دارت الدنيا لتدق طبول قلبي

بارت الأربعون..

ضيغم يگول
تره صحتي عليله وگلبي مو زين!!

ملاك تگول
گلي وين اليوجعك ؟
خل أچفي صحتي .

هجان يكول
لو ما ابوها وياي ينزع كبرته
چا هسه عدنه وليد توجع ضربته

عبيرادريس🤎
_______________

(عناق يتبعه فراق)

من بعد ما كال جملته الاخيرة ، ثارت ثائرته وصار يصيح ويحجي حجي مو منطقي ولا يمت للواقع بصلة كلام مغلف بمرارة ويمهد للهجران الابدي والوحدة الموحشة  ، رجعني بكلامه للماضي لأول يوم يغصبوني بيه على زواجي منه ، وهسه هم لازم اترك حياتي وابدي من جديد ...

اي شخص قريب من عندنا وشهد على حالتنا اجزم يسمع صدى ألمنا ويحس بقهرنا خصوصاً بهذه اللحضات..

هجوميته بالكلام مقابل سكوتي ودمعتي معادلة صعبة ، اريد ادافع عن نفسي ما ينطيني مجال اكتفيت بالسكوت وعيني تترقب قساوة ملامحه شوكت ينهي هذه المهزله..

من هذا الموقف رسمت خط للنهاية وحسيت رحلتنا لهنا و انتهت  بهذه المحطة المؤلمة..

همست اريد افهمه اريد ينطيني مجال ما يسمعني صوته عالي رحت وكفت كباله حتى ينتبه لوجودي و يسمع صوتي ..

ملاك : بس اسمعني الله يخليك والله اني ما خنتك والله مو خاينة الله يخليك مره وحده خليني افهمك..

حجه بلغة واضحة وصريحة مو مثل قبل شويه جان كلامه عبارة عن تلميحات والغاز استقرت نظراته المتشتته على وجهي وهمس بتعب عاكد حاجبه..

ضيغم : تريديني اصدك هجان مايوم اجاج شارب وتحارش بيج وانتِ فسحتيله المجال ؟

فتحت عيني بهتت بوجهه تملكني شعور الغضب والرهبة موقف اقل ما اوصفه مأساوي بالنسبة لعلاقتنا وممكن بجرة قلم ينهي كلشي ..

ملاك : الكاعد تحجيه مجرد وهم ماصار هيج شي بينا

هز راسه ضحك مستهزء واردف ..

ضيغم : لج صعب انه اعرفه ورابي وياه تعلميني بيه مستحيل يعوف بنيه بدون مايسويلها شي لو تحجين للصبح ما تقنعيني علاقتكم شريفة ونظيفة..

رفعت عيني وخليتها بعيونه متأسفة للحال الوصلنا اله نزلت دمعتي وطلع صوت من حنجرتي يشبه النحيب ..

ملاك : والله اني مو هيج وراح ييجي يوم تندم على تفكيرك بيه بهذه الطريقة..

التفتت متوجهه للبيت بخطوات واسعة مبتعدة عنه ، تصاعد الغضب عنده عاط اوكفي ، ماكدرت التفت لان اعرف الوضع راح يتأزم اكثر والسمعته مو قليل ، حسيت بمرارة بحلكي سمعت صوت العربانة يمشي سريع يريد يوصلني خففت من مشيتي شبه وكفت التفتت عليه لكيته صاير نار وعيونه تجدح ، شكله غريب كأنما تسيره كل شياطين الغضب