عشقت صوتك 🔥 ( روايات ليبية )

حلقة 9🔥

عشقت صوتك الجزء الثاني9
أنا حوشكم يهبل كل شي فيه حلو
فرح هذا كله ذوق حكيم تعرفي كل شي ف الحوش بنديروه لازم نأخدو رايه
أنا اها كويس
فرح تعرفي الحوش من غيره مظلم هوا نوارة البيت يطلع فينا ويضحك فينا الحق مانقدروش نتخيلو حوشنا من غيره وكان تشوفيه كيف يعاون فينا ف المطبخ يطيب معانا ويغسل معانا ف الماعين
أنا ربي يخليه ليكم
فرح تسلمي يارب ويحفظلك أحبابك
كنت محتاجة الصراحة لتغيرت الجو تعرفت ع هلبة بنات والصراحة ناس تنحب ومشاء الله عليهم
حكيم أسمعي فروحه طلعيها للخيمه فاضية خاطري نشوفها
فرح البنت تعبانه من بترقد
حكيم لاتعبانه لاعقرب أسمعي الكلام وطلعيها
فرح تي باهي
أنا كنت طالعه من الدوش ونجفف ف شعري
فرح لولو شن رأيك نطلعو للخيمه ونشربو طاسة بردقوش تخليك ترتاحي
أنا اللهم إن كان هذا سحر فأبطله
فرح ههههه ضحكتيني خيرك
أنا شن برقدوش لابرقيوش
فرح البردقوش هدي عشبه كويسة تستعمل لهلبة حاجات وأهم حاجة تزيد هرمونات الأنوثه عند البنات
أنا هيا وطلعنا للخيمة كانت فاضية قعدنا ف جيهة وقعدت فرح توري فيا ف صور بيانها حي وكان تشوفو خطيبها طرف مافيش زيه بكل
فرح توا نجيك نمشي نجيب مخاد نتكو بالك يلحقونا البنات
أنا تمام
فرح خش شوية وأطلع مرات بيلحقو البنات توا ديرلنا مشكله
حكيم مش معطل أصلآ
أنا نتفرج ع صور فرح ومنسجمه ونسمع ف واحد ينادي فرح يافرح
أنا شفتله وكان حكيم الحق انا خشيت ف روحي وتحشمت والمشكله طالعه من غير وشاح
حكيم السلام عليكم
أنا وعليكم السلام
حكيم اسف مانحسابك قاعده هنا
أنا فرح كيف خشت توا تجي والحق ماقدرت نوض التوتا قصيرة
حكيم كيف حالك وشن اخبارك
أنا تمام الحمد لله
حكيم عجبك الجو عندنا
أنا الحق حلو جوكم
حكيم والله مافي شي حلو الا أنتي
أنا نعم
حكيم تبسملي قتلك كلك ذوق
أنا تسلم يارب
حكيم ليلى ومانعرفش كيف قالها بطريقة تخليك تنوضي تجري لحضنه
أنا شفتله وجت عيني ف عينه نعم
حكيم كان جت فرح قوليلها دورك حكيم
أنا هزيت براسي وطلع
الصراحة وبجديات أول مرة نلاحظ إن حكيم شخصيه وجنتل وأسلوبه حلو وضحكته تهبل وخطر عليا وسيم
وسيم كولي حتى شوية
ترتيل ماخاطريش وسيم بعد السفرة من عني
وسيم لأمتى باهي بتقعدي هكي
ترتيل خايف عليا
وسيم إنتي أمانة عندي ماتنسي إن بوك موصيني عليك
ترتيل أطلع وخليني ف حالي لو سمحت
وسيم رفع السفرة وطلع
أم وسيم مافيش فايدة
وسيم خليها براحتها يام وخشي أرقدي تعبتك معايا
أم وسيم تصبح على خير
وسيم وأنتي من أهل الخير
فات يوم الحنة وكان حلو
وجاء يوم الخميس لبست مروة الفيلو وطلعت تهبل عيلة حكيم نقشهم يهبل الحق
انا لبست قفطان أسود لفوق الركبة وفيه كمام شفافات ويلمع درت شعري ع جنب ومكياج
فرح شن ديري
أنا ندير ف كريم الأساس عاى ركبي ماتشوفيش فيهم سود
فرح ههههه والله إنتي
أنا ترا شوفيهم باينات
فرح لا طالعه تهبلي
فرح لبست قفطان طويل موفي مفتوح من فوق ودارت مكياج طلعت تهبل
خالة فرح يابنات مازال ماكملتو
فرح أنا وليلى كملنا
منتهى نحنا مازال وكانت الدار معبيا بنات الى تمكيج والى تسشور والى تلبس جو الاعراس يعني
خالة ليلى فرح اطلعي إنتى وليلى شوفو الخيمة ورتبو الطاولات
فرح هيا توا نطلعو وطلعنا
انا وفرح نرتبو ف الطاولات ونوزعو عليهم ف الحاجات ويخش علينا حكيم
انا شهقت بصوت عالي وهوا من الخلعة قعد واقف ويشوف
فرح حكيم خيرك
حكيم طلع يجري
أنا حي ياحشمتي شافني بالمنظر هذا
فرح خلي نطلع نشوفه وطلعتله
حكيم أسمعي
فرح انت خيرك ماعندك فرينوات خاش علينا هكي
حكيم خالتي قاتلي المنظومة ماتبيش تولع خش شوفها
فرح البنت قريب تتعقد من وراك
حكيم بالله عليك صوريها وأبعتيهالي صورتها طالعه تهبل
فرح إمشي ياسخيف والله لما نخبر ماما
حكيم خبريها أصلآ بنخطبها أنا
فرح إمشي ف حالك توا بعدين ساهل
بدت الناس تجي والخيمة مشاء الله تعبت بالناس
نسمعو ف الكلاكسات والرمي بالرصاص
فرح مروة وصلت
الى ف الخيمه كلهم تسترو لان حكيم ومحمد خوه كانو مدخلينها الحق منظرهم يهبل
فرح شدي الكاميرا وتعالي صورينا
أنا تمام وقعدت نصور فيهم
محلاهم كانو مع بعضهم مروة متأثرة وقعدت تبكي
حكيم يمسحلها ف دموعها
رقصنا وهيجنا والجو كان يهبل وخش راجل مروة وطلعها وودعو البنات أختهم بالدموع وحتى هيا قعدت تبكي وبكوني معاهم دكرت غزلان صاحبتي وأختي وحبيبتي
ف الليل قعدنا ف الخيمه نحنا والبنات جو ضحك وهدرزة وبعدها لدو ينسحبو بالوحدة الى خشت رقدت والى مشت تكلم ف كبيدتها وحتى فرح تباعدت عني وقعدت تهدرز مع خطيبها طلعت من الخيمة وقعدت ع العتبة البرا حطيت السماعات وقعدت نسمع ف الأغاني لعند حسيت بحد حط إيده عليا
أنا نخلعت وشفت ورايا لقيته حكيم
أنا حولت السماعات ونضت واقفة
حكيم أسف خلعتك بس من بكري نادي عليك ومارديتي
أنا كنت حاطة السماعات
حكيم شن ديري هنا بروحك متخافيش
أنا ليش بنخاف
حكيم ماهو أنتو البنات تخافو حتى من ظلكم
أنا فيه حاجات نخاف منهم وفيه حاجات لأ
حكيم وين فرح
أنا خليتها ف الخيمة ونسيت مبروك ع أختك وعقبالك
حكيم الله يبارك فيك قولي عقبالنا
أنا مافهمتش
حكيم يعني عقباالك حتى إنتي وطلع شكلاطة باونتي من جيبه ومدهالي
أنا لاشكرآ مانبيش
حكيم والله الا بترفعيها
أنا رفعتها شكرآ عندك علم إنى نحبها هلبة باونتي
حكيم حتى أنا نموت فيها وكان يشوفلي كأنه يقصدني ف الكلام
أنا شفت للساعة حى الساعة 3 شن بينوضني غدوة تصبح ع خير
حكيم وإنتي من أهل الخير
وسيم مقعمز ف الدار ويتفرج
ترتيل فاقت من النوم تبكي
وسيم قرب عندها خيرك يوجع فيك شي
ترتيل مانعرف خاطر عليا نبكي وخلاص
وسيم تبي شي خاطرك ف شي
ترتيل خاطري نرقد ف حضنك
وسيم قرب ورقدها ف حضنه
الله ع النفاق والدلع ياترتيل عرفتي كيف تجيبيه ولاخليكم مع وسيم والشهامة الى زايدة عن حدها🤦‍♂️
فى الصبح
انا بابي ستاحشتك
بابا أطلعي انا البرا خلي نشوفك
انا لبست المصلية من فوق وطلعت
بابا أهلآ اهلآ وحضني
أنا بابا كيف حاالك وين جاد وإياد
بابا راقدين خليتهم
أنا فطرت
بابا ايه الحمد لله شن عجبك الجو
أنا هلبة عجبني وعيله عمي أسامة مشاء الله عليهم
مع جيت عمكم حكيم جايب الخبزة وسلم ع بابا
أنا امتى بنروحو
بابا شني قلقتي مش توا قلتي عاجبك الجو
أنا مش قصة قلقت لكن يوم الأحد عندي إمتحان
بابا غدوة مروحين إن شاء الله
حكيم خيركم مستعجلين مازال أقعدو
بابا حكم القوي المديرة طلع عندها إمتحان ومانقدروش نقعدو
حكيم شن هيا بتحضر الدرة هوا إمتحان كان فات تعوضه
أنا والله يوم الى تطلع النتيجة ونلقاهم حاطيلى ر شن بتنفعني إنت
حكيم شني ر
انا راسب
حكيم قولي كعكة مش راسب
وقعدنا نضحكو
يتبع