"إمتى هتعرف إمتى.... إني بحبك أنت... يا حمار!"
على فكرة أسمهان مقالتش يا حمار دِ.
= ما أنا عارفة، أنا اللِ قُلتها..
-لمي لسانك واسكُتي!
= مهو أنا بحاول أعرف مالك من امبارح وأنت مُش راضي تقول..
مفيش!
= هو احنا هنخُش على شُغل بعض! انطق قول مالَك!
-أبدًا، اتخانقت مع خطيبتي وشكلنا كده هنسيب بعض.
= وكتاب الله المجيد! قول والله...
مالك فرحانة كده ليه؟ أنا قُلت هنسيب بعض مش سيبنا بعض!
= طيب إيه السبب؟
أنتِ..
=أنا! هو التخاطر جاب مفعول ولا إيه؟!
تخاطر! إيه التخاطر ده؟!
= متاخدش فـ بالك، المُهم أنا السبب إزاي يعني؟
غيرانة منك..
= مني أنا؟! هو أنا كُنت جيت جمبَك؟!
عمالة تقولي بنت عمك بتتكلم معاك كده ليه، وبتكلمك ليه أصلًا، وحاجات تافهه كتير، وأنا عمال أفهمها إنك زي أختي الصُغيرة وهي برضو مُصممة على اللِ في دماغها..
= أوختشك! بعد كل ده أختشك!
-بطلي تفاهة بقَـ أنا بتكلم جد!
= ما أنت اللِ غلطان من الأول، لو كنت خطبتني من الأول مكنش كل ده حصل!
يبنتي أنا مش شايفك غير أختي..
= تمام أوي كده، أنا غلطانة إني برفض كُل العرسان اللِ بيتقدمولي علشان واحد حلوف زيك، ده أنا كان متقدملي طيار وأنا رفضته.
طيار دليفري..
= احم... ايه الإحراج ده، أنا هكلم خطيبتك وأفُض الموضوع، قصدي أصلح الموضوع..
ربنا يستر!
.................
بالك أنتِ يا مرات عمي لو جوزتيني الواد الحليوة ابنك ده هطبخلك كل يوم..
= فين الحياء يبنتي..
عندك تاني رف جمب برطمان الملح..
= طول ما أنتِ تافهة كده عمره ما هيتجوزك..
بجد! طيب أعمل إيه علشان أبقَـ عاقلة..
= بطلي تفاهة وبطلي تجري وراه خلاص هو فاضله ٣ شهور ويتجوز، انسيه يا بنتي. بكره تلاقي اللِ يحبك ويجري وراكِ مش أنتِ اللِ تجري وراه..
أين كرامتي أنا لا أراها؟
= شوفي بقولها إيه وهي بتقول إيه..
طيب هو متخانق مع خطيبته وهيسيبوا بعض، فيه أمل إنه يتجوزني ولا اصرف نظر عن الموضوع؟
= اصرفي نظر. بلاش تبصي لحاجة غيرك، يعني يرضيكِ تكوني مخطوبة لحد وواحدة تانية تتمناه زوج ليها وتحبه؟
لأ طبعًا..
= خلاص... اللِ متقبليهوش على نفسك متقبليهوش على غيرك..
بس أنا بحبه..
= وتفتكري هو مش عارف؟
أنا من يوم ما وعيت على الدنيا وأنا مشُفتش أبويا ولا أمي، اعتبرتك أمي واعتبرت عمي أبويا، بس للأسف مقدرتش اعتبر ابنك أخويا، غصب عني حبيته، تفتكري إني محاولتش أنساه، بس غصب عني، مقدرتش والله.
= صدقيني يا بنتي مش هتاخدي غير نصيبك..
أعمل ايه علشان أنساه؟
= حاولي تتجنببه، قللي كلام معاه، وبطلي تفاهة واعقلي، ومتتدخليش بينه وبين خطيبته.
حاضر..
=ووافقي على العريس اللِ متقدملك.
-لا!
ليه؟ مش اتفقنا خلاص..
= دَ أقصر مني مينفعش، مهو اللِ هعمله في الناس مش هيطلع عليا.
صبرني يارب.
= أوعدك لما ييجي واحد طول هوافق بيه علطول...
.................
أومال أسرار فين يا ماما؟
= تعبانة ونايمة في أوضتها.
تعبانة؟! تعبانة مالها؟
= أبدًا، شوية برد.
وهي كويسة؟
= أيوا متقلقش، ادخل اغسل ايدك على ما أحضر الغدا.
...
"كنت قاعدة في أوضتي وسمعت ماما فاطمة وأدهم بيتكلموا، أنا كويسة مُش تعبانة، بس غصب عني، لازم أنساه، غلط اللِ بعمله وكمان حرام، هو لو كان بيحبني مكنش خطب غيري، كان خطبني أنا.. صعب عليا أشوفه لحد غيري، بس مش مهم أنا، المهم هو يكون مبسوط وبس، كنت قاعدة بفكر سمعت صوت خبط على الباب "
مين؟
= أنا عمك يا أسرار.. تعالي علشان نتغدى سوا..
-احم....معلش يا بابا وجيه، أنا تعبانة شوية ومس هقدر أقعد معاكم.
= تعبانة مالك؟ تحبي نروح للدكتور؟
لا هبقَـ كويسة بإذن الله، اتغدوا بس وأنا لما أكون كويسة هاكُل.
.......
" أدهم "
" لأول مرة أحس بفراغ وهي مش موجودة معانا، دايمًا بتيجي تقعد أول واحدة على الأكل، صوتها كان دايمًا عالي وضحكتها كمان، كنت سرحان ومش باكل لقيت أمي بتقولي"
مش بتاكل ليه يا أدهم؟
= أبدًا، مليش نفس.
متشغلش بالك، وحاول تتعود على كده..
= مش فاهم قصدك!
لا افهم قصدي كويس.. كل يبني ربنا يريح بالك، عملت ايه مع خطيبتك؟
= مُصممة برضو إننا نسيب بعض.
وأنت عاوز إيه؟
= مش عارف أنا تايه.
* ما قُلتلك من الأول بنت عمك أنت أولى بيها من الغريب.
= يا بابا قُلتلك قبل كده ١٠٠ مرة أسرار زي أختي.
* أنت عارف كويس إنها مش شايفاك كده.
= يا بابا افهمني...
* خلاص الموضوع انتهى، هي متقدملها عريس كويس، وأنا موافق عليه ومستني رأيها، على الله توافق بدل ما هي بترفض أحسن الناس علشانك.
............
ألا صحيح يا بابا وجيه العريس ده بيشتغل إيه واسمُه إيه؟
= مُدرس تاريخ في مدرسة إنترناشيونال، وعنده عربيته الخاصة وشقة كبيرة على النيل ومن عيله كويسة، واسمه سيف.
الله اسمه حلو أوي.
"كنت قاصدة كُل كلمة نطقتها قُدام أدهم علشان أغيظه، بس هو حلوف برضو، لقيته فاجأة وقف مكانه وقال"
أنا هدخل أنام تصبحوا على خير.
= صحيح يا أدهم مقولتليش رأيك في العريس؟
مليش دعوة بحياتك، أنا اللِ هتجوزه ولا أنتِ؟
= روح يا شيخ جاتك داء الماية. جبلة مبتحسش...
-خلاص يا بابا وجيه أنا موافقة أقعد مع العريس.
......................
ماما أنا هتأخر شوية النهاردة، هقعد شوية مع أصحابي.
=متتأخرش علشان عريس أسرار جاي النهاردة..
عنه ما جه..
= بتقول حاجة يا أدهم؟
لا أبدًا مفيش، أنا خارج..
..........
" حاسة إني مخنوقة ومش عاوزة آخد الخطوة دِ، بس لازم أنساه، أنا مش هفضل طول عمري مستنياه، أنا إنسانه ومن حقي مظلمش نفسي مع واحد مش حاسس بيا، فجأة سمعت صوت تليفوني بيرن، وكان أدهم"
خير يا أدهم بتتصل ليه؟
= متقعديس مع العريس ده..
-ليه؟
= اسمعي الكلام وخلاص.
اسمع بقَـ، أنت دلوقتِ واحد خاطب وعلى وش جواز، وأنا في حُكم المخطوبة، يعني مينفعش تكلمني وتأمرني، روح شوف خطيبتك، وأنا هشوف اللِ هيبقَـ خطيبي، وكمان ياريت تمسح رقمي من عندك، مينفعش نتكلم تاني خلاص، سلام يا... ابن عمي..
.......
" كنت قاعدة مع العريس، كان شخص لطيف وبشوش، فجأة لقيت أدهم داخل علينا وباين إنه متعصب، أيوا عارفاه لما يتعصب، بخاف منه أوي"
اتفضل اخرج لو سمحت..
= أدهم مينفعش كده، عيب!
فين العيب يا خطيبتي يا محترمة يا اللِ أول ما اتخانقنا سوا رميتي الدبلة وشُفتي غيري..
* كداب والله يا أستاذ سيف متصدقهوش أنا مش..
والدبلة اللِ ف إيدي دِ تشهد على خطوبتنا..اتفضل يا أستاذ، هحل الموضوع أنا وخطيبتي وآسفين لحضرتك..
............
بكرهك يا أدهم.... بكرهك..
= مش من قلبك..
صدقني لو أنت آخر واحد في الدنيا مستحيل أتجوزك..
......
"بارك الله لكما وبارك عليكما وجمع ببنكما في خير"
ياه يا أدهم مش مصدقة إني خلاص بقيت مراتك..
= يا سلام! أومال مين اللِ كانت بتقول إنها مستحيل تتجوزني؟!
أنا.. بس ليه عملت كده؟ ليه مش أنا كنت أختك؟
= لا، عمري ما اعتبرتك أختي، كنت طول الوقت في صراع ما بين عقلي وقلبي، عقلي كان مسيطر عليا، بس لما جه اليوم اللِ ملقتكيش بتاكلي معانا فيه كنت حاسس بفراغ كبير، كنت حاسس بخنقة لما عرفتك إنك هتتخطبي وتكوني لحد تاني غيري، طول الوقت كنت متطمن إنك بترفضي العرسان علشاني، بس لما وافقتي تقعدي مع عريس، حسيت إنك ممكن تنسيني وتبطلي تحبيني، مستحملتش تكوني لحد غيري، وبالنسبة للي خطيبتي فكانت مجرد حجة علشان أحاول أثبت لقلبي إني أقدر أعيش من غيرك، بس قلبي اللِ انتصر في الآخر، وحبك يا حرمي المصون.
قولها تاني..
= ب.. ح... ب.. ك يا أسرار.
حد يوديني الإنعاش يا جدعان.
= مش هتعقلي أبدًا؟
وهو اللِ يعرفك يعرف يعني إيه عقل!
"كان مجيئك كَغيثٍ أُنزل فارتوت بَيداء قلبي"
#حسناء_عطوان
