هيثم : داخل لابوك و اعملي حسابك العرس بعد شهر
جوان : انت بتقول شنو!! ... دقيقة بتكلم معاك ... هيثم يالله منك
وضاح كان واقف بعيد بعاين فيهم و هي واقفه محتار ... دخلت البيت .. هيثم قابل ابوها حددو العرس واتفقو على كل التفاصيل ... كانت قاعدة في نصهم و ساكتة حاج كمال سالها مالك ماعلقتي على الموضوع
جوان: ابدا ... كنت فاكرة الموضوع بخصني
هيثم : كيف يعني مابخصك دي حياتنا
جوان : افتكر كنا متفقين الزواج بعد التخرج
هيثم : مشكلتك شنو حبيبتي
جوان : ولا شي ... عن اذنكم
هيثم : ماشه وين
جوان : اجهز حالي مش قلت العرس بعد شهر يادوب ألحق ارتب اموري
و طلعت غرفتها قفلت الباب و اتصلت على اختها جيهان كلمتها بالحصل
جيهان : الف مبروووك حبيبتي ...احلى خبر والله
جوان : انتي شايفة كده
جيهان : في شنو جوجو مش دا هيثم الصدعتينا بيو ولد الوزير الخطف قلبك
جوان : تصدقي لو قلت ليك ماعارفة عايزة شنو
جيهان : طبيعي تحسي كده ... دا زواج مالعب و مرحلة انتقالية في حياتك شويه خوف على شوية ارتباك لكن في النهاية الحب اقوى من كل المشاعر دي ... صح
جوان : اكيد
جيهان : من بكرة برحل معاكم عشان نرتب لعرس زوجة نجل الوزير
جوان : صححي معلوماتك .. زواج جوان كمال الشيخ
جيهان : حاضر ياستي
قفلت من اختها و قعدت تفكر ... في الصباح لبست ملابسها جهزت حالها عشان تمشي الجامعه وهي طالعة بتتلفت تفتش في وضاح بس على غير عوايدو ما شايفاه برا ... ركبت عربيتها و اتحركت وصلت الجامعة ... لما جات تدخل صادفت هالة جنب البوابة
جوان : هلهول ... حمدلله على السلامة
هالة : الله يسلمك
جوان : بقيتي كيف
هالة : الحمدلله عدت على خير
جوان : خلاص بعد دا نكون قويين و ننسى الحصل اتفقنا
هالة : ماتختي في بالك
جوان : يلا اتأخرنا
دخلو مع بعض لقو اصحابهم كلهم قاعدين ماعدا انور ... سلمو عليهم و قعدو معاهم
هالة : مافي محاضرة
بسمة : الظاهر كده الدكتور اتأخر شديد
علاء : احسن زاتو يارب على طول يتأخر
سحر : وينكم انتو الاتنين بتظهرو في الشهر مرة
جوان : مش برضو البدر بظهر مرة في الشهر ولا الحكاية اتغيرت
سحر عاينت ليها بطرف عينها .... لو اعرف مين الزول الغاشيك كده .... انور جا داخل جر كرسي و قعد بدون مايقول كلمة خلاهم كلهم مستغربين ... مهند سألو وين مختفي يازول ماخليت مكان ماسألت عنك فيه
انور : سافرت بورتسودان الحاج تعب شويه
مهند : تعال عايزك على جنب
انور : ماوقتك خالص
علاء : في شنو ياجماعة
انور : مافي شي و اصلا مهند بتاع تشغيلات
هاله كانت بتعاين ليه و العبرة خانقاها بتحاول تحبس دموعها عشان ماتنزل تفضحها .. انور متجاهلها تماما و كأنها ماموجودة ... جوان لما شعرت بيها و حست ان الجو مكهرب جبت تغير الموضوع
جوان : طبعا نسيت اهم حاجة ... اعملو حسابكم عرسي انا وهيثم بعد شهر
بسمة : بالجد .. ألف مبروك
علاء : حرم الوزير واخيرا جا اليوم واشوفك عروس
هالة : بالجد خبر حلو الف مبروك حبيبتي فرحت ليك
جوان : تسلمي حياتي عقبالكم قريب
سحر : مش كان مفروض العرس بعد التخرج
جوان : كان كده لكن هيثم حبيبي امبارح جا و اصر على بابا نعجل العرس لانو مابقدر يعيش بدوني ثانية
انور عاين ليها بطرف عينو .... الله يهني سعيد بسعيدة
جوان : بنات بكرة تمشو معاي عشان المصمم ياخد مقاساتكم لفساتين الشباين
بسمة : وفستانك انتي
جوان : اكيد فستاني بتصمم برا السودان
علاء : و بالنسبة لينا احنا فساتيننا وين اقصد بِدَلنا وين
جوان : من عيوني انت أأمرني بس .... التفتت لمهند القاعد ساكت بدون مايقول كلمه قالت ليه .... مستخسر علي كلمة مبروك
ابتسم نص ابتسامة ... ألف مبروك ياستي بتمنى ليك حياة سعيدة مع القلبك اختارو
جوان : واضح انها من ورا قلبك لكن برضو بقبلها الله يبارك فيك و عقبالك
مهند : عن أذنكم
بسمة قامت وراه طوالي .... علا بعاين لسحر قال ليها في شنو يابت قطعتي كل اظافرك من قبيل تاكلي فيهم .... ردت عليه في شنو يعني عادي
جوان : ماتشغل بالك نفسنه بايرات لا اكتر
سحر : بايره مين ياانتي .. انا لو قلت ياعرس اجيبهم عشرة دي هيثم بتاعك واحسن منو كمان ... بس عندي اهتمامات اهم من الكلام الفاضي دا
جوان : بتعرفي ياهالة المابحصل العنب بقول عنو شنو
هاله : شنو
جوان : حاااامض
انور : تصدقو ونستكم هي البقت حامضة يلا ماشي
جوان : هو في شنو الناس دي مالها
علاء : الظاهر النفسنه عامة
جوان : انا كمان ماشه تعالي هلهول نفطر برا
بالمسا رجعت البيت فتح ليها البواب عم الزبير سألتو وين وضاح .
الزبير : مشى البلد من الفجر بدري
جوان : ليه
الزبير : امو تعبت شديد
جوان : طيب تلفونو كم
الزبير : يابنتي انتي قايلة مشى ابوظبي ... بلدنا مافيها شبكة
جوان لو انت عايز تتصل تعمل شنو
الزبير : هم بمشو منطقة قريبة فيها تغطية و بضربو لي
جوان : تمام لما يتصل خليه يكلمني ضروري
الزبير : خير يابتي في حاجة
جوان : ابدا حاجة بسيطة
دخلت لقت امها و جيهان قاعدين في الهول بتونسو انصاف رفعت راسها عاينت ليها .. طبعا رايقة ولا على بالك والجوطة كلها فوق راسي ...قربت منها باست راسها وهي بتبسم ... قعدت جنبها
جوان : مالو الجميل داقي جرس
انصاف : لازم ادق اجراس ... عرسك دا ولا عرسي مش مفروض تكوني معانا تشوفي الحاصل
جيهان : ايوا يابت كلها كم يوم بعدين الوقت بسرقنا
جوان : انتو تاعبين روحكم ليه اي حاجة تجي جاهزة ماعليكم الا تهتمو ببشرتكم و تيابكم اشكال الحنه الميك اب و التساريح
انصاف : بالله هو العرس عندك كده ياهبلة ... في ريحة .. سدمال ... فطور عريس .. جرتق ومليون حاجه تانيه
جوان : كل دا ماصعب تجيبو خدم يعملو ليكم ... انتي اطلبي بس وهم ينفذو
جيهان : واي من برود اعصابك
انصاف: غايتو بعد العرس بجيني ضغط
جوان : سلامتك حبيبتي مش سمعتي امبارح هيثم مع بابا قال ليو مسألة الصالات والفنانين كلها محلولة متوترة ليه ياست الكل
انصاف : زول يفهم لي البت دي العرس ما حفلات بس
و اثناء ما هم قاعدين جا جهاد نازل من غرفتو عاين ليها سألها ... خطيبك حكايتو شنو مابرد على تلفونو
جوان : ماعارفة من الصباح ما اتكلمنا
جيهان : الناس بتسلم بالاول يااستاذ
جهاد : جيجي تصدقي ماشفتك ازيك
جيهان : الشاغل عقلك
انصاف : شنو ياولد ليك كم يوم ماطبيعي طوالي جايط و مشغول راسك دا فيو شنو
جهاد: فيو مصايب حقة الشغل دعواتك بس ياغالية ... عاين لجوان قال ليها .... عرس شنو بعد شهر انتو الاتنين
جوان : في شنو الله
جهاد: استاذ هيثم بتاعك يخلي الشركة تتطربق فوق راسي و عايز يتهنى يتزوج
جوان : دي غيرة جديده ولا شنو
جهاد : غيرة شنو انتي هبلة انا لو جابو لي واحده من الحور العين ماداير عرس
انصاف : داير تفضل صايع عمرك كلو
جهاد : ياحجه ... عرسي لبناتك ... يلا سلام
جوان : انا اطلع اغير ملابسي و ارجع ليكم
دخلت غرفتها اخدت شور لبست بجامه و طلعت تلفونها من شنطتها لقت مكالمة فايته من هيثم عايزة ترجع ليه جاتها رسايل ورا بعض من رقم غريب ( أزمة مواصلات بقلم شيماء عثمان) ....كانت الرسايل عبارة عن ارقام مامفهوم المقصود منها شنو ... رسلت ليه علامة استفهام .. رسل ليها تواريخ كلها قبل سنة .. ردت عليه برسالة ..مليون مره قلت ليك خليك شجاع وقول انت مين .... رسل ليها التاريخ المحدد فيه يوم زفافها ... استغربت قالت ليه دا تاريخ زواجي قصدك شنو ..... سكت مسافة دقيقة بعدين رسل ليها رسالة محتواها ...
مين خدعك وقال ليك دا تاريخ زواجك .. دا تاريخ نهايتك جوان كمال الشيخ !!! .
لنا لقاء أخر ......
