بقايا رماد

40 والاخير

#بقايا_رماد_الجزء_الثاني

#جميلة_جاسم

ما حــال يبقي علي حال.. وكل شي عنده نهايه
بو مـــال يصبح بلا مال..  والفقير يلبس عبايه
والعيـال ايجيبو اعيال .. وكل حد يمشي ابرايه
تضعف وكـل شي ينشال ..  منك اترد للــبـدايـه
وعيونك بالدمع تنهال.. وتذكر اذنوب او خطايه
وكل شي عنده اجال .. وتضل سطر في حكايه

كان كتبت سعاد مرة تانية ديرولي بلوك من عندكم وارتاحو ولا معش تقرولي 🤭🤭🤭

____________

ربيعة.... رقدت الصغار ..وكلمت عماد قالي تعبت اليوم بنرقد وغدوة نجيكم قبل نبيه يبات معانا  الشقة بعيدة علي سكن حوش حناي...

طلعت بنشوف جليلة وشهاب عطلو. ...فتحت الباب لقيت جليلة بروحها مقعمزة وشهاب مهناش...قتلها

شن اديري جليلة......التفتت لقيت عيونها حمر....

مشيت مخلوعه وقفت قدامها خييرك شن صااير

جليلة...مش عارفة علاش ديما في حاجة مخليتني نعكر مزاجي...ربيعة تخيلي تهاني الكلبة باعتة واحد وفتحت موضوع الصور من جديد

ربيعة...اي صور  جليلة

جليلة...الي قتلك عليهم ربيعة لما توفت جداي مش قتلك...تهاني مصورتني وتبعت في صوري اني للشباب الي تكلم فيهم

ربيعة...حييي اعليينا توا شبحهم شهاب قصدك ولا كييف  الفجي فيها هالحيوانه

جليلة...مش عارفة من باعتة وشبحهم لشهاب في القهوة

ربيعة....وشهاب شن قالك عصب وصدق ولا شنو

جليلة...لالا شن يصدق عارفني مستحيل نبعت صوري..وبعدين اني في صورة راقدة علي مندار في حوش بارقة زمان مش اني مصورة في فرق

ربيعة....باهي كيف ماقلتيش عليهم لشهاب ولا اقل شي حتي سالم..
اني نسيتهم والله ماجوش في بالي بكل ..

جليلة....ان شاءالله ياااااارب نشبح فيها يوووم مفضوحة فضيحة لا تقرا لا تكتب ياااارب

ربيعة....توكلي علي ربي  هذي اعراض عالم مش حاجة ساهلة ربي يعااقب مش احني ...وخشي ارقدي وراك فاتحه غدوة

جليلة....هو قعدت فيها فاتحة....
خشيت لقيت حناي راقدة وتسبح بسبحتها...مشيت غسلت وجهي وربيعة تكلم في عماد اشرتلي قتلي نقوله ...

قتلها قولي ...اقل شي يمشيلا ايدير شي ولا يضرب واحد نقعد سنة ونص تانيات نستنى

رقدت ونسمع في ربيعة تكلم وتهدرز مع عماد وتضحك....توا كنا في الاعياد في حساسية بينهم في حاجة خلتهم يبعدو علي بعضهم ورجع الحب لطريق.ط سبحان الله..

نضت الصبح علي صوت حناي ادير في الشاهي والصنة الدحي بطماطم والفلفل...بنة تاانية عندها مستحيل تاكلها عند غيرها ..