العوض الجميل ❤️!

4

الليلة يوم الجمعة صحيت من الصُبح وكنت منتظرة عيون الضفدع تجي تفتح لي الباب عشان أتوضى وأصلي إنتظرتها لحدي ما جات فتحت لي الباب
وقالت لي: قومي يا فقر شوفي شغلك😒
قلت ليها : طيب بس دقيقة أصلي وبعمل ليك العايزاه
قالت لي : لا ما شغلتي شوفي شغلك أول حتى تاني تصلي ولا ما تصلي دي ما حاجة بتخصني😒
سكت وما عرفت أعمل شنو وماف فايده من النقاش معاها 😔💔قمت وقفت على حيلي وهي جرتني من يدي ساقتني المطبخ نضفت وغسلت العدة وخلصت اي حاجة حتى جيت دايره أصلي!...
قالت لي : خلصتي شغلك ؟ 😒
قلت ليها : اي وماشه أصلي
قالت لي : خلاص طيري لكن كان طلعتي نسيتي شي بجي بكُرِك من صلاتك فاهمه؟ 😤
دنقرت راسي ومشيت 😔 صليت ودعيت ربنا يحلني منها وأقدر أعيش زيي وزي باقي الخلق🤲🏻! بس فجأه لقيت دموعي نازله مسحتها...
وقلت لي نفسي : ما تبكي يا شمس خلاص إنتي إتعودتي ودا بقى واقعك💔 لازم تتأقلمي وتبطلي بكى عشان لو واصلتي بالطريقة دي حتبكي كتير💔...

الباب فتح وطلعت دي عيون الضعدع
قالت لي : ماشين ناس حبوبتك قومي أجهزي وأدتني كيس ومشت...
فرحت شديد وجيت أشوف الكيس دا فيه شنو فتحتو ولقيت فيه هدوم كتيره وكلها حلوة وجديدة إستغربت لانو هي كانت دايما بتديني هدوم تارا القديمة وما حصل أدتني لبسة جديدة ولا حتى في العيد مع انو عمي كان بقول لي رسلت ليك حاجات وصلتك؟ كنت بقول ليه اااي وصلتني لكن في الحقيقة أنا ما بكون شفتها بي عيني💔
شلت لي لبسة لبستها وختيت الكيس جمبي عشان حشيلو معاي لإني حنوم عند حبوبة ❤️... بقيت قاعدة منتظرة عيون الضفدع تجي تفتح الباب وتقول لي أرح إنتظرت شويه كدا الباب فتح وطلعت دي هي
قالت لي : يلا أرح قدامي وحسك عينك تشكي مني قسماً عظماً ما أرحمك وخليك عارفة حبوبتك دي ما بتقدر تمسكك مني عشان كدا أحسن تلمي الدور فاهمه؟😒
دنقرت راسي 😔وقلت ليها : فاهمه
قالت لي : ولو سألوك عني قولي بعاملك كويس وإنك سعيدة وما ناقصك شي مفهوم
قلت ليها : مفهوم 😔
... ودا كان الدرس البتديني ليه كل يوم 💔...

طلعنا من المخزن ومشينا الهول لقيت ضياء وتارا جاهزين فرحت...
وقلت ليهم : حتمشوا معاي
قالوا: اي حنمشي معاك لكن ما حنبيت حنقعد شويه ونرجع
قلت ليهم : طيب
طلعنا وركبنا العربية ومشينا
وصلنا بيت حبوبة ❤️
إستقبلتنا إستقبال حلو شديد وبالذات انا كانت بتريدني وروحها فيني زي ما انا كمان روحي فيها ❤️!
... دخلنا والشغاله ضيفتنا و جابت لينا العصير بعد شوية كدا إتغدينا وناس ضياء وتارا وأُمهم رجعوا البيت وفضلنا انا وحبوبه الكانت عايشة براها مع الشغالة...
......

كسرة...
تعالوا نعرف سبب عيشت حبوبة براها ولي ما عاشت مع عمي عبد الله في بيته؟! :
حبوبه عايشة في بيت حلوووو وصغير كان عبارة عن فيلا صغيرة دا بيت جدي وهي بعد جدي مات رفضت تخلي البيت وبابا زمان حنسها كتير وحاول يقنعها انو ترحل معاه لكن رفضت...
وكانت بتقول : البيت دا فيه ريحة المرحوم راجلي...!
وكمان عمو عبد الله حاول يقنعها عشان ترحل معاه لكن هي برضو رفضت وقالت ما بترحل من البيت دا إلا على القبر وهي دا ما كان سببها... سببها الأساسي إنو هي ما دايره تعيش مع مرت عمي تحت سقف واحد لانو ما كانت بتحبها وعارفاها إنسانه دواخلها ما نضيفة ونواياها سودة💔 عشان كدا دايماً كانت ثابتة على قرارها لحدي ما عمي وأبوي قِنعوا وقرروا يجيبوا ليها شغاله عشان تهتم بيها ....
........

حبوبة قالت لي : شمس بتي تعالى حبيبة😊...
..... جيتها رقدتني في حضنها
وقالت لي : انتي سعيدة؟!
قلت ليها : أكيد طول ما انتي راضية عني وبتدعي لي حأكون سعيدة😊
قالت لي : راضية عنك وعافية منك وما بتمر دقيقة إلا وأدعي ليك فيها دا انتي بت الغالي والغالية❤️
قلت ليها : انا بريدك شديد يا حبوبه!
قالت لي : وحبوبة كمان بتريدك شديد يا عيون حبوبة إنتي❤️... اها قريتي سورة الكهف مش عارفه انو الزول مفروض يقراها كل جمعة
قلت ليها : لسة يا حبوبه انا ما بعرف أقرا وهي بقروها لي يعني؟
قالت لي: بتنور ليك بين الجمعتين وبتريحك شديد انا هسه بقرا وإنتي أقري وراي ولمن أن شاء الله تخشى المدرسه وتتعلمي القرآية أقريها براك حاضر؟
قلت ليها : حاضر يا حبوبة
.... قرت وقريت وراها لحدي ما خلصنا قفلت المصحف وباستو وانا بستو معاها
مسحت بي يدها على شعري وقالت : يلا يا شمس قومي نومي بعد دا عشان بكرة تصحى بدري دايره أتونس معاك وأشبع منك...
قلت ليها : حاضر يا حبوبه😊
جات الشغالة وكان اسمها " برتقالة "ودتني غرفة كدا وقالت لي: إتفضلي.
دخلت لقيت الغرفة كبيره وحلوه رقدت في السرير
وقلت : اااااااه لي كتيييير ما نمت لي في سرير 💔 ااااه من الدنيا أتاريه السرير مريح كدا وأنا كل يوم أنوم في الأرض اااه منك يا دنيا يا قاسية 💔!

# خاطرة....
نتعب...نتألم... وننكسر... لكن لا نيأس ونبقى بإنتظار السعادة دوماً عسى ولعل تقومُ بزيارتنا ذات يوم 😔💔!
#كتابتي

# يتبع...