دارت الدنيا لتدق طبول قلبي

البارت الثاني

ﺁﺧﺒﺮﺗﻬﻢ بأﻥ ﻻ ﻳﻌﻠﻘﻮا ﺁﻣﺎﻟﻬﻢ ﺑـ ﺷﺨﺺ ﺃﻳﺎً ﻛﺎﻥ .. ﺃﺧﺒﺮﺕ ﺍﻟﺠﻤﻴﻊ الجميع ..ﻭﻧﺴﻴﺖ ﺍﻥ ﺃﺧﺒﺮ ﻧﻔﺴﻲ.

مسكين_الشمع
كل عمره حاضن خيط
مايدري اليكتله
كاعد بروحه.

-----------

( أنتهينا قبل ان نبتدأ)

طريق البصرة _بغداد

اليوم اتعس يوم يمر علية او بالأصح راح يمر علية طلعنا كلنا بسيارة وحدة متوجهين لبغداد تحديداً لبيت عمي طالب..

ليش شنو الصار ما أعرف !!
بس الأعرفه صار انقلاب جبير بحياتي على اثره تدمرت اني وصعب..

صعب؟؟؟؟
وينه ليش ماشفته ليش مادافع عن حبه ليش تخلى ليش ليش هواي عندي اسئلة !!!!

جنت نايمة وكعدت لكيت روحي مغدورة من الكل والكل متفقين علية صيحت بجيت ناشدت يا أهل الغيرة وينكم عني محد يستجيب الى أن فقدت الوعي وكعدت صرت زوجة انسان يبغضني وابغضه واليوم اخذوني لبيته غصب و تحت التهديد ..

وصلنا والساعة شارفت على ال١٢ الظهر وكفت السيارة كبال باب سجني الجديد سجن بدون اغلال لكن أغلالي من نوع ثاني اسمها القيود العرفية ..

نزلت خليت رجل بالكاع والثانية بالسيارة وارجف خوف على ذاك المذبوح العفته هناك بديرة محبتنا ..

نغتني ريا التفتت عليها ردت اضربها من كثرة الضغوط العايشتها..

ريا : شبيج ملاك انزلي اريد انزل..

خزرتها وبدون ما اجاوبها نزلت توجهت لباب بيت عمي شنو اسوي انهزم وافضحهم يستاهلون على السووه بيه لو احتفظ ببقايا سمعتي التطشرت بسبب منو ؟؟؟
ما اعرف لحد الان غموض بغموض منو وصل لبابا صعب يمي وشلون اجوي هو وعقيل مستحيل تكون صدفة لان بابا مايرجع قبل عمامي..

ماما دكت الباب طلعت عمة رشا اخت بابا نسيت اكوللكم عماتي صاروا حزب من يوم ما اريام اكتشفت خيانة زوجها وانفضح كلهن صارن ويا اختهن وابن اختهن رغم هو على باطل ولهذا السبب اريام رفضت تجي وتحضر عرسي المشؤوم كالت ملاك ما اتحمل سجاجينهم تغرز بصدري روحي واني ادعيلج بالفرج هنا...

بس يافرج اريام يافرج ولج اجيت برجلي للموت وخلص...

اباوع بالوجوه كلها تضحك بس ليش احسهم وحوش حتى ضحكاتهم قاتلة وتضرب سهام بكلبي..

شعوري بالضبط نفس اليدخل بفاتحة هذا حالي الكل يحضن ويبوس ويبارك واني جثة هامدة ما استجيب لأي احد..

ساكتة وصافنة بس روحي لايبه عليه اريده بكلبي وبعقلي وبروحي وبكل جرح بيه نزف اريده يجي و بيده يضمدهن اليه...

صاح الله أكبر صحت عليكم ان شاءالله وعلى ظلمكم النا..

ناهد : سكتي ملاك كافي يا امي لاتخزيني انتِ ناوية تخلين ابوج يذبحج لو شلون فهميني..