Unicode Version
ဘုန်းသျှန်ထက်မှာအလုပ်မသွားခင်မနက်ခင်းထမင်းစားပွဲတွင်စားသောက်နေသည်ကို အာရုံမရဘဲအရှေ့တည့်တည့်ကနေရောင်လွှမ်း၏အရိပ်အကဲကိုသာသတိထားနေမိသည်။ ပြီးခဲ့သည့်တစ်ပတ်လုံးလုံးဘုန်းသျှန်ထက်မှာနေရောင်လွှမ်းအား ကျောင်းပြီးလျှင်လုပ်ရမည့်မင်္ဂလာပွဲနှင့်ပတ်သက်၍ အနည်းအကျဥ်းတော့ပြောပြထားရမည့်အကြောင်းကို အသေအချာစဥ်းစားထားပြီးဖြစ်သည်။
ဘုန်းသျှန်ထက်အဖို့နေရောင်လွှမ်းနှင့်သင့်တော်မည့်လူကို သေချာရွေးချယ်ပေးသင့်သည်ဟုတွေးကာတစ်ပတ်လုံးလုံး သောကရောက်ရသလိုတာဝန်လည်းကြီးသည်ဟုခံစားနေရသည်။
သို့သော်အရေးအကြီးဆုံးအရာကထိုကိစ္စများကိုနေရောင်လွှမ်းအား မည်သို့ပြောထွက်နိုင်မည်ဆိုသည့်အရေးပင်။ ဘုန်းသျှန်ထက်ကပြောထွက်ခဲ့သည်ဆိုလျှင်တောင် နေရောင်လွှမ်းကခါးခါးသီးသီးဖြစ်ရှာပေလိမ့်မည်။
"ဦးသျှန် ဘာမှလည်းသေချာမစားဘူး ဘာဖြစ်နေတာလဲ နေမကောင်းဘူးလား"
မျက်နှာမသာမယာရှိလှသောဘုန်းသျှန်ထက်၏ပုံစံကိုကြည့်၍ နေရောင်လွှမ်းစိတ်ပူစွာမေးလိုက်သည်။ မနက်စာ မစားခင်ကအထိအဆင်ပြေနေပုံရသဖြင့်ရုတ်တရက်ကြီး တစ်ခုခုများဖြစ်လေသလားဟုတွေးကာစိုးရိမ်မိရသေးသည်။
"ဦးသျှန် နေကောင်းပါတယ် ခေါင်းမကြည်ဘဲနည်းနည်းမူးချင်သလိုဖြစ်နေလို့ "
"ဒါဆိုဆေးသောက်မလား"
"ရတယ် အဲ့ဒါကအရေးမကြီးဘူး....အမ်...ငယ်လေး..."
ဘုန်းသျှန်ထက်ကသူ၏စကားကိုဆက်ရန်ပြင်နေပုံရသဖြင့်နေရောင်လွှမ်းကငံ့လင့်နေသည့်အမူအရာဖြင့်ဘုန်းသျှန်ထက်ကိုကြည့်နေသည်။ နေရောင်လွှမ်းကဤကဲ့သို့ ကြည့်နေပြန်တော့လည်း ဘုန်းသျှန်ထက်မှာသူပြောရမည့်စကားကို ပြောမထွက်တော့ပြန်ဘဲတွန့်ဆုတ်နေမိသည်။
"ပြောလေ ဦးသျှန်"
"အာ..ဟိုဟာ..ဦးသျှန်ကိုရေတစ်ခွက်လောက်ခပ်ပေးပါလား"
နောက်ဆုံးတော့ဘုန်းသျှန်ထက်ဟာဘုန်းသျှန်ထက်ပါပင်။ နေရောင်လွှမ်းနှင့်ပတ်သက်လျှင်သတ္တိမဲ့ကာတွန့်ဆုတ်နေတတ်သည့်သူတစ်ယောက် ဖြစ်နေဆဲပါပင်။
VOCÊ ESTÁ LENDO
ALL I EVER NEED (Completed)
Romanceကိုယ်ဟာကိုယ့်ရဲ့နေ့ရက်တွေမှာသူ့ကိုချည်နှောင်ထားချင်နေဆဲ ဒီလိုနဲ့ပဲ နာကျင်လိုက်ရ၊လဲကျလိုက်ရ......။ ဒီလိုပဲ သူ့ဘက်ကကိုယ့်ကိုချည်နှောင်လာခဲ့ရင်လည်း စိတ်လိုလက်ရငြိတွယ်လိုက်ချင်သေးတာ...။ နေရော...
