أريد طفلا (بالهجة الجزائرية)

🚼 الحلقة 23 🚼

جيش القراء سمحولي ماهبطتش البارت في الوقت لأنو كنت مريضة و مزالني مريضة mais قلت علاجال جيش القراء نعمل أي حاجة 😁😁 هيا نبدوا
.
.
نزيم : رحاب بعدي لهيك و مهما وش صرا ما دخليش روحك
رحاب : لا ما نروحش
.....: أووو القطة بنت عمي ما تخافش
نزيم : بنت عمك !!
.....: بنت عمي لي راح طلقها و نتزوجها أنا و لا ولد عمي
رحاب : ااااي هذي المرة ألف لي نقلكم أنا متزوجة
.....: إيه و عاادي وش فيها إذا طلقتي
هنا نزيم طلعلوا الزبل و بدا يتخربط في مخو حكم هذاك الطفل لي هدر من فكو
نزيم : شوف أنت و عيلتك كاملة إذا شفت واحد منكم قرب لينا ولا حاول برك يفرقنا والله نمحيه من الدنيا
(خلي نسموهم باه تجي لحكاية ساهلة 😁 نسموهم فاتح و رضا)
فاتح (يحاول ينحي يد نزيم من وجهو): والله سقسي علينا نحنا شكون راك لعبتي مع ناس غالطين راح تندم
و هنا نزيم عطاه بواحد البونية الله لا يشوفكم طيرلوا ملامح وجهوا 😂😂
يوسف : يا كلب كيفاه تمد يدك عليه
و راح ليه رجعلوا الضربة
رحاب : اااي وعلاه تضربوا يا خماج
عاود نزيم رجعلوا الضربة و بقاو يتعاركوا حتى ناض فاتح
رحاب : نزيييم ورااك عندك
و هذي آخر كلمة سمعها قبل ما يحس بحاجة ضرباتوا لراسوا و طاح في الأرض  هوما زادو بدوا يضربوا فيه .. و رحاب راحت تجري لعندو و حضناتوا باه ما يضربوهش و هوما كي شافوها ماحبوش يضربوها
رحاب : نزيم .. نزيييم نوض
فاتح : أبعدي أنتي قبل ما نكمل عليك
رحاب : ماكش راجل كون جيت راجل كون ماتضربش بالغدرة 😢 و ماتضربش واحد دايخ
يوسف : فاتح أمشي نروحوا
فاتح : أمشي ... أما أنتي قولي لهذاك أنو مزال ما خلصت كلشي 😬
و راحوا و رحاب بقات تسب فيهم
رحاب : 💦💦 كلاب خماجات $&&$:+$؛:&-)3؟)::$))!($؛
و من بعد عيطت لرائد و عبدو قالتلهم باه يلحقوها للسبيطار
رحاب : 😭 نزيييم .. نزيييم
نزيم : ممم رحاب ما تبكيش  (و تبسم لها)
رحاب : هيا .. هيا نوض معايا
وقفاتوا و راحت تمشي حتى لقاو طونوبيل وصلهم للمستشفى
رحاب : شحال لخلاص
الراجل : 60 ألف
رحاب : عمي كون دخلوا أنت للإستعجالي راح نعطيك صوارد قد ما تحب
الراجل : وي نديه نورمال
راح دخلوا و رجع لعندها كان عبدو و رائد لحقوا
رائد : قولي شحال لخلاص
الراجل : 60 ألف
رحاب : وحق مادخلتي نزيم للمستشفى
الراجل : لا هذيك ماشي خدمتي عاونتوا برك على خاطر الطفل في عمر ولدي ربي يشفيه
كامل : نشالله
راح الراجل بعد ما خلصوه
رائد : هيا ندخلوا نشوفوه
رحاب : إيه روحوا لعندوا و أنا راح نستناكم في لوطو
عبدو : رحاب وعلاه هيا معانا
رحاب : لا لا نخاف يشوفوني معاه و يعرفوا بلي تزوجنا
رائد : لا ما تقعديش وحدك هنا
عبدو : وي أنت روح لعند نزيم و أنا راح نبقى معاها
راح رائد و رحاب راحت قعدت في لرض و عبدو قعد جنبها
رحاب : من نهار دخلت في حياتوا و هو غير يتضرب 😭 ما شاف حتى نهار شباب معايا
عبدو : ششش ما تقوليش هكا
رحاب : حتى إذا ما قلتش عيلتوا راح تقول هكا
عبدو (عنقها): لااا لا واحد ما راح يقول هكا أصلا هذا وين نزيم حبس لمشاكل
رحاب بقات معنقاتوا و ساكتة حتى صونا تيليفون تاعو
عبدو : اااا هذا نزيم 😁 .. آلو
نزيم : عبدو بعد يدك عليها قبل ما نهبطلك
عبدو : 😂😂 بالعقل برك كيما أختي
رحاب : أعطيني نحكي معاه أعطيني
عطاها التيليفون وقفت و بقات تحكي و تمشي
رحاب : نونو
نزيم (صوتوا تعبان): وي يا روحي
رحاب : رتحتي
نزيم : لا طبيب كتبلي دوا .. قالي بوسة صباح و بوسة نص نهار و وحدة قبل مانرقد
رحاب : تبوسك عقرب
نزيم : 😂😂 خلاص درك باي خلي نكمل لخياطة و نهبط ماتقعديش جنب عبدو 😁😘
رحاب : باي 😂😂
دارت لعند عبدو و شافاتوا يحرك في يديه كي شغل قاعد يعزف 😂😂
عبدو :  إنه الحب يا سادة 😂😂
رحاب : ممممم 😁
بقاو يستناو حتى هبط نزيم و كان ساندوا رائد .. ركبوا في لوطو و رحاب راحت لعندو و ركبت جنبوا و عبدو ركب في طونوبيل تاعو و راح لدار بعد ما حكا شويا مع نزيم .. رائد ديمارا و رحاب سحبت نزيم من قشوا و تكاتوا في حجرها و بقات تلعب على شعروا و هو يضحك حتى وصلوا للدار و رائد عاون نزيم طلعوا لبيتوا و حطوا في لفراش
رحاب : رائد معليش تبات هنا الليلة
رائد : وي باينة هذي
داتوا رحاب لبيت الضياف و عطاتوا قشات من عند نزيم و رجعت لعند نزيم
رحاب : نونو
نزيم : مممم 😇
رحاب : مزال راسك يوجع
نزيم : شوي برك
رحاب : نروح نبدل قشي و نجي
نزيم : وي
قبل ماتروح تبدل رجعت لعند رائد و قالتلو يبدل لنزيم قشوا على خاطر هي يدها مكسرة ( تسبب برك 😂😂 كذاااابة 😂)
راح بدلوا قشو و هي بدلت في الدوش و راحت لعند نزيم بعد ما خرج رائد و كانت لابسة قش خفيف و قصير
رحاب : نزيم وعلاه ماكش لابس t-shirt
نزيم : راهي سخانة
شافت في صدروا لي كان مضروب شوي
رحاب : اااه يا ربي الله لا تربحهم كسروك كامل
نزيم : 😁 ما تخافيش مزالني صحيح
راحت رقدت في السرير جنبوا أما رقدت في الحافة تاع السرير قريب طيح
نزيم : رحاب قربي لعندي و علاه بعدتي لهيك ألف مرة نقلك ما راحش نقربلك
رحاب : لا برك أنت قلتي بلي سخانة
نزيم : و قلت قربي 😁
قربت رحاب لعندو و حطت راسها جنب رقبتوا و حساتوا سخون ياسر هزت راسها و شافت فيه .. دارت يدها على راسوا
رحاب : نزيم شبيك
نزيم : واالو
رحاب : كيفاه والو راك تغلي بالسخانة
وقفت راحت لدوش و رجعت لعندو و بقات ديرلوا في المنشفة مبلولة على راسوا أما باقي السخانة ماهبطتش
راحت شعلت كليماتيزور و رجعت لبستلوا تقاشر مبلولين و بلت المنشفة و حطت وحدة على راسو و وحدة على صدروا ... شوية و بدات السخانة تهبط و نزيم رقد .. ناض شاف في الساعة لقاها الزوج تاع الصباح و رحاب مزالت نايضة و قاعدة جنبوا في الكرسي
نزيم : رحاب
رحاب : وي
نزيم : وعلاه راكي نايضة
رحاب : والو برك خايفة ترجع السخانة تطلع
نزيم : أرواحي عندي
رحاب : لا و درك أرجع أرقد
هي وقفت من الكرسي و دارت رايحة للدوش تبدل الماء و في نفس الوقت هو وقف و جبدها من يدها دارت لعندو و ضربت في صدروا و طاحوا لزوج في السرير و تبلوا من الماء لي كان في يد رحاب .. رحاب كانت تحاول توقف
نزيم : اااه يا طفلة يزي بلا تفرفيط راني مكسر كامل
رحاب : سمحلي .. mais خليني نوقف باه ما نوجعكش
نزيم : لا و درك أرقدي 
.
.
.
يتبع 😂😂
جيش القراء وش رايكم في البارت و شكرا على دعمكم يا أقوى جيش ما تنسوش نحبكم كااامل 💗💟
Peace 💪💪