أنين الحب_صراع العشاق (باللهجة الجزائرية)

بارت 37

فطنت علا ضو شمس لي ضرب فوجها تململت في بلاصتها طلعت عينيها ليه وهي راقدة فحضنو قربت لوجهو باستو بوسة خفيفة علا شفافو وخرجت من فراش مشات لدوش غسلت وهودت مع دروج للطابق تحتاني كان واقف عند اخر درجة
نزار: صباح الخير مدام
ردت وهي تتبسم معاه الين: صباح نور واش مرقدتش راه يبان عليك تعب
تبسم معاها حتى هو وحكا نزار: منقدرش نرقد مدام خدمتي نخلي بالي عليكم
الين: حتى ولو ارقدلك ساعتين ريح روحك مراحش يأثر ومشات رايحة للكوزينة دخلت جات عينها عليه قاعدة يشرب فقهوتو
الين : صباحو الظاهر اليوم راك مبكر مع الزواوش وجبدت كرسي ريحت مقابلاتو
ضحك ادم وحكا صباح نور نو مرقدتش اصلا
ردت الين مدهوشة اووو علاش حتى
ادم: بقيت سهران نستنا يوصلو رجال الحراسة ومعلاباليش واش صرا ومقدروش يأمنولي عدد لي طلبتو حتى 5:00 تع الصباح
حكات الين وملامح استفسار علا وجها اممم شحال جبت حراس
تكا لور علا كرسي وحط يديه تحت راسو وحكا بغرور 50 راجل
ضحكت الين وضربت جبينها بيدها مدهوشة من تصرفو وحكات مهبول انت 50 ضربة وحدة يخاه بلاك رؤساء معندهمش حراسة قاع هكا
تقعد وسڨم قعدتو وحط يديه علا طابلة وحكا وراح نزيد نجيب قدهم وكثر غدوا وغمزلها
هزت الين راسها بفقدان امل منو ورفدت شوب قهوة لي قدامو شافت فيه كان باقي فيه كمية قليلة وحكات يرحم باباك شحال شربت قهوة لحتى عقلك نضرب لهذي درجة
طرطڨ رقبتو علا جيهتين وشبك صباعتين يديه فبعضاهم وطرطڨهم وحكا والله باش نضمن سلامتك معنديش بروبلام نأمنلك قاع باديڨاردز تع دنيا كاملة .ومد يدو لتارموس الحليب وفرغلها وحكا يلا شربي
رفدت الين شوب وشربت رشفة وحطت الكاس وحكات تعرف واش ادم احساس ولا اروع يكون عند الواحد ناس يحبوه ويخافو عليه قاع هكا
وشافت فيه طلع راسو جاو عينيه فعينيها لي يلمعو فثانية ولا قلبو يخفق بزربة وتخلطو مشاعرو داخلو ودخل في بعضاه بقا ساهي فيها شوي ومنبعد حكا حبسي متشوفي في هكا علا ساعة راني مروح ويلا بقيتي تشوفي فيا بهذو نضرات محال نخطي خطوة من هنا
ضحكت الين ومنبعد زبطت ملامحها وحكات منك صح راك رايح بصح علاه بهذي سرعة
طلع جاجبو وحكا بغرور واش ظاهر لحقتي تتوحشيني حتى قبل من نروح
خنزرت فيه وشافت فيه بنص عين وحكات الين: رنك برك ستغربت لي راك رايح بلخف سيتو ومدتلو لسان .بقا ادم يضحك من تصرفاتها ومنبعد حكا لازم نروح عندي شعالات نفريهم
الين: اوك ربي يسهل عندك برك كشما يصرالك حاسب علا روحك صحا
تبسم علا جنب وحكا اه صغرونتي كامل هكا خايفة عليا قولي قولي متحشميش
ناضت من بلاصتها وفدت حبة قاطو رماتها عليه وحكات بتنرفيز كيما يحكي لواحد مايسلك معاك ومشات خارجة
لقف ادم حبة القاطو لي ترمات عليه كلا منها قضمة وناض خارج وراها وحكا والله ياريت كون  تصرالي كاش حاجة برك ميت علامنشوف ردت فعلك ..تلفت شافت فيه وحكات بنبرة سيريو تع الصح خصك تشوف طبيب بسكو راسك مابقا فيه ذرة عقل ومشات ريحة علا طرف الفوتاي فصالة ..بعد ساعة لحق وقت انو ادم يروح مشا وين قاعدة ريح علا طرف طابلة تع زجاج مقابلها شدلها يدها بيديه وحكا تهلاي فروحك وخلي بالك علا روحك وعلا البيبي وعندك تهملي روحك فهمتي وباسلها يدها هزتلو براسها اوكي وناض من قدامها سقم فاستو ومشا خارج لحق لعند وين واقف نزار حبس حط يديه فجيوبو وقربلو وهمس وهو واقف حدو ادم: صدقني كان يطلع حرف منلي قلتو كذب الموت راح تكون اهونلك من شي لي راح نديرو فيك تطلع لسابع سما تهبط لسابع ارض نجيبك وندمك علا دقيقة لجيت فيها لدنيا فاهم
رد نزار: بلاه تهديدك انا محال نخون البوس
ضحك ادم بستهزاء ميهمنيش اسر تعك يلي يهمني الين وبس تتلمس شعرة منها ...... دنيا علا راسك وراس لي جابوك خليها مليح فبالك ومشا خارج. بقات الين تشوف فيهم من بعيد مش فاهمة علا واش يحكو فجأة عيطت ااادم تلفت ليها ناضت من بلاصتها مشات وقفت مقابلاتو وبدون سابق انذار قربتلو وحاوطاتو بيديها من ظهرو رعشة مشات فقاع بدنو وقلبو ولا يضرب بزربة بمجرد قربتلو بلامايخمم  ورما يديه حضنها حتى هو وزير عليها
حكات وهي حاضناتو الين: ماغسي بزااف علا كلشي جامي راح ننسالك كلشي درتو فجالي وجبدت عليه
رد ادم وهو يتبسم :لما ندير حاجة نابعة من هذا وضرب بيدو علا صدرو وكمل يحكي منحبش نتشكر عليه فهمتي
هزتلو براسها وهي تبسم معاه اوكي
ورما يدو حط علا كتفها وحكا تهليلي فروحك صحا
الين:اوكي ونت ثان خلي بالك علا روحك
غمزلها وحكا ادم:راح نرجع نشوفك سلام
.بقات واقفة عند باب تشوف فيه مروح فطاكسي تلوحلو بيدها لحتى ختفى عن الانظار
دخلت وغلقت لباب ومشات طالعة للطابق زاوج بدات تطلع فدروج بخطوات متثاقلة حاسة روحها منهارة من داخل ومن برا وكأنو كانت متقاوية بأدم وبعدما مشا خسرت هذيك القوة .قلبها يوجع ويسطر منكلشي قاعد يصرا معاها تمنات يكون كابوس يجي نهار وتفطن منو وترتاح من قاع العذاب لي راهي عايشاتو تنهدت بوجيعة تنهيدة تهز جبال بلاما تتحكم فروحها نزلو دموعها شلال . تلفت ليها بعدما سمع شهقتها وعرفها راهي انورمال زرب فخطوات لحق لعندها شدها من ذراعها وسندها كانت يدوب قادرة توقف عاونها تقعد فدروج ونزل علا ركبو عند رجليها وحكا
نزار: مدام الين راكي مليحة تحبي نجيبلك طبيب