جَسدٌ يُجيدُ الحِواراتِ الصَامتَة.

حوارات الجسد

انفصام. Internal struggle صراع داخلي

صراع داخلي بين الخير و الشر و نفسك:
الشر:ايه يا عم.. انت مش شايف ان مشاكلك كترت اوي
انت:ايوه يعني اعمل ايه؟
الشر:انتحر!
الخير:ايه انت عايز تسمع كلامه انت عايز تنهي حياتك بالسهولة دي
الشر:يسطا حياة ايه انت فارق مع مين اصلا فالحياة
الخير:طب بلاش الناس.. اهلك و صحابك دول مش فارقين معاك وجعهم
أنت:بس هما مش حاسين بالحزن اللي انا فيه ولا انا فارق معاهم
الشر:انت فاكر الانتحار بيوجع اوي ده هي ثانية و هتخلص من الوجع ده كله
الخير:على فكرة انت كدا بتخسر دنيتك و اخرتك
الشر:يا عم اسمع كلامي بس ربنا غفور رحيم و اكيد مش هيحب حد من عباده يعيش ف اكتئاب
انت:...............
___________________________________________
ده لا يمثل اكتر من الصراع الداخلي اللي جوانا لما بنحس بالحزن و صراع دائم عند الشخص المكتئب، و اكيد فكرنا فالانتحار و لو مرة واحدة ف حياتنا بسبب حزن شديد دخلنا فيه، بس ايه اللي يخلينا نفكر ف حاجة زي دي اصلا و احنا عارفين انها مرعبة؟؟
تعريف الانتحار:فعل يقوم به الشخص لإنهاء حياته عن طريق وسائل مختلفة
قد تكون بتفكر أن مش كل الناس تقدر على ده بس عالميا بيموت 8 مليون شخص منتحرين من سن 15-25 سنة! ده مش كلامي ده كلام منظمة الصحة العالمية فايه الأسباب اللي تخلي شخص يلجأ ل ده؟ 90% من اللي بينتحروا بيكون عندهم مشاكل نفسية صعبة و أحيانا تكون غير مشخصة أو أزمات مر بيها و شايف ان الدنيا انتهت بعدها (فراق،فشل،......)
__________________________________________
الأمراض اللي قد تسبب الفعل ده:
1-الاكتئاب الحاد اللي بيخلي الشخص حرفيا شايف السواد ف كل حاجة لدرجة انه يلجأ للموت و شايفه انه حل.
2-مرض اسمه bipolar disorder(الهوس الاكتئابي) و المرض ده بيخلي عندك مشكله ف المزاج بشعة بتخليك يا فرحان بشكل مبالغ فيه يا زعلان بشكل مبالغ فيه و واحد من كل تلاته عندهم المرض ده بينتحروا.
3-الفصام ده مرض بيعمل عندك خيالات و بيعمل عندك مشاكل كتير جدا بتخليك تشوف و تسمع حاجات مش موجودة و هي حالة نفسية طويله المدي دي نسبة المنتحرين بسببه من كل 20 شخص واحد بينتحر.
3-ال borderline personality disorder او اضطراب الشخصية الحدية ده بيسبب أن مشاعرك تبقا مضطربة جدا و مش قادر تتحكم فيها و المرض ده بيسبب اكتئاب و في بعض الحالات الحرجة انتحار.
3-فقدان الشهية العصبي ده مرض بيبقا بسبب ان اشخاص بيبقا عندهم سمنة فبيحاولوا يخسوا بأي طريقة و منها قئ الطعام اللي لسة واكلينوا و بسبب اللي بيواجهوه ده 1 من كل 5 بينتحروا. انا طبعا شرحت الأمراض دي باختصار شديد جدا جدا لو عايز تعرف عنها اكتر ممكن تعمل سيرش.
___________________________________________
رأي الدين في الانتحار:
طبعا حرام و فيه حديث عن أبي هريرة رضي الله عنه أن النبي صلى الله عليه وسلم قال:( من تردى من جبل فقتل نفسه، فهو في نار جهنم يتردى فيه خالداً مخلداً فيها أبداً، ومن تحسَّى سماً فقتل نفسه، فسمه في يده يتحساه في نار جهنم خالداً مخلداً فيها أبداً، ومن قتل نفسه بحديدة فحديدته في يده يجأ بها في بطنه في نار جهنم خالداً مخلداً فيها أبداً) و في قول الله تعالى في سورة النساء الآية 29 :{وَلا تَقْتُلُوا أَنْفُسَكُمْ إِنَّ اللَّهَ كَانَ بِكُمْ رَحِيماً}،ف الانتحار حرام طبعا و كفر عشان انت بتقنط من رحمة ربك، بس فيه اختلاف ف حته إذا كان مريض أو لأ لأن مريض الاكتئاب غير واعي للي هو بيعمله هو مخه بيهيأله أن الدنيا سودة و ان الحل الوحيد هو الموت و هو مش عارف ليه بيعمل كدا و ليه مخه بيعمل كدا بس هو مش شايف غير الحل ده، لأن هو مش هيقدر يهرب من مخه و هو مش عارف سبب حزنه الشديد ايه ولا عارف يخرج منه، متقعدش تقول هو مش فارق معاه أهله أو هو هيموت كافر لأن هو مش فارق معاه هو عايز يرتاح!
___________________________________________
"عند لحظة الانتحار شعرت أن جميع مشاكلي قد انتهت.. الا مشكله واحدة، هي أنني فكرت في الانتحار" دي جملة شخص قالها بعد ما انقذوه من الموت، الانتحار مش حل زي ما انت فاكر، انت بإقدامك على خطوة زي دي انت بتخسر دنيتك و اخرتك و انت مش متخيل كم الناس اللي هتزعل بسبب اننا خسرناك.
صدقني انت مهم ف حياتنا و اكيد هنزعل لو فكرت ف حاجة زي دي، ف لو ده شاغل بالك ارجوك شيل الفكرة دي من دماغك، ممكن تفضفض لحد بتحبه و متأكد انه هيفهمك أو لو مش لاقي الشخص و مش قادر تتغاضي الفكرة دي و واخدة كل وقتك ممكن تلجأ لدكتور و ده مش عيب خالص بالعكس انت بتعمل خطوة صح جدا.
___________________________________________
لو انت عندك شخص حاسس انه بيفكر ف ده و مقبل عليه ارجوك أقف جمبه و حاول تفهم مشاكله و تستوعبه،هو مش محتاج اكتر من دعم و احتواء و انك تفهمه، على فكرة مش لازم نستني لغايت ما شخص يوصل للمرحلة دي عشان نقف جمبه حاولوا نفضل جمب بعض و نقف جمب بعض ممكن شخص يبقا جمبك النهاردة ميبقاش جمبك بكرة.
__________________________________________
آخر كلمة عايزة اقولها انت مهم و مميز، متصدقش اي حد يقلك حاجة غير كدا انت مفيش منك اتنين، احيانا بيمر علينا فترات حزن و خنقة بس ده ميخلكش تلجأ ل حل زي الانتحار، احنا كدا بنفقد شخص مستحيل نعوضه تاني،ولو متدايق لدرجة انك مش قادر تتجاوز و ده الحل الوحيد ف ممكن نتكلم و نتناقش بس ارجوك ارجع عن قرار زي ده انت غالي اوي و مش سهل علينا خسارة حد جميل زيك، و لو محتاج حد تفضفض معاه و يساعدك انك تخرج من ده فأعتقد اني لو عرفت اساعد و نوصل ل حل سوا هبقا مبسوطة جدا..