12 نوفمبر 2021
_ هتسميه إيه؟
= إلياس، إلياس عز الدين.
_ يراضيكِ ربنا يا جميلة ويباركلك فيه، ويباركلك في عُمرك لحد ما تشيلي ولاده وولاد ولادُه.
= كان نفسي عز يكون معايا في يوم زي ده!
_ استغفري ربك يا جميلة وادعيله بالرحمه، متحزنيش يا جميلة علشان ابنك.
= كله يهون لأجل ابني أنا وعز الدين.
_ مش آن الأوان تفتحي الوصية..
= عارفة اللي فيها يا أمي؛ مش عايزة أفتحها علشان لو اتفتحت وأنا الموت أهون عليا من تنفيذها.
_ لأجل ابنكم يا جميلة، لأجل ابنك، مش أنتِ أم برضو!
= من أجله أعمل أي حاجة، هحاول يا ماما هحاول.
____________
22 نوفمبر 2021
_ عم ابنك وعمته في الصالون عاوزين يشوفوه.
= حاضر خارجة يا ماما.
_ أومال فين ابن اخويا؟
= نايم يا سلوى.
_ هو فين؟ عايزة أشوفه.
= في أوضته، اتفضلي، بس ممكن بهدوء علشان لسه نايم.
_ وهو أنتِ هتعرفيني أتعامل ازاي مع ابن اخويا ولا إيه؟
= لا إله إلا الله، سلوى أرجوكِ أنا مش عاوزة مشاكل، اتفضلي لو عاوزة تشوفيه.
_ ايه ده؟ إيه اللبس البلدي اللي الولد لبسه ده؟ هقول إيه! عز طول عمره بيختار كويس، جه عندك وغلط.
= مسمحلكيش تهنيني في بيتي، الله يرحمه اللي كان بيدافع عني وأنا مش هسكتلك يا سلمى، ولآخر مرة بقولهالك لو أهنتيني تاني هتشوفي مني وش مش هيعجبك..
_ عجبك كده أهو الولد صحي بسببك!
= خلاص يا روح ماما متعيطش...
" وفجأة ظهر قُدامي عمه حسن ولقيته بيبتسم وبيقولي:"
_ ممكن أنا أشيله، لو معندكيش مانع.
= اتفضل...
" خده مني وشاله على إيده وبدأ يهديه، وفعلًا هدأ، بصيتله باستغراب، إزاي هدأ بسهولة كده! ده أنا أمه وبيغلبني على ما يهدى"
= شُكرًا يا حسن.
_ العفو على إيه، اتفضلي دخليه أوضته، سلمى تعالي معايا، عن إذنكم هنمشي وهنيجي في وقت تاني..
________
_ ينفع اللي عملتيه ده يا سلمى؟
= وهو أنا عملت إيه يعني؟
_ غلطتي في أرملة أخوكِ في بيتها، تربيتنا وأخلاقنا عمرهم ما يسمحوا باللي عملتيه.
= مغلطناش في ست الحُسن يا روميو!
_ سلمى!
= بلا سلمى بلا بتاع، على أساس إني مش فاهمة إنك لسه بتحبها!
_ كنت، ومبقتش...
= عينك بتقول غير كده، ولو آخر واحدة في الدنيا مش هسمحلك تتجوزها، مش كفاية أخوك الكبير اتعمى في عينه واتجوزها هتبقى أنت كمان!
_ اللي بتتكلمي عنها دي كانت في يوم من الأيام مرات أخوكِ، وصحبتك، فاكرة ولا مش فاكرة؟
= متقولش صحبتي دي..
_ ربنا يهديكِ يا سلمى وترجعي لعقلك..
_____________
_ حسن كلمني يا جميلة وبيقولك متنسيش ميعاد المحامي بُكرا.
= حاضر يا ماما مش هنسى..
_ يعني إيه الكلام ده؟
= اهدي بس يا جميلة أما نشوف باقي الوصية..
_ أنا استحالة أوافق على الجنان ده..
= لاحظي إن اللي بتقولي عنه مجنون ده أخويا وأبو ابنك..
_ مش عايزة جنيه من الفلوس دي، اشبعوا بيها.
= ده حقك أنتِ وابنك يا جميلة..
_ وأنا بتنازل عن الحق ده، أنا مش هكون زوجة لحد بعد عز الدين، فاهمين؟! عن إذنكم....
______________
_ وأنا مش هعيشلك العُمر كله يا بنتي..
= هنزل اشتغل يا ماما وأصرف على ابني، ومش عايزة جنيه منهم.
_ بس ده حق ابنك.
= هعرف أرجع حقه يا ماما مش حتة ورقة هتخليني أعمل حاجة ضد إرادتي، وأنا متعودتش على كده..
_ مرة واحدة يا بنتي اتنازلي عن كبريائك علشان ابنك، واتعودي تتنازلي بعد كده طول ما ابنك موجود.
= وإخلاصي لعز الدين؟
_ وأمر ربنا وشرعه؟! ليكِ الحق تتجوزي بعده وتعيش حياتك، وده طلب أخير من حبيبك.
_ وأنا مش عاوزة أكون زوجة لحد غير حبيبي.
= متحرميش ابنك من إنه يعيش وسط أب وأم.
_ حسن مش أبوه!
= الأب والأم مش اللي خلفوا يا بنتي! الأب والأم اللي ربوا واللي حنوا على ولادهم، ياما ناس بتخلف وبتنسى إنهم مخلفين من الأساس، عكس ناس ربت وشالت الحِمل، الأب والأم مش بالدم يا جميلة، الأب والأم بالروح والاحتواء والاهتمام، هيحطك إنتِ وابنك في عنيه، أنا شايفة اهتمامه بابنك وحنانه عليه، بلاش تحرمي ابنك من الحنان ده، لو حسن اتجوز واحدة غيرك اهتمامه بابنك هيقل، مش هيبقى معاكم علطول، فكري، بلاش قلبك يسيطر المرادي...
_____________
_ نفذ الوصية يا حسن...
= متأكدة؟
_ كلام عز الدين لازم يتنفذ.
= وإيه غير رأيك؟
_ ابني، ابني وبس يا حسن!
= أوعدك أكون أب لابنك وخير زوج ليكِ.
_ من أولها يا حسن بقولهالك، محدش لُه سُلطان على قلبه يا حسن!
= الحُب مش غصب يا جميلة، مش بإرادتنا نحب حد وننسى حد تاني
__________
" بارك الله لكما وبارك عليكما وجمع بينكما في خير"
_ مبروك يا جميلة.
= الله يبارك فيك يا حسن..
_ عند وعدي يا جميلة..
= وأنا واثقة فيك يا حسن..
