*"وهاتلي قلب لا داب ولا حب ولا انجرح ولا داق حرمان"
- مسمعتهاش أنت وهي بتقول:" يا اللي ظلمتوا الحُب وقولتوا وعيدتوا عليه، قولتوا عليه مش عارف إيه، العيب فيكم يا في حبايبكم، أما الحُب يا روحي عليه، يا روحي عليه"
= يا روحي عليك أنت، لسه بسمعها منك زي أول مرة مرة غنيتها ليا.
- لسه فاكرة أول مرة سمعتيها معقول؟!
= وهي أول ليلة منمتش فيها بسببك تتنسي؟! كنت بقول لو آخر راجل في العالم يستحيل أتجوزه، وكلمة يستحيل طارت لما سمعتها منك، كنت شايفاك الشخص الشرير اللي بعدني عن اللي كنت بحبه، ومن غير مقاطعة، بس هقولك على سر ولأول مرة أقوله، أنا قبلك ما حبيت، كل الحكاية إني بنت عنيدة بتحب كل حاجة تكون على مزاجها وأنت كنت العكس علشان كده كنت برفضك، بس أنت زي ما تكون عملتلي سحر وحبيتك.
= تعرفي إن اللي بيحب حد بيبان في عنيه.
- إزاي؟
= أقولك، فيه لمعة غريبة كده بتظهر في عيون الشخص لما يشوف حبيبه قدامه، و عنيه بتفضل مركزة مع كل حركة بيعملها، عنيه بتفرح لما يفرح، عنيه بتزعل لما يزعل، ويا سلام لو عنيك اتصادفت مع عيون اللي بتحبه بتوصلها إشارة إنها مُغرمة، وتفاصيل كتير متتحكيش نظري، محتاجة عملي.
- ونفس اللهفة في كل مرة بيشوف محبوبه فيها زي أول مرة.
= وبتدور عليه في كل مكان.
- وبتخدعك وتخليكِ تشوفيه في كل الوشوش.
= العيون خطر خلي بالك.
- أخطرهم عنيك.
= يا أحب الناس لفؤادي، يا أجمل ما رأت عيني، يا أحسنهم في نظري، أنا وأنتِ طريقين مبيتلاقوش، بس كان من نصيبنا يتلاقوا، كان كل شيء يجمعنا مستحيل، لا عقل ولا منطق كان يفرض لُقاهم، بس النصيب غلب العقل والمنطق.
- النصيب غلاب، ويا محلى نصيبي.
لـ حسناء عطوان💙
