رجعت البيت لقت اخوها جهاد راجع ونازل من عربيتو ناداها
جهاد: يداب راجعة ... كنتي وين
جوان: كنت مع اصحابي
جهاد : مش قلنا نخفف طلعات بالليل و نرجع بدري
جوان : اووف جهاد ماتبقى معقد بابا قال ليك بثق فيني ... مافي داعي كل يوم تعمل لي موشح القاها منك ولا من هيثم
جهاد : ماهو لو استاذ هيثم دا ينجز ويتم العرس بسرعة عشان نخلص منك يوفر علينا كتير
جوان : تطردني من بيت ابوي كمان ... المهم خلينا مني انت سهرتك كانت وين ومين المزه السرقت قلب اخوي الوجيه
جهاد : ماعندي مزه غير الشغل ... البركة في هيثم من عملنا شركة الاستيراد والتصدير و هو مطلع زيتي ... كنت فاكر ابوك صعب لقيت خطيبك اصعب بمراحل
جوان : طالما السيرة اتفتحت .. ساعدني انا غلبت معاه ... بلييز فهمو ان الحياة ماشغل بس لاني خلاص اتخنقت
جهاد : هوي احنا ناس بزنيس ما لينا بلعب العيال حقكم ... يلا سلام و تاني ما اشوفك تتأخري كده .
في الصباح ... المنبة بتاعها بضرب مدت يدها فقلتو وهي تحت البطانية .. بتتأفئف اوووف يا هسي لزومو شنو من الصباح جامعه و محاضرات و وجع قلب .... باب غرفتها بدق ... جيهان دخلت و بتقول ليها .. قومي يابت شنو الكسل دا مش عندك جامعه
جوان رفعت راسها و بتدعك في في عيونها ... ايوا عندي زفت
جيهان : قومي بطلي دلع .... مين قال ليك امبارح تساهري لنص الليل
جوان : جيجي حبيبتي مارايقة ليك خالص ... كفاية العلي اصلا الجامعه دخلتها تحصيل حاصل وعشان كلكم نقيتو فيني لا حابة الهندسة ولا طايقاها ...الدكاترة سخيفين و الطلبة اسخف منهم
جيهان : يوميا بنسمع الكلام دا استغفري يابت و قومي
قامت من سريرها .. اخدت شور .. غيرت ملابسها شالت حاجاتها و نزلت الهول لقت امها و ابوها قاعدين بشربو شاي و يتونسو ... سلمت عليهم ... باست راس ابوها ويد امها وقالت ليهم : عصافير كناري بتغرد و ربي .. بتحنك مدام انصاف من الصباح يا حاج كمال ولا شنو الحكايه ... وغمزت لابوها
انصاف : يابت احترمي نفسك شنو الالفاظ دي
كمال : الجيل دا كلو كده ما تتعبي روحك ساي
جوان : حبيب هارتي انت امممح
انصاف : اصلا مافي زول خارب البت دي و مطلعها فوق راسنا غيرك
كمال : مش أخر العنقود عيون ابوها يحق ليها الدلع
جوان : ايوا كده هنا الانصاف و العدل يامدام انصاف
انصاف : استغفر الله بس
جوان : انا اتأخرت لما ارجع نكمل تمام ... خليكم زي ما انتو كده بتغردو مع بعض..ابتسمت ليهم و طلعت .
من اول ماركبت عربيتها و هي بتتصل على هيثم لكن هو مابرد عليها ...اتصلت كم مره و مافي رد ... اتضايقت شديد ... وقالت اوووف وبعدين معاك اتصلت تاني المره دي رد عليها
جوان : صباح الخير حبي
قاطعها انا في اجتماع و قفل الخط .. اتنرفزت ورمت التلفون بغضب في الكرسي الجنبها ... متوترة بتضرب الديركسون بيدها ...فجأة الشارع وقف ... العربيات كلها واقفة وفي حافلة قدامها قافلة الطريق ... بقت تضرب بوري لكن الحافلة لسا وافقة ما اتحركت ... علقت يدهاعلى البوري و من جوا فايرة معصبة شديد ... لمحت الكمساري فتحت الشباك و بتناديه ... ياهيي انت ماتتحركو شنو معطلين الشارع على حسابكم
الكمساري : بالهداوة يابتنا .... البطارية شكلها نزلت و بنحاول نصلحها
جوان : و انا مالي خلصونا خلينا نشوف اشغالنا ... شيلو الخردة دي من نص الشارع عشان نقدر نعدي
الكمساري : ماقلنا صبرك علينا ..دقايق و نفتح الطريق
جوان : انت عبيط ولا اهبل بقول ليك زح من الطريق تقول لي دقايق .. رايك شنو انزل الزها ليك
الكمساري : ياريت يكون حصل لينا الشرف
جوان : يازفت انت بطل خفة دم مصطنعة و خلصنا
الكمساري : مش عشان عدينا ليك الاساءة الاولى تسوقي فيها .. قلت ليك صبرك شويه ... ومشى خلاها زعلانة تهرج براها
دقايق و صلحو الحافلة بعدوها من الطريق فتحو الشارع ... العربيات اتحركت من غضبها داست بنزين بسرعة عايزة تطلع لقت الكمساري في وشها ... قربت تصدمو داست فرامل بقوة وقفت... هو خبط على العربية بزعل وقال ليها ...عارفين عطلنا حضرة سيادتك لكن برضو مابديك الحق تخبطي في الناس كده.
عاينت ليه من فوق لتحت وقالت ليه ..هو فين الناس ديل انا ماشايفاهم ... حركت عربيتها ومشت ( ازمة مواصلات بقلم شيماء عثمان )... أثناء ما هي بتسوق جاتها رسالة على الواتساب من رقم غريب محتواها .. بحبك وحفضل طول العمر بحبك .. استغربت شديد ... ضربت للرقم لقتو مفصول احتارت في الكلام بس ما اهتمت للامر .
وصلت الجامعة لقت المحاضرة بدأت .. دخلت القاعة بدون ماتستأذن ... الاستاذ بناديها .... ياأخت ... ما اشتغلت بيه قعدت في الكرسي جنب هالة صحبتها
الاستاذ : ياطالبة .. مش بتكلم معاك
ماردت عليه بتلعب بتلفونها... تاني ناداها ... اتحرك وقف قدامها زعلان .. اعتقد اني بتكلم معاك يابت
جوان رفعت عينها عاينت ليه .. بت دي تقولها للبت الشغالة عندكم في البيت انا عندي اسم
الاستاذ : قومي على حيلك وانا بتكلم معاك
قامت بطريقة استفزازية و بطرف عينها قالت ليه ... نعم
الاستاذ : اسمك مين
جوان : جوان كمال الشيخ
الاستاذ : اتفضلي اطلعي برا و تاني مااشوفك في محاضراتي
جوان : شكلك ماسمعت الاسم كويس ... ابوي بملك ثلاث ارباع الجامعة دي ..الكراسي القاعدين عليها حقة ابوي ... القاعة الواقف عليها حقة ابوي ... المرتب البتاخدو كل شهر من جيب ابوي ....ابدا مايحق ليك تطردني
الاستاذ : اسمعي يابت قلة ادب و طول لسان ماعايز شيلي حاجاتك واطلعي سريع قبل ما انادي الحرس يرموك برا
جوان : يرمو منو ههه قول نكتة غير دي
انور قام من مكانو وقف جنبها ... جوان اطلعي بعد دا عيب المدرج كلو بتفرج فيك
جوان : اسكت انت مابخصك ... عايزه اشوف الليلة مين يترمي برا
الطلبة اتضايقو وبقو يتكلمو مع بعض بهمس ... الاستاذ واقف بعاين ليها و هي مربعة يدها بتعاين ليه ... جا مهند من اول القاعة مسكها من يدها ... تعالي معاي
جوان : ابعد عني
مهند : تعالي اسمعي الكلام
جوان : مهند فك يدي
مهند : اطلعي قلت ليك .... ماسكها من يدها بقوة وطلعها من القاعة ..
( في الوقت الحاضر )......
تحبي استخدم معاك اي اسلوب الضرب ولا الاغتصاب.... قعدت تبكي ...ابوس يدك ما تأذيني ابوس رجلك ارحمني .... ماعندك اخوات ... بترجاك ماتعمل فيني حاجة والله العظيم ماعارفة الشنطةالبتتكلمو عنها دي ولا فاهمة حاجة ..اصلا ماقادرة اتذكر الحصل ... قرب من اذنها و بهمس ليها .... جوان كمال الشيخ تترجى وتبكي اكيد دي معجزة سبحان مغير الاحوال .... شفتي الدنيا دوارة كيف
سكتت شوية ..قالت ليه صوتك ما غريب علي هو انا بعرفك
_ كل شي جايز
جوان : انت مين
_ مامهم
جوان : متأكده صوتك ماغريب علي لكن ماقادرة اتذكر ...انت بتعرفني صح
خت يدو في فمها ...اشش اسكتي خالص ما اسمع صوتك ... قرب من اذنها زيادة حتى انها حست بشعر دقنو في وشها ... عايزة تتكلم ماقادره هو خاتي يدو في فمها ... بقت تبكي بصوت مخنوق .... قال ليها اهدي لو فضلتي تعملي كده حتخسري حياتك .... اسمعي كلامي تضمني نجاتك .... ساعديني عشان اقدر اطلعك من هنا .... المكان كلو مراقب بالكاميرات ... حفهمهم انك طلبتي ماتتكلمي الا معاي و انا بحاول باسرع وقت اطلعك من هنا .....بعد شويه بخليهم يجيبو ليك موية واكل ... بتتكلم بهمهمة ... زح يدو سألتو انت مين .... غطى فمها تاني ماتسألي تنفذي و بس لساما اتعلمتي ..
جوان : طيب انا عايزة امشي ال....ااااا
_ قصدك الحمام
جوان : ايوا
_ معانا بت بتجي تساعدك لكن مامسموح تشيلي ربطة العين ولا حتفك يدينك هي بتجي و بتأكلك ماشي
جوان : حاضر ..بس قول لي انا وين
_ مش قلنا ما تسألي .... لكن لو حابه تعرفي يا أنسه بغبائك دخلتي مغارة الشيطان برجلينك .
لنا لقاء أخر
