أنين الحب_صراع العشاق (باللهجة الجزائرية)

بارت 35

قاعدة علا طابلة العشا وتاكل وهو مقابلها وحتى هو ياكل ومرة مرة طلع راسها تشوف معاه مع هبطت راسها تزيد ترفد لقمة تنفضت علا صوت سكين وفرشيطة لي طاحو فلرض رمات عينيها تشوف واش  صرا كان يرجف ويرعش وشاد بابي يمسح ويحك فيديه طبعت كرسي وناضت تجري مفجوعة عليه قلبها قريب يخرج من خوف ريحت فحجرو حطت يديها علا وجهو اسر واش بيك احكي واش كاين
رد عليها ومزالو يرعش وعينيه مفتوحين علا وسعهم بصوت متقطع بسيف باش خارج الين الدم يديا يديا فيهم دم ..شوفي شوفي دم راه يقطر منهم  دم يما لي قتلتها ..قربت اليه عنقاتو وزيرت عليه تهدي فيه وتحكي مكان والو عمري والله مكان حتى دم برك راه يتهيألك
اسر يهز فراسي لالا دم فيدي دم متكذبيش عليا شوفي دم شوفي
جبدت شويا وحطت جبينها علا جبينو اسر ياروحي والله مكاين حتى حاجة وشدت يدو توريلو فيها شفت مكاش دم راك غير تتخيل وتهلوس لازم تأمني راني نقولك في الصح
بقات هكاك فنفس الوضع تهدي فيه فايت ساعة بعدها ناضت جبدت دوا مهدأ نحات حبه رجعت لعندو حطتلو الحبة في فمو وشربتلو الما وبقات مريحة علا ركبها وشادتلو يدو خايفة عليه ومذعورة من حالتو شويا هكا وقص عليها تخمامها لما رفد يدو ومسح علا شعرها وحكا راني مليح حبيبي متخافيش صحا هزتلو راسها اوكي ..ناض من بلاصتو ونوضها معاه وخرجو من كوزينة وهو شادها من خصرها وهي عينيها غير عليه تتسائل داخلها اسكو صح راه مليح ولا غير يتظاهر باش ميخوفهاش منو وعليه مشاو ريحو فصالة حذا بعض شادتلو  الين يدو وتمسح عليها وحكات اسر تحب نطلعلك لفوق ترقد اذا راك تعبان
اسر: نو خلينا مريحين مرانيش نعسان رما عينيه شاف مع وجها كان يبان علا ملامحها الخوف والذعر ولونها مخطوف حب يطمنها جبدها لعندو قعدها فحضنو وشدها من وجها بيديه :حبيبي علابالي خلعتك من قبيل لما تصرفت هكاك مي كانت مجرد نوبة وذوك والله راني مليح بلاما تخافي صحا مستحيل نأذيك
نحاتلو يديه وتلاحت عليه عنقاتو وحكات مش خايفة علا روحي خايفة عليك انت منحبش نشوفك هكا ...تبسم وبقا مزير عليها فحضنو ويمسح علا ظهرها ....بقاو هكاك مدة بعدها نطق اسر حبي خلينا نطلعو نرقدو خصك ترتاحي مردتش عليه رما عينو شاف معاها كانت راقدة رفدها بين يديه طلعها مع الدروج وصل للشمبرة فتحها دخلها وسطحها علا البونك غطاها وهود مسح بصباعو علا وجها وباسها وخرج رايح لغرفة خلاف دخل ووقف مقابل البالكون وساهي لبعيد كيفاه يتعامل مع الوضع واش لازم يدير باش مايوصلش يأذيها هي ولدو بالغلط وهو هكاك قص عليه سهو الباب لي تفرع بالقاوي تلفت يشوف ...تحكي وهي تغلي من لاخر يامسيو غريم وين تكون نكون وراح نرقد هنا ليلة وياويلك وتخرج من ودارت للباب غلقاتو بالمفتاح وترمات في الفراش تغطات وكروازات يديها تكات علا بونك بقات ساكتة شوي وتشوف معاه مزالو يشوف معاها ويتبسم من واش دارت: منبعد واش مراحش تجي راح الحال
اسر: اوكي جاي ومشا للبونك تسطح حدها وعطاها بظهرو غمضت عينها بعصب من تصرفاتو طلعت فوقو وتقلبت جات راقدة قدامو قربت لعندو ودخلت فيه وفوتت يديها ورا ظهرو وشبكتهم وشافت معاه بنص عين وحكات منا وجاي هكا راح نرقدو مش ونت عاطيني بظهرك ويلا انت مسمعتش هدرة سعتها تخلاص عليك مربوط مع البونك
تبسم اسر وحكا مالا شغل عصابات مع راجلك ههه وربط علاه متقوليليش راح تتحرشي بيا
الين: اممم مكاش لي علابالو مي يلا سخفت عليك ايه نديرها وعلاش لالا وغمزتلو
ضحك اسر بالصوت وزير عليها وباسها علا شعرها وحكا نحبك يافصعونة ....
فطن مع نص ليل لاجو العرق ويلهث  ويهلوس من نفس الكابوس لي يتكرر كل ليلة حط يديه علا راسو يهز فيه ويعيط الا الااااا قتلتها قتلتها كيفاه قدرت نقتلها وبقا يعيط ويزڨي ناضت بزربة شعلت الضو تشوف معاه يترعد ويرعش قربت ليه تهدنو طبعاها وناض يجري تبعاتو شداتو من يدو تحكي اسر اسمعني تعيش نتر يدو منا بعديييني متقربليييش بعديييني ولا حابة تخلاص عليك قاتلك انتي ثان بلاكي تغلطي وتقربي وخرج ورذخ الباب موراه ومشا للبيرو تعو دخل ليه وقعد يكسر فكل حاجة تجي فطريقو وبلاما يحس علا روحو دمدم روحو كامل ...قعد فلرض وتكا علا الحيط نزلو دموعو كيف طفل الصغير يلوم فروحو انت واحد قاتل ..قاتل يماه قاتل دمو ضحك بانكسار كيفاه قدرت تقتل لي عطاتك الحياة وطلڨ عيطة ضرب صداها فقاع ارجاء الغرفة  ....طاحت الين فلرض علا ركبها تبكي بشهڨة ودموعها شلال وداخلها اعصار تع افكار ومشاعر مخلطة حزنها علا حبيبها لي راه قريب يفقد عقلو وحالتو لي غي تزيد وندامة لي تاكل فيها من داخل فكل مرة تشوفو هك وتتفكر بلي هي سبابو لي وصل لهذي الحالة  قعدت تعيط وتزڨي وتضرب في لرض علاااه علاااه كل مرة نوصل حتى نذوق طعم الفرح ديرها بي دنيا وتجبد بي الحصيرة وتبكيني دم علاااه يادنيا غير انا لي مكتوب عليا نقاسي علاااه وتمنات كان ماتت ولا وصلت تشوف حب حياتها يصرا فيه قاع هكا وهي مش قادرة تدير حتى حاجة فجالو وتخفف عليه لي قاعد يصرالو .....
فاتو اليام وكانت  حالت اسر فلرض يوم عن يوم حالتو تزيد للاسوء صار ماياكل ميشرب وحتى  هدرة مولاش يهدر ولا كيف الشبح جسد بلا روح و انعزل عن عالم الخارجي كليا بقا عايش برك داخل عالمو داخلي لي مليان الم وجيعة ندم ولوم وقهر وحتى انو ولا كان تتتقلب الدنيا فوقاني تحتاني ميحسلهاش ولا حتى يقدر يتفاعل مع الوضع وكان كامل هذا الشي يصرا قدام الين لي نهد حيلها خارت قوتها وتكسر ظهرها لي كانت شاداتو بآسر قبل مايصرالو لي صرا كانت كل مرة تحاول تحكي معاه ويبقا ساكت وميدير حتى ردة فعل كأنو شخص داخل كومة تخليها تتمنى الموت الف مرة اهون من انو تشوفو هك