#اسكريبت_الغدر١
-احنا لازم نتطلق.
=تاني يا خالد، هنعيد نفس الكلام ده تاني؟
-تاني وتالت وعاشر، صدقيني أنا مبقتش مستحمل، انتي من حقك تكوني أم.
= صدقني أنا مش عايزة أكون أم غير لولادك أنت، انت حبيبي اللي اتجوزته بعد عذاب، يرضيك حُب خمس سنين يضيع عشان سبب تافه زي ده؟
-تافه، انتي شايفة ان ده سبب تافه، لما اكون مش عايز احرمك من إنك تكوني أم سبب تافه.
= انت مش مستوعب انت بتقول إيه، انا عندي فوبيا من كُل الرجالة إلا انت، فاهم ده معناه ايه، يعني موتي بالبطيئ.
-وليه تجبري نفسك تعيشي مع واحد معيوب؟
=اسكت، متقولش على نفسك كده، انت أحسن راجل في الدنيا، صدقني مفيش حد كامل، احنا بشر مش ملاك، أنا معاك خطوة بخطوة، انا اتجوزتك عشان اقف معاك في ضعفك وخوفك عشان تكون سندي وأكون سندك عشان انت الوحيد اللي قدرت تخليني اتغلب على خوفي، عشان انت الوحيد اللي بتستحملني، متقولش الكلام الوحش ده تاني أبداً، ممكن.
آية، أنا مش عايز أكون سبب في تعاستك.
=تعاستي معاك أحسن مليون مرة مع سعادتي مع غيرك.
-ربنا يخليكي ليا يا حبيبتي وميحرمنيش منك أبداً.
=ولا يحرمني منك يا نور عيني، بس ممكن طلب.
-قولي.
=من غير م تتكلم حرف واحد... نروح بكره للدكتور عشان نبدأ في العلاج بتاعك.
تاني السيرة دي؟ مش كنا خلصنا منها، احنا روحنا لدكاترة ملهمش عدد وكلهم قالوا : الأمل ١٪ أعمل بيه اي؟
" ابتسمتله بسماجة وقُلت"
= م احنا هنروح عشان ال ١٪ ده.
سمجة، طول عُمرك سمجة وباردة.
=عشان خاطري بقا، آخر محاولة.
-طيب.
" أنا اسمي آية وده زوجي خالد اتجوزنا جواز صالونات زي م بيقولوا مكناش نعرف بعض قبل الخطوبة بس حبينا بعض من أول نظرة زي م بيقولوا برضو"
...........................................
-يا ميلة بختك يا بنتي، لو كنا نعرف مكناش جوزناه ليكي،انا عارفة جوازه اي المهببة دي؟
= ماما لو سمحتي كفاية، م انتي عندك اختي ماشاء الله مخلفاهم ٤ وحامل في الخامس ويا عالم هتجيب السادس امتى؟ ومش قادرة تصرف عليهم ومش ملاحقة وكل يوم والتاني ولادها يعملوا مصايب ومشاكل، صدقيني يا أمي انا مرتاحة كده، خالد مخليني أسعد واحدة في الدنيا والله ومفيش في طيبته ولا حنيته.
الطيبة والحنية يختي مش هينفعوكي لما تكبري وتعجزي ومتلاقيش اللي يسندك ويقف جمبك.
= يوووه يا ماما هو انا كل م آجي عندك تسمي بدني بالكلام ده.
-يا خايبة ابن خالتك رضا لسه شاريكي وعايزك في الحلال واهو احسن من اللي مبيخلفش ده.
= انا مش عارفة انتي ازاي بتفكري تبعديني عن جوزي بالشكل ده، شكلي جيت للمكان الغلط، انا ماشية سلام.
.................................................
-مالك يا آية يا حبيبتي بتعيطي ليه؟
"بصتله بحزن ومسحت دموعي وقولت"
= مفيش يا خالد انا كويسة.
-طالما قولتي خالد يبقى في حاجة وحاجة كبيرة كمان.
= مفيش يا حبيبي صدقني، ها جاهز نروح للدكتور؟
-انتي كنتي عند مامتك مش كده؟
=ايوا.
-طيب تمام، يلا بينا.
.....................
"روحنا للدكتور سوا وأول م قال ان في أمل إنه يخف فرحت جداً وفي نفس الوقت زعلت لانه قال العلاج هياخد من سنة ل سنتين ويمكن ٣ سنين مكنتش عارفة أوصف إحساسي، بس كُنت شايفة نظرة حزن وكسرة في عيون خالد، مكنتش ف إيدي حاجة أعملها غير إني أدعي إنه ربنا يتم شفائه على خير ".
....................
-مش شايفة إنه عدى سنتين أهو ومفيش أمل من علاجي، خلاص بقا أنا تعبت ويأست.
= بس أنا ميأستش، أنا لسا عندي أمل إنه ربنا هيكرمنا قريب وقريب أوي كمان بس انت قول يارب.
-يارب، بس لحد امتي حاطين أملنا في حاجة مش هتحصل، احنا عاملين زي اللي بيتعلق في حبال دايبة ومسيره يقع.
= وانت اي اللي عرفك انها حبال دايبة، مش يمكن هي حبال قوية بس احنا اللي بنوهم نفسنا بكده عشان احنا معندناش ذرة ثقة في كرم ربنا.
-ونعم بالله، انا واثق من كرم ربنا، بس احنا حاولنا كتير بس مفيش فايدة، أنا مش هاخد العلاج ده تاني، وكل واحد يروح لحاله "
= امي كلمتك مش كده.
-محدش كلمني.
=تبقى كلمتك، وحضرتك بتسمع كلامها ومش بتسمع كلامي، تمام أوي لحد كده، مش انت عايزني ابعد عنك، انا بقا مش هبعد عنك وهمسك فيك أكتر.
" لقيته ابتسملي بدموع وقالي "
لو لفيت الدنيا كلها مش هلاقي واحدة تحبني زيك، ولا هلاقي في طيبتك وحنيتك.
=آه م انا عارفة.
-تباً لتواضعك.
= ده مش تواضع دا غرور.
-مبسوطة يا آية؟
=طبعاً مبسوطة.
-وأنا مبسوط لما تكوني مبسوطة، بس انتي هتكوني مبسوطة وسعيدة أكتر لما تكوني أم،...... انتي طالق يا حبيبتي.
#يُتبـــع
#حسناء_عطوان
#اسكريبتات_حسناء_عطوان
