- وقلبكِ؟
=ملكي أنا لحد م ييجي اللي يخطفه.
- وهو انتي سايبة لحد فرصة انه يخطفه؟ ما شاء الله عليكي اللي ييجي جمبك بتاكليه بسنانك.
=علشان أنا غالية، عشان أنا فرحة أمي وأبويا، عشان أنا جوهرة محدش يقدر ياخدني غير اللي يقدرني ويعرف قيمتي كويس، علشان أنا صعبة المنال، علشان نفسي اللي ربنا مآمني عليها، علشان خاطر أهلي اللي بيثقوا فيا واثقين إنهم مخلفين بنت بميت راجل، وقبل كل ده عشان ربنا اللي قال في كتابه العزيز" ولا متخذات أخدان"، صدقيني أنا مش مستنية كلمة حلوة من حد، تعرفي إني بحس بأي حاجة هتحصلي، قلبي بيقولي إنه قريب وقريب أوي كمان هييجي اللي هيخطف قلبي من قبل م اشوفه حتى.
- هتفضلي طول عمرك فقرية، خليكي عايشة في عالم الروايات اللي آخرته وجع دماغك.
= آخرته فُل يا عسل ان شاء الله، ويلا بقى عشان بننام بدري.
" نسيت أعرفكم بنفسي، اسمي رحيل عندي ٢١ سنة، يمكن فهمتوا من كلامي إني قافلة على قلبي بمفتاح إلى أن يأتي مُن يسرق قلبي، يمكن اللي مخليني عايشة في الخيال هو حُبي للروايات وخاصة قصص الحُب، دايماً البطل يحب البطلة من أول نظرة وهوب هي تحبه هي كمان وهوب هوب يتعرفوا على بعض قبل الخطوبة ويروح يتقدملها ويتجوزا عن حُب ويعيشوا في تبات ونبات ويخلفوا محسن ونعمات "
- رحيل..... قومي يا رحيل.
= خير يا غالية في اي؟
- احنا بقينا العصر.... قومي شوفي اللي وراكي عشان عايزاكي في موضوع مهم.
=موضوع اي يا غالية؟
- يا بنتي أنا أمك احترميني شوية وقوليلي يا ماما.
= لا انا بحب اقولك يا غالية مش انتي غالية وأغلى ما عندي، ايه الموضوع بقا؟
- اخلصي بس وأنا هقولك.
=لا دلوقتي.
- عريس.
= لولولولولولولي.
- يا بنتي وطي صوتك، مش لما تعرفي هو مين الأول.
= مش مهم، المهم إني اخلص من الكلية.
- حازم ابن خالتك.
= اطفي النور يا ماما عايزة أنام.
- رحيل.... اسمعيني بس.
= يعني بزمتك حد يتجوز حد اسمه حازم؟
- لا
= وابن خالتي.
-لا
=وكمان اقصر مني.
-لا.
= ولما كله لا لا، بتقوليلي عليه ليه؟
- يا بنتي يا حبيبتي عايزة افرح بيكي واشوف عيالك قبل م اموت.
= بعد الشر عليكي ياغالية، ميرضينيش الكلام ده، عشان كده لو فتحتي موضوع حازم ابن اختك ده تاني هفتحلك دماغه واخلي وشه زي قفاه.
-منك لله يا رحيل ياريتك كنتي كيلو طماطم كنت هستنفع بيكي.
= أم بلاهدف.
- بنت بلا أهداف.
...................
" يا نجمتي...... يا نجمتي...... امتى بقى هتنوري دُنيتي؟ ...... هتفضلي بعيد كده؟ كعادتي من وانا صُغيرة بقعد اتكلم مع نجمتي بتخيلها أميري اللي هينور حياتي، بلاقي نفسي ببتسم تلقائياً وأنا بتخيل أول لقاء بيني وبين أميري، هل شوفته قبل كده؟ هل أعرفه؟ أسأله كتير بسألها لنفسي بس في الآخر بنام واسكت كعادتي"
- ايوا يعني بيشتغل اي؟
= قبطان.
-موافقة.
= مش لما تعرفي اسمه الأول.
-سيف.
- اللهم صلِ عالنبي، سيف وقبطان دا احنا نبل الشربات بقا.
.....................
-ازيك يا آنسة رحيل؟
= بخير الحمد لله، تايتنك بقا وكده وevery night in my dreams i see you i feel.
- مش فاهم.
= لا بيسلموا عليك
- هما مين دول؟
=صوابع رجليك هاهاهاها، هسألك سؤال ذكي ولو جاوبت صح تبقى عديت الاختبار.
- اسألي.
= مين اللي قتل موفاسا؟
-والله م انا ههههههههههه
- ابو تُقل دم أمك، يلا يلا من هنا يلا وخد امك اللي بتبصلي بقرف دي من أول القعدة، جايلي ولابس كوتش عالبدلة، منكم لله يا مصريين.
....................
-يا غاليااااااه...... أنا جعانه يا غالياااااه.
= في اي؟ وطي صوتك فيه ضيوف مع أبوكي جوه.
- طيب مش تقوليلي ان فيه ضيوف كُنت وطيت صوتي.
=طيب بطلي كلام وخشي غيري هدومك عشان تدخلي العصير للضيوف.
- اوعي يكون عريس؟
= لا لماحة، خشي يلا بسرعة، مش كفاية جيالي متأخر.
- مش كنتوا فاجأتوني وجبتوا مأذون كنا نخلص بسرعة.
..........
- السلام عليكم ورحمة الله وبركاته.
= تعالي يا رحيل سلمي على عمك خيرت.
- آسفة يا عمو مش بسلم.
= ربنا يكملك بعقلك وأدبك يا بنتي.
" قلبي بيدق بعنف حاسة بتوتر وفرحة في وقت واحد، عادتي لما بتوتر بطرقع صوابع ايدي، قلبي بيرفرف مش عارفة ليه؟ قلبي فرحان ايوا قلبي فرحان أول مرة أحس بالإحساس ده مع إني مرفعتش عيني عليه بس حاسة بأمان محاوطني في كل مكان"
- يُسعدني ويشرفني يا عمي إني أطلب إيد بنت حضرتك المصون للزواج بي وأنا أوعدك إني أحفظها في عنيا وأكون خير زوج ليها.
= ماشاء الله عليك يا ابني، مغلطتش لما دخلتك بيتي.
- كفاية أخلاق بنت حضرتك اللي بتحلف بيها كل الناس.
" كنت شبه اللي في عالم تاني، سامعة كل اللي حواليا بس مش قادرة اتحرك"
..........
-آنسة رحيل.
= اي ده؟ بابا فين؟ انا فين؟ انت مين؟
-انا خالد، لسه طالب ايدك من والدك من خمس دقايق بس، وباباكي وابويا ادونا ٥ دقايق نتكلم فيهم سوا لو تكرمتي.
= اعذرني بس متوترة بس شوية.
- لا ولا يهمك.
= معندكيش أي أسألة؟
- لا.... بس طموحك اي؟
= معنديش طموح بس عندي حلم وحيد.
-وإيه هو؟
= لما ييجي الوقت المناسب ان شاء الله.
- وانتِ حلمك ايه؟
= لما ييجي الوقت المناسب هقولك ان شاء الله.
.................
" بعد كتب الكتاب"
-فاكرة لما سألتيني عن حلمي؟ حلمي هو انتِ يا رحيل لما سمعت صوتك لما ألقيتي علينا السلام وانا بخطبك كنت حاسس اني اتولدت من جديد، كنت حاسس بأمان وطمأنينة وراحة عجيبه، قلبي ارتاحلك وحبك وبقيتي حلمي الوحيد.
= وانت حلمي الوحيد يا خالد.
. #حسناء_عطوان
#الكاتبة_الكسولة
