_بابااا ....باباااا..باباااا ....انا جيت يا بابا ....!
=حمدالله عالسلامة يا قلب بابااا..!..طمنيني عملتي ايه ...؟!
_كنت شطورة والميس ادتني نجمة بتضحك ..حتي شوف !
=الله حلوة اوي ...شطورة ي حبيبتي !...يلا تعالي غيرى هدومك ...علشان نتغدي...!
_باباا ..ممكن اسألك سؤال؟!
=اتفضلي يا قلب بابا..!
_هو. انا ليه مش عندي ماما زي صحابي ...هو انا وحشة علشان مش عندي ماما ؟!
=لا يا حبيبتي ازاي تقولي كدا؟!..انتي جميلة اوي ...انت عارفة انك شبه مامتك اوي ..؟!
_بجد يابابا ؟!
=بجد يا روح بابا...!
_طيب ممكن تحكيلي عنها..؟!
=حاضر يا ستي نخلص الغدا الاول وبعدين احكيلك كل حاجة عن ماما ..!
_حاضر ...!!
=ياااه يا فريدة وحشتيني اوي كان نفسي تكون معانا دلوقتي ...بنتك شبهك اوي بطيبتها وبرائتها وروحها الحلوة ... وعفويتها...بتفكرني بيكي اوي ...انتي فعلا اسم علي مسمي "فريدة" وفعلا انتي فريدة الله يرحمك يا حبيبتي ♡
_بابااا ...خلصت اكل يلا بقا احكيلى!
=حاضر ياستي نبتدي من الاول..!صلي علي النبي!
_عليه الصلاة والسلام ♡
=مامتك كانت حب عمرى اللي اتولدت علي ايدى زي ما بيقولوا......انا اللي سميتها فريدة ...كانت بنت خالتي اتربينا سوا...مكناش بنفارق بعض ابدا ..كانت جميلة اوي ..ضحكتها مكنش ليها مثيل ..كانت شبه الشمس اللي بتنور حياتي ..مكنش لينا حد غير بعض ...كنا بنذاكر سوا ..وبنلعب سوا...وبناكل سوا ....كانت طيبة اوي وبتحب الخير لكل الناس ..مكنتش شايف حد غيرى ...ببساطة لان عنيا كانت مليانة بيها اكتفيت بيها .وبحبهاا ..لحد م الايام عدت وكبرنا سوا لحد ما جه اليوم وروحت اتقدملها فيه ...كاني امتلكت سعادة الدنيا...حسيت بفخر وانا شايف الحب ف عنيها ...كنت مبسوط علشان شايف الفرحة ف عنيها مش علشان نفسي ...وقتها اخدت عهد علي نفسي اني هفضل اخليها مبسوطة علطول ...اتجوزنا ولما عرفنا انها حامل فيكي كنا هنموت من الفرح ....كانت بتحبك اوي حتي من قبل م تشوفك ...كانت بتفضل تتكلم معاكي بالساعات وتحكيلك عننا ..كانت نفسها تشوفك ناجحة ف حياتك...مكنش بيهمها حاجة غير انها تشوف اللي حواليها مبسوطين...مش مهم هي...كانت بتسامح اي حد..مكنتس بتزعل من اي حد...كانت مفكرة كل الناس ملايكة زيها ...كانت طيبة اوي ...الله يرحمها ماتت وهي بتولدك ...كانت مستعدة تضحي بنفسها علشان تعيشي انتي ..لدرجة انها كانت عارفة انها ممكن تموت وهي بتولدك ...كانت عارفة انها تعبانة ومتتحملش الحمل بس هي عنيدة ...خبت عليا مرضها علشان تعيشي انتي ...علشان تيجي الدنيااا ....الله يرحمها كانت ملاك...وبسكدااا ...اي دا انتي نمتي ...مغلطش فعلا لما سميتك فريدة علي اسمها...بس ياترى هتسبيني وتروحي زيها...؟!
