تُبتِ؟
= بس متُبتِش عن هواك، قلبي رافض ينساك...
فات الأوان.. كل حاجة كانت بين إيدك بس ضيعتيها...
= فيه فُرصة نرجع؟
لو قدرتي ترجعي الماضي.....
..........
"ياقوت"
أنا ندمانة أوي يا شهد، أنا محتاجاه جمبي، أنا اللِ ضيعته من إيدي....
=الندم مش هيرجعه..
حُبي ليه هيرجعه صح؟
=الحُب لوحده مش كفاية، اثبتي ليه إنك اتغيرتي، هو لسه بيحيك، والدليل إنه لسه بيسمعِك...
-تفتكري؟
= جربي، مش هتخسري أكتر من اللِ خسرتيه....
خايفة أرجع للذنب تاني، إنتِ عارفة إنه مش ب إيدي..
= إنتِ غلطتِ إنك معرفتيهوش من الأول..
-خُفت يبعِد...
= في الحالتين بِعد عَنك...
الدكتور طمني إني قربت أخِف..
= ربنا يريح بالك يارب....
............
"طارق"
طمني يا دكتور... في أمل تبقَ كويسة؟
= متقلقش، أنا شايف إنها بتستجيب للعلاج..أهم حاجة الصبر، بس ليه مُصِر تعرف كل حاجة عنها مع إنك قررت فعلًا تبعد عنها؟
اللِ بيني وبين ياقوت أقوىٰ من أي حاجة، مقدرش أسيبها بتعاني واتخلى عنها، هي اتظلمت كتير وهي طفلة، لما والدها اتوفى والدتها طبعًا اتجوزت، وياقوت كانت آخر همها...
= الإضطرابات الأسرية بتسبب مشاكل كتير، ومنها مرض السرقة... ياقوت ضحية، كلنا لازم نقف جمبها... متسبهاش!
-حد يسيب روحه يا دكتور؟!
..........................
" أنا ياقوت، مُصابة بمرض السرقة، محدش فينا كامل... ذنبي إيه إني اتربيت في وسط أسرة مضطربة، محدش بيختار أهلة زي ما بيقولو، اتخرجت من حوالي سنة، بدأت أكتشف إني مريضة سرقة لما دخلت الكلية، كنت بسرق حاجات أنا مش محتاجاها، في مرة من المرات وأنا بسرق بنت كانت صديقتي وبتكرهني في نفس الوقت، فضحتني في الكلية واترفدت منها، والدتي لما عرفت عاقبتني بالضرب وحرماني من المصروف؛ ف اضطريت لسرقة الفلوس؛ لأني كنت محتاجاها، كانت بتحرمني من كل حاجة والسبب حُب زوجها اللِ بيكرهني، أوبمعنى آخر حُب فلوسه.... كُنت بسرقها هي وبس وكأني بعاقبها، ممكن السبب الرئيسي لمرضي هو أنانية أمي وجشعها.....
لما والدتي قالتلي إن فيه عريس متقدملي مكنش فارق معايا، يعني هيكون أحسن من الست اللِ ولدتني؟
اتخطبتله، اداني حُرية إني أحكي كل حاجة عن حياتي، كان دايمًا يسمعني، مكنش بيمِل أبدًا... بيشاركني تفاصيل يومه، حبيته أكتر من روحي... خُفت أحكيله عن مرضي يبعد ويسيبني.... قررت بيني وبين نفسي أروح اتعالج عن دكتور نفسي؛ علشانه هو وبس، كان عيد ميلاده قرب وكان لازم أجيبله هدية... بس مكنش معايا فلوس طبعًا... ف اضطريت أسرق من أمي؛ لأني مكنتش بشتغل ومكنش معايا فلوس....بس هي عرفت وقالت ل " طارق" خطيبي؛ لأنها كانت بتكره حبه ليا وكانت عاوزاه يكرهني، بس حصل العكس وحاول يفهم مني أنا ليه عملت كده، بس فهمني حاجات كتير بتدل على إني غلط ومكنش ينفع أعمل كده؛ لأنها والدتي وحذرني من إني أعمل كده تاني مهما كان السبب.... موقفه ده أثبتلي إنه كتير عليا ولازم أعمل أي حاجة علشان أكون أحسن، لما خدت قراري خلاص إني أروح للدكتور النفسي كنت محتاجة بالفعل فلوس، ف اضطريت أسرق أمي تاني، ومن هنا بدأت المشكلة.......
