظافر حبيبي وانا حبيبتو الاولى والاخيرة والباقي كلو لي خدمتو الشخصية
جوليا: تصرفاتك بتقول العكس، اولاً جيتي لحد عندي وإتهجمتي علي وانا اصلا مابعرفك وكان واضح انك غايرة، والغيرة مابتجي الا لمن تحسي سيد ريدك عاين بعيد، تانياً جاية حسي تأكدي انو حبيبك جد مهتمي بي وده مخوفك موت، على فكرة ظافر بعشقني ومن اول لحظة شافني فيها، ده كلامو لي، و رغم اني اتمنعت عليهو وادللتا كتير لكن ماقدر يشيلني من راسو واصر يحبني بي الغصب وعشان كده انا هنا، انا هنا ماعشان انا ضحية لي عصابتكم والا كان خدروني وحامد باشا اغتصبني وصورتوني، لكن ظفور ماعايز راجل تاني يهبشني ولا يشوفني بدون هدوم
زهرة إتحرقت منها وصرخت في وشها: كذابة! موهومة ظافر جايبك عبده لي نزواتو مااكتر والا لي مرمية الرمية دي؟
جوليا ضحكت ضحكة تخلي زهرة تغضب ذيادة وقالت ليها بي إسلوب يبين إسلوب بنات الشوارع لكن بي طريقة شيك وقالت ليها: هو بحاول يفرض سيطرتو علي ويكسر إرادتي بس حايمل ويفهم إنو انا ماشبه الرمم المنتنة اللي هو متعود عليهم من أمثالك يازوزو، انا واحدة غير حرة ولحمي مر وحا تعرفي قريب إنو خبرتي في المجال حاتعمي عيونو عن شوفتك تاني وشوفة الزيك لأنو حايغرق في بحوري تماماً وطبعاً مامحتاجة اوريك مدى الاختلافات البيني وبينك امشي شوفي المراية وهي توريك كيف انا احلى منك واكثر إثارة وفتنة بينما انتي  سمينة وكلك منحنيات شايلة بين طياتا روائح معفنة منتنة مهما إتحممتي مابتروح اهههههههههههه
زهرة إتجننت وهجمت عليها بس جوليا ورتا الجن الأصلي وردت الهجوم وكلبشت في رقبتا وعضعضتا فيها بعنف كببتا الدم وفي كتفها وكم حتة كده خلت زهرة تفرفر وتصرخ بعلو الصوت وهي تعضي زيادة وتقول ليها لازم ابرد ناري فيكي ياحيوانة واخد حق سهى وحق راسي المسكين، وهجمت عليها عضتا في وشها وسمت ليها خدها..
دخل حامد وظافر على صوت الصريخ حق زهرة وبصعوبة فكوها من تحت يدين جوليا، حامد مسك يدينا لي جوليا ولواهم ورا ضهرها ولصقا عليهو وزهرة واقعه على ركبها بتبكي بي هستريا وتقول بقتلك ياعاهرة بقتلك، جوليا عملت ليها مجنونة عديل وقالت : ابقي مرا وحاولي مدي يدك علي تاني يازبالة لو ماقرمتا ليك اصابعيكي كلها وتفيتا في الأرض، انتي لو مجنونة وفتحتي راسي بي طوبة انا اجن منك وبعمل فيك عملة عمرك ماتتخيليها يالمامة ياحيوانة ياشبه القمامة
حامد بنهر فيها : اهدي يامجنونة اهدي مالك بيها
جوليا صرخت فيهو ورفستو : ابعد عني انت ياكلب عايزها فرصة عشان تلصق جسمك على جسمي ياتافه ياحيوان
ظافر نهرو بصوت مخيف وقال فكها بسرعة، واطلع انت والحيوانة دي برا وانتظروني في الغرفة يلااااااا
حامد فك جوليا وهو بتوعدا بي عيونو وقوم زهرة وطلعا بعنف من الغرفة وقفل الباب
جوليا بتحاول تاخد نفسها وظافر بدا يقول ليها: مش قلتي عملتي حادث؟ كيف زهرة تكون فتحت راسك
جوليا :  كنت عايزني اوريك اسراري واكلمك انو في واحدة مجنونة جاتني في الجامعة وضربتني بحجر فتحت جبهتي عشان خاطر حبيبا اللي ماكنت عارفة انك انت هو؟ خسارة ياظافر لو كنت صبرتا كان ممكن تبقى عشيقي، اصلاً انا حريصة في علاقاتي وماكنت بستعجل والدايرني بفضل وراي وانا بعمل احتياطاتي حتى اسلم ليهو نفسي، بس انت ضيعتا فرصك وانا لا يمكن احن ليك تاني، خلي زهرة المنتنة السمينة تنفعك
ظافر مدهوش من السامعو ده وماقادر يصدق
ورجع قال ليها: وحبيبك راشد الضابط صبر عليك ونال المراد؟
جوليا لوت خشمها وقالت ليهو بي نظرة فيها إهانة لي ذكائو المحدود وقالت : راشد اي نعم ضابط لكن ماحبيبي دي الصورة الحبيناها توصل ليكم لما حس البوليس انو انتو مراقبيني، راشد ضابط مكلف بمتابعة قضية البحث عن عصابة الشيطان الاغتالت سهى بعد ماضيعو شرفا وشرف ميات البنات، راشد ود عم سهى وشغال في الشرطة شعبة الجنايات
ظافر وسعت عيونو لي اقصى حد وماكان مصدق، جوليا قالت ليهو : انت كنت ذكي في حتت انو تلوي يدي وتخليني اسلمك نفسي براي لكن غرورك وغبائك العام ماخلاك تشوف الصورة كاملة يابيبي
صغطت على كلمة بيبي دي بصورة ساخرة
ظافر طلع وكل غضب الدنيا في وشو ورزع الباب بعنف، جوليا انهارت وبقت تبكي بعد المجهود المرهق للمشاعر العملتو و بتلعن في نفسها الف مرة انها مضطرة تمثل دور ماحقها وتقول كلام حايلوث لسانا لي الأبد وإنهمرت الدموع شلالات من عيونا وقلبها حستو نزف من كمية الألم الحاساهو..
فضلت مرمية في الغرفة الفاضية بدون مازول فيهم يخش ليها تاني والحزن وكسرة النفس مالين قلبها وتناجي وتقول : بس لو اشوف ماما وبابا لي اخر مرة واملي عيوني منهم ممكن اموت راضية..
زهرة إتعذبت على يد ظافر بعد عرف إنها هي اللي ضربت جوليا في راسا، كواها بي النار بعد جلدها بي الحزام، زهرة إتضخم جواها إحساس الكره لجوليا وقررت انو لازم تقتلا بي اي طريقة وإنو تشرحا بي سكين وهي حية وتسمع صوت صريخا عشان تشفي غليلا منها، حامد بقى ممنوع يقرب على جوليا لكنو قرر يغتصبا بي اي شكل بدون ظافر يدرى لأنها مابت وما حا يفرق، بقى عندو هوس فيها وعاجبو شكل البت المتوحشة وعايز يقهرا ويدفعا تمن القالتو في إنتقاص رجولتو، كانو الاتنين منتظرين ظافر يطلع لي اي سبب..
مرت ٥ ايام كاملة والشرطة في حالة إستنفار تام بدون جديد يذكر غير إنو اوصاف الهام قريبة من وصف سهى لي  صاحبة الكوافير البسموها الست، فتحو موبايل جوليا بواسطة الخبير ولقو الرسايل والصورة الاترسلت ليها والتهديد الخلاها تسلم نفسها ليهم
راشد فلفل تلفونا ماخلا ملف ولا رسالة ولا صورة الا فتحهم، ركز مع صورتا لي وقت طويييل وهو بتنهد بي حسرة، مصر إنو ماكان قدر المسؤولية وضيع حقها وحق سهى معاها وفشل اشد الفشل..
             ®®®®®®®®®®®®®
إلهام في سجن النسا سلموها رسالة جاتا ولما فتحتا لقتا من طليقا الهاربة منو سنين وداسة منو ولدها، كاتب ليها انو لقاها أخيراً وبي الصدفة البحتة وعرف انها مسجونة في قضية دعارة، وعرف طريق ولدو ومشا شالو ووراها انها ماحاتشوفو تاني لي ابد الدهر وانو بتمنى ليها تتحرق في نار جهنم وتضوق عذاب فراق الجنا لحد ماتموت، إلهام وقعت من طولا وبعد فوقوها بقت تصرخ بي علو الصوت ولديييي ولدييي عموري حبيب امك وين اخدوك مني ولدييييي ردو لي جناي، انا ماعندي غيرو وكل حياتي كانت ليهو، ولدييييي جناي حبيب روحي انا سويت المابتسوى عشان اربيهو ومااحوجو لي ابوهو في يوم واااااااااااي ياحبيبي الليلة وااااا سوادي وااااا رمادي جيبو لي جناااي
حاولو يهدوها بدون فايدة وإتصلو في الاخير على ظافر يجي يشوفا، ظافر قبل مايطلع من هناك قفل باب الغرفة بي المفتاح ووقف حارس ومشا طلع فات،زهرة وحامد ماقدرو يلمسوها بي اي شر..
ظافر مشا السجن وفي عيون قطرتو وصوروهو  ورسلو الصور للقيادة، راشد إطلع على الصور واكد انو ده نفس الشخص الجار المزعوم، قررو يراقبوهو لحد مايوصلو لي جوليا عن طريقو
ظافر جابو ليهو إلهام وأول ماشافتو قالت : حسبي الله ونعم الوكيل فيك، ضيعتا لي ولدي بعد كان في امانتك، ولدي قلعو مني انا كيف القاهو تاني وااااااي يااخوي ياود امي وابوي يالضيعتا جناي وااااااي ياعمر حبيب حشاي الليلة وين رحتا ووين بتا
ظافر ضربا كف وقال ليها بعنف اسكتي سكت حسك ياواطية، إنتي من متين بتعرفي ربك، ماهو لو ما كنتي واحدة فاكة ما كان ولدك اترمى بعيد عنك ورجع لي حضن ابوهو تاني
إلهام : انت واحد ماعندك ضمير ولاقلب انت كلب ولا تسوى وتربية ثريا القوادة بتاعت الرجال
ظافر: القوادة دي ربتنا نحن الاتنين،  علمتك إنتي الفجور وقلة الحيا وحياة الرزيلة وعلمتك حقيقتك شنو وانك مااكتر من عاهرة فاجرة ، وعلمتني انا اصل المرا شنو والراجل شنو علمتني انو اي واحدة في الدنيا دي مجرد مداس للرجال وسبب لي رفاهيتهم ومتعتهم الحرام مااكتر، والمابتجي بي الزوق تجي بي العافية لمن تعرف اصلها الحقيقي شنو، وانا نفذت الشي ده وخليت اي واحدة تقع في طريقي فاجرة وذليلة تحت رجليني..
قام بعد تم كلامو وفات خلاها بتصرخ بي اعلى صوتا عومااااااار ولديييييي، الله يلعنك ياظافر الكلب الله يلعنااااااك حرمتني من جناي الله يحرق قلبك..
ظافر طلع من السجن وركب عربيتو وفات، المراقبة اترصدتو وتابعوهو لكنو ماكان ساهي إتصرف بي طبيعية ورجع شقتو، الشرطة كبست على البيت وإعتقلوهو ومشى معاهم بي كل هدوء وودوهو مركز الشرطة التابع لي ناس عمار وحققو معاهو كتير بدون فايدة
إجتمعو عمار وراشد وجابوه قدامهم وحققو معاهو تاني
عمار : إتكلم ياظافر وين جوليا
ظافر : انا مابعرف واحدة بي الإسم ده
عمار : بس في ناس في الحي اللهي ساكنة فيهو لمحوك كم مرة واقف بتتكلم معاها واخر مرة كانت في الجنينة الموجودة في الحي
ظافر بي برود: ياتو حي ده
راشد : ماتحاول تنكر لأنو انا شخصيا لاقيتك وإتجرأت وجيت سلمتا عليها قدامي
ظافر: هل عندك إثبات اني انا الجيت وقفت وسلمتا عليكم؟ عموماً انا اجرتا بيت في حي اسمو ال......... إحتمال اكون صادفتا واحدة من بنات الجيران كذا مرة بس انا ماحافظ اسامي الناس ودي مااعتقد جريمة
عمار : طيب علاقتك شنو بي المستر جورج فارلي
ظافر رفع اكتافو وقال : اجر مني شقق مفروشة كذا مرة، بيزنس يعني مااكتر
ماقدرو يستفزوهو ابداً ونكر اي كلام واجهوهو بيهو، حتى الرقم اللقوهو بعد فتحو تلفونا الكان مرسل منو لي جوليا رسايل الغزل ورسايل التهديد مابخصو ومامسجل بي إسم..
ماقدرو يعتقلوهو بدون دليل وفكوهو، راشد لحقو جمب الباب وقال ليهو بي غل : لو حصل ليها حاجة مابهمني القانون ووقتها برصصك بدون مايرف لي جفن
ظافر إبتسم وقال ليهو براحة بستفذ فيهو  : لو شبعتا منها برسل ليك الباقي هههههههههه
راشد خنقو من ياقة القميص والعساكر فكوهو منو بي العافية
قال ليهو قبل يمشي : الكل شاهد انو اعتديت علي ولو فكرتا تقرب مني بقلعك الكم دبورة المفرحنك ديل
وقرب منو تاني وقال ليهو : لاحق لي موعد غرامي مع فراشتي والا كان قعدتا اكتر
فات طلع وراشد بتوعدو انو مايرحمو ابداً ابداً...
تابعوهو بس قدر يتملص منهم بي سهولة وفات بيتو، إتواصل مع شريكو الرفض يدخل نفسو في الصورة وظافر هددو إنو لو الشرطة مسكتو تاني حايفضحو وينشر الفيديوهات الاباحية المصورها ليهو خلى الراجل سكت من الصدمة..
قرر ينهي الموضوع إبتداء من الليلة ويغتصب جوليا على مدار كم يوم ويستفيد منها كمان ويصورها في فيلم إباحي مع اي واحد من الشباب المعاهو، ويبيعو ويتربح منو وبعدها يقتلا ويدفنا وسط الجبل لا مين شاف ولا مين درى...
راشد وعمار مشو زارو إلهام في السجن وحققو معاها لكنها في عالم تاني كانت بسبب فقدانا لي ولدها، حققو معاها في موضوع سهى وضغطو عليها والغريبة إعترفت طوالي إنو سهى شغالة معاها في الدعارة واول مرة تعرف انها ماتت أساساً، اعترفت انو ظافر شريكا في الأعمال القذرة وانو ياما خطفو بنات واغتصبوهم بي الميات ده غير الهربوهم وباعوهم في السوق السوداء لي الأجانب، نكرت انو هي قتلت جورج او لمستو بي سوء، واعترفت انو حامد كان يدو لي ظافر اليمين والمسؤول انو ينضف وراهو وياما قتل ناس بسبب ظافر وانو على الاقل قتل خمسة بنات من الشغالين تحت يدهم بتهمة الخيانة ومحاولة سرقة الزباين لي حسابهم الخاص
كانت إعترافاتا صادمة وورتهم انو حتى زهرة كانت من ضحاياهم
عمار كذب عليها وفي نفس الوقت الكذبة كانت هي الحقيقة اللي هو ماعارفها، قال ليها انو ظافر هو السبب في رميتا هنا وانو قتل مستر جورج بسبب خلاف معاهو، إنصدمت شديد لمن بقت ترجف كلها
راشد قال ليها لو ساعدتهم يتوصلو ليهو حايطلعوها برائة من كل القضايا لأنو خاطف بت جديدة وهي في خطر عايزين يعرفو وين حاجزها
قالت ليهو : قولو عليها يارحمن يارحيم بتكون راحت في شربة موية خلاص، حامد العواليق الرمرام بكون اغتصبا وانتهى منها وطلع بلاهو عليها
راشد مسك نفسو بي العافية وقال ليها بعصبية : ساعدينا نلقاها قبال يقتلوها
إلهام : مابتهمني حياتا ولا حياة غيرها خلوني في مصيبتي وامشو من هنا
راشد صرخ فيها بعصبية : إتكلمي احسن ليك ياحيوانة
عمار : اهدى ياراشد لو سمحتا، إلهام إتكلمي ورينا وين نعتر فيهم هو وحامد إتكلمي
لكن إلهام ابت تتكلم وقامت على حيلا بسرعة وغافلت عمار وسحبت مسدسو، وبقت تهددهم بي هستره وتقول امشو من هنا يلا ماعندي معاكم كلام
ارتبكو كل الموجودين وحاولو يهدوها، عمار حنسا وقال ليها ختي المسدس يا إلهام مافي زول بهبشك اطمني
كان عارف المسدس مؤمن لكن زياده حرص ماحاول ينبها لكنها قالت ليهم : انا مالي حياة تاني بعد ولدي وماعايزة أعيش، إطمن ياجنابو انا بعرف استخدم المسدس وعارفة انو مؤمن، فتحت التأمين بسرعة وختت المسدس إتجاه قلبها، كلهم حاولو يهدوها ويتكلمو معاها براحة لكنها إبتسمت وقالت : بدون عمر مابعيش تاني
وطااااااخ ضربت الرصاصة لمن المسدس عمل هزة عنيفة وارتد لي ورا ووقع من يدها ووقعت سايحة في دمها وماتت في لحظات..
كانت لحظات عصيبة وإتملكهم الإحباط الشديد، إلهام كانت اخر أمل يساعدهم يلقو جوليا وفقدو الأمل ده..
إحساس العجز بولد القهر الشديد وده كان حال راشد وعمار والتيم المعاهم، في اليوم ده لما رجعو المركز لقو هاشم منتظرهم ومعاهو راجل كده شخصية، مهندم  وزول كده باين عليهو مثقف، هاشم عرفهم بيهو : دكتور اسامة النور ابوالوليد والد جوليا
سلمو عليهو الاتنين بي ترحاب شديد وفضلوهم على المكتب
بعد قعدو هاشم قال تاني : الدكتور لسة واصل من نص ساعة وماقدر يجي قبل الليلة
أسامة : خليت المدام واولادي في حالة كربة ولسه بحاولو يجو وراي رغم اني منعتهم بس مصرين، طمنوني ارجوكم هل في جديد؟
عمار : يدينا مربطة تقريباً، ختينا يدنا على هوية الناس ديل لكن ماقدرنا نثبت تورطهم لأنهم محتاطين كويس، جل اهتمامنا حالياً نوصل لي المكان المحتجزين فيهو جوليا
أسامة : الشي المؤلمني انو في نفس يوم اختفائها رسلت لي مقطع صوتي بتطلب مني انها ترجع كندا في اسرع وقت لأنها مشتاقة لينا وحاسة بي الوحدة، ماحبت تقلقني وتقول انها في خطر، وكل مرة يحصل معاها شي كانت بتجبر هاشم يسكت ومايكلمني بي الحاصل، بتي عنيدة بعرفا لكن توصل لدرجة تترجاني بي الطريقة دي  ده ماحصل منها قبل اليوم، وده بثبت لي مدى عذابا في الفترة الاخيرة
جرت منو دمعة لحقا بسرعة ومسحها، وفتح ليهم التسجيل، كان واضح إنها باكية ونبرة صوتا حزينة
إتأثرو كلهم كتير
أسامة : انا مالايمكم، الحصل ده قضاء وقدر، ولو حصل فيها اي شي بقول العوض على الله، بس متمني ترجع لي حية على الأقل، ماعايز اعيش ندمان في باقي عمري إنتي رسلتها لي قدرها بدون رغبتا وانو لحد اخر لحظة كانت بتترجاني ارجعا
عمار: إن شاءالله حانقدر نرجعا ليكم لأنو نحن على حق وربنا معانا
هاشم: امي من امس بطلت بكا وبتقرا في قرآن قالت افضل من البكا والنواح
إبتسمو كلهم لأول مرة من ساعة ماإختفت جوليا..
عمار وراشد وعدو يبذلو اقصى قدراتهم عشان يلقو جوليا في اسرع وقت..
        *****************************
ظافر قدر يغفل المراقبة وركب عربية مختلفة وفات على طرق الجبل وفي راسو انو ينهى كل حاجة في اقرب وقت، طول الطريق شريط حياتو ماشي قدام عيونو، كيف عاش طفولة غريبة وكيف امو كانت جميلة وناعمة وزي الأميرات في نظرو ، اتذكر كمية الاعمام الكانو بزوروهم وكان بفرح بكمية الهدايا والحاجات البجيبوها معاهم، إتزكر صدمتو الكبيرة لما إكتشف حقيقتهم أول مرة وكيف امو ماإهتمت ولا حتى خجلت، كان عمرو ١١ سنة وقتها، شافا في وضع فظيع لوث عيونو لي الأبد، وكل القالتو ليهو ده شغل ياظافر شغل فاتح بيتنا ومعيشنا ومامحوجنا لي زول.. سكت وقتها لكنو كان ماعاجبو البحصل ابداً وبطلع من البيت طول مافيهو راجل غريب مع امو، الزاد انو امو اجبرتو يكون حاضر لي خدمة الضيوف هو واختو، كان بترسل الدكان يجيب السجاير ويجيب اي طلبات يقولوها ليهو بدون إعتراض، لما تم ١٥ سنة امو قعدتو وفهمتو إنو ده اصل اي مرا في الحياة مافي زول بساعدا ولا يسد حاجتا من دون المقابل ده، اي راجل مستعد يدفع لي مزاجو ملايين لكن مامستعد يكفل مرا وحيدة في يدها اطفال وماعندها معيل عشان كده قررت تخضع كل الرجال بي كل الطرق وتاخد منهم اكبر قدر من القروش البملكوها، إقتنع بعد دخلت فيهو كره السنين لي الضعف وقلة الحيلة والفقر، علمتو إنو يستغل اي مرا واي بت تقع في يدو في المستقبل ويعمل من وراهم شغل ويلم ملاين الملايين، إتزكر إنو اختو اغتصبا واحد من ضيوف امها والوجع قلبو انو امو مانزلت دمعة ولا حست بي الذنب بي العكس فهمت البت إنو الشرف مامهم ودخلتا في شغلها وكسبت بيها قروش اكتر، ولما الطوبة جات في المعطوبة واختو حملت بي الحرام ودتا وسقطتا بدون اي إحساس بي الذنب وفي الاخر دبرت ليها زواج من راجل اكبر منها كتير ورمتا تحت رحمتو وسافر بيها بعيد وبقت ليهو خدامة بس ليهو ولي اصحابو وبعد سنين حملت بي عمر وبعد ولدتو هربت من الراجل ده وشالت اوراق عمر كلها وجات عند امها، وقتها كانو رحلو وجو العاصمة وامو وسعت نشاطا وشغلت بنات تحت يدها وهو خلاص إتشرب الموضوع وإشتغل فيهو بس كسرة نفسو في اصلها امو وجرحو مابرا منها لحد الآن، خلتو إنسان قلبو ملان بي السواد وضميرو إتعدم وبقى شيطان رجيم في هيأة إنسان، وكان كاره إنها تكون امو وكره النسوان بسببا عشان كده عمرو ماعرس ولا كانت ليهو حبيبة بس كان بلقى مزاجو في اي وقت يطلب، بعد امو ماتت بعد مرض كتير ودفنا بيدو رجع مع إلهام وزاولو النشاط ده ووسعوهو وإشتغلو بي كل الطرق الشريرة الحقيرة وكونو كيان مرعب وياما وقعو ضحايا بي ابشع طرق لحد ماوصلو عند النقطة دي، وحسي لقى نفسو قدام نفس الشخصية قدام ثريا الجميلة المغرورة متمثلة في جوليا، وبما إنو ماكان بتجرأ على امو قرر يروي خيالاتو ويمارس شرورو ورغبتو السوداء على جوليا المسكينة ويعاقب فيها امو الكانت ليهو عقدة حياتو ولازم يقطع العقدة عشان يرتاح.. إتصل على حامد وقال ليهو : خلي زهرة الكلبة والبنات الرسلتهم قبيل يجهزو الفراشة وايااااك زهرة تلمس شعرة منها بي ضر بحرقكم الاتنين، جهز الاوضة إياها انا جاي في الطرق، الليلة لازم اتمم الموضوع وادك الحصون
حامد بفرح : علم وينفذ ياريس، بركاتك ياظفوررر
ظافر : عايز كل شي تمام وماعايزكم تخدروها، عايزها صاحية ومفرفشة كده عشان تعيش القصة لحظة بي لحظة ههههههههههه
حامد: وانا ياريس لي فيها نصيب؟ بترجاك ماتحرمني يابوس بترجاااك
ظافر : بعد اقطع نفسها تماماً تواصل انت محل انا بقيف
حامد: اووووف كده لكن ماااااا صعبتها؟
ظافر : لو ماعايز انسى خلاص
حامد: لا لا حلو حلو هو انا لاقي؟
ظافر : يلا سوي القلتو ليك
حامد: على جناح السرعة حاتلقى كل شي جاهز
ظافر قفل الخط وإبتسم بي طريقة مخيفة وقال : جربي ولدك العملتي منو شيطان ياثريا وشوفي كيف نارو مستعرة وحاتحرقك وتحولك رماد.....
ظافر في طريقو لي المخباء وضباطنا جاتهم اخبارية مهمة جداً جايز تساعدهم في الوصول أخيراً لي جوليا وبقو في سباق خطير على الحافة....
يتبع........