دارت الدنيا لتدق طبول قلبي

البارت العشرون

غيرك جانت امنيته احبه وافتهم قصتة
كامل جان مابيه عيب بس مشكلته مو انت🤎
________

لا تحكم على شخصيتي اذا كنت تجلس في مكانك ولم تعيش جزءاً من اَلمي ولم تشاهد احتراق دمي وهلاك روحي وغياب ابتسامتي وحجم الجحيم بداخلي ، لا تتحدث عني وانت لم تعيش تخبطاتي بين فكري وقلبي ، لا تبدي رأيك اذا ماكنت بنفس الموقف ونفس الشعور..

التأقلم مع حياة مفروضة مع انفس غريبة هذا الألم بحد ذاته..

اسمي ملاك والملاك هو مخلوق نوراني يعبد الله ولايعصيه في امر ما ، وهل انا ملاك منزل لم يخطأ ؟ اكيد لا ..

كلنا او اغلبنا نمر بأخطاء ونرجع نندم ونصصحها او نبتعد عنها ..

وهذا الصار ويايه خطأت من نطيت فرصه لصعب واني على ذمه رجال المفروض ما اجازف الى ان ينتهي كل شي واصير حرة ،

حرة ؟؟؟ حلم اي صار حلم بالنسبة اليه ..

وصار لازم اتأقلم خصوصاً بعد الأحداث الجديدة الصارت..

بعد مرور فترة من الزمن ...

بيوم من الأيام جان ضيغم متغيب عن البيت صارله اكثر من ٣ ايام ، على اساس عنده دورة ولازم يحضرها ، وهاي كل شهر اني اسبوع اظل وحدي بالبيت مرات اسبوعين ضجت والملل اكلني اكل ، ردت اغير من حياتي اطلع اشوف شغل اتعلم لغة اي شي المهم يطلعني من المود الأني بيه..

قبلها قررت اسوي فيس جديد ، لان القديم جنت ضايفه كل العشيرة بيه ، لغيته وحذفت البرنامج بس من الفراغ العندي سويت واحد وضفت اخواتي ، نغم واريام وريا ، واكيد ما نسيت العشق نرمان اقرب صديقة اليه كاتمة اسراري والصدر الرحب اليسمعني بكل وقت بدون ما تمل ولا تضجر مني بحيث اطول ساعات وهي نفس اندفاعها ونفس حماسها ويايه...

المهم بعد ما سويت الفيس بأسبوع ضبط ، وصلتني رسائل على الماسنجر ، دخلت على طلبات المراسلة حساب بنيه دازتلي مجموعة صور ، دخلت عليهن ، انصدمت وعطت بصوت عالي ..

ملاك : لا مستحيل كذب..

ظليت اكلب بالصور وعيوني ماراضيه تصدك الاشوفه ..

صعب بملهى ليلي ويكيت على النسوان ، مستحيل لالا معقولة انت هيج واني جنت مخدوعة بيك ، لو هسه بالجديد هيج صرت..

اكلب بالصور كل شويه ارجع عليهن واقرب على وجها ، عاكد حاجبه والجكارة بحلكه اعرف نظراته هاي حافظتها حفظ ، من شي ما يعجبه هيج يباوع ، اذا ماعاجبك المكان ليش انظميت اله ولوثت نفسك ..

دموعي صارت تنزل من وحدها ورجفه بكلبي مو طبيعية ،  اغار عليه اي اغار ليش اكذب حسيت بلحظة قلبي يريد يوكف..

شايف من تفارك وانت لسه تغار
ويصفن بيك لونك والهضم يحتار
من يروح منك وانت بعدك حار ..
( محمد الطالقاني )