( في وقت سابق) .....
مهند جراها من يدها و ضربها كف .... بقت مخلوعة خاتة يدها على خدها و بتعاين ليه وهو صاري وشو .... كل الفي المكان بعاينو ليهم و فجأة المكان الصاخب إتحول لسكون رهيب ... مسكها من يدها و طالع بيها برا هي معصبة و بتتكلم معاه ... فك يدي ... بقول ليك فك يدي ماعندك سلطة علي .... مهند دمو فاير لدرجة انو ماشايف قدامو اخدها على عربيتو ... اركبي
جوان : برجع بعربيتي مامحتاجة منك مساعدة
مهند : اركبي ماتنرفزيني زيادة
لما شافت منظرو خافت وركبت طوالي .... هو مد يدو الكرسي الورا اخد شال ناولو ليها ... غطي شعرك ... صرت و شها و شالتو
جوان : و عربيتي
مهند : جيبي المفتاح بكرة تلقيها في الجامعة
جوان : الشنطة هناك
مهند: تمام بتصرف
اتحركو ... ساكتين ... التفتت عليه
جوان : خلاص كده عملت الفي راسك
مهند : في شنو ليه بقيتي كده
جوان : بقيت كيف
مهند : انتي عارفة ... البتعمليو غلط و زاد عن حدو
جوان : بهمك في شنو... مش كل واحد مشى في طريق
مهند : بتهميني انتي ... مامستحمل اشوفك بتعملي في نفسك كده
جوان : افهم من كلامك انا لسا في قلبك
مهند : انتي اخترتي تبعدي وانا احترمت رغبتك
جوان : ليه دايما بتحملني مسؤولية الحصل ... ما انت عايش اروع قصة حب في التاريخ
مهند : ارتبطت عشان اقدر انساك
جوان : و قدرت ؟؟
مهند : دي مشكلتي انا .... وصلنا بيتكم ممكن تنزلي
عاينت ليه ... وعمرك ماحتقدر .....جات نازلة ناداها ... انتي واحدة مخطوبة ماتنسي الحاجة دي و اتصرفي بحكمة زمن الطيش انتهى ... عاينت ليه بغيظ .. تصبح على خير و قفلت الباب .....
لما دخلت البيت شافت وضاح قاعد في كرسي تحت شجرة مولع سيجارة و شغال بتلفونو وقفت قدامو عاينت ليه من فوق لتحت بدون ماتقول ولا كلمة ... هو رفع صوتو وعليكم السلام و الرحمة ... صرت وشها وعايزه تدخل جوا قال ليها أحلام سعيدة .
في اليوم التاني مشت الجامعة مع السواق.... لقت هالة ادتها شنطتها
هالة : تلفونك من امبارح ما سكت لما البطارية خلصت و دا المفتاح مهند جابو
جوان : اوك .... يلا المحاضرة
بعد ما اليوم انتهى رجعت البيت شحنت تلفونها لقت كمية من الاتصالات و الرسائل من هيثم و الارقام الغريبة... بعد ثواني هيثم اتصل ردت علية بزعل
جوان : نعم
هيثم : انتي وين من امبارح
جوان : لا والله وانت وين من اسبوع ... يداب اتذكرت عندك خطيبة
هيثم : اتكلمي معاي زي الناس .. وصلتني صور زبالة ليك بترقصي مع علاء
جوان : من الاخر كده انا زهجت و المسرحية دي لازم تنتهي ... دبلتك قاعدة لما تفضى تعال شيلها ... قفلت الخط و عملت ليو بلوك .... طلعت الدبلة من يدها غمضت عينها وأخدت نفس عمييييق .
مشت لجيهان في غرفتها ... واقفة جنب الباب بتعاين ليها و هي بترتب حاجاتها في الشنط ... ابتسمت و في دمعة نزلت على خدها
جيهان : جوجو ماتبكي عشان ما ابكي معاك
جوان : مامصدقة انها اخر لحظات ليك معانا .... قربت منها حضنتها و باست راسها قعدت معاها شوية تاني نزلت لقت امها وابوها في الهول بشربو شاي و يتونسو وقفت جنبهم ... تسمحو لي اشاركم العقدة .... ابتسمت و قعدت جنب ابوها ... امها عاينت ليها ... و احنا نطول اخيرا اتذكرتي في بشر معاك في البيت دا و عايزه تقعدي معانا دا كرم منك يابت كمال الشيخ .... إلتفتت لابوها ... شايف الحجة بتبهدل فيني كيف ..
كمال : براحة عليها يا انصاف .. انا مابرضى في حبيبة قلبي
مسكت يد ابوها .وقالت ليه ينصر دينك ياابو جهاد و قعدو يضحكو
انصاف : البت بتتكلم معاك زي واحد زميلها وانت و لا فارق معاك
كمال : هم الجيل دا كلو كده خليهم يعيشو زمنهم
جا جهاد من برا لقاهم بضحكو .
جهاد: اول مره اشوف الاجتماع العائلي دا ... دقيقة اطلع تلفوني سيلفي لتخليد الذكرى التاريخية ... وقعد يصور
انصاف : احي انا العاقلة الوحيدة حبيبتي جيهان خلاص حتمشي و تخليني مع المجانين ديل
كمال : بكرة جوجو زاتها تمشي و اقعد ليك انا براي
انصاف : دايراها تمشي كلم هيثم يتم العرس بسرعة يشيل مني وجع الراس
جوان من جوا موجوعة لكن ماظهرت لاهلها .. قالت ليها .. قصدك شنو ياماما انا وجع راس بالبساطة دي عايزة تتخلصي مني ابدا ماكان العشم يا خالتو انصاف
و قعدو يضحكو ... عاينت لجهاد غمز ليها ..تعالي اخد رايك في بدلة العرس هي في العربية ... طلعت مع اخوها الحديقة سألها
جهاد : في شنو
جوان : مافهمت قصدك
جهاد : هيثم ضرب لي
جوان : قال شنو
جهاد : تقريبا فسختي الخطوبة دا الفهمتو
جوان : بالظبط كده
جهاد : اعقلي يابت دا زواج مالعبة ... مش تلفون تلعبي بيه كم يوم و لما تزهجي ترمي
جوان : عشان هو زواج ما لعبة فسخت الخطوبة ... وانتهينا ... بليز ابوالجود خلبنا ننبسط بالعرس وبلاش السيرة الهم دي
جهاد تلفونو ضرب .... لازم ارد على الاتصال ... سلام .. مشى خلاها .. لمحت وضاح من بعيد واقف بعاين ليها ... ندهت عليه
جوان : تعال
وضاح اتحرك ناحيتها ...اتفضلي
جوان : مش عيب راجل كبير بعمرك و تتصنت على الناس
وضاح ابتسم بسخرية ... عندك خيال خصب .. بتعجبني القصص البتنسجيها في خيالك مزيج من فيلم امريكي على مسلسل مصري و شوية هندي ... كوكتيل ظابط لكسر الملل
جوان : اتكلم كويس
وضاح : لما كلامك يكون كده تجبريني ارد عليك بالطريقة دي يابت الحلال صدقيني حياتك مابتهمني لا من قريب و لا من بعيد بس انتي طلعيني من راسك
جوان اتغاظت منو .... هو مين اصلا فهمك اني شغالة بيك ... دخلت البيت مغيوظة منو ...
في جانب أخر .....
_ حبيبي حرام عليك لابترد على اتصالاتي ولا رسايلي
_ مش طلبتي كده لما زواجنا يبقى رسمي خليتك على راحتك
_ و اهون عليك
_ بتعرفي مابحب اغصب زول على حاجة
_ انا اي زول يعني
_ انتي عارفة مكانتك عندي
_ افهم من كده اشتقت لي
_ اكتر مما يخطر في بالك ماتجي الشقة زهجان قاعد براي .... ينفع كده الواحد يكون عندو زوجة زي القمر و هي ماشغالة بيه ... و بعدين جبت ليك طقم الدهب الكان عاجبك
_ بالجد حبيبي ربنا يخليك لي .... نص ساعة واكون معاك حياتي .
( في الوقت الحالي ) .....
البت الشغالة ساقتها الحمام وفكت يدها
جوان : خلاص اطلعي
_ مابقدر ماتعملي لي مشاكل
جوان : ماتخافي كلها دقايق و بطلع اوعدك
_ خلاص بقيف ليك جنب الباب اوعك تتشاطري
جوان : حاضر
طلعت البت و قفت جنب الباب و قفلتو نص .... جوان طلعت القطعة من عيونها فتحت و تاني غمضت عينها بسرعة لان النور كان قوي مؤلم و هي محرومه من الضوء ايام عيونها كانت بتوجعها بس اصرت تقاوم و تخلص نفسها( أزمة مواصلات بقلم شيماء عثمان) ... بدت تتلفت في المكان سمعت صوت البت ... اها خلصتي ..... ردت عليها دقايق بس فتحت الماسورة و رفعت راسها شافت شباك صغير لكن ممكن يمررها ... طلعت في الحوض رفعت نفسها ... فتحت الشباك براحة وقفت على امشاطها رفعت نفسها زيادة ختت رجلها في طرف الشباك ... نطت و طلعت .
لنا لقاء أخر.......
