-أنتِ اتجننتي أكيد! إيه اللِ أنتِ بتقوليه ده؟
= ف... فيه إيه يا يوسف؟!
فيه إيه! بعد المُصيبة اللِ قُلتيها دِ وبتقوليلي فيه إيه؟! يا برودك ياشيخة!
= مُصيبة! أنت مش وعدتني تحبني زي ما أنا وتتقبلني بكُل عيوبي؟!
أنتِ واحدة كدابة؛ علشان لو مكُنتيش كدابة كنتِ قُلتيلي قبل كتب الكتاب، بس قُلتي أدبسه!
= أدبسك! أنت بتقول عليا تدبيس؟! أنا يا يوسف؟! أنا آلاء يا يوسف! آلاء حبيتك! ضي عينك زي ما كنت بتقولي.
أنتِ واحدة كدابة، وضحكتِ عليا واستغليتي حُبي ليكِ.
=وأنا إيه ذنبي إن ربنا ابتلاني بالمرض ده؟
وأنا إيه ذنبي إني أتجوز واحد مريضة ويا عالم هتعيش معايا ولا لا؟ أنا عاوز أبني أسرة ويكون عندي حياة، إنما إنتِ شبه ميتة..
= أنا اتعالجت والله، كان ورم حميد وخدت علاج وخفيت الحمدلله.
برضو مهما عملتِ كدابة.. أنا استحالة أكمل معاكِ دقيقة واحدة بعد كده.
= يعني إيه؟!
هطلقك طبعًا.
=أنت بتهزر صح! أكيد بتهزر، يوسف أنت مش هتسيبني، أنت بتحبني يا يوسِف....استحالة تعمِل كده!
-أنتِ طالق يا آلاء.
_________________________
" يا قلبُ ضاع هواك.. في حُب مَن جافاك"
مش كفاية بُكا على الأطلال يا قلب أُختِك، حرام عليكِ نفسِك.
= ليه؟ ليه عمل فيا كده؟ أنا بقيت مُطلقة وأنا مكملتش ٢٢ سنة!
قولي الحمدلله إن ربنا كشفه قبل تدخلي بيته ويكون عندكم ولاد.
= أنا لو كنت قُلتله قبل كتب الكتاب كان هيسامحني صح ويفضل معايا.
خالص... مين قال كده؟ الحكاية كلها نصيب، هو مش نصيبك، أكيد ربنا شايلك الأحسن.
= ونعم بالله، مين هيقبل بواحدة مريضة؟
كانت.. ودلوقتِ هي أشطر كتكوت في الدنيا وهتبقى أشطر كاتبة في الدنيا.
ارجعي لجمهورك، بقالك ٤ شهور من يوم ما يوسف سابك مكتبتيش كلمة والناس بتسأل عليكِ.
= معندش شغف أكتب حاجة صدقيني، اللِ كنت بكتب ليه وعنه خلاص سابني، أكتب لمين؟ أكتب عن إيه؟
عن نفسك، عن تجربتك، حاولي تسيبي أثر في الناس، حاولي تنصحي البنات متقعش في غلطتك.
= تفتكري هنجح.
-أنا واثقة فيكِ وواثقة إنك قدها وأكتر.
= أنا بحبك أوي، ربنا يباركلي فيكِ يا أحلى أُخت في الدنيا.
___________________________
" وأخيرًا قررت أفتح الأكونت الشخصي بتاعي بعد غياب ٤ شهور، كمية إشعارات كتيرة جدًا وكومنتات كتير على آخر بوست كُنت مشيراه، كان مُحتوى الكومنتات عبارة عن"
-وحشتينا يا آلاء.
كتاباتك وحشتنا يا آلاء
ليه الغياب ده كُله؟
أنتِ بخير يا آلاء؟
مستنينك يا أحلى كاتبة في الدنيا.
" اتنهدت وصعبت عليا نفسي أكتر، سألت نفسي هل حُب الناس ده حقيقي ولا مُزيف زي الوهم اللِ كُنت عايشة فيه؟ نزلت منشور وكان محتواه "
أنا آلاء ٢٢، النهاردة هحكيلكم تجربتي مع الحُب، هحكي بكُل صراحة، محدش فيكم أو معظمكم مكنش يعرف إني مخطوبة أصلًا... كُنت ناوية أحكيلكم عن بطل حكاياتي وعن قصة حُب عظيمة، كنت ناوية أحكيلكم يوم كتب كتابي اللي هو نفسه يوم طلاقي، هحكي... هحكي كل حاجة بالتفصيل.......
كتبت وحكيت كُل حاجة، يمكن كده أبطل أحمِّل نفسي الذنب، شيرت البوست وقفلت الموبايل ونمت، لأول مرة أنا بالراحة دِ من ساعة ما حصل اللِ حصل، يمكن كُنت محتاجة أحكي علشان أنام براحتي.... تاني يوم وفتحت الموبايل وفتحت الأكونت، جالي صُداع من كُتر الاشعارات، فئة من الناس كانت بتشجعني وناس بتلومني إني خبيت عليه، أنا حبيته، خبيت لإني كنت واثقة من حُبه، ياريتني ما وثقت ولا حبيت، ياريت قلبي ما كان حبُه...... وفي وسط ما أنا بشوف الكومنتات، لقيت أكونت باسم مُستعار كاتب كومنت محتواه ( من زمان ببعت ليكِ رسايل على الخاص مُمكن تتكرمي وتردِ عليا) دفعني فضولي إني أشوف الرسايل اللِ الأكونت كان بيبعتها، فتحت الرسايل ولقيت رسايل كتير من أكتر من ٧ شهور، من أيام ما كُنت مخطوبة! رسايل كتير، اسكرين لكُل حكاية كُنت بكتبها ورأي الشخص ده فيها، آراء كُلها إيجابية ومُبهجة، لحد آخر حكاية، من بعد اللِ حصل بأسبوع لقيت الشخص ده بيبعت رسايل كل يوم، وبيسألني مبتقتش أفتح الأكونت ليه ولا أنزِل حكايات ليه، حُب! اعترفلي بحُبه، كمان يعرفني كويس! مُستعد يخطبني كمان، واتقدملي وعرف إني مخطوبة ولسه بيحبني ومش قادر ينساني، اتصدمت من كُل كلمة كان كاتبها، بس الصدمة الأكبر كان محتواها "
مسكتش إلا لما عرفت مين خطيبك وعرفته، هو مش كويس والله، خطيبك متجوز من ورا أهله ومراته حامل وبتيجي تتابع معايا الحمل؛ لإني دكتور نسا زي ما قُلتلك قبل كده، هو ميستاهلكيش، لو مش مصدقة كلامي هبعتلك تسجيلات كاميرات العيادة بتاعتي وهو جاي معاها.
" فتحت فيديو لقيته هو، ليه؟ ليه عمل فيا كده؟ إذا كُنت كدابة زي ما بيقول فـهو أكبر كداب ربنا خلقه، الحمدلله إن ربنا كشفه، الحمدلله، شفت آخر رسالة بعتها وكان محتواها"
أنا قرأت آخر بوست أنتِ مشيراه، ميهمنيش كُل ده، ميهمنيش غير إني بحبك وعاوزك تكوني مراتي وحبيبتي وأم ولادي وشريكة أيامي وحُزني وفرحي، تقبلي؟
" مفكرتش كتير وعملتله بلوك، أنا مش عايزة حُب تاني في حياتي، أنا كُنت هكون زوجة تانية لواحد حقير وكداب ضحك عليا وعلى عيلتي، واحد محترمش أهله اللِ مخلفينه، إزاي كان هيحترمني؟".
_______________________
آلاء... آلاء.... آلااااااء.
=إيه؟ فيه إيه؟
عريس..
= عرفتي منين؟
سمعت ماما وبابا بيتكلموا في المطبخ وهو هييجي بكره ومش هيقولولك علشان عارفين إنك هترفضي.
= بقى كِده؟
أيوا بس أنا مقُلتش حاجة.
= طبعًا.. سرك في بير.
_______________
-ماما أنا خارجة شوية مع صُحابي..
= لا..
ليه؟
=من غير ليه أبوكِ قالي متخليهاش تخرج.
-أيوه ليه؟
= علشان فيه ضيوف جايين ليكِ..
أنا فاهمة، ريحوا نفسكم يا ماما، مش عايزة أشوف حد ولا اتجوز حد.
= آلاء.... قولي الكلام ده لأبوكِ، مليش دعوة.
-فين بابا طيب؟
= راح يجيب العريس من أول الشارع علشان مش عارف العنوان.
-يا مُرِك يا آلاء.
____________
-آلاء، أنتِ بنتي الكبيرة العاقلة، أنتِ أول فرحتي، لسه فاكر يوم ولادتك لما شيلتك على إيدي كُنت حاسس إني شايل الدُنيا بين إيديا، سميتك آلاء، كُنت بشوفك بتكبري قُدام عندي وأنا فخور بيكِ ومستني اليوم اللِ تكوني فيه عروسة وأسلمك بنفسي لعريسك، يوم نتيجة الثانوية بتاعتك كُنت فرحان وفخور إن بنتي حبيبتي هتبقى دكتورة أد الدنيا وترفع راسي، لما يوسف اتقدملك وافقت عليه علطول من غير. ما اسأل عليه علشان عارف إنك بتحبيه ومستحيل أحرمك من حُبك، أنا مكنتش مرتحاله ولا لتصرفاتُه، بس كنت بكدب نفسي علشان كنت شايف حبك ليه في عيونك، بس بعد ما حصل اللي حصل، وأنا على أد ما كنت مرتاح إنك خلصتي منه على أد ما كنت زعلان على حالك، حالك مكنش يسُر عدو ولا حبيب، الشخص اللِ قاعد بره ده سألت عليه كويس مرة واتنين وعشرة علشان مش هآمِن عليكِ مع أي حد وخلاص، ثقي فيا يا بنتي، لو مكنش كويس مكنتش دخلته بيتي، سبيني أختارلك شريك حياتِك.
=حقك عليا يا بابا.. أنا... أأنا آسفة.
-متعيطيش يا بنتي، اطلعي شوفي عريسك.
" كنت مُرتبكة وخايفة من لحظة المواجهة، كان شخص لوحده في المكان، وأنا داخله لقيته بيبتسم بهدوء وقام وقف أول ما شافني"
-اتفضلي اقعدي يا دكتورة
= عاملة إيه؟
كويسة الحمدلله..
= بقالك أسبوع مبتفتحيش الأكونت من ساعة آخر بوست... ممكُن أعرف ليه؟
-أنت تعرف منين إني بكتب؟!
= مش لازم أعرف كُل حاجة عن البنت اللي هخطبها.. نسيت أعرفك بنفسي.. اسمي رائد دكتور نسا وعندي عيادة و..
أنت؟!
= وبحب كتاباتك أوي...
-إزاي؟
وبحبك ومبسوط إني قاعد هنا دلوقتِ في بيتك..
= مش فاهمة!
وهتوافقي عليا حالًا..
= أنت.....أنا..
-إيه رأيك؟
= في إيه؟
تتجوزيني؟
= أنا...
أفهم من كده إنك موافقة؟
______________
" بعد سنة"
" ياللي ظلمتوا الحُب وقُلتوا وعيدتوا عليه... قُلتوا عليه مش عارف إيه، العيب فيكم يا في حبايبكم، أما الحُب يا روحي عليه"
مش ناوية توافقي نكتب الكتاب؟
= مش لما اتأكد إنك بتحبني؟
يا شيخة حرام عليكِ، أنا بحبك والله، أغنيهالك؟
= لا... صوتك وحِش.
طيب... أنا ماشي، لما تقرري ابقي قوليلي، ولو مش عاوزاني أكمل معاكِ قوليلي، مش ذنبي إني حبيتك.
= وأنا إيه ذنبي؟!
ملكيش ذنب، عارف إنك بتحبيني وأنا بحبك أضعاف والله.... بس كفاية كده، ممكن تبطلي عند شوية؟
= حاضر.... آسفة.
-متتأسفيش. ممكن توافقي نكتب الكتاب كمان شهر.
= حاضر، بس هتحبني؟
هعشقك.
= هتطمني؟
هديكِ كُل أمان الدُنيا.
= هتزعلني؟
أموت قبل ما أفكر أزعلِك.
= رائد.
-حياتُه.
= كان مجيئك كغيثٍ أنزِل فارتوت بيداء قلبي.
#حسناء_عطوان
