مين خدعك وقال ليك دا تاريخ زواجك ... دا تاريخ نهايتك جوان كمال الشيخ ..
فجأة قلبها اتقبض خافت بقت ترجف و قبل ماترد عليه لقتو حضرها ...فضلت ماسكة التلفون و بترتعش قاطع توترها صوت تلفونها برن كان هيثم بتصل من خلعتها رمت التلفون من يدها ... بعد هدأت رفعتو من الارض و ردت عليه بصوت مبحوح أ أ ألو
هيثم : حياتي ... كنتي نايمه
جوان : لا
هيثم : طيب مالك صوتك متغير
جوان : تعبانه شويه
هيثم : مالو حبيبي انا ... تعبان من شنو
جوان : هيثم
هيثم : عيونو
جوان : انا محتاجاك
هيثم : حبي في شنو .
جوان : خلينا نعمل العرس بسرعة ونسافر من هنا مخنوقة شديد
هيثم : قلبي انا اصلا مسافرين ... نلف اوروبا شهرين كاملات لما تزهجي
جوان : بالجد
هيثم : وانا عندي كم حبيبة عشان ادلعها
جوان : تسلم لي حياتي
هيثم : وينك من الصباح
جوان : في الجامعة وكده
هيثم : وبعد بكرة عندك شنو
جوان : غالبا بكون بجهز حاجاتي في السوق ولا في مركز العناية بالبشرة كده يعني
هيثم : لا لا بعد بكرة دا يومي براي فاهمه
جوان : مافهمت قصدك شنو
هيثم : شكلك عجزتي و ذاكرتك بقت ضعيفة ... اشوف لي عروس تانية ولا كيف
جوان : بالله ... لكن صدقني ماعارفة قصدك
هيثم : شوفي التقويم ... بعد بكره يوم كم
جوان : 15\7 صح برضو ماعارفة ...... وااااي حبيبي والله نسيت طلع من بالي خالص
هيثم : في زول ينسى عيد ميلادو
جوان : اعمل شنو مية حاجه في راسي
هيثم : عشان تعرفي وتبطلي تقولي لي انت مابتهتم بي و انت طوالي مشغول مني
جوان : ماقادرة اصدق انك متذكر عيدميلادي اول مره تعملها
هيثم : حبي صدقيني انا زول ظريف و رومانسي لكن شغلي ظالمني
جوان : تسلم لي ياعيوني
هيثم : المهم جهزي نفسك نسهر ونتعشى سوا ..برسل ليك لوكيشن المكان ظابط
جوان : يعني برضو ما حتجي تسوقني
هيثم : ما تخليني امشي المكان بدري اجهز للسهرة
جوان : اذا كده ماشي ياسيدي ... يلا هسي عشان جيهان بتنده علي ... قفلت الخط و طلعت من غرفتها نزلت ليهم ...
جيهان : ساعة لكن ... ماكان تغير ملابس
جوان : في شنو يابت
جيهان : تعالي عشان تختاري التياب نكلم المصممة تجهزهم ليك ... اتأخرت ماشه بيتي
جوان : بيتك شنو كمان مش قلتي بتقعدي معانا
جيهان : مأمون قال لي لما يفضل للعرس اسبوعين اقعد معاكم .... مابقدر يقعد في البيت براه
جوان : ياشيخة .... و دكتور مأمون ماعارف انو عرس اختك ولازم تكوني معاها طول الوقت ... اتكلمي مع بتك ياماما
انصاف : خليها تمشي لراجلها اصلا هي كل يوم معانا
جوان : طبعا عشان ولد اختك لازم تدلعيو
جيهان : بكرة لما تتزوجي تفهمي كلامي المهم شوفي التياب ديل اخر موضة طلعت .. اختاري منهم و بكلم المصممة بعد بكرة نمشي ليها لانها بكرة مافاضيه
جوان : بعد بكرة انا مافاضية
انصاف : عندك شنو ياختي اجتماع في مجلس الوزراء
جوان : هيثم محتفل بي بمناسبة عيد ميلادي
جيهان و امها بصوت واحد ... نعم !!
انصاف : مافي طلعة انتي محبوسة للعرس
جوان : بالله ياماما حركات ناس زمان خليها
جيهان : كلام ماما صح مفروض هيثم مايشوفك الا يوم العرس بعدين بشيل نورتك و تانيا عندنا حاجات اهم من حركات المراهقين دي
جوان : اتكلمو للصباح ماشه مع خطيبي اوك و بعد كده احبسوني براحتك ... جيبي الصور خلينا نتفرج .
