أريد طفلا (بالهجة الجزائرية)

🚼 الحلقة 25 🚼

جيش القراء وينكم هيا أجمعوا بعضكم يا سكان المملكة الخيالية و أرواحوا نكمل ليكم لحكاية 😁😁 هيا نبدوا
.
.
آخر حاجة رحاب وافقت على لعرض لي نزيم رفضوا .. قطعت رحاب التيليفون حطاتوا فوق الطابلة
رحاب : اااا تصبح على خير يا سكر 😀
و جات طالعة لبيتها
نزيم : رحاااب أرجعي هنا
دارت لعندو بشوي و هي تدعي تموت قبل ما يقتلها 😂😂
رحاب : خليك عاقل و ما تتهورش خمم في ولدك و هدي أعصابك ☺
نزيم : تسما كيما هكا .. معليش ترجعلك
رحاب : 😁 اااا نجيبلك توكل معايا
و هنا صونا تيليفون نزيم مرة ثانية و رحاب إنسحبت إلى الكوزينة 😂
نزيم : آلو .. وي ماما
أم نزيم : نزيم ولدي لباس عليك
نزيم : وي لباس وعلاه
أم نزيم : راك حاسب ما سمعتش بلي تضربتي
نزيم : ماما تصحيح معلومات تعاركة ماشي تضربة
أم نزيم : المهم قلي درك راك مليح
نزيم : وي مليح أصلا ضربة خفيفة
أم نزيم : أوكي طمنتيني هكا نقدر نقعد مرتاحة
أم نزيم : إيه .. نزيم ولدي غدوة عاملين عشا للعيلة و لازم تحضر أنت و رحاب
نزيم : مممم والله نسقسي رحاب
أمو : والله كبر ولدي ولات عندو مرا و مسؤولية و يسقسي مرتوا قبل ما يدير أي حاجة 😂😂
نزيم : وش رايك أنو لمرا لي تزوجتها باه نعقال طلعت أنا أعقل منها 😂😂😂
أمو : هيا برك كنتي مسكينة عاقلة .. حقا وينها فوتهالي نحكي معاها
نزيم : رحااب .. وينك
رحاب : هنا
نزيم : ماما تحكي معاك
عطاها التيليفون و راح يتفرج
رحاب : وي خالتي .. ااا عمتي
أم نزيم : 😁 يابنتي قولي ماما كيما يقول نزيم أنتي راكي كيما بنتي
رحاب : 😁 مرسي ... إيه قوليلي لباس عليكم
أم نزيم : والله لحمدلله نستناو وقتاه يجي لعندنا ولدكم و يزهي لينا الدار
رحاب(تفكرت لولادة): اااا أنا كون نصيب صح نخليه غير في كرشي
أم نزيم : 😂😂 وعلاه
رحاب : حكاية طويلة خلينا منها 😁
أم نزيم : إيه يجي نهار و تحكيلي 😁 .. و درك قوليلي نزيم ما تضربش ياسر صح !!
رحاب : مسكين لبارح ليلة كاملة و هو يغلي بالسخانة .. أنا قلت بلاك من الضربة تاع راسو
أم نزيم : ااااه شبيه راسو
رحاب : اااا ما تقوليليش عميتها
أم نزيم : رحاب قولي لنزيم راني جاية درك
رحاب : مرحبا بيك برك ما تتقلقيش راهو لباس
أم نزيم : وي كي نشوفوا نقول إذا لباس ولا لالا
و قطعت ..
رحاب : نزيييم راني عميتها أمك راهي جاية درك
و خلينا نروحوا لعند رائد كان قاعد مع وفاء في قهوة (علابالي 6 تاع لعشية mais راهو صيف نورمال 😁)
رائد : والله ما راني مأمن أنا و أنتي وحدنا بلا لحس تاع هذيك لمجنونة
وفاء : اااا كأنو قلتي على صحبتي مجنونة 😁
رائد : 😂 وي رحاب مجنونة و نزيم مجنون و راح يجبوا مجانين صغار
وفاء : ربي يكرمنا و نديرولهم مستشفى مجانين 😂
رائد : 😂 وي .. ودرك ما كانش رحاب لازم نحكوا عليها
وفاء : إيه صح خلينا نحكو على رواحنا أحسن
رائد : وي
هو مزال ما حكاش و تيليفون صونا
وفاء : شكون
رائد : ماما .. آلو وي
أمو : رائد أرواح لعندي درك نسحقك
رائد : وعلااااه وش كاين
أمو : راني حابة نروح عند خوك
رائد : إيه روحي
أمو : راني نشاور فيك واقيل أرواح أديني
رائد : خلي السواق يديك
أمو : رائد هيا أنت تديني قلت
رائد : أوكي جااي .. زهري و نعرفوا
قطع و شاف في وفاء
رائد : هيا نوصلك
وفاء : لا عااادي أنا نروح وحدي
رائد : يظهرلي على هذي لحكاية يلزمنا 25 سنة باه نقعدوا نحكوا و 40 سنة باه نديروا لعرس 😁
وفاء : عرس مرة وحدة 😂
رائد : يا بنتي مانلعبوش نحنا 😉
وفاء : 😊 درك باااي من بعد نحكوا
بساتوا على خدوا و خرجت و هو وراها .. لحق لعند أمو و راحوا لعند نزيم .. فتحت رحاب لباب سلمت عليهم و فوتتهم لصالون
رائد : وااش مرت خويا لباس
رحاب : لحمد لله و أنتم
أم نزيم : والله رانا في نعمة
بقاو ساكنين شويا
رحاب : اااا نزيم لفوق يبدل قشوا و يجي
أم نزيم : وي معليش بنتي
رحاب : إيه وش تشربوا
أم نزيم : لا يكثر خيرك
رحاب : مالا تتعشوا معانا
وهنا هبط نزيم كان لابس كسكات (باه أمو ما تشوفش الضربة لي في راسوا) و حط يدو على خصر رحاب
نزيم : وعلاه مرتي من وقتاه تعلمتي طيبي 😁
رحاب(بصوت خفيف): معليش نتفاهموا
أمو : هيا خليلي بنتي ما تقلقهاش .. وعلاه راك لابس الكسكات نحيها
نزيم : لا لا خلي برك
أمو : تنحيها ولا نوض أنا نحيها
نحا الكسكات و شافت راسو داير بشاش أبيض
أمو : يخااااه راح راس ولدي
رحاب : اااا أنا نروح نجيب قهوة
نزيم : أوكي ما طوليش
حكالهم لحكاية رحاب حشمت على خاطر لي ضربوا نزيم يقربولها .. جابت القهوة و دخلت لعندهم
نزيم : رحاب أرواحي أقعدي هنا 😁
أمو : الله لا تربحهم لكلاب
رائد : إيه خلاص هذي تتخلف غير ترتاح و نردولهم الضربة
أمو : لا ماديروا والو ... لحمدلله جات خفيفة و رحاب ما صرالها والو هي و حفيدي
رحاب : مرسي ☺
أمو : إيه ولدي غدوة تجي لعندنا في لعشا يااك
نزيم : ممم بلاك 😁 نجي و هكا نودعكم قبل مانروح
رائد : لوين
نزيم : والله قلت نروح أنا و رحاب شهر لفرنسا منها نشوفوا الشركة لي ثم و منها أنا ندير عقد عمل لمدة شهر و نحوسوا شوية و نرجعوا
رحاب ضحكة
نزيم : مممم فرحتي درك 😁😁
أمو : إيه فكرة شااابة راح تعجب علي
رائد : وي صح
أمو : درك شفتكم و طمنت عليكم نقدروا نروحوا 😁
نزيم : لا كيفاه تقعدوا تتعشوا و بعد تروحوا
أمو: لا هذاك هو نروحوا برك
رحاب : وعلاه هكا أبقاو معانا نتعشوا و بعد روحوا
رائد : لا هذاك هو بابا يكون يستنى فينا على لعشاء 😁
وقفوا باه يوصلوهم لباب و قبل ما يوصلوا لباب رحاب راحت تجري للدوش رجعت و نزيم واقف جنبها و يفوت في يدو على ظهرها
نزيم : حبيبتي لباس
رحاب : وي وي
أم نزيم : يا بنتي وش صرالك
رحاب : والو .. راسي يوجع شويا
خرجها نزيم من دوش و حطها في الصالون
نزيم : نجيبلك الدوا و نجي
رجع و معاه دوا و كاس jus شربها و خلاها ترتاح
نزيم : تقدروا تروحوا أنتم
أمو : و أنتم تجيوا معانا
وبعد صراع طويل قبل نزيم يروح يبات عندهم هو و رحاب
.
.
.
يتبع 😂😂😂
جيش القراء خلولي رايكم و أفكاركم و أي حاجة في قلبكم 😂😂
وش راح يصرا يعني جاوبوا على السؤال و إربحوا هدايا قيمة 😂😂
ماتنساوش نحبكم كااامل 💗💟🌸
Peace 💪💪