زبون عندي من زمان .. فيه اللي مكفيه.. زي ما بيقولوا.. طلب مني دواء عشان فقدان الذاكره قال له عليه دكتور.. وكان كتير مستعجل عليه .. وألح بكم تلفون .. والمشكلة انه طلبه بده اياه بنفس اليوم والمستودع بناعور مش رح يوصل الدواء الا بكره.. !!هلق اعتذرت له وفهمته انه الدواء مش رح يوصل اليوم.. طلعت شو القصه ؟؟؟ الدواء ثمنه سبعين دينار( يعني ١٠٠دولار) ومش له.. وانما تبرع لمريض ختيار حتى مش في عمان ! المريض حالته الماديه متواضعة جدا والدكتور طلب صوره أشعه ورنين مغناطيسي وتحاليل.. حمل حاله هالرجل وراح بسيارته على اربد وترك شغله ..أمضى النهار مع المريض العجوز فحوصات وتصوير .. وجاب النتائج للطبيب في عمان عشان يكتب للمريض على دواء مناسب لحالته.. بالطريق قريب من جرش مع بدايه العتمه ،ما لقي حاله الا عامل حادث سير الله ستره فيه!!!! قال لي: سواقتي على قدي يا ام حكم وما اشوف بالليل..!! وانا اعرف اصلا أولاده بس بدهم راحته وطلباته أوامر..! المهم سبحان الله .. اكيد ناله دعوه صادقه من هالختيار المريض دفعت عنه بلاء الحادث .. اللي كان ممكن يروح فيه.. انا قلت له هذا يؤكد صدق نيتك يا ابو فلان والله عالم بصدق النوايا..الله يجازيه كل خير ويكثر من أمثاله..
