=وعد.
"محستش بنفسي غير بكوباية ماية بتتدلق على وشي ونبع الحنان بتصحيني بصوت عالي"
قومي يختي، قومي يا فالحة، قومي يا مصيبة، قومي يا أخرت صبري، يا ريتني كنت جبتك ولد، قومممميييي.
=في إيه يا ماما، صحيت اهو، صحيت خلاص.
قومي يختي، حماتك بره، وناوية تفسخ الخطوبة
"وقتها بس عرفت اني كنت بحلم وإن كلامي مع (علاء) خطيبي كان كله حلم وإنه مش ناوي يفسخ الخطوبة، وبعدين انا زعلانة كدا ليه، هو من إمتى كان يهمني، لبست هدومي وخرجت لقيت حماتي، قاعدة وبتبصلي من فوق لتحت، وبصت لبابا وقالتله بغرور وكبرياء"
-خُلاصة الموضوع، انا مش عاوزة بنتك لإبني، أنا من الأول مكنتش عاوزاه يتجوز واحدة أقل من مستواه، كُل شيئ قسمة ونصيب.
" لقيت بابا بيبصلي بحزن وكأني خذلته، كان لسا هيرد عليها، لقيت نفسي بقولها "
=بعد إذن حضرتك يعني، إبنك الحروس نن عين امُه فين؟
مجاش ليه هو اللي يفسخ الخطوبة.
-ابني مسافر، مش فاضي، وبعدين إزاي تتكلمي عن إبني الباشمهندس بالشكل دا؟
=والله حضرتك، لو ابنك كان عكس ما بقول كان جه بنفسه، أو كان عالأقل اتصل بينا وقال ننهي كل حاجة، بس زي م قولت لحضرتك ننوس عين امه، عن اذن حضرتك، عشان بننام بدري.
"طبعاً مش هقولكم عالتهزيق اللي أخدته من بابا، والاسطوانة بتاعت اني فاشلة وغبية ومستاهلش أي حاجة حلوة وتصرفاتي غلط و.. و.. و..، اتوضيت وصليت وقرأت الورد اليومي جيت عند قوله تعالى (وعسى أن تكرهوا شيئاً وهو خير لكم وعسى أن تُحبوا شيئاً وهو شر لكم)، هل ممكن اكون ظالمة أهلي، وإني فعلاً تصرفاتي كلها غلط، بس معقول مش بعمل تصرف واحد صح؟، ١٠٠ سؤال جه في بالي، محستش بنفسي غير وأمي بتصحيني تاني يوم الصبح، بنفس اسطوانة كل يوم وزودت كمان مع موشح التهزيق اني عانس.. أيُعقل؟..."
-------------------------
" كانت آخر واحدة بتدخل السكشن، ومقدرتش ولا مرة اطردها، كانت بتبصلي بصة بفضل سرحان طول السكشن ومش مركز، عمري م فهمت معناها، مش عارف هي حزن ولا عتاب "
-طيب ودلوقتي؟
=مش عارف عنها حاجة، من وقت م الاجازة بدأت ونا معرفش عنها حاجة، عملت جروب مخصوص بحجة اننا نتابع مع بعض اخبار الكُلية، متكلمتش ولا كلمة، حسيتها انطوائية جداً، اكتشفت كمان إنها معندهاش صُحاب
-للدرجادي بتحبها.
=وأكتر من كدا كمان، تعرف مع إنه لسا فاضل عالدراسة شهر وتبدأ، وعارف إنه هييجي يوم واشوفها تاني، بس خايف أقع في حبها من جديد، بس أنا بجد مش قادر، حاسس إني متكتف، مش قادر أنساها وفي نفس الوقت مش قادر أوصلها.
-صدقني، لو من نصيبك، محدش هياخدها غيرك، ثِق في إن ربنا بيختار لينا الأفضل.
=ونعم بالله.
---------------------------
=مصاحبش الفرافير حتى لو راكبين فيراري.
-بسسسس، قومي انشري الغسيل يختي، بطلي صوتك خرم وداني.
"كالعادة، كنت باخد راحة ٥ دقايق من غسيل المواعين، نسيت اقولكم، في عريس جاي بكرا، واطية أوي أنا صح، مكملتش اسبوعين فاسخة خطوبتي وهتتخطب تاني فعلاً الحزن في القلب بس أخيراً أمي هتشيل لقب عانس من التهزيق، اللهم لك الحمد، عقبال الباقي يارب، حتى جاء غداً، اليوم الموعود، إن شاء الله هيكون عريس كويس، وأحسن من ابن أمه، دخلت ولقيت شكله مش غريب عليا، ايوا أنا عارفاه دا دكتور ايهاب، شكله العريس، كدا هيتحفل عليا في الكلية، بس اشطا عادي، دخلت الصالون ولقيته جاي لوحده من غير أهله معاه، بابا استأذن وسابنا لوحدنا بس قعد بعيد شوية، المهم لقيته بيقولي :
