المطر الأسـود ( مكتملة )

الحلقة 29

المطـــــــــر الأســـــــــود

للكــاتـبـتــين " بنـــين . و . برنتــلي "

البـــــــــــــــــــــــارت التـاسع والعشــرون..
..
شَـرد
شَـرجع
شَسوي

بعشرتك شلّي؟

شَلم
شَجمع
. شباقي بيّه شضال؟
شَحصد
شَرتجي
يلـ شگگت شتـلي ....

...

كاظم .. اي احجي ..

.. فطيم - بوية لكيتلي شغله واريدن اشتغل..

كاظم .. بويه عدلي عويناتج وباوعي زين انه موش رجلج ذاك اهو رجلج .. من عرستي.. بعد شورج صار عد رجلج. اسعلي اهو لا تسعليني..

خضر .. انته الخير والبركة عمي كلنه تحت يمناك.

فطيم .. وانته شتكول يخضر

خضر .. ما كاصرج شي حته تشتغلين ويو مكصرة انه اوياج كليلي ..

فطيم .. انه الشغل اريدن اشتغله..

خضر .. سدي السالفه يفطيم وسمي ومدي ايدج اكلي..

رسيل .. سكتت فطيم. لجن ضلت تخوزر بخضر وبيه جا انه شعليه مال الحريشي تباوعلي جني كاتله ابوها..

دنكت اوكل بناتي ورغيده الكبرت وصارت مرة..

كملنه العشه وشلنه الماعين غسلتهن بلحوض وتمل خدرت الچاي شربو وكامو ضلن بس النسوان انه كمت لحجرتي كام خضر اوياي..

نبت افطيم

فطيم .. اليوم ليلتي يو نسيت يخضر ..

خضر .. ها
لا مانسيت

رسيل .. حجاها وطلع
انه هم عفتهم ودشيت لحجرتي ..
فرشت لبنياتي ونمت ابصفهن وانه استرجع ذكرياتي شلون جنت اوكف اعله التنور البلب خبز لابوب وخواني المايجازون تبعي اوياهم عمرهم كله..

لو كعداتنه انه وبتول وتبهه وخالتي..

لو.. ملاكات عبد لله الصدفة ..
شلون رضى عبد لله يتزوج اختي؟!
لابد اكو شي خلاه ياخذها

هساع وذا اخذها سالفه صار الها اسنين نساني وراح والله بطرانه انه..

لا لا. انه حاسه اكو شي والله..

بنص افكاري العميقه وكلبي المجروح وعقلي المشغول .. فززني صوت رحيل واهي تكول

رحيل .. يمه شو ابوي ما اجه

رسيل .. نامي يمة نامي ابوج الليله عد مرته الاولى.

رحيل .. جا يله انه انامن ..

.......

فطيم .. دشيت لحجرتي
لبست ثوب مشرشب وحطيت الكحل والديرم
فتحت شعري وحطيت ريحه.. وكعدت متانيه خضر