- الحل الوحيد إنك تتجوز..
= مستحيل!
- ولحد إمتى هتفضل تسقط؟
= مش عارف!
- يا حسن افهمني، أنت بقالك 3 سنين بتسقط بمزاجك علشان متتخرجش من الكلية دي، لو كنت كملت كنت هتطلع الأول، 4 سنين يا حسن بتطلع الأول على الدفعة وجيت على آخر سنة وتعمل كده؟
= وأخويا اللي ملزوم مني ده، مين ياخد باله منه؟
- ما أنت رافض تسيبه عندي لحد ما تخلص جيشك!
= يوسف أنت مش ناقص مشاكل مع أبوك، كفاية إنه مش بيصرف عليك.
- يلا الله يسامحه هو ومراته بقى، ولية عاملة شبه بابور الجاز ومخلفة خمس عيال وحامل في السادس ومكوشة على فلوس أبويا، مش عارف لو كانت حلوة شوية أبويا كان هيعمل فيا إيه أكتر من كده!
= شوف خدت كام ذنب بسببها دلوقت! لم لسانك ومتجبش سيرتها ولا سيرة حد مش عاوزين سيئات.
- ما هي اللي بتجيبه لنفسها..
= الله يسامحها بقى ويهديها، ما تيجي نجيب ياسين من المدرسة.
-لسه فاضل ساعة على ميعاد خروجه!
= تعالى نضرب كشري....
--------------------"تاني يوم"
* الأجرة ورا يا حضرات...
= 2 من 10 يا أستاذة للسواق.
- حضرتك بتكلمني؟
= لا حول ولا قوة إلا بالله، أومال بكلم أمي!
- أنت بتكلمني كده ليه؟
= هو فيه بنت في العربية كلها غيرك؟!
- وحضرتك مدتش الأجرة لأي راجل ليه؟
= والله حضرتك الكل بيديكِ الأجرة!
- يعني دول مش ليا؟
= ليكِ إيه يا أستاذة؟! هو أنتِ فاكرة نفسك بتشحتي في السيدة، الأجرة فين يا أستاذة اديها للسواق؟
- اتفضل..
= متركبيش ميكروباصات تاني، ابقي اطلبي أوبر، بدل ما تبهدلي نفسك كده!
- متزعقليش، أنا عيد ميلاد واحدة صحبتي ساكنة قريب من هنا وأوبر مش بيروح الأماكن دي، فخدت ميكروباص..
= وصحبتك دي ساكنة فين؟
- في ......
= نفس المكان اللي أنا ساكن فيه.
- بجد! طيب ممكن توصلني؟
= صحبتك دي اسمها إيه؟
- اسمها آلاء خالد......
= دي بنت عمي! بس آلاء عيد ميلادها مش النهاردة، آلاء لسه فاضل شهرين على عيد ميلادها..
- لأ النهاردة، أنت هتعرف صحبتي أكتر مني؟
= وأنا بقولك متروحيش، مينفعش..
- وأنت مالك أصلًا؟
= أنتِ زي أختي، بلاش تروحي، هي مش كويسة...
- أنت اللي مش كويس، إزاي تتكلم على بنت كده؟ وكمان بنت عمك!
= مهي علشان بنت عمي وعارفها بقولك بلاش تروحي...
- لأ هروح، بني آدم غلس وبتتدخل في اللي ملكش فيه.
* جرا إيه يا أبلة أنتِ وهو؟ بقولكوا إيه أنا مصطبح وأنتوا ضيعتوا الدماغ اللي عاملها، اتنيلوا انزلوا هنا منكم لله..
= ننزل فين يسطا؟ احنا على طريق سريع وفيها أكتر من ربع ساعة مشي..
* هتنزلوا بالذوق ولا أنزلكم بالعافية؟
- خلاص هننزل، هننزل...
= ننزل فين اقعدي..
* ولا أنت وهي، هتنزلوا ولا أرفع عليكم المطوة؟
= تحت أمرك يا باشا على جنب، اتنيلي انزلي جبتي لينا الكلام من اللي ميسواش......أنتِ بتعيطي ليه دلوقت؟ هو أنا ناقص؟
= علشان نسيت شنطتي في العربية..
- يا خبر؟ فيها فلوس كتير؟
= لا، مش معايا فلوس..
- أومال حاسبتي إزاي؟
= معايا فيزا..
- مهو مصطبح، الحمدلله إنه مكنتش فايق وإلا كان هيخلي وشك شبه وش أبو الهول..
= مين أبو الهول ده؟
- أبويا...
= اسمك الهول؟
- لا أوضة السفرة..
= أنت بتستظرف؟
- هو أنتِ مش عايشة في البلد دي ولا إيه؟
= لسه جاية مصر الأسبوع اللي فات..
- وآلاء تعرفيها منين؟
= سوشيال..
- هو أنتِ عبيطة؟!
- هعيط والله!
= أنا همشي قدامك، وامشي ورايا لحد ما أوصلك للست آلاء دي...
-------
- يوسف اسمعني ضروري، تعالى قدام بيت عمي خالد ضروري، آلاء بنته بتعمل مصيبة جديدة..
= مصيبة إيه تاني؟
- أما تيجي هحكيلك، تعالى بسرعة بس...
= حاضر...حاضر..
