#فرقتنا_عادات
#الحلقة_الثامنة_عشر
~~~~~~~~~~~~~~~~~~~~~~~~~~
لايك قبل ما تقرواا 🙏
وتعليقاتكم السمحه وتوقعاتكم للحلقة الجاية بعد تكملوا
والله التفاعل الا ضعييييييف هلبا وحاجة تحبط المعنويات نبدا نكتب في الحلقة ومتفألة انشوف التفاعل نندم ع الوقت الي مفوتاته في كتابة هالرواية
عموما نتمنى تعجبكم
~~~~~~~~~~~~~~~~~~~~~~~~~~
رفعوا فرح للمستشفى واحني علي اعصابنا ومحد يرد علينا
في المستشفى ....
الدكتور_المريض لازم تتحول طرابلس تبي تصوير مقطعي للدماغ وتحاليل وصور رنين مغناطسي والأجهزه عندنا خااربة
بابا_ شن حالتها هيا ...وفاقت و لا لا
الدكتور_حاليا تفيق شوي وترجع ادوخ ثاني ومانقدرش انشخص الا بالتحاليل والصور
بابا_تتحمل الطريق هيا
الدكتور_للأسف لا حالتها مستعجلة لازم اسعاف طاير
بابا_وين بنحصلوه هدا لو تعرف حد انت كلمه واحني بعدين ندفعوا اجار الطايره
مصعب_لا خلاص خلوها عليا جهزها يادكتور تو اتجي الطياره
بابا_ بارك الله فيك
مصعب_مش بجميلي لولا الي صار راهي مرتي تو
كلم الأمر امتعه وطلب منها طيارة وحكاله الوضع وافق الأمر
وبعد ساعة جت الطيارة ورفعوا فرح ومشي معاها عمي سالم وحسن ومصعب
.....
روحوا الباقي للحوش وحكولنا
انا_بابا خلاص خلي نطلعوا نلحقوهم بالسيارة
بابا_جهزوا ارواحكم حتى جدك يبي يمشي معانا
جهزنا رواحنا وجي مع بابا جدي وعميمة فادية و وبنتها
وانا وريماس ركبنا مع كريم وكان تليفوني ملوح في الشنطه مانندري عليه كل تفكيري في فرح
روحنا الطريق كلها متنكدين وخافين عليها
......
وصلت فرح لطرابلس ورفعوها للمصحه مش للمستشفى ودخلوها وبدت التخاليل والصور
وفرح تفييق شوي وترجع ادوخ
وصلنا لسبها حط بابا ع فادية وامي ومشي مع جدي بيشوف وضع فرح
....
انا _كرييم بالله عليك نمشي معاك نطمن ونرجع
كريم_لااااااا خشي داخل
انا_بالله عليك والله مانقدر هادي فرح ياكريم هدي توؤمي الثالث بالله عليك
ريماس_بالله كريم نطمنوا ونرجعواا طول
ياسمين_هيا كريم ع خاطري والله مانقدروا
كريييم_اووووف نقيق نقيق تمشوا تطمنوا وطول للحوش فاهمات
احني_باه
ومشينا للمستشفى وصلنا وكلم كريم بابا وقاله ع مكانهم
وصلنا لقينا جدي وبابا يبكوا ومصعب وجهه ع الحيط وشكله حتى هو يبكي
انا_حطيت يدي علي فمي مانبيش انعيط وعيوني لا إراديا بدو ينزلوا
كريم_شن فيه يابوي
بابا_فرح
انا _خيرها
ريماس_ماتقلوش ماتت
ياسمين_لا ياعمي لا
حسن_فرح تااعبه هلبا وتو بنشوفولها طيارة ترفعها امريكيا
انا_علاااش شن عندها ونبكي
بابا_سرطان في الدماغ وقال منتشر هلبا واحني تأخرنا ف التشخيص
انا_لاا لا لا يابابا هادي فرح كبيدتي لا يابابا مستحيييل 😭
ريماس_ربي يشفيها ومن بيمش معاها وكيف حالها تو
بابا_الدكتور قال بدت تفيق ماقدرناش انخشوا
خشيت نجري انا وريماس و ياسمين
انا_فرروووحه 😭😭
فرح_لقيتها مقعمزة.....خيرك تبكي شن قالوا الدكاترة
انا_لا حبيبتي دوخه بس يمكن فقر دم التحاليل قاعده ما طلعت 😭
فرح_و كيف وصلت لطرابلس 😧الدكتور قال اني في طرابلس
انا_مش مهم بس ارتاحي
فرح_😣تي شن هو الي مش مهم خيركم تبكوا !!!!
ريماس _مافيه شيء غير انشغلنا بس
ياسمين_وسبها عارفتيها ماعندهم شيء جبناك لطرابلس
خش مصعب
فرح_مصصصصعب شن ادير اهني انت؟؟؟ انا شن فيا؟؟؟ علاش كلكم اهني؟؟؟
مصعب_ممكن يابنات شوي بنكلم خطيبتي
طلعنا وقعمز مصعب
وشد يدها
مصعب_غلاااي وعيونه تعبوا دمووع ....انتي مؤمنه بإنه ربي ادا احب عبد ابتلاه وانتي ياغلاي ربي يحبك
فرح_بدت تبكي .... شن فيا ؟؟؟....لاااا.... خبييييث ...آه قول مصعب
مصعب_حب مافيش حاجة اسمها خبيث كل ابتلاء من ربي حمييد .عندك كتلة في المخ داروا تحاليل وانتي لازم تسافري عشان العلاج..ماتخافيش حبي اليوم بتسافري لأمريكيا مع ولد خوك و اختك كنت نبي انسافر لكن خوتك رفضوا
فرح_انههااااارت بالدموع.......
اظبطها مصعب_اس اس ياحبي قولي الحمد لله
فرح_الحمد لله الحمد لله الحمد لله
مصعب_حبي ارقدي شوي تو انجي بنكلم اهلي
فرح_مصعب
مصعب _عيونه وقلبه وروحه
فرح_انا انحبك والله انحبك لكن في هالمشوار نبي اهلي بس معاي
مصعب_ماتكملييش بكل.......اسكتي انتي تو بس تحت تأثير الصدمة .....
انتي حتتعالجي وتروحي ونتزوجوا
فرح_لكن
مصعب_فرح ماتعصبينيش اسكتي اسكتي تنسيه هالخراف الزايد وألهي بصحتك بس...
تو ارتاحي انكلم اهلي وانجي
طلع مصعب وكلم اهله ونزل للحديقه امتع المصحه وقعمز ع الكرسي
مصعب_بدي يبكي البنت الوحيده الي قظرت تملك قلبه وتنسيه هم الحرب وتغير لون حياته الي تحول لاسود واحمر بس من داعش والقتل
لحياه كلها الوان وفرح
فرح كانت الفرحه الي خشت حياته وقلبتها في مده قصير وتو في احتمال كبير انه يفقدها
.....
عند فرح
طلع مصعب
وانهارت فرح بالبكي لانها مالحقتش تفرح بحب استناته سنيين ولما وصلها بتمشي وتخليه كانت ديما تتخيل في حياة واطفال من راجل تحبه لكن جي ضيف غير مرغوب فيه وسكن دماغها وبياخدها معاه بتخلي هالدنيا قعدت تخمم هل درت شيء كويس نقدر نقابل بيه ربي هل انا مستعده لبعد هالدنيا مستعده للقبر هل حيكون رفيقي سوء او خير في القبر
فرح تدعي_ياااارب لو هالمرض هو نهايتي حياتي الدنيا فياارب اجعلني اعاني في هدا المرض وخفف عني من عداب الأخره يااارب انت الرحيم انت الغفور ارحمني برحمتك واغفر لي دنوب اقترفتها لظني بأني سأعيش واتوب عنها يااارب اغفرها لي يااارب انا احمدك واشكرك علي ما اصابني فقوني يااارب واجعلني اتحمل اوجاعه والامه واصبر عنها يياااارب لو كان امتحان منك لصبرك فأدعوك يااارب ان تعطني صبر أيوب ياااارب يااارب اجعل صبر كصبر سيدنا ايوب يااااارب
اللهم امين
انا_كنت نسمع فيها تدعي واول ماكملت خشيت نجري حظنتها
فرح_ياااهبلة اسس الحمد لله هدا قدري ومكتوبي وانا راضيه الحمد لله
انا _خااايفه عليك لكن عارفاتك قدها بنستاحشك هلبا مابوش يخلوني نمشي معاك
فرح_ولاش بتمشي تو نمشي انكمل العلاج وانروح غير قصي من شعرك جهزيلي بيه باروكه
انا_علاش
فرح_ياحماره تو انروح صلعه يشوفني مصعب يهرب للشرق معاش يرجع
انا_ههههههه تو هدا الي تخممي فيه
فرح _امالا شن من تو حاافضي عليه وقصي المتقصف واول مانحجز بنروح قصي نصه وديريه بااروكه سمحه نستر بيها روحي لين يرجع شعري
انا_ههههههههه هبلة وحق ربي .....دمعوا عيونا
انا_بنستحشك يافرخه
فرح_حتى اني ...كل يوم اتصلي بيا
انا_وانتي ردي عليا كل مانتصل بيك
ربماس_ خشت تبكي.....ياكلبه يافرح قلنالك عااايني قتلك شوفي راسك كويس هكي خربتي الفاتحة وفوتي علينا التورته الي جابها مصعب وابتسمت
فرح_ههههه خسارة كان منظر التورتة يسهف
انا_اما انتم الزوز اهم شيء بطنكم
خشت ياسمين ومعاها كريم وبابا وعمي سالم وجدي ماخشش
اظبطوها وطمنوها وبكت في حظن بابا وعمي سالم بعدين كلنا طلعنا وخش جدي بروحه
فرح_باتي
جدي_فرحتي وبدوا دموعه ينزلوا
قعمز جنبها
اظبطها
جدي_وكان نقدر يابنتي ناخد هلي في راسك وانحطه عندي كنت درتها لو نقدر كنت مانخلي الشوكة توصل فيك لا انتي ولا خوتك ماتقوليش باتي عنده هلبا ولاد وبنات كلكم قطعة مني وانتي فرحتي اخر العنقود مانعرف كيف بنخليك تبعدي عليا لكن هالبلاد الخاربة لاطب لاغيره .....ردي بالك علي روحك وكلميني كل يوم ربي يحفظك ويردك انتي بوك عزمك قوي وقلبك قوي وهالمرض يبي ايمان خلي ايمانك بربك قوي ماتخليش الشيطان يوصلك ويهز ايمانك متنسيش صلاتك ومصفحك خليه عند راسك هدا امتحان من ربي وانتي قده....
فرح_ادعيلي بس ياباتي وكان صار شيء سااامحني وقول لأمي تسامحني
جدي_معاش تقولي هكي انا مسامحك وراضي عليك دنيا واخره
قعد جدي مع فرح ليين رقدت
الدكاترة جهزو تحاليل فرح والصور و عطوا اسم دكتور مشهور لأمريكا لي بابا والمستشفى الي يخدم فيه وايميله وراسله بابا وبعتله التحاليل والتقارير بعد ترجمتهم مامت وسبحان الله كله اسهل ومع الساعه 2 طلعت فرح وبابا وحسن لأمركيا بعد احضان ودموع ومصعب كان في اسوء حالاته ورجع من طرابلس لبنغازي طول
وروحنا للحوش
........
تاني يوم عند قيس
احمد_عندك حالة تستنى اطلع شوف
قيس_اووووف والله ما خاطري نبي انروح
احمد_خيرك شن فيه
قيس_ماتردش من امس الصبح كلمتها وبعدها معاش ردت وتو مقفل
احمد_يمكن صاير معاها شيء او التليفون مستك لو مافتحتش تليفونها لغدوة بعدين نصرفوا
قيس_شن بيصبرني لغدوة ياراجل والله بنجن خايف يكون فيها شيء
احمد_لا لا ان شاء الله خير غير شوف الحالة الي عندك وبعدها ساهل
قيس_ اوووف وبعدها عندي توكه في المستشفى لغدوه الصبح
احمد_لا لاه ....انا امس توكة وكان الطواريئ معبي احمد ربك تتخصصك معظم حالاتكم الصبح انا جراحة والرصاص كاتر بالدات المخانب والسكارى حاااله الطواريئ ديما معبي ...انا بنطلع حالاتي تموا بنمشي لنادر
قيس__اوكي تو انكمل ونصكر سلم ع الكلب
احمد_يوصل....
كمل قيس وروح ....
عند احمد ونادر
احمد_هلا اووووه شن هاللبس السمح ههههه
نادر_صكر فمك ....
احمد_شن السروال البودري هدا ههههههه
نادر_تي قتلك صكر فمك
احمد_باه ....والله مانقدر خيرك لابس سروال بودري
نادر_اوووف هدا المدام من فترة غسلت سروالي الأبيض مع حوايجها بالمية السخونه معاش لبسته
وهي ليها يومين مش غاسلة دبش مالقيتش شن نلبس لبسته وخلاص
احمد_لا بسيطه نحسابك بتغير زي هالمعيلة الي نشوفوا فيهم
نادر_باه شن تبي متصل
احمد_تنهد ااااااااه
نادر_شكله موضووع طويل
احمد_اسمع قبل بعدين احكم
نادر_خير ان شاء الله تكلم هي
احمد_يوم روحنا من تونس ...بتت عند علي
و ( حكاله شن صار يومها) ومن هداك الوقت البنت معاش فارقتني بكل من لاخير ع قولتك كبدت وليا اسبوع نمشي قدام المدرسة الي تقري فيها باش انشوفها واليوم عطيتها رقمي..
نادر_ قصه الزح.......باهي اخطب احسن شيء منها ماتخونش علي ومنها تريح قلبك
وبدون ما ايحسوا شافهم علي من بعيد وسمع الكلام كله...
علي_اختي يا احمد اختي من ليبيا كلها
احمد_تي ياراجل ما تفهمش غلط والله ماصارت حاجه اسأل نادر اهو قدامك
علي__تي شن ماصار شيء سمعت كلامك كله ..وانت اتبع فيها ويوم بتت عندنا تي ياراجل وشده من حوااايجه ...تي صاحبي راه انت خوووي كيف هكي
احمد_والله ناوي الحلال قلت انشوف رايها بس قبل لانتقدم
علي_طلقه......لاتخطب ولا تجي لاعاد نبي انشوفك خسارة الصحبه بس ....
احمد_تي شوفه يانادر برا امشي ...
نادر لحق علي وفي اخر لحظه ركب معاه السيارة
علي_انززززل يانادر تي انزل
نادر_مش نازل ..
علي_تي انزل ياع&٪$$#$٪$#
نادر_صكر فمك وحرك سيارتك
علي_اوووووووف شغل السياره وصلو الشط نزلوا
نادر_شن فيها عجباته وبيتزوجها كلها تتكلم بنات و اولاد وكلنغ نعرفوا هالشيء
علي_تي حط روحك مكاني انا نشبح في اختك ونتمقل ونمشي من وراك نعطيها الرقم باش ان .....استغفر الله....
كلنا نعرفوا العلاقات وشن يصير فيهم من كلام وهادي اختييييي اختيييي
نادر_وهو بيخطبها ماتعقدهاش غدوه اهله يكونوا عندكم وتمت القصة
علي_ترضاها انت؟؟؟؟
نادر_لو احمد او انت او قيس نرضاها لاني نعرفكم كويس
جاهم احمد ( لانه هالمكان ديما يجوه ونفسه الي جاه قيس وايمن قبل)
احمد_علي والله ناوي الحلال بس قلت انشوفها قبل مرات عندها موضوع
علي_هجم عليه وضربه بوني واحمد ماردش عليه ونزل علي فيه ضرب لين طاح ع الأرض
علي_غدوه امك تكون عندنا فااااااهم
احمد_يكح /تي بااه غير ياسر دقتقتني
علي_مد يده ونهضه
احمد_تي كسرتني يا راجل
علي ونادر_تستاهل
احمد_يكلم في نادر_وانت رد بالك اتجي اتحز احيي
نادر_علاش انحز استحليتها فيك
علي_فوتتها بس لاني نعرفك ومدته
ونعرفك مستحيل تكون بتلعب بأختي والا كنت قتلتك اهني
احمد_عارفك ياطيري
علي_بالله شن هالسروال الي لابسه
احمد _هههههههههههههههههههههههههههه
نادر_ايح عاد علينا زمري ...
....اضحك ياكلب
احمد_هههههههه والله حتى اني بكري سألته
علي_ههههه خيرك ولا غالط ولابس سروال زينب
نادر_هههههه صكر فمك تي مهناش الا هدا امحدد و واتي وهيا مريضه
علي _مش خشت شهرها من شهر قريب
نادر_كدبت عليكم ماخشتش غير مانبيش نمشي
احمد/خزييي حصلتنا احني وهو سلك روحه
علي_عليك تشحويره حصلناها في جرته
نادر_قلتلكم من الاول حبها تي واضحه
احمد_لكن قصته قصة مستحيل بوه يوافق واضح نهايتها اصلا
علي_احسن شيء اني لاحب لاهم بنسلمها لأمي الشقة قريب نكملها بنكلم امي تشوفلي
احمد_انت حظك عافن في البنات الي تكلمها ياتنخطب ياتطلع تخونك فيك
نادر_تتدكر فيها الي تعرفت عليه في الفيس
احمد_ههههههههه اما هديكا بع
نادر_شن كان اسمها ف الفيس
احمد_نسيت
علي_ههههههههههه الورده الحمراء
احمد_قصدها الشوكه الحمراء
علي_لما تلاقينا قريب هربت
نادر_نتفكر قيس بدموعه يضحك هو واحمظ وانا من الصدمة معاش قدرت نوقف سطل زواق حاطاته ومع هدا شينة
علي_تي احمد ربك انك ماقعمزت جنبها قريب دخت عرق مخلط بالصنه لين محمظة قريب رجعت جنبها......
وقعدوا يهدرزوا للمغرب وروحوا ....
روح احمد لأمه _
ام احمد_اسمله وليدي خيرك
احمد_لا بسيطه
ام احمد_شن بسيطه و وجهك متورم
احمد_لا عادي عركة بسيطه يام نبي ندزش وبندوي معاك
ام احمد_باهي تو انحطلك حوايجك قدام ااحمام خش كيف غيرت الفوط في الحمام
باس احمد راس امه_سامحينا ديما متعبينك
خش احمد دوش وطلع صل المغرب وقعمز جنب امه
ام احمد_خير شن تبي
احمد_يام فيه بنت عاجبتني ونبيك تخطبيها
ام احمد_شن اسمها ومن عيلة من كان ماعجبتني ولا اهلها ماعجبوني ماتخلم بيها انت مصماص الكرشه نبيلك وحده تستاهلك
احمد_ربي يحفظك ي امي ويطول ف عمرك
لكن اطمني بتعجبك اخت علي صاحبي اسمها فدوى
ام احمد_لا عيلتهم ماشاء الله عليها تو انشوف خوتك ونمشولهم الخميس الجاي
احمد_علي خاطري يام بتمشي غدوة
ام احمد_وعلاش مستعجل الدنيا مش طاييره
احمد_بالله عليك ياغالية تمشي غدوة
ام احمد_باه يصير خير
احمد_ربي يخليك يام وناض باس راسها_بنكلم علي راه
ام احمد_كلمه خلاص
............
وكلم احمد علي واكدله الموعد
......
عند قيس
مع الساعة 12 رن تليفونه وكان عنده حالة مستعجلة ماردش ولا شاف من ومع الساعة 1:30 كمل
شبح تليفونه لقي مكالمات من ايناس ومسج
انا
( حبيبي اسفه هدا وين شفت التليفون لو تسمع شن صار معاي مستحيل تصدق محتاجتلك هلبا رد علي نستنى فيك )
اتصل طول
انا _الوو 😭
احمد_الووو خيرك حبي صاير معاك
انا_نبكي ...فرح يا احمد
احمد_خيرررها اهدي شوي ياحبي واشربي اميه
انا _قعدت نتنفس وشربت اميه ...ايوه
احمد_احسن تو
انا_ايه
احمد_احكي
انا_فرح طلع عندها سرطان في الرأس
احمد_لاحول ولا قوة الا باللله اجر وعااافية ان شاء الله... مش امس علي اساس فاتحتها
انا_ايه لكن ياناري طاحت قبل لا يقروا الفاتحةو ( حكتله كل شيء وهي تبكي)
احمد_ان شاء الله خير امركيا فيها دكتارة كويسين وان شاء الله تروح طيبة
انا_ان شاء الله لكن كأنها تودع فينا لما مشت قعدت توصي وتبكي خااايفه انها معاش ترجع هادي توؤمي الثالث لو يصرالها شيء انموت يا احمد انموووت
احمد_لا ان شاء الله تروح بالسلامه ومعاش تجيبي سيرة الموووت بكل انا نهبل ننجن لو نفقدك انتي مش عارفه كيف مر عليا هاليوم ونص قريب لحقتك في سبها امس
انا_تحبني لهالدرجة احمد لدرجة تلحقني لسبها لو ما اتصلت بيك
احمد_انا مانحبكش انا نعشقك انا بلاك ولا شيء جثة ماشية وخلاص انتي روحي ونبضي وقلبي
انا_حبيبي انت انموت فيك والله انت ملكت قلبي وعقلي وكل شيء فيا
احمد_يااااريت نملكك وتكوني حلالي
انا_ان شاء الله ربي يجمعنا بالحلال
احمد_بالله كتري من الدعوه هادي .
انا _غدوه بيجي راجل عمتي فادية وبيجهزو اوراقهم عميمه تبي تلحق فرح خااطري نمشي معاها لكن بوي راافض
احمد_تمشي عينك وانا من بيا اهني لااااااا يا ايناس مفيش مشي تو تتعالج وتروح بالسلامة
انا_انحس فيها مش حترجع نتمنى ترجع لكن مش متفأله بصراحة
أنت تقرأ
#فرقتنا_عادات مكتمله
Tiểu Thuyết Chungملخص الروايه #فرقتنا_عادات ﻃﺒﻌﺎ ﺣﺘﻜﻮﻥ ﺍﻟﺮﻭﺍﻳﻪ ﻣﻌﺘﺪﻣﻪ ﻋﻠﻲ ﺍﻟﻮﺍﻗﻊ ﻟﻜﻦ ﺷﺨﺼﻴﺎﺗﻬﺎ ﻣﻦ ﺧﻴﺎﻟﻲ ﺣﻨﻤﺰﺝ ﺷﻮﻱ ﻣﻦ ﻗﺼﺺ ﺳﺎﻣﻌﺘﻬﺎ ﺍﻭ ﻗﺎﺭﻳﺘﻬﺎ ﻃﺒﻌﺎ ﺍﻟﺤﻘﻴﻘﻴﻪ ﻣﻨﻬﺎ ﺣﻨﺸﻮﻑ ﻛﻴﻒ ﺑﺎﻟﺮﻏﻢ ﻣﻦ ﺍﻧﺎ ﻓﻲ ﺍﻟﻘﺮﻥ ﺍﻟﻮﺍﺣﺪ ﻭ ﺍﻟﻌﺸﺮﻳﻦ ﻟﻜﻦ ﻗﺎﻋﺪﻩ ﻋﺎﺩﺍﺕ ﻣﺘﺨﻠﻔﻪ ﻭﻗﺪﻳﻤﻪ ﻋﺎﻳﺸﻴﻦ ﻋﻠﻴﻬﺎ ﻭﻣﺘﺸﺒﺘﻴﻦ ﺑﻴﻬﺎ...
