- يعني ملقتش غير دِ؟
= مالها دِ يعني؟ مش بني آدمة؟ مش بنت زي باقي البنات؟
- هي بنت زي كل البنات آه بس مش حلوة زي باقي البنات، أنت مش بتبص لنفسك في المراية وتبصلها، أنت كل بنات الجامعة هتموت عليك وأنت ولا معبر واحدة فيهم.
= مش عايز حد فيهم يا عم، عايزها هي.
- دِ مش مصدقة أصلًا إنك بتحبها، وعندها حق بصراحة، أنا عن نفسي مش مصدق.
= محدش لُه دعوة بيا، أنا حُر يا عم!
- حُر حُر يا سارق قلوب العذارى!
......................
"يا حبيب امبارح وحبيب دلوقت، يا حبيبي لبُكره ولآخر وقتي"
- اطفي الزفت ده وقومي اغسلي المواعين، ومتاكليش من الأكل اللي في التلاجة بتاع أختِك.
= يا ماما حاضر.
- يكش تخسي عشان يجيلك عرسان ونخلص منك، مش عارفين نخطب أختك الصغيرة.
= وأنا مالي بيها، ما تتخطب، محدش يستناني.
- والناس يقولو الصغيرة اتخطبت قبل الكبيرة! بقولك إيه، من بكره تعملي دايت، قربتي على ال 22 ولسه متخطبتيش، اللي قدك اتجوزوا وخلفوا.
= نصيبي يا ماما.
- نصيبي يا ماما! نصيبك عمره ما هييجي وأنتِ قد البقرة كده.
= عنه ما جِه، مش عايزة حد، ومش عايزاكم أنتم كمان.
- بنت!
= روحي مشوارك يا ماما وسبيني في حالي الله يرضى عنك.
....................
- آنسة جميلة.
= مش هنخلص النهارده!
- خير حضرتك؟ مش قُلنا ملكش دعوة بيا.
= أنا عايز رقم والدك.
- عايزه ليه؟
= ههدده!
- نعم؟!
= اخلصي يا آنسة، عندي مُحاضرة.
- لا، مش هديك حاجة، واتفضل امشي من وشي السعادي علشان مش طايقة نفسي.
= بقولك إيه هتتجنني عليا هتتجنن عليكِ.
- والله، وريني كده هتعمل إيه!
= عينك دي ولا لينسز؟
- عيني، بس ليه؟
= أصل لونهم يجنن.
- أنا اللي هخليك تتجنن دلوقت.
= يعني مش هديني الرقم؟
- لا.
= خلاص سهلة، هجيبه من الشؤون.
- حسبي الله ونعم الوكيل في الرجالة.
...................
- يا حسن، أنا مستاهلكش، أنت كل بنات الجامعة تقريبًا بتحبك.
= بس أنا مش بحبهم، أنا بحبك إنتِ.
- مش مصدقة، ومش عارفة أصدق.
= أنتِ بتحبيني أنا عارف.
- إيه، لا، لا، لا طبعًا مين قال كده؟
= متحاوليش تنكري، صدقيني أنا مش بهزر ولا بتسلى، أنا والله بحبك يا جميلة.
- اشمعنى أنا؟
= هو حد لُه سُلطان على قلبه يا جميلة؟ القلب وما يريد.
- القلب حلوف والله!
= القلب يعشق كُل جميل يا جميلة، أنتِ جميلة من جوا ومن برا.
- أنا مستاهلكش.
= أنتِ كنز، مش هقدر أفرط فيكِ.
- أنا مليانة دهون!
= شايفهم حنية ودفء واحتواء، وصفاء وطيبة وأخلاق، جمالك الداخلي منعكس على مظهرك الخارجي، كله يقدر يغير المظهر الخارجي، بس الداخلي استحالة يتغير.
- بلاش أنا، فيه زي كتير وأحسن مني كمان!
=أنا مش مضطر ألف الدنيا كلها علشان أعرف إن مفيش زيك، أنا هنا في مكاني ده واثق ومتأكد إنك نسخة واحدة بس.
-تقبلي ؟
= أقبل.
لـ حسناء عطوان 💙
