#بقايا_رماد
#جميلة_جاسم
ماهن سوا حتي صوابع يدك
والناس تختلف راهي اطوار اطوار
تلقى اللي مشتاقلك ويودك
وتلقى اللي ما يحبلك تدكار
وتلقى اللي وقت الملام ايعدك
يوقف معاك لحيرتك يحتار
وتلقى اللي تحتاجله ويردك
لصفار جمعهن ديمه يكون أصفار
صاحب اللي وده امواتي ودك
واترك اللي للمنفعه دوار
ربيعة... مصدومه من بوي اول مرة ييضربني ايدي علي وجهي ..حسيت علي فتحت الباب وحناي فاطمه طلعت ....
مشيت عقلت وراها وبوي ايعارك يبي المسجل شن بنقوله جابهولي عماد يااربي سااعدني اني ربطت اعليه في شاربة وحطيته في الدولاب ...
جت من وراه عمتي انتصار ...وقفت
انتصار....شفت ياعلي مش قتلك بنتك تبي رباية ..وونته البارح تقولي نبي اندير تليفون في الحوش كان تسمع حتي التلفزيون نحييه هيا انتينا ويتفرجو علي التلفزيون هذا الي فسدهم عطيها لواحد من خوتك ورييح راسك ...
ردت عليها حناي فاطمه وهيا شادتني مع ايدي واني وراها ندعي ما يعرفش بوي بشواريط يااارب
فاطمة...عييب ياعلي هذي امانة المرحومة هكي تضربها اني لو مش بندير لمشاكل نقيمهم ونمشي بنياتي هذو قطعه من روحي ومن روح ذهيبة....كيف يعلي هكي اني مرتاحه لانك معاهم وقلت هذا بووهم ويحب امهم بخاف الله فييهم
شن ريت منها البنية شن دايرة زيها زي بنات جيلها تسمع في شاريط اني جيبتهولها كانت امها تحبه وتسمع فييه وبعدين لا دارت العيب ولا دارت العار...
علي....اني ياحاجة مقالي حد انتي اهني جيت تعبان من الشغل وتزيدني انتصار قالت من عماد هذا كله
فاطمه....لا عمااااد لا ناااصر عماد صاحب سالم لو سالم عافن عماد عاافن
ردت عليها عمتي انتصار ..
انتصاار....يممة يمممه من الكذب تيي عيب اعليك ياحاجه كبيرة راه اني بعيني شفتها في السقيفة عطاها شاريط ورقة معاه...
ومرة لقيتهم تحت السدة مقعمزين هذي مش اول مرة ولا اخر مرة ...من حياة امها في لعيااد ديما معااه شن منفهمش اني في الدرووب ...
علي صوتهم خش سااالم وقف في النص وبوي متحشم من حنينه فاطمه يحترمها ويحبها ولانه يحب امي ميقدرش يزعلها....
سالم...شن صاااير عقابات الليل شنو فيه
علي...اختك عندها مسجل وشاريط وعمتك شابحة عمااد الزفت هذا هو عطاهملها
سالم...المسجل متاعي اني خديته منه والشواريط ليا وعطيتهم لعماد قتله مدهم لربيعه من الفم ...
وين المشكله في الموضوع...بعدين احني خلاااص مش في السبعين ولا التمانيين احني في التسعيين الناس بدت تطلع وتمشي وتاخد في سيارات واحني قعدين حتي مسجل وتليفون مافيش يابوي.
أنت تقرأ
بقايا رماد
ChickLitبين احدات تمضي واخرى تعاد ...بين جيل راحل وجيل يأتي ....ناري تصبح رمااد وجمري يصبح هبااااء منثور ...واعيش بين رماد السنين وناار الالم.... قصة جديدة بعنوان بقايا رماد 1997 بقلمي انا الكاتبة جميلة جاسم
