#فرقتنا_عادات مكتمله

الحلقه34

#فرقتنا_عادات
#الحلقة_الرابعه_والثلاتون
**************والأخيرررره*****************
عاد اخر حلقه يااااريت تكثروا اللايكات وتكتبوا تعليقاتكم ع الرواية وع الحلقة
******************************************
ثاني يوم نضت من الصبح قبل الكل لقيت ماما بس في المطبخ تجهز في الفطور وتبكي
انا_صباح النور ماما وجيت بست راسها
ماما_مسحت دموعها ..صباح النور بنيتي ...تعالي افطري
انا_ هيا نفطروا في الجنان انا وانتي وبابا بس
ماما_باه طلعي الفطور ونمشي انوض  بوك
طلعت الطاولة والفطور الجنان وقعمزت شويه وجت ماما و وراها بابا
بابا_صباح الخير علي بنيتي السمحه
انا_صباح النور لأغلى واحلى بابا
بست راسه وفطرنا كنت نتأمل في بابا وماما ..كانوا ياكلوا من غير نفس يجاملوا فيا وبس واضح عليهم الحزن والهم
(مش ساهله ايكون ولدك او بنتك....كبدك ...يعاني من مرض زي هالمرض وانت مش قادر ادير شيء تتفرج بس ..حاير ...مهموم. وكل احمال الدنيا تحسها علي اكتافك ..لو بإيدك تاخد هالمرض وتنقله ليك انت ..لكن.وييين...ماتقدرش )
انا_ماما..بابا... معاش تخمموا انا رااايضه ونشكر ربي علي هالإبتلاء لان ربي يحبني وهدا اهم شيء ..لو طلع حميد عملية بسيطه وشوي علاج وتمت ..ولو خبيث ...مع اني مش مع تسميته خبيث لانه ربي مايكتبلنا الحاجه الخبيثه....رحلة طويله لكن انا حنحاول وحنخطيها  خطوه خطوه لين نتجاوزها لو عشت الحمد لله فظل من ربي ولو لا فهدا عمري وتم ...معاش تخمموا بس
بابا_لو احني ماخممنا وما انشغلنا من ينشغل يابنتي انتي قطعه منا
ماما_وعيونها دموع ..لو هالمرض ينشال كنت شلته لدماغي ..ع الأقل انا عشت وشفت في الدنيا اما انتي ...وبدت بالعبرة صغيييره ع ..الوجع ...صغيره ...
انا_ياماما خلاااص ..ماتخافيش ...بإذن الله نتعالج ونرجع زي قبل بس انتي ادعيلي محتاجه لدهواتك تنتي وبابا
بابا_بنتي خشي بدلي نرفعك للمستشفى باش ياخدو العينه
انا_باه ..وخشيت انبدل فاقت ريماس وجت حظنتني ...الناس تقول صباح الخير وتغسل وجهها وبعدين اتجي تتلصق
ريماس_اس ياابارده...وين بتمشي
انا_للمستشفى ..
ريماس_بياخدو الخزعه اليوم
انا_يب ...قال الدكتور لازم بسرعه ع خاطر موقع الكتله وهكي
ريماس_ماتمشيش بنمشي معاك...وجري للحمام
بدلت زطلعت نلبس في السبيدروا لقيتها جنبي وتلبس في وشاحها ولابسه نفس لبستي
انا_وعلاش لابسه نفس اللبسه ..
ريماس_هكي احل هيا نووضي
انا_نافطرتي انتي
ريماس_مش مهم نوووضي بس بوي يستنى
وطلعنا وركبنا ...صحه كنت قويه مع ماما وبابا لكن الحق خاايفه لو طلع خبيث اكيد حنسافر والكماوي واعر هلبا والي واجعني اكتر شيء هو شعري..وخفت حتى من موقع الكتله لو ننعما كيف بنكمل حياتي ....يااارل يطلع حميد... مش بس عشاني حتى ع خاطر اهلي ..وفي عز هالأفكار ..تدكرته ..لما انقوله بنقص شعري ويرد انقص رقبتك...وينه تو...قاعده الا دكريات واوهام عايشه فيها بروحي ....
ريماس_خيرك مسكته...
انا_هزيت راسي..لالا شيء
بابا_هيا انزلو...
نزلنا ....
وبدي التمزريط ودراه الكبد اركبوا فووق تعالوا اهني امشوا للدكتور بروا للتحليل لين دخنا ودرهت كبدنا بعدين خدوا الخزعه لعد دخلوا حاجه في انفي وتعبت من التمرميد و..روحنا بعد الظهر ....
عند قيس....
نظت الصبح مش مرتاح بكلللل حلمت امس بنوسه واقفه و وجهها متغير ضااعفه هلبا وفي حد لابس اسود يكر فيه لحفرة سودة وهيا ماده يدها وتقول ماتخلينيش يا احمد ماعنديش غيرك وتبكي وبعدها نضت
اتصلت بعلي
قيس_الو
علي_اهلين ياالماني....
قيس_ههههه ..شن الجوو
علي_ تمام وينك مغيب حتى الفيس معاش تفتح
قيس_ والله حااصل جامعه وبعدين نخدم مع دكتوري
علي_اووه بديت حتى تخدم
قيس_مش خدمه رسمي لكن الدكتور المشرف علي الرساله يدرب فيا معاها في عيادته
علي_باهي امشي امورك
قيس_ايه ..علي
علي_شن فيه نبرة صوتك مش مريحه بكل ..
قيس_نبيك تسأل علي ايناس كيف حاله امس كواابيس مش مرتاح بكل...
علي_تي فوت ياقيس ...خلاص شن تبي قداش ليكم متفارقين شن تبي تو
قيس ..._طلبتك ياعلي بتردني
علي_اكيد لا حاضر تو انقصقصلك عليها
......
عند علاء كان في المحل هو ومعز ويغيرو في ترتيب الأثاث  ..لين رن موبايله
علاء_الو
خلود/_اه تعال ياعلاء الحقني بنمووت
علاء_خييرك...
خلود_بنجيب من الصبح فيه وجع نحساب زي قبل ليه وتمشي لكن تو زاد هلبا وبين الوجعات خمس دقايق
علاء_اووكي جاايك ...
وطلع يجري بدون مايقول لمعز
معز يتصل وعلاء ما ايردش خاايف مووت علي خلود وصل وجري للحوش فتح ولقي خلود لابسه وتستنى فيه
علاء_رفع صاكو البيبي وشنطة خلود وحجهم في السيارة ورجع ساعد خلود لين وصلها للسيارة وطول للعياده
....
علاء_ عندي مرتي حالة  وضع واحني انتابعوا عند الدكتوره اهني...
الاستقبال_اسم المريضه. 
علاء_خلود محمد ال&٪$
الاستقبال__ايه عندنا ..وينها هيا..
علاء_في الإنتضار ..تتوجع هلبا ...
جت ممرضه لخلود ورفعتها
وعلاء_متوتر طالع خاش اتصل بأمه ومعز وجت امه وع زهرة ومعز...