سحر : أنا زوجتك لو نسيت
هيثم : هسي عايزة شنو
سحر : انت بتلعب معاي .. مش وعدتني تعلن زواجنا و تنفصل منها ... مش قلت لي اننا حنفضل مع بعض طول العمر ... وهي مجرد غلطة في حياتك وبتصلحها .. اليوم البعدو اسمع منها ان عرسكم بعد كم اسبوع و هسي عامل ليها عيد ميلاد من الف ليلة وليلة .... انا ياهيثم اكون شبينه للبت الحتتزوج راجلي !!!
هيثم : ماتجي تمثلي علي دور الضحية ...انتي جريتي وراي من البداية و عملتي المستحيل عشان تلفتي نظري نسيتي ولا اذكرك و اي شاب في مكاني بعمل كده .. بت وفرضت نفسها علي ابقى عوير لو ما استغليت الفرصة ... انتي عارفه وانا عارفه العملتيه دا ابدا ماكان بدافع الحب كان كل همك تسرقي خطيب صحبتك توجعي قلبها بديتي المسلسل وانا ختمتو ليك .
جوان واقفة بعيد بتسمع وكل كلمة تنزل على مسمعها زي الصاقعة ... غمضت عينها فتحتها عينها وتاني فتحتها على أمل يكون حلم .... حلم شنو دا كابوس ... رجلينها ماشايلاها اتسندت على العربية الجنبها ... صوت الانذار ضرب ... إلتفتو هيثم وسحر مع الصوت شافو جوان واقفة معالم وجهها متغيرة .... عيونها بتقول كلام كتير و لسانها عاجز عن الكلام .... قرب منها هيثم بإرتباك .... حبيبتي انتي هنا تعالي معاي جوا بعرفك مابتحبي الظلام .... مسك يدها عايز يسوقها ... نفضت يدها منو بغضب و قالت ليه بصوت عالي .... ابعد مني
هيثم : حبيبي مالك
رفعت يدها نزلت فيه كف ماكان متوقعو .... قالت ليه .. انت اكبر كذاب شفتو في حياتي ... انت واحد خاين ... جبان و حقير
هيثم : دقيقة افهمك الموضوع شكلك فهمتي غلط .
جوان : ارتباطي بيك هو الغلط
هيثم : انا بحبك وعايز اتزوجك انتي
جوان : وسحر بالنسبة ليك شنو
هيثم : هو زواج عرفي ... مجرد ورقة اقطعها قدامك و نخلص
جوان : اسكت خلاص حافظ على الباقي من رجولتك قدامي .... انت طينتك شنو ياخ قرفانه منك و قرفانه من نفسي
سحر قربت منو مسكتو من قميصو وبتصرخ زي المجنونة ... قلت شنو تطلقني انا .... مابخليك .. فاهم مابسمح ليك لو ما زواجنا بقى رسمي ما بخليك فاهم
هيثم : انتي طالق و الورقة بليها واشربي مويتها ...إلتفت لجوان لقاها بتبعد بخطوات مترنحة ... شايلة حيلها بالعافية .. وصلت عربيتها طلعت المفتاح من شنطتها وهي بترجف ... بصعوبة فتحتها ( ازمة مواصلات بقلم شيماء عثمان )... شافت علاء من بعيد بأشر لهيثم ... هيثم بعد سحر منو بقوة و جاي عليها علاء بأشر ليها جوان انتظري لحظه
هيثم بناديها .. اوعك تسوقي العربية ... جاين عليها وبتكلمو .. ماتتحركي اصبري
وقف هيثم قدامها خت يدينو في العربية و بعاين ليها... رفعت راسها عاينت ليه بنظرة كلها خيبة أمل ممزوجة بمرارة طعم الخيانة .
علاء بقول ليها ماتسوقي العربية .... اسمعي الكلام ياجواااان
رجعت ورا ساقت عربيتها و ماشة بسرعة ..... جرا هيثم ركب عربيتو و علاء ركب معاه ماشين وراها .... عيونها مليانة دموع ماشايفة قدامها ... ضربت الدريكسون بيدها و صرخت صرخة صداها ملاء ارجاء المكان ... وهي في حالتها الصعبة دي رفعت راسها على انوار عربية جاياها من قدام .... لفت الدريكسون بعدت منها و داست فرامل لكن في حاجة مامفهومة جات من الناحية اليمين ضربت العربية طلعتها من الطريق ... اتقلبت كم مره و بعد ست قلبات العربية أستقرت مقلوبة رأساً على عقب و جوان جواها فاقدة الوعي ..
