..
- ياه لو العالم كان عبارة عن عصير قصب ومكرونة بشاميل وعصير قصب والإنسان هيبقى سعيد ومبسوط خالص خالص والله.
= وجميلة.
- وأحمد...
= للأبد؟
- للأبد....
----------
- قالي للأبد، وطلع الأبد عنده بعد ٣ شهور النتن بتاع سماح.
= خلاص يا جميلة ميبقاش خُلقِك ضيق كده.
- هستنى إيه من واحد اسمه أحمد؟
= حصل خير خلاص، تعالي عندنا مُحاضرة لدكتور وسيم.
- دي صفة ولا اسم.
= اسم على مسمى.
- تلاقيه اسم بس ما أنتِ اختياراتك نتنة.
= تؤتؤ أنتِ أنتن!
- كان خاطبني بدهب صيني النتن.
= مش قُلتلك أنتِ أنتن.
- كان كل يوم يناديني باسم واحدة شكل، وأنا أقول ضغط شُغل.
= هو كان مضغوط فعلًا، الله يكون في عونه!
- وكان نرم وكنت مستحملة.
= مهو مكنش ينفع برضو تتخطبي لواحد من دفعتك!
- أنا رغم إني بهزر بس أنا زعلانة وزعلانة أوي يا إلهام، أنا حبيته!
= عارفة، أنا أكتر حد حاسس بيكِ، ربنا هيعوضك والله بزوج صالح أخير منه.
- مستنية العوض.
-------------
- إلهام، فيه مشتل ورد وزع فتح جديد جمب الكُلية، إيه رأيك نروح نشتري من هناك؟
= مين صرف فلوسه كلها الشهر اللي فات على الزرع ومقضيها صياح لآخر الشهر.
- آني!
= يبقى مفيش زرع.
- نبات واحد بس.
= واحد بس...
- آه آه واحد....واحد بس.
-أيوه، كده تمام ١٠ نباتات تمام أوي، بتبرقيلي كده ليه؟ دول ١٠ بس مش هيأثروا على المصروف.
= ماشي...
- أيوه لو سمحت عاوزة ليهم سماد، إيه ده؟ الله صبار تين شوكي، جيبه كمان، الله نخلة! هاخدها، واو فيه نبات ديل البُرص، نُقطة ضعفي الزواحف.
= هو حضرتك عندك مشتل؟
- لأ، ده ليا أنا ....
= أول مرة أشوف حد بيحب الزرع كده ويشتري الكمية دي كلها لنفسه.
- ومش بس الزرع، بحب الكتب وأم كلثوم وعصير القصب.
* ما تحكيله قصة حياتك بالمرة.
- وه! أنتِ هنا من إمتى؟
* هنتأخر يا جميلة يلا..
- طيب أنا مش هعرف أنقلهم البيت.
= ممكن حضرتك تسيبي العنوان ورقم تليفونك وهيوصلو خلال ساعات.
- طيب حضرتك اسمك إيه؟
= باشمهندس حسن الزيات.
---------------
- حسن الزيات، الاسم ده مش غريب عليا يا إلهام مُتأكدة إني سمعته قبل كده
= تيجي نعمل سيرش عنه عالفيس؟
- فاتتني دي، يلا بسُرعة.
= لقيته، أول اسم ظهرلي، ألاه، وصورته كمان أهي، الأكونت برايفت، نامي بقا.
- نحس!
= مش الطلبية وصلت، وصل معاها كارت ولا لا.
- لحظة، الكارت عليه رقم تليفون واحد، وفيه لينك أكونت فيسبوك.
= مستنية إيه، ادخلي على اللينك بسُرعة.
- دي بيدج المحل.
= كويس، يلا.
- واو، بيجيبوا نباتات نادرة كمان، الله! نبات القفص الصدري، نجيبه بكره.
= منك لله أنتِ والزرع، شوفي احنا بنعمل إيه اخلصي.
- فيه حاجة، فيه اختصار على كُل صورة H.Z الاختصار ده كان بيكون تحت كل رسالة بتتبعتلي في كل جواب وأنا في ثانوي.
= معقول هو ؟
- يمكن مش هو..
= ممكن آه.
- نتأكد ازاي؟
= نامي والصُبح إن شاء الله نتأكد.
-----------
- أهلًا وسهلًا بحضرتك، خير إن شاء الله، الزرع فيه حاجة؟
= لا أبدًا، بس كنت محتاجة أعرف طريقة العناية بكل نبات فيهم.
- كُل نبات عليه طريقة العناية بيه ويتسقي كل أد إيه.
= طيب محتاجة سماد زيادة؛ لإني عندي نباتات تانية ومحتاجة سماد.
- إيه نوع النباتات؟
= ريحان ونعناع وجرجير.
- تحت أمرك.
= وطريقة العناية ممكن.
- هكتبهملك حاضر.
" وأنا خارجة من باب المشتل سمعت صوته بيقول:"
- مش هتعرفي توصلي لحاجة..
= نعم؟
- بتكلم في التليفون.
----------------
- مش نفس الخط يا إلهام.
= يبقى مش هو.
- هو، متأكدة إنه هو، حفيد حسن الزيات.
= أخو جدك؟
- آه هو.
= ممكن ميكونش حفيده، ويكون تشابُه أسماء.
- شبه جده، أنا لازم أعرف كل حاجة النهاردة.
-----------
"حسن"
جالي رسالة واتساب من رقم مجهول، مهتمتش وسبت الموبايل، بعدها بحوالي رُبع ساعة الموبايل مبطلش يجيب صوت إشعارات من كُتر الرسايل، فتحت الرسايل وكان محتواها:
" أنا جميلة اللي خدت منك الزرع من يومين"
" فاكرني؟"
" أنا لازم أعرف أنت مين"
"أنت تعرفني، وتعرفني كويس، ومن زمان، وأنا متأكدة"
" كمان أونلاين ومش بترد!"
" أنا مبحبش كده على فكرة"
" تمام أوي"
" بس مش هسكت غير لما أعرف كل شيء"
"ومش هبطل أبعت رسايل لحد ما ترد عليا علشان فضولي هيموتني"
- شفت الرسايل ومردتش غير بعدها بربع ساعة.
" ممكن تديني فُرصة أفهمك علشان واضح إنه فيه سوء تفاهُم"
" اتفضل"
" أنا معرفش حضرتك، ومش فاهم حضرتك بتتكلمي عن إيه، أنا أول مرة أشوفك فيها لما دخلتي المشتل أول مرة، وبعد إذن حضرتك"
----------------
- بتعيطي ليه دلوقتِ؟
= بحبه أوي يا إلهام، أنا حبيته.
- هو مين ده؟
= حسن يا إلهام.
- متأكدة؟
= متأكدة..
- جبتلك نبات القفص الصدري اللي كنتِ عاوزاه.
= حسن!
- آه حسن.
= يعني مطلعتش موهومة أهوه، وتعرفني، وأنت صاحب الجوابات.
- آه أنا...
= كنت عايز أفاجئك بس بوظتي الدنيا.
- حصل خير، أنت حسن الصُغير حفيد حسن الكبير صح؟
- أنا اللي كُنت بغلس عليكِ، بس منستكيش، نقلنا اسكندرية تاني من حوالي خمس سنين، ومن أول يوم وصلنا فيه وأنا ببعتلك جوابات بعبرلك فيها عن مشاعري المكنونة في قلبي.
= مكنش بيلمس قلبي غير جُملة " يسعِد مساكِ يا هانم"
- ويسعد قلبك يا جميلة.
= تقبلي تكوني شريكة حياتي يا جميلة.
- وتجيبلي كل الورد والنبات اللي في الدنيا.
= تعرفي إني فتحت المحل ده مخصوص لأجل عيون جميلة، لأجل إن جميلة بتحب الزرع.
- تعرف إن جميلة ممتنة للزرع؟
= أنا اللي ممتن ليه والله.
- أقولك على سِر؟
= قول...
- مش بحب النباتات، وعندي فوبيا منها، بس حبيتها لأجلك، يا ضي عين حسن!
وفي الخلفية صوت أم كلثوم وهي بتقول: " كان لك معايا..... أجمل حكاية في العمر كله"
#حسناء_عطوان
