زمان، وأنا لما أقول زمان يعني زماااان! سألت وحده بتفهم في الدين.. بيصير أقول: اني أحس الله بيحبني؟ الحمد لله قالت لي هذا شعور طبيعي ومش عيب ولا حرام تقولي هيك.. !! المهم ، مرت بي الأيام والحياه والتجارب واكتشفت ..إنه الله مش بيحبني انا وحدي! وإنما بيحبنا كلنا ! الله خلقنا عشان بده إيانا كلنا نروح عالجنه!! وبعث الأنبياء والكتب السماوية ودلنا على طريق الجنه وحذرنا من العدو الحقيقي!.. وسبحان الله كيف في أشياء بتصير مع الواحد بتسم بدنه للوهلة الاولى بس مع الأيام بيكتشف انها كانت للأحسن! ومقوله (لعله خير) تلازمني دائماً.. وأثرت فيّ قصه الاعرابي اللي خلال أسبوع فقد أغلى ما يملك وكان تعليقه كل مره (لعله خير)..اول مره لما مات حماره (اللكسس تبعه!) وتاني مره لما مات الديك الوحيد اللي عنده! والديك هذا مش عشان يقول كوكو كوكو عالفجر ! وانما هو المسؤول الأوحد وراء بيضات المزرعة! وكملت معه لما صحي ولقي كلبه اللي بيحرس خيمته ميت! انجنوا الناس منه ليش كان ما يقول غير (لعله خير)!!! وفعلا طلع خير .. لانه في ليله ما لها ضوء قمر ، هجموا قطاع الطرق على القريه قتل وسرقه ونهب ! واللي كان يدلهم على الخيم اللي بعيده عن بعضها ، كان صياح ديك أو نهيق حمار أو عواء كلب !!! يعني حتى وانت عندك شغله مضايقتك ومش قادر تفهم ليش هيك عم بيصير معك ، لازم يكون عندك ثقه وقناعه تامه انه هذا اللي عم بيصير أكيد لمصلحتي لإنه الله بيحبني ! واذا هلق انا مش شايف ولا فاهم ، مع الأيام رح اشوف وبعدين أفهم !!... أحبك ربي ..
