دارت الدنيا لتدق طبول قلبي

البارت الثالث والعشرون

الله يدري
بكلشي عشته وياك ما صار أعله نزوه
والشاهد الله ما بخلت وياك بحچايات حلوة ..
چنت أسمّيلك مساماتك وأعدهن
شهگه شهگه
وچانت الصفنة أعله وجهك هي صحوة وهي غفوة
چنت بس أنته الوحيد اليمّه أحس ما عندي قوّة!

__________________

هزيت راسي رافضة الفكرة ، عيوني امتلئت بالدموع حاولت اسيطر على نفسي وما ابجي ،،

حسيت للحظه وكأنه راح افقد الوعي اختل توازني لزمت الحايط ،

فجأة اختلط عندي الماضي والحاضر وكأن شي داخل بشي ، كمت افكر هذه حوبه صعب لو حوبتك ضيغم ، لو هذا حظي !!!!

اريد استوعب كلماته و افهم نيته شنو ، مافهمت كلامه هوسه شي ما مترابط بشي هو يحجي واني صافنه عليه مابدرت مني اي ردة فعل عدا الخدر الحسي من واقع الكلام السمعته ، انفجرت المشاعر البداخلي وعبرت عنها بدمعاتي الحارة ..

حجى بنبرة عالية ومتكبرة خلاني اندم لان بادرت ..

ضيغم : انتِ عبالج انه غبي واوكع بألاعيبج مثل كل مرة !!!..

ملاك : اني عندي الأعيب خلف الله عليك.

حجيتها واختنكت..

ضيغم : شنو كذب ؟ اذكرج كل مرة من عندج مصلحة ويايه تتوددين و اصير ضيغم الرجل الشهم المثالي الي ينقذج بأول وكعة ،تكولين ليش اشيل هم وهو موجود موصح !!

ملاك : اني مو مجبرة اجاوب على فرضياتك وامشي وره احاسيسك ، حبيت اصلح علاقتنا وياريت ما فكرت من الأساس..

تقرب مني لزم ايدي بقبضة ايديه ورفعها فوك راسي ثبتها على الحايط وصار يتفحص ملامحي بنظرات ذابله..

ملاك : شبيك ايدي اذيتني..

ضيغم : وين تريدين توصلين وياي على شنو ناويه؟؟

ملاك : انت صدك تحجي .؟

ضيغم : تركيبتج شنو ، شو من اقترب يمج تحسسيني بكرهج وكأنما انه مرض جسدي وتريدين تتخلصين مني ، ابتعد واعاملج بالمثل تجين تتودديلي ..

ملاك : حبيت اصلح العلاقة وانسى الصار كله اعتبرني ما بادرت..

ضيغم : احنا باجر منفصلين خلينا نتمم علاقتنا اول وتالي انحسب عليج زواج..

جان يحجي وعيونه تاكل تفاصيلي وبنفس الوقت حسيت بيها حقد مو طبيعي كأنما يريد يرجعلي المواقف الصديته بيها او يحسسني بنفس الاحساس الخليته يعيشه ..

درت وجهي عنه قرب انفه بأتجاه ركبتي  كشت نفسي ميلت راسي على  كتفي ..

ميل راسه ويه ميلان راسي رفع حاجبه ، قرب شفته من اذني وهمس.

ضيغم : مادام جنتي متحضرتلي الليلة واجيتيني برجلج ماراح افوتها لأن متأكد انتِ تريديني مثلما انه رايدج..