فى قصر عائله الألفى كانت النساء تجلس سويا فى غرفه المعيشه والرجال تجلس فى ساحه القصر
وفجأة فتح بابا القصر ودخلت من ناريمان التى عادت من عشاء العمل أما زين فقد تعلقت نظراته بها فور دخوله
نمر بإستغراب"غريبه رجعتى بدرى"
ناريمان"لا غريبه ولا حاجه ده صاحب الصفقه جاى يستظرف مش جاى يشتغل وانا دماغى واجعانى ومش
ناقصه"
نمر"يعنى فاكس الصفقه"
ناريمان"اه"ثم أكملت قائله"عن اذنكوا"
قالت ذلك وتركتهم وذهبت وأثناء صعودها مرت على غرفه المعيشه التى تجلس بها النساء
اسيل بصياح"تعالى اجعدى معانا يا نيرو"
ناريمان بابتسامه"ماشى"
دخلت بالفعل وجلست معهم
ناريمان"هما بابا وماما لسه فوق"
اسيل"اه يا حبيبتى"
اومئت لها ناريمان
زينه بابتسامه"انتى هتشتغلى ايه صحيح يا ناريمان"
ناريمان"خليها نيرو بس يا قمر وانا ياستى عندى مجموعه شركات للسفر والسياحه واخواتى شركا معايا فيها"
زينه بابتسامه"ربنا معاكى"
وأثناء ذلك دخلت عشق وبالطبع نظرت لها زوجه سيف بغيظ
عشق بابتسامه"مساء الخير"
والده عشق إلهام"مساء الفل يا عشق يا بتى"
عفاف"حمدالله على السلامه يا عشج كبرتى واحلويتى"
عشق"الله يسلمك يا طنط والله حضرتك وحشتينى"
عفاف"وانتى كومان يا حبيبتى"
سما بابتسامه"اللى ينضرك انتى وناريمان يفكركوا انتوا اتنين اخوات"
والده عشق"فعلا والله"
ناريمان بابتسامه"لا ماما احلى طبعا"
ضحكت عشق قائله"انتى الأحلى يا قلبى"
زينه بابتسامه"انتوا اتنين احلى من بعض"
ابتسمت ناريمان قائله"بس انتى بتشتغلى فين دلوقتى يا زينه"
زينه"مش بشتغل دلوجت بس اشتغلت بعد ما اتخرجت وكنت اوجات كاتير بشتغل من البيت بس جمال مرداش يخلينى اكمل"
ناريمان"ايوه بس انتى لسه صغيره وكمان انا اعرف أنه لسه مكتوب الكتاب"
ريمه"لا صغيره ولا حاجه ده عندها خمسه وعشرين سنه وبعدين ده انا وفى سنها كنت حامل فى رحيم"
انزعجت زينه من حديثها هى وسما وعفاف ولاحظت ناريمان ذلك فقالت"والله مسأله الجواز بيبقى ليها وقتها وزينه اختارت الوقت الصح لأنها اتعلمت ودرست واشتغلت واستمتعت بحياتها وبعد كده قررت تستقر وده الصح اما بقى تتجوز وهى عندها تمنتاشر سنه ومتكملش تعليمها ولا تستمتع بحياتها ورغم ده تطلق هو ده بقى الغلط بعينه"
انزعجت كل من ريمه وحافصه وهنيه من حديثها فلا واحده منهم أكملت تعليمها وجميعهم تزوجوا فى سنه الثامنه عشر وبعد ذلك تطلقوا بعد زواجهم بثمان أو سبع سنوات وناريمان تعرف كل ذلك من ماريهان
حافصه بغضب" تجصدى ايه بحديدك"
ناريمان ببرائه مصطنعه"انا مقصدش اى حاجه خدتى الكلام على نفسك ليه"
وقفت حافصه بغضب"انا مش هجعد اهنه دجيجه واحده"
عفاف بحده"اجعدى مكانك ومسمعش حسك هى البنيه جالت ايه يعنى انتى اللى خدتى الحديد على نفسيكى"
جلست حافصه مكانها ويظهر على وجهها علامات الغضب هى وهميه وريمه
روحيه بحنق"متزعليش نفسك يا عفاف يا خيتى ناريمان عيله وغلطت"
كانت ناريمان سترد عليها ولكن قالت عفاف"لاه مغلطتش فى حاجه البنيه بتتحدد عادي"
ناريمان"انا مغلطش فى حاجه كل اللى قولته أنه مش لازم البنت تتجوز فى سن صغير لأنها مش بتكون لسه ناضجه واوقات كتير الزوج مش بيبقى قادر يحتوى زوجته"
ورد"انا مش معاكى فى النقطه دى انا ومهران اتجوزنا وانا عندى سبعتاشر سنه وحملت فى جود وجواد بعد جوازى بتلات شهور وكملت تعليمى واشتغلت ومهران كان بيساعدنى فى كل حاجه"
ناريمان"مش كل الناس ذيكوا انتوا الاتنين متجوزين عن حب طبيعى كل واحد فيكوا يضحى بحاجه عشان التانى انتى قبلتى تحملى وانتى يعتبر لسه طفله وكمان لسه بتدرسى وهو ساعدك فى الحمل وفى الدراسه وقدر يحتويكى وكمان خلاكى تشتغلى وساعدك فى تربيه اولادكوا وانتوا عملتوا كده عشان أساس علاقتكوا الحب وطبيعى مش كل الناس بتتجوز عن حب هنا عشان كده يبقى الزواج الأنسب للبنت فى العشرينات كده"
عشق يتهكم"يارب تعملى باللى انتى بتقوليه بس وتبطلى ترفضى العرسان اللى بيتقدموا ليكى"
ناريمان بسخرية"وهما اللى بيتقدموا دول عرسان"
عشق بصدمه"نعم ياختى مش عرسان ده انتى بيتقدملك السفرا والوزرا والظباط ورجال الأعمال والدكاتره والمهندسين وأشهر محامين البلد كمان وكل دول مش عرسان فى نظر ساعتك"
ضحك معظمهم على حديث عشق
ناريمان"لا مش عرسان وبعدين انا مالى بيشتغلوا ايه انا هتجوزهم هما ولا هتجوز شغلهم وبعدين مفيش فيهم المواصفات اللى انا عايزها"
عشق بتهكم"وايه مواصفات ساعتك"
ناريمان بابتسامه"بصى انا الشكل مش مهم عندى بس يبقى اطول منى ده شرط أساسى اه وعايزه اول ما اشوفه احس انى اتخطفت كده ويبقى ليه حضور كده وكاريزما ويبقى جان فى نفسه ويبان أنه قاسى من برا بس من جوا مفيش اطيب منه وياريت يكون بيحب السفر ذيى"
عشق بتهكم"وده نفصله فين ده هو فى حد بالمواصفات دى"
ناريمان بخبث"اه فى"
عشق بسخريه"هاتيلى حد بالمواصفات دى"
ناريمان بخبث"بابا ايهاب مثلا"
خجلت عشق فور سماعها اسمه ولاحظت ناريمان ذلك التى أكملت قائله بخبث"راجل ليه مركزه وحضور وعنده كاريزما تخطفك كده من النظره الاولى ومش بس كده ده يبان قاسى ومعندوش قلب لكن فى الحقيقه مفيش اطيب منه خصوصا مع الناس اللى بيحبهم واخده بالك انتى"
ضحك الجميع وخجلت عشق أكثر فقالت عفاف بابتسامه"بكفياكى عاد يا ناريمان متخليش امك تستحى اكتر"
ضحكت ناريمان قائله"عشان خاطرك انتى بس يا تاتا"
روحيه"سيبك من الكلام ده يا حاجه جوايلى هنعمل ايه فى موضوع التار ده مش كنا خلصنا"
عفاف"والله يا روحيه ياختى معرفش ايه اللى رجعه من تانى بس تلاجى زين جاعد برا مع الرجاله يمكن يلاجوا حل"
ناريمان"سؤال بس تار ايه"
عفاف بابتسامه"زمان يا بتى واحد من حدانا جتل واحد من عيلتكوا فعياله جتلوا واحد من عيلتنا وكانت هتجوم حرب بين العيلتين بس ولدى حسام هدى الجمور بينهم وصالحهم على بعض بس الظاهر ان اهل الجتيل مصفوش ورايدين يجوموا الدنيا من تانى"
ناريمان"طب وفين البوليس والشرطه"
سما"الحكومه يا بتى ملهاش حكم اهنه اللى بيحكم اهنه العمده ورجالته"
ناريمان"بس ده مش صح"
عفاف"يابتى الصعايده ميكبروش غير لكبيرهم اى حد تانى لاه يعنى الحكومه وجودها زى عدمه"ثم أكملت قائله"انتى بس مستغربه عشان حياتك كلها فى البندر لكن اهنه الوضع غير يا بتى"
ناريمان"إن شاء الله الأمور تتحل عن اذنكوا هطلع انام"
عفاف"يارب يا بتى اذنك معاكى"
وبالفعل تركتهم وصعدت نحو غرفتها دخلت الى حمام فور دخولها غرفتها لتنعم بحمام دافئ وخرجت وارتدت إحدى منامتها وتمددت على فراشها تنظر للأعلى وكل ذلك وهى لاتزال شارده فى ذلك الزين ولا تدرى ما ذلك الشعور الذى تولد فى قلبها نحوه رغم معرفتها أنه متزوج وانه ليس متزوج واحده فقط بل ثلاثه هى تسمع عنه منذ وقت طويل من ماريهان والغريب فى الأمر أن ذلك الشعور الذى تولد بداخلها فور رؤيته يماثل ذلك الشعور الذى شعرت به فور سماعها اسمه من قبل
