دارت الدنيا لتدق طبول قلبي

البارت الواحد والعشرون

وانت بغيبتك طاريي مامر بيك؟
وكلبك مايكلك وين صار فلان؟

ضميرك ماكعد ماشبع من النوم
ماشافتني عينك من رحت زعلان؟

عليك اتلفتت لفتت مهفه ابأيد
شايب سولة عنده حتى اذا بردان؟

وموهسه السهر ذبل سواد العين
من يوم العرفتك وانه ما حلمان

انا سهرانلك من يوم ذاك اليوم
لمن كتلي شسمك وانه كلت فلان.

_________

ملاك : هو يجي لو انت تروح تجيبه؟

ضيغم : اي انه رايح بس احتمال نتأخر  ويه المغرب نوصل..

ملاك : هاا لعد سويت اكل من الصبح عبالي هسه راح يجي.

ضيغم : خليه ماعليه شي احتمال نوصل اقرب من الوقت الكلتلج عليه.

ملاك : ماشي..

هنا هو يحجي ومدنك يلبس بحذائه ، بدون ما يباوع بعيني ، حتى نظرات عيونا صار التقائها صدفة ،

والأهمال بالعلاقة سيد الموقف ،

صار النا اشهر ماحاجين سويه ولا كاعدين بمكان واحد ، عكس قبل تجمعنا سالفة ومرات ضحكة ،

وحتى نتشارك بالسفرة بس كل واحد اكله شكل ، هسه لا انقطع كل شي بينا ، برود وفتور وتجاهل مو طبيعي يسود العلاقة سواء مني او منه ، بس الأكثر منه هو..

طلع بدون حتى ما يكول مع السلامة ولا ديري بالج على نفسج ،

بهذه الاشهر سافر ٣ مرات وبهذه ال٣ مرات يخلي فلوس فوك الميز ويطلع بدون ما ينطيني خبر بسفرته او بموعد رجوعه ،

المكالمات شبه انقطعت بينا ، صار ما يسأل عني و من يوصل ما يبلغني ولا اني اتصل بيه ، ومن يرجع كأنما جان بالشغل الصبح ورجع المغرب ..

اعصابي تعبت والحياة صارت لاتطاق لابيه اصلحها ولابيه اعاتب  ليش اعاتب؟

واني دفعته لهذا الشي ، مكالماته رجعت بوجودي وعدمه نفس الشي ما يهتم لمشاعري مثل بداية زواجنا وكأنما رجعنا لنقطة الصفر ،

بس الفرق صرت شي ثكيل على كلبه ويتمنى يخلص مني، بس منتظر فرصة او منتظر مني اني الابادر واطلب الأنفصال ..

الصراحة احجيها رغم هذا الصار كله بس اريح اليه من بيت اهلي وهوستهم وتحكمهم بيه صار عندي بيت مستقل وحياة هادئة رغم الملل اليحيطها..

فكرت بعقل كلت اذا رجعت مستحيل راح يجي يوم وننجمع اني وصعب، ليش اجازف برجوعي علمود شي مأيسه منه وحتى خيط امل ماعندي ..

وكالعادة من ماعندي شي اكعد اتفرج تلفزيون او اكلب بالموبايل مالتي ، بعدها خابرت نغم واريام سولفت وياهم وسديته سألت على اهلي واحد واحد بس ما اشتهي احجي وياهم..