العوض الجميل ❤️!

9

صحيت الصباح بدري وكالعادة إنتظرت عيون الضفدع كابوس حياتي تجي تفتح لي الباب💔... جات فتحت الباب وكالعادة...
قالت لي : يلا على شغلك عشان حتمشي لي حبوبتك😒
... مشيت عملت الشغل العلي كلوووو وكنت بالجد تعبانة شديد وحاسه اني ما تمام مصدعة وحالتي صعبة إتوضيت وجيت صليت ورقدت شوية حتى قمت أجهز عشان حمشي لي حبوبه لبست وكنت الليلة حنوم عندها فشِلت لي هدوم في كيس وبقيت قاعدة منتظرة الزمن يجي لمن زهجت قريت سورة الكهف الوصتني بيها حبوبة وقالت أقراها كل جمعة ❤️... شوية كدا وجاتني عيون الضفدع
قالت لي : يلا أطلعي والليلة حتمشي براك لانو ضياء عندو قراية وتارا عيانة
قلت ليها : طيب
مشيت ركبت العربية وقبل ما أركب عيون الضفدع أدتني الوصاية العشرة بتاعت لو شكيتي مني حأعمل ليك وحأعمل ليك ووو وانا أصلاً حفظت الوصايا دي حفظ💔...

وصلت بيت حبوبة❤️ لقيتها منتظراني سلمت عليها في رأسها وكان ظاهر عليها التعب...
قلت ليها : حبوبه مالك الليلة ما طبيعية فيك شي؟
قالت لي : لالا انا كويسة بس دي علامات الكبر يا بتي😊
قلت ليها : كبر شنو عاد انتي لسه صغيرة
قالت لي : لا يا بتي العمر ليه حقو

جات برتقالة سلمت عليها وحبوبه قالت ليها ترص الفطور
رصت الفطور وفطرنا وبرتقالة فطرت معانا لانو أصلاً حبوبه ما بتحب تحسسها بي الزله أو القرف كانت معتبراها زي بتها وبتعاملها كويس شديد حتى برتقالة إتعودت على حبوبه وحبتها وأبت تفارقها أبداً❤️...

بعد فطرنا برتقالة سوت الشاي شربنا وجيت رقدت لي حبوبه في رجلينها كنت بحب الحركة دي شديد بتحسسني بي الحنييييه❤️!
قلت ليها : حبوبه انتي عارفه إنو انا بحبك شديد
قالت لي : وانا كمان بريييدك شديد دا إنتي من ريحت الغالي والغالية❤️
قلت ليها : إنتي يا حبوبة الاسرة الكانت عايشة معاها أمي وين؟
قالت لي : قاعدة وكمان لمن أمك ماتت قالوا دايرنك حيربوك زي ما ربوا أمك وما حيقصروا معاك لكن عمك رفض.. هم كانوا بحبوا أمك شديد وبعد ماتت إنهاروا💔
قلت ليها: طيب انتي بتعرفي عنهم شنو ؟
قالت لي : البعرفو إنهم عبارة عن مرة وراجلها المره إسمها ( غيداء) والراجل إسمو ( ياسر) أسرة غنية وحنييينة شديد كانوا بحبوا أمك وأمك كمان كانت بتحبهم ربوها وطلعوها أكبر دكتوره!
قلت ليها  : طيب هم عايشين هسه ولا ماتوا؟
قالت لي : لالا عايشين وكمان بضربوا لي كل فترة يسألوا مني ومنك
قلت ليها : طيب أنا عايزة أشوفهم
قالت لي : لو ربنا أراد حتشوفيهم أن شاء الله😊
قلت ليها : طيب يا حبوبة إنتي ما عندك صورة لي ماما وبابا
قالت لي : أكيد عندي دقيقة أجيبها ليك
مشت الغرفة وجات طالعة أدتني دفتر قالت لي شيلي الدفتر دا فيه صور أمك وأبوك كلها
شلت الدفتر ومن قبل ما أفتحو عيوني دمعت🥺💔... فتحتو وكانت دي المره التانيه أشوف ليهم صوره كانوا حلوين شديد وفعلا طلعت بشبه أبوي شدييييد❤️ إتفرجت على صورهم كلها حتى صور عرسهم وكانوا عندهم صورة بي اللابكوت حق الدكاترة
قلت لي حبوبه : حلاتهم هنا كانوا في الجامعة!
قال لي : اي كانوا أحلى دكاتره وكانوا دايماً بقولوا دايرنك تطلعي أحلى وأكبر دكتورة
قلت ليها : وانا أن شاء الله حأطلع أحلى وأكبر دكتورة وحأحقق ليهم حلمهم ❤️
قالت لي : ان شاء الله

شفت ليهم صوره حاضنني فيها لمن كنت بيبي دي أكتر صوره عجبتني🥺 كانت ظاهرة في وشهم السعادة حبيت الصورة شديد وإخترتها من بين كل الصور ما عارفة لي لكن الصورة أسرت قلبي!
قلت لي حبوبه : حبوبه ممكن أشيل الصورة دي معاي؟
قالت لي : شيلي الدفتر كلو أصلاً هو ملكك بعد دا
قلت ليها : لالا خلي الدفتر معاك بس أنا دايره الصوره دي
قالت لي : سمح شيلها

برتقالة جهزت الغدا إتغدينا وجينا قعدنا تاني حبوبة كانت بتعاين لي زي كأنها بتتأمل فيني بقت على الحال دا قريب الربع ساعة
قلت ليها : حبوبة مالك إنتي كويسة؟
قالت لي : اي كويسة
قلت ليها : ما تكذبي على باين انِك ما على بعضك
قالت لي : شمس!
قلت ليها: نعم
قالت لي : يا بتي دايرة أقول ليك كلام ختيه حلقه في أضانك
قلت ليها : اتفضلي سامعاك
قالت لي : إعتمدي على نفسك دايماً يا بتي وخلي بالك من نفسك عيشي حياتك زي ما إنتي عايزة وما تخلي زول يسيطر عليك... أحلمي وحقق أحلامك وما تخلي الضحكة تفارق وشك عيشي بي قلب أبيض ونية صافية حبي الناس كلها عشان تتحبي❤️... ما تظلمي زول وخليك دايما عارفة انو في حاجه اسمها رب العباد وحاجة اسمها يوم القيامة وأعرفي انو ربنا يمهل ولا يهمل! ما تخلي صلاتك وحافظي عليها أفعلي الخير دايماً إتصدقي وصومي وصلي... ركزي على قرايتك وما تخلي التوافهه تشغلك... ما تحقدي على زول وما تحسدي زول... حياتك دي في يدك إنتي وماف زول بقدر يغيرها غيرك ومها الدنيا ظلمتك حيجي اليوم الربنا حيعوضك فيه كل المآسي والظلم بس إنتي أدعي وقولي يا رب🤲🏻

لقيت نفسي ببكي قلت ليها : حبوبة خليك عارفة اني حأمشي بي كلامك دا وأقول يااا رب بس إنتي لي بتتكلمي كدا؟! 🥺
قالت لي : يا بتي الدينا ما معروفة نحن الليله في لكن بكره الله أعلم نكون في ولا ماف
قلت ليها : حبوبة أوعى تمشي وتخليني أوعى كفاية ماما وبابا أوعى تعملي زيهم🥺💔
قالت لي : ما تخافي طول ما فيني نفَس حأقيف جمبك وأسندك وما حسيبك
حضنتها وقلت ليها : انتي الزول الوحيدة العرفت منها معنى الحنان والحب حبوبة انا بحبك شديد❤️
قالت لي : وانا كمان بحبك
طلّعت ورقة وأدتني ليها...
قالت لي : دا رقم وعنوان الناس الربوا أمك غادة وياسر خليها معاك لو إحتجتي لي أيّ حاجة وما لقيتي زول يقيف معاك أو تطلبي منو هم حيساعدوك وأنا واثقة فيهم ولو أبواب الدنيا إتسدت في وشك أمشي ليهم حتلقيهم في أي وقت سند ليك!
قلت ليها : انا ما حأحتاج لي زول طول ما إنتي معاي😊
... إبتسمت وباستني في راسي❤️
وقالت لي : ربنا يحفظك ويحميك من الدنيا وشرها 🤲🏻 أها قريتي سورة الكهف؟
قلت ليها : أكيد يا حبوبة مش أنا وعدك أقراها كل جمعة
قالت لي : شاطرة بتي يلا قومي صلي ونومي عشان تصحى بدري لي الصبح كان الله حيلنا 😊
قلت ليها : حاضر✨

مشيت غرفتي صليت ورقدت وبقيت بفكر في كلام حبوبه قلت : حبوبة دي مالا يا ربي ما عارفة قلقتني شديد ربنا يحفظها ياخ بالجد حبوبة نعمة دي إسم على مسمى! ياخ دي نعمتي في الدنيا رسلها لي رب العباد ❤️ اااه انا بس خوفتني بي كلامها دا... ما قدرت أنوم مشيت ليها في غرفتها لقيتها نامت سرحت فيها مسافة حتى مشيت غرفتي حضنت صورة ماما وبابا ونمت وأنا قلقانة على حبوبة وما عارفة بكرة مخبي لي شنو !

# ك~سر~ة....

اللهم إني أحببتها فحفظها لي🤲🏻
اللهم أدمها ليّ نعمة وأحفظها من الزوال✨
اللهم هي ومن دون ذلك هيّن❤️!

#يتبع