- ازاي؟ وصحيت ازاي؟
= شخص أنا مدين ليه بحياتي هو السبب في اللي أنا فيه دلوقتي.
- مين ده؟
* أنا يا ليلى
=بابا! ازاي؟ ازاي كنت مخبي علينا كل السنين دي؟
* هفهمك كل حاجة. قبل ما اتجوز والدتك بحوالي سنتين كنت بشتغل مع عم معتز وفي يوم سمعته وهو بيتفق مع واحد تُربي انه يفتحله بالليل عشان يدفن معتز، وطبعًا معتز كان نايم لانه كان حاططله منوم في الاكل علشان ميقاومش وهو بيدفنه، عمره كان لسه ٣ سنين، المهم مشيت ورا عمه بالليل لحد م دخلت وراه المقابر وساعدني اكتر انها كانت مفتوحة ومكنش ليه سور، اتفاجأت انه فتح مقبرة والد معتز اللي كان مدفون فيها وحط معتز بكل حذر وقفل عليه بالقفل ومش بسرعة علشان محدش ياخد باله، كنت مستخبي ورا شجرة كبيرة وكانت الدنيا ليل ومحدش عرف يشوفني، حاولت افتح الباب بكل الطرق معرفتش، القفل كان كبير جدًا وكان صعب يتفتح، قعدت حوالي ساعتين افتح فيه وفي الاخر نجحت اني افتحه، فتحته لقيت معتز نفسه مكتوم ووشه أزرق بسبب نقص الاكسجين، بقيس نبضه لقيت فيه نبض لسه، جريت بسرعة على المستشفى وأنقذت حياته.
= وايه اللي حصل بعد كده؟
وليه خبيت علينا؟
* والدتك عارفة هي كمان، معتز كان عايش معانا انا ووالدتك لحد ما كان عندك ٣ سنين، بس لما لقيناه اتعلق بيكِ قررت اني اوديه دار أيتام أفضل، بس كنت بزوره كل يوم انا ووالدتك، وفهمناه انه مينفعش يقعد معانا علشان انتوا مش اخوات.
" مقدرتش اسمع حاجة تانية، دخلت اوضتي وقعدت اعيط، ازاي انا مش حاسة بنعمه امي وابويا؟ ازاي شخص زي ده استحمل كل ده من وهو طفل!
هو اتربىٰ من غير عيلة وبقا دكتور وشخص ناجح في حياته وانا عندي امي وابويا ومش مخليني محتاجة حاجة وفاشلة وبنجح بالعافية، أنا هكون عوض ليك يا معتز، هكون انا شمس حياتك، هكون انا النور اللي تهتدي بيه، هكون انت ربنا بعتك ليا علشان افوق من اللي انا فيه "
............
"يوم الخطوبة"
-دبلتي منورة ايدَك.
= أنا العريس على فكرة!
- كمل باقي الاسرار، بتروح فين كل يوم؟
= بروح ازور عمي.
- ايه! انا لو مكانك كنت قتلته.
= عمي المرض بياكل جسمه، عنده بكتريا اسمها ( البكتريا آكلة لحوم البشر)
البكتريا دي لما بتصيب عضو شخص لازم يتم بتره بسرعه والا الشخص بيموت فورًا، عمي بتر رجليه الاتنين، بس البكتريا مصممة تقتله، ربنا بينتقم منه في الدنيا بالشكل ده، يا ترى حساب الآخرة عامل ازاي؟ ولاده سرقوه وسافروا، ومحدش بيسأل عليه غيري، هو اعترفلي بكل ده، لكن بعد فوات الاوان.
- انت شخص عظيم!
= اوعديني متسيبينيش.
- اوعدك اكون شمسك ونور عينك، اوعدك اكون سندك واكون خير زوجة ليك، اوعدك ان نفسي اللي بتنفسه يكون ليك، اوعدك افضل جمبك لآخر نفس في عمري. ممكن تقولي سر انك جيت تتقدملي الصبح؟ ومجتش بالليل.
= هقولك بعد كتب الكتاب.
..........................
" يوم كتب الكتاب"
-مبروك.
= السر يسطا.
- بخاف من الليل؛ لأني لما عمي دفني كنا بالليل وصحيت لقيت نفسي في القبر اتخضيت، بس مطلعتش صوت، قعدت حوالي ٣ سنين متكلمش لحد م شوفتك يا ليلى وانتِ طفلة، كان أول حاجة انطقها هي : لي.. لىْ.
قعدت في الملجأ لحد ما بقا عندي ١٨ سنة كنت لسه مخلص ثانوية وجبت مجموع الطب بس رفضت ادخل علشان مزودش الحمل على والدك ووالدتك، كفاية انهم كانوا شايلين همي طول السنين دي، اشتغلت جمب الكلية، واجرت شقة قعدت فيها لوحدي، اتعلمت اطبخ واغسل لنفسي، اتعلمت ازاي اعتمد على نفسي ومحتاجش لحد، تخيلي اني طول السنين مروحتيش عن بالي لحظة، شوفتك بالصدفة مرة وقولت لوالدك اني عايز اخطب وطبعًا رحب بالفكرة حدًا وطلعتي انتِ، كان رافض في البداية علشان الظروف اللي مريت بيها، بس وافق في الاخر بسبب اصراري، واهو نجحت الحمدلله في الاختبار وبقيتي مراتي الحمدلله.
=ياريتني قابلتك من زمان.
- لما شوفتك عرفت معنى الأمان
#حسناء_عطوان
